పవిత్ర స్థలాల్లో చిత్రీకరణలపై ఆంక్షలు

చర్యలు తీసుకోనున్న మధ్యప్రదేశ్‌ ప్రభుత్వం

భోపాల్‌: రాష్ట్రంలోని పవిత్రస్థలాలు, ఆలయాల్లో జరిగే షూటింగులను వీడియో తీయించాలని మధ్యప్రదేశ్‌ ప్రభుత్వం మంగళవారం అధికారులను ఆదేశించింది. పవిత్రస్థలాల్లో అభ్యంతరకర సన్నివేశాల చిత్రీకరణను కట్టడి చేసేందుకు ఈ పద్ధతి ఉపయోగపడుతుందని ఆ రాష్ట్ర‌ హోం మంత్రి నరోత్తమ్‌ మిశ్రా పేర్కొన్నారు. నిబంధనలు ఉల్లంఘించిన పక్షంలో సంబంధిత డైరెక్టర్‌, నిర్మాతలపై చర్యలు తీసుకుంటామన్నారు. నెట్‌ఫ్లిక్స్‌లో ప్రదర్శితమవుతున్న ‘ఎ సూటబుల్‌ బాయ్‌’ వెబ్‌సిరీస్‌లో ఆలయంలో చిత్రీకరించిన కొన్ని అభ్యంతరకర సన్నివేశాలు ఉన్నాయి.  ఈ సన్నివేశాలు భక్తుల మనోభావాలు దెబ్బతీసేలా ఉన్నాయని భాజపా నాయకులు ఆందోళన వ్యక్తం చేసిన విషయం తెలిసిందే. ఈ మేరకు భాజపా యువమోర్చా జాతీయ అధ్యక్షుడు గౌరవ్‌ తివారీ ఫిర్యాదు చేశారు.  ప్రభుత్వం ఈ ఫిర్యాదుపై తక్షణం స్పందించింది. నెట్‌ఫ్లిక్స్‌ ప్రతినిధులు మోనికా షెర్గిల్‌, అంబికా ఖురానాపై సోమవారం ఎఫ్‌ఐఆర్‌ నమోదు చేసినట్లు నరోత్తమ్‌ మిశ్రా ఒక వీడియో ప్రకటనలో తెలిపారు.
ఈ వెబ్‌సిరీస్‌లో ఆరు భాగాలుండగా ప్రముఖ డైరక్టర్‌ మీరా నాయర్‌ దర్శకత్వం వహించారు. ఆమె ఇంతకు ముందు ‘సలామ్‌ బాంబే’, ‘మాన్‌సూన్‌ వెడ్డింగ్’, ‘ది నేమ్‌ సేక్‌’ వంటి చిత్రాలతో విమర్శకుల ప్రశంసలు అందుకున్నారు.