ఆ ఊరిలో రెండంతస్తుల ఇళ్లు ఉండవు..

బెళగావి :  మన దేశంలో దేవాలయాలది ప్రత్యేక స్థానం. ప్రత్యేకించి దక్షిణ భారతంలో  నిర్మించే గోపురాలకూ ఎంతో ప్రాధాన్యత ఉంటుంది. వాటి కంటే ఎత్తుగా లేదా సమానంగా ఇళ్లు నిర్మించకూడదన్నది ఓ ఆచారం. దశాబ్దాల నాటి ఈ కట్టుబాటును ఇప్పటికీ ఆచరిస్తోంది కోహల్లీ గ్రామం. కర్ణాటకలోని బెళగావి జిల్లాలో ఉందీ ఈ ఊరు. గ్రామంలో ఉన్న సంగమేశ్వర ఆలయ గోపురమే ఎత్తయిన నిర్మాణంగా ఉండాలన్నది ఆ ఊరి ప్రజల నిర్ణయం. అందుకోసం గ్రామంలో రెండంతస్తుల ఇళ్ల నిర్మాణం పై నిషేధం విధించారు. గ్రామస్థులు తీసుకున్న ఈ నిర్ణయం కొత్తదేమి కాదు.  అయినప్పటికీ ఈ నిబంధనను తు.చా తప్పకుండా పాటిస్తూ దేవుడిపై ఉన్న విశ్వాసాన్ని చాటుతున్నారు ఆ ఊరి ప్రజలు. అంతేకాదు.. సంగమేశ్వర ఆలయానికి శ్వేతవర్ణం మాత్రమే వేస్తారు. ఆలయం వెలుపల వివాహాలను అనుమతించరు.