close

తాజా వార్తలు

అప్పుడు నేనూ సంతోషించా, కానీ..: ఆర్కే

అమరావతి: రాజధానిగా అమరావతిని ప్రకటించినప్పుడు ఈ ప్రాంత వాసిగా తానూ సంతోషించానని మంగళగిరి ఎమ్మెల్యే ఆళ్ల రామకృష్ణారెడ్డి అన్నారు. కానీ, ఇక్కడ జరిగింది తెలుసుకుని మోసపోయామని గ్రహించానని చెప్పారు. రాజధానుల అంశంపై ఆయన అసెంబ్లీలో మాట్లాడుతూ.. ‘‘రాజధాని భూముల కొనుగోలు వ్యవహారంలో జరిగిన అవినీతిని ప్రతిపక్ష నేతగా ఉన్నప్పుడే జగన్‌ అసెంబ్లీలో బయటపెట్టారు. ఇన్‌సైడర్‌ ట్రేడింగ్‌ ద్వారా జరిగిన రూ.వేల కోట్ల అవినీతిని బయటకు రానీయకుండా గత ప్రభుత్వం.. జగన్‌, వైకాపా గొంతును నొక్కేసింది. తాడికొండ, మంగళగిరి నియోజకవర్గాల్లో 29 గ్రామాలున్నాయి. ఈ ప్రాంతంలో రాజధాని అని చెప్పిన రోజు సంతోషించిన వారిలో నేనూ ఒకడిని. వాస్తవాలు తెలుసుకునే సరికి మేం మోసపోయాం అని గ్రహించాం. రాజధానికి 30వేల ఎకరాలు కావాలంటే సమర్థించాం.. కానీ అది ప్రభుత్వ భూమి అయ్యుండాలని నాడు జగన్‌ చెప్పారు. కానీ దాన్ని వక్రీకరించి నాడు జగన్‌ అంగీకరించి నేడు వ్యతిరేకిస్తున్నారంటూ చంద్రబాబు అసత్యాలు ప్రచారం చేస్తున్నారు’’ అని అన్నారు.

‘‘గత ఐదేళ్లలో తాడికొండ, మంగళగిరి ప్రాంతాల్లో రైతులను చంద్రబాబు కంటిమీద కునుకుమీద లేకుండా చేశారు. కౌలు రైతు వ్యవస్థను నాశనం చేశారు. రైతు కూలీలు రోడ్డున పడ్డారు. పర్యావరణ చట్టానికి ఈ ప్రాంతం వ్యతిరేకమని తెలిసినా ఈ ప్రాంతాన్ని నాటి ముఖ్యమంత్రి చంద్రబాబు ఎంపిక చేసుకున్నారు. కానీ నేడు అందరి అనుమతితోనే మూడు రాజధానులు ఏర్పాటు చేస్తున్నారు. దీని కోసం మొత్తం మూడు కమిటీలు వేశారు. రైతుల కౌలును పెంచుతూ నిర్ణయం తీసుకున్నారు. కౌలు రైతుల గురించి కూడా ఆలోచన చేశారు. గ్రామ సచివాలయాల ద్వారా ప్రభుత్వాన్నే ప్రజల ముందుంచాం. అలాంటప్పుడు సెక్రటేరియట్‌ ఎక్కడుంటే ఏమిటి? హైకోర్టు ఎక్కడుంటే ఏమిటి? నెల రోజుల నుంచి చంద్రబాబు గగ్గోలు పెడుతున్నారు. ఎక్కడ ఇన్‌సైడర్‌ ట్రేడింగ్‌ బయటపడుతోందనని భయపడుతున్నారు. ఆయన బినామీలను కాపాడుకోవడానికే ఈ ధర్నాలు, నిరసనలు చేపడుతున్నారు. ప్రజలు రాకపోవడంతో బయట నుంచి తీసుకొచ్చి ఆందోళనలు చేయిస్తున్నారు’’ అని ఆళ్ల రామకృష్ణారెడ్డి ఆరోపించారు.


Tags :

రాజకీయం

జనరల్‌

సినిమా

క్రైమ్

స్పోర్ట్స్

బిజినెస్‌

జాతీయ-అంతర్జాతీయ

జిల్లా వార్తలు

దేవతార్చన

+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.