close

తాజా వార్తలు

Updated : 07/04/2021 16:46 IST
Facebook Share Twitter Share WhatsApp Share Telegram Share

ఏపీలో పరిషత్‌ ఎన్నికలకు గ్రీన్‌ సిగ్నల్‌

అమరావతి: ఏపీలో పరిషత్‌ ఎన్నికలపై ఉత్కంఠ వీడింది. రాష్ట్రంలో జడ్పీటీసీ, ఎంపీటీసీ ఎన్నికల ప్రక్రియను నిలిపేస్తూ హైకోర్టు సింగిల్‌ జడ్జి ఇచ్చిన ఉత్తర్వులను డివిజన్‌ బెంచ్‌ కొట్టేసింది.షెడ్యూల్ ప్రకారం ఎన్నికలు నిర్వహించుకోవచ్చని పేర్కొంది. తదుపరి ఉత్తర్వులు వచ్చే వరకు ఫలితాలను ప్రకటించవద్దని ఎస్‌ఈసీని హైకోర్టు ఆదేశించింది. 

ఎన్నికల ప్రక్రియను నిలిపేస్తూ హైకోర్టు సింగిల్‌ జడ్జి మంగళవారం ఇచ్చిన ఉత్తర్వులపై రాష్ట్ర ఎన్నికల సంఘం (ఎస్‌ఈసీ) కార్యదర్శి కన్నబాబు ధర్మాసనం ముందు అప్పీల్‌ చేశారు. ఈ పిటిషన్‌పై హైకోర్టులో డివిజన్‌ బెంచ్‌ ఎదుట వాదనలు జరిగాయి. ఎస్‌ఈసీ తరపున సీనియర్‌ న్యాయవాది సీవీ మోహన్‌రెడ్డి వాదనలు వినిపించారు. వర్ల రామయ్య తెదేపా తరఫున పిటిషన్‌ వేయలేదని, వ్యక్తిగతంగా రిట్‌ పిటిషన్‌ వేయకూడదని సీవీ మోహన్‌రెడ్డి ధర్మాసనం దృష్టికి తెచ్చారు. 28 రోజులు కోడ్‌ ఉండాలనేది సుప్రీం ప్రత్యేక సందర్భంలో ఇచ్చిందని పేర్కొన్నారు. కోడ్‌ నిబంధన ఈ ఎన్నికలకు వర్తింప జేయాల్సిన అవసరం లేదన్నారు. పిటిషన్‌లో సరైన వివరాలు లేవని ఎస్‌ఈసీపై హైకోర్టు అసహనం వ్యక్తం చేసింది. సరైన పేపర్లతో మధ్యాహ్నం 12 గంటలకు కోర్టు ముందుకు రావాలని ఎస్‌ఈసీ తరఫు న్యాయవాదికి ధర్మాసనం ఆదేశించింది. మధ్యాహ్నం 12గంటల తర్వాత మరోసారి వాదనలు విన్న ధర్మాసనం.. సింగిల్‌ జడ్జి ఉత్తర్వులు కొట్టివేస్తూ తీర్పు వెలువరించింది.

ఏర్పాట్లు దాదాపు పూర్తి..

పరిషత్‌ ఎన్నికలపై హైకోర్టు తీర్పు నేపథ్యంలో రేపటి పోలింగ్‌కు అధికార యంత్రాంగం ఏర్పాట్లు దాదాపు పూర్తి చేసింది. ఇప్పటికే పోలింగ్‌ సిబ్బంది ఎన్నికల సామగ్రితో గ్రామాలకు తరలి వెళ్లారు. రాష్ట్రవ్యాప్తంగా 515 జడ్పీటీసీ, 7.220 ఎంపీటీసీ స్థానాల్లో ఎన్నికల పోలింగ్‌ జరగనుంది. జడ్పీటీసీ స్థానాల్లో 2,058 మంది, ఎంపీటీసీ స్థానాల్లో 18,782 మంది అభ్యర్థులు బరిలో ఉన్నారు. రాష్ట్రంలోని 2,46,71,002 మంది ఓటర్లు తమ ఓటు హక్కును వినియోగించుకోనున్నారు. పరిషత్‌ ఎన్నికల కోసం 27,751 పోలింగ్‌ కేంద్రాలను ఏర్పాటు చేయగా.. వీటిలో 6,492 సమస్యాత్మక, 6,314 అత్యంత సమస్యాత్మక పోలింగ్‌ కేంద్రాలుగా గుర్తించారు. 

ఇవీ చదవండి


Tags :

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని