close
Array ( ) 1

తాజా వార్తలు

Updated : 31/03/2020 00:27 IST
Facebook Share Twitter Share WhatsApp Share Telegram Share

అగ్గిమీద గబ్బిలం కావొద్దు

ఎందుకంటే..

గబ్బిలం కనిపిస్తే చాలామందికి చిరాకు!

అది ఇంటి చుట్టూ చక్కర్లు కొడుతోందంటే.. అపశకునంగా భావిస్తారు!!

ఇవి చాలవన్నట్టు కరోనా ఎక్కడి నుంచి వచ్చింది? గబ్బిలాల నుంచేనని కొందరి సమాధానం. అందులో నిజమెంతో తేలకముందే.. గబ్బిలాలపై అగ్గిమీద గుగ్గిలం అవుతున్నారు! ఆమె మాత్రం ఈ నిశాచర జీవులపై కనికరం చూపుతున్నారు. మనిషి మనుగడకు అవెలా తోడ్పడుతున్నాయో నిగ్గు తేలుస్తున్నారు. గబ్బిలాల వల్ల నేరుగా మనిషికి వైరస్‌లు రావని చెబుతున్నారు ఉస్మానియా విశ్వవిద్యాలయ పోస్టు డాక్టోరల్‌ పరిశోధకురాలు భార్గవి శ్రీనివాసులు. 18 ఏళ్లుగా తన భర్త శ్రీనివాసులుతో కలిసి చేసిన ఆమె పరిశోధనలు, తన అనుభవాలను వసుంధరతో పంచుకున్నారు.

ప్పుడు అంతటా వినిపిస్తున్న మాట సామాజిక దూరం. ఒకరికొకరు కనీసం మీటరు దూరం పాటించాలని చెబుతున్నారు. కరోనా అనుమానితులు స్వీయనిర్బంధంలో ఉండాలని సూచిస్తున్నారు. ప్రభుత్వాలు చెబుతున్నా.. సెలబ్రిటీలు వేడుకుంటున్నా.. చాలామంది పట్టించుకోవడం లేదు. అదే గబ్బిలాలు.. ఎవరో చెప్పినట్టు ఈ విషయంలో ఎంతో బాధ్యతతో మెలుగుతాయంటారు భార్గవి. ‘గబ్బిలాలు గుంపులు గుంపులుగా ఉంటాయని తెలుసు. కానీ, వీటిలో ఏదైనా జబ్బుపడితే గుంపు నుంచి బయటకు వచ్చేస్తుంది. దూరంగా వెళ్లిపోతుంది. ఎక్కడో ఒంటరిగా చూరు పట్టుకొని వేలాడుతుంది. తనకొచ్చిన జబ్బు తగ్గాక గానీ మళ్లీ గుంపు జోలికి రాదు. ఇప్పుడున్న పరిస్థితుల్లో అందరూ గబ్బిలాలను ఆదర్శంగా తీసుకోవాల’ని చెబుతారామె.

కోలార్‌ కొండల్లో..

భార్గవి విద్యాభ్యాసమంతా హైదరాబాద్‌లోనే సాగింది. 2002లో ఉస్మానియా యూనివర్సిటీ నుంచి పీహెచ్‌డీ పట్టా అందుకున్నారు. పోస్ట్‌ డాక్టోరల్‌ పరిశోధకురాలిగా పనిచేస్తున్నారు. భర్త శ్రీనివాసులు ఉస్మానియాలో జువాలజీ విభాగాధిపతి. ఆయన గబ్బిలాలపై రిసెర్చ్‌ చేస్తుండేవారు. తనకూ ఆసక్తి కలిగి భర్తతో కలిసి ప్రయాణం మొదలుపెట్టారు. ‘కీటకభక్ష గబ్బిలాల జీవనం’పై మా పరిశోధన సాగింది. ఎన్నో ఏళ్లు శ్రమించాం. ఈ క్రమంలోనే కోలార్‌ లీఫ్‌ నోస్‌డ్‌ (కోలార్‌ ఆకు ముక్కు ఆకారం) జాతి గబ్బిలంపై ప్రత్యేకమైన ఆసక్తి కలిగింది. 1994 ప్రాంతంలో కర్ణాటకలో కోలార్‌ ప్రాంతంలో ఇద్దరు శాస్త్రవేత్తలు వీటిని గుర్తించారట. తర్వాత వాటి జాడ ఎవరూ కనిపెట్టలేకపోయారు. ఆ పనిని మేం భుజానికెత్తుకొన్నామ’ని చెప్పుకొచ్చారు భార్గవి.

తిరిగితే ఏం కాదు!

‘‘మనిషి తన అవసరాల కోసం ఇతర జీవుల స్థావరాల్లోకి వెళుతున్నాడు. సులువుగా దొరుకుతాయన్న ఉద్దేశంతో కొందరు గబ్బిలాలు తింటున్నారు. వాటిని కోసినప్పుడు రక్తం చిందుతుంది. అప్పటికే వాటికి ఏమైనా రుగ్మతలు, వైరస్‌లు వంటివి ఉంటే... అవి మనకూ వ్యాపిస్తాయి. అంతేతప్ప గబ్బిలం తిరిగితే వైరస్‌లు, ఇన్‌ఫెక్షన్లు రావు. సహజ ఉష్ణోగ్రతల వద్ద వైరస్‌లు వాటిపై అంతగా ప్రభావం చూపవు’’

మైనింగ్‌ పంజా..

2013 నవంబరులో నలుగురు పరిశోధక విద్యార్థులతో కలిసి వీరి పరిశోధన మొదలుపెట్టారు. కర్ణాటక కోలార్‌లోని తెరెళ్లి గ్రామానికి వెళ్లారు. గబ్బిలాలను గాలించడమే వీరి పని. ఎక్కడ ఏ గుహ కనిపించినా వెళ్లిపోయేవారు. సాధారణ జాతి గబ్బిలాలు కనిపించడం తప్ఫ. ఆకు ముక్కు రకం తారసపడలేదు. తిరుగుతూ తిరుగుతూ హనుమాన్‌హళ్లిగ్రామ సమీపంలో అరుదైన జాతి గబ్బిలాలు ఉన్నాయని తెలిసి అక్కడికి వెళ్లారు. ఊరెక్కడుందో తెలియదు. రహదారి నుంచి ఐదు కిలోమీటర్లు కాలినడకన వెళ్లారు. గుహల జాడ కనిపించలేదు. ఓ గుట్ట దగ్గర ఏదో హడావుడి! అటుగా వెళ్తుంటే ట్రాక్టర్‌ డ్రైవర్‌ ఎదురుపడ్డాడు. గుట్ట దగ్గర రెండు గుహలున్నాయని చెప్పాడు. ముందుకు కదిలారు. దూరంగా గ్రానైట్‌ మైనింగ్‌ జోరుగా సాగుతూ కనిపించింది. దగ్గరికి వెళ్లి గబ్బిలాల గురించి ఆరా తీస్తే.. వివరాలు చెప్పడం అటుంచితే.. ‘మీకిక్కడేం పన’ని వీరి మీదికొచ్చారు మైనింగ్‌ నిర్వాహకులు. తిరిగి వస్తుంటే ఓ పెద్దాయన కలిసి ఈ బృందాన్ని గబ్బిలాలున్న ప్రాంతానికి తీసుకెళ్లాడు. అక్కడే ఆకుముక్కు గబ్బిలం ఉన్నట్టు అంచనాకు వచ్చారు.

గబ్బిలాల మాంసం తీసి వేడి చేసి.. పిల్లల కాళ్లకు రాస్తే పక్షవాతం పోతుందని, వండుకుని తింటే ఆస్తమా పోతుందని.. ఇలా రకరకాల అపోహలు గ్రామీణుల్లో ప్రచారంలో ఉన్నాయి. వీటిని నమ్మి అరుదైన గబ్బిలాలను అంతమొందిస్తున్నారు. వీటిలో నిజం లేదు.

అరుదైన జాతికి అండగా..

2014 జనవరిలో మరోసారి భార్గవి బృందం హనుమాన్‌హళ్లికి వెళ్లింది. ‘ఈసారి మాకో వింత అనుభవం ఎదురైంది. రాత్రి వేళ గబ్బిలాల ఫొటోలు తీస్తుంటే.. గుట్టపై ఏదో చేస్తున్నారని గ్రామస్థులు దాడికి ప్రయత్నించారు. దూరం నుంచే వారిని గమనించి రహదారి వైపు పారిపోయి వచ్చాం. అక్కడ నిర్మాణంలో ఉన్న టోల్‌ప్లాజా దగ్గర ఆగి మేం పట్టుకున్న గబ్బిలాలను ఫొటోలు తీసి వాటిని వదిలేశాం. ఫొటోలను పరిశీస్తుండగా కోలార్‌ ఆకుముక్కు గబ్బిలాన్ని గుర్తించామ’ని చెబుతారు భార్గవి. అరుదైన గబ్బిలం జాతిని గుర్తించడమే కాదు, వాటిని కాపాడటానికి నడుం బిగించారు. అక్రమ మైనింగ్‌ ఆపడానికి కృషి చేశారు. గ్రామస్థులతో కలిసి బయోడైవర్సిటీ మేనేజ్‌మెంట్‌ కమిటీ ఏర్పాటు చేశారు. సమీప పాఠశాలలు, కళాశాలలకు వెళ్లి అవగాహన కల్పించారు. ఆకుముక్కు గబ్బిలం వంటిది ప్రపంచంలో మరెక్కడా లేదనీ, వాటిని రక్షించుకోవాలనీ ప్రచారం చేశారు. గ్రామస్థులు రంగంలోకి దిగారు. మైనింగ్‌కు వ్యతిరేకంగా పోరాడారు. చివరకు జిల్లా కలెక్టర్‌ స్పందించి.. మైనింగ్‌ ఆపేలా చర్యలు తీసుకున్నారు. 2015లో కర్ణాటక ప్రభుత్వం అక్కడ మైనింగ్‌ను నిలిపివేస్తూ ఆదేశాలిచ్చింది. మైనింగ్‌తో ఎండిపోయిన చెరువు ఇప్పుడు నీటితో కళకళలాడుతోంది. చుట్టూ గుహల్లో బిక్కుబిక్కుమంటూ కాలం గడిపిన గబ్బిలాలు ఇప్పుడు స్వేచ్ఛగా జీవిస్తున్నాయి.

దిగి వచ్చిన సర్కారు..

ఇంతటితో భార్గవి, శ్రీనివాసుల పోరాటం ఆగలేదు. అంతర్జాతీయ సంస్థ తోడ్పాటుతో సామాజిక చైతన్యం కల్పించడమే లక్ష్యంగా పలు కార్యక్రమాలు నిర్వహించారు. హనుమాన్‌హళ్లిని కన్జర్వేషన్‌ జోన్‌ కింద ప్రకటించాలని గ్రామస్థుల సంతకాలు సేకరించి కర్ణాటక బయోడైవర్సిటీ బోర్డుకు అందించారు. ‘ఆకుమక్కు జాతి గబ్బిలాలు కేవలం 250 వరకు మాత్రమే ఉన్నాయనీ, అంతరించిపోతున్న జాతిగా వీటిని గుర్తించాలని పోరాడాం. చివరికి కర్ణాటక ప్రభుత్వం స్పందించి.. గతేడాది జనవరి 10న గుహ ఉన్న ప్రాంతాన్ని కన్జర్వేషన్‌ జోన్‌గా ప్రకటిస్తూ ఉత్తర్వులు జారీ చేసింది. దీనికి ప్రత్యేకంగా రక్షణ కంచె వేసి పరిరక్షిస్తున్నారు. అలా మా పోరాటంతో అరుదైన జాతి గబ్బిలాలను సంరక్షించుకునే అవకాశం దొరికింద’ని సగర్వంగా చెబుతారు భార్గవి.

-అమరేంద్ర యార్లగడ్డ, ఈనాడు, హైదరాబాద్‌


Tags :

బిజినెస్‌

రాజకీయం

జనరల్‌

సినిమా

క్రైమ్

స్పోర్ట్స్

జాతీయ-అంతర్జాతీయ

జిల్లా వార్తలు
మరిన్ని

దేవతార్చన

+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.