close
Array ( ) 1

తాజా వార్తలు

పిల్లల భవితకు ఇద్దాం.. భరోసా

కుటుంబంలోకి పిల్లల రాకతో.. ఒక కొత్త ప్రపంచం ఏర్పడుతుంది. తల్లిదండ్రుల ప్రతి ఆలోచనా వారి చుట్టూనే తిరుగుతూ ఉంటుంది. వారికి మంచి దుస్తులు కొనే దగ్గర్నుంచి, ఏ పాఠశాలలో చేర్పించాలి.. ఏం చదివించాలి.. ఇలా ప్రతి ఒక్కటీ అత్యున్నతంగా ఉండాలని కోరుకుంటుంటారు. వారు జీవితంలో స్థిరపడేందుకు తమ శాయశక్తులా కృషి చేస్తుంటారు. ఆలోచనలు ఎలా ఉన్నా.. వాటిని ఆచరణలో నిజం చేసేందుకు మాత్రం ప్రణాళికాబద్ధంగా ముందుకు వెళ్లాల్సిందే. ఆ సంగతులేమిటో తెలుసుకుందాం! 

ల్లిదండ్రులుగా మన పిల్లలపై మనకు ఎన్నో ఆశలు, ఆకాంక్షలు ఉంటాయి. కొన్ని పరిమితుల వల్ల మనం సాధించలేనివి వారి ద్వారా తీర్చుకోవాలనే కోరికలూ ఉంటాయి. మనకు ఎదురైన ఆర్థిక కష్టాలు వారికి రాకుండా చూసుకోవాలనే తపన కనిపిస్తుంటుంది. ఉన్నత చదువులు చదివి, అత్యున్నత స్థాయుల్లో జీవించాలని భావిస్తాం. ఇలా అనుకున్నవన్నీ జరగాలంటే.. పిల్లల ప్రతి దశలోనూ ఎదురయ్యే ఆర్థిక అవసరాలపై సరైన అవగాహన ఉండాలి. వాటిని ఎలా తట్టుకోవాలనే అంచనాలు వేసుకోవాలి. పిల్లలు చిన్న వయసులో ఉన్నప్పుడే ఈ లెక్కలు చూసుకోకపోతే.. తర్వాత ఇబ్బందులు తప్పవు.

ఇప్పటి వరకూ ఇదీ లెక్క... 
పిల్లల ఉన్నత చదువులు, వారి వివాహం.. ప్రతి తల్లిదండ్రులూ ఈ రెండు విషయాల కోసమే ఎక్కువగా ఆరాటపడుతుంటారు. ఇంటర్మీడియట్‌ పూర్తయిన తర్వాత, గ్రాడ్యుయేషన్‌, పోస్ట్‌ గ్రాడ్యుయేషన్‌కు ఇప్పుడు అధికంగా ఖర్చవుతోంది. విద్యా ద్రవ్యోల్బణం రోజురోజుకూ అధికమవుతోంది. ఇది తల్లిదండ్రులను మానసికంగా ఆందోళనకు గురిచేస్తోంది. కాలేజీ ఫీజలు ఒక్కటే కాదు.. పుస్తకాలు, పరీక్ష ఫీజులు, ట్యూషన్‌, రవాణా, హాస్టల్‌లో ఉంటే ఆ వ్యయాలు, వారికి మొబైల్‌ ఫోన్లు, ల్యాప్‌టాప్‌లు.. ఇలా అనేకానేక ఖర్చులు ఉంటాయి. ఇవన్నింటి గురించి మనకు తెలిసిందే. అయినా.. వీటిని అంచనా వేయడంలో పొరపాటు చేస్తూనే ఉంటాం.

పైన చెప్పిన ఖర్చులన్నీ పరిగణనలోనికి తీసుకొని, గ్రాడ్యుయేషన్‌/ఇంజినీరింగ్‌ చదువు కోసం ఇప్పుడు రూ.8,00,000 ఖర్చవుతుందనుకుందాం. భవిష్యత్తులో ఈ ఖర్చులు ఎలా పెరుగుతాయంటే..

చూశారుగా.. ఇప్పుడు రూ.8లక్షలే అవుతుంది కదా.. అని లెక్క వేసుకుంటే.. భవిష్యత్తులో ఎంత ఇబ్బందో. అందుకే, పిల్లలు ఉన్నత చదువులకు వచ్చేనాటికి ఎంత ఖర్చవుతుందన్నదే ప్రధానంగా చూడాలి. 
ఇక పెరుగుతున్న బంగారం ధరలు కూడా మధ్యతరగతికి చుక్కలు చూపిస్తున్నాయి. పిల్లల వివాహం నాటికి బంగారం కొనడం, ఇతర ఖర్చులన్నీ కలిపి ఎంతవుతుందనే దానికి సరైన అంచనా కూడా దొరకదు. ఇప్పుడు రూ.20లక్షలు అవుతుందనుకుంటే.. పెరుగుతున్న ఖర్చులను లెక్క వేస్తూ వెళ్తే ఎంత మొత్తం అవసరం అనేది తేలుతుంది. ఇవి కచ్చితంగా కాస్త ఆందోళన కలిగించేవిగానే ఉంటాయి.

ఆధునిక కాలంలో.. ఏం అవుతోంది? 
ఎల్‌కేజీ చదువులకే రూ.50,000 నుంచి రూ.75,000 వరకూ ఖర్చవుతోంది. కొన్ని స్కూళ్లలో రూ.లక్షకు పైగానే ఫీజులున్నాయి. ప్రాథమిక విద్యా ఖర్చులతోపాటు.. సామాజిక బరువులు అంటే.. పిల్లలను సంతృప్తి పరిచేందుకూ అధిక మొత్తంలో ఖర్చు చేయాల్సి వస్తోంది. ఐదో తరగతి నుంచే ల్యాప్‌టాప్‌లు అవసరం అంటున్న కాలం ఇది. పిల్లల చదువుల ఖర్చుల కోసం కొంత మొత్తం తీసి పక్కన పెట్టే దశ నుంచి వారి చదువుల ఖర్చుకు తగ్గట్టుగా సంపాదించాల్సిన అవసరం ఏర్పడింది. 
తమ పిల్లల భవిష్యత్తును బంగారం చేయాలని ఆలోచించే తల్లిదండ్రులు.. ఈ లెక్కలను అర్థం చేసుకోవాల్సిందే. పిల్లలు పుట్టిన దగ్గర్నుంచి వారు పెరిగే క్రమంలో దశల వారీగా అయ్యే వ్యయాలకు ఏర్పాట్లు ఉండాల్సిందే.

వారి కలలకు ఆర్థిక రక్షణ.. 
ముందుగా ప్రతి తల్లిదండ్రులు చేయాల్సిన పనేమిటో తెలుసా? వారి పిల్లల కలలకు ఆర్థిక రక్షణ కల్పించడం. తామున్నా లేకున్నా పిల్లల చదువులు ఆగకూడదనే ఆలోచన ఉండాలి. కుటుంబ పెద్ద ఆ బాధ్యతలను ఎట్టి పరిస్థితుల్లో విస్మరించకూడదు. తక్కువ ప్రీమియంతో ఎక్కువ రక్షణ కల్పించే టర్మ్‌ ఇన్సూరెన్స్‌ తీసుకోవడం మేలు. రూ.7లక్షల కారు కొంటేనే దానికి రూ.18వేల వరకూ ఖర్చు చేసి బీమా తీసుకుంటాం. మరి, అమూల్యమైన మనిషికి బీమా అవసరం ఎంతగా ఉంటుందో ప్రత్యేకంగా చెప్పాలా? 35 ఏళ్ల వ్యక్తి రూ.కోటి విలువైన టర్మ్‌ పాలసీని ఎంచుకుంటే.. దాదాపు ఇంతే ప్రీమియం ఉంటుంది.

సాధారణంగా వార్షిక ఆదాయానికి కనీసం 12 రెట్ల వరకూ టర్మ్‌ పాలసీ ఉండేలా చూసుకోవడం అవసరం. ప్రతి 2-3 ఏళ్లకోసారి పాలసీ విలువను సమీక్షించుకోవాలి. దీంతోపాటు కుటుంబం అంతటికీ వర్తించేలా రూ.5లక్షల ఆరోగ్య బీమా పాలసీ తప్పనిసరి. దీంతోపాటు తీవ్ర వ్యాధుల బారినపడినప్పుడు ఆర్థికంగా రక్షణ ఉండేలా టాపప్‌ హెల్త్‌ పాలసీలను తీసుకోవడం మంచిది.

పెట్టుబడులు ఎలా? 
పిల్లల చదువుల కోసం పెట్టుబడులు పెట్టడం ఎంత ముఖ్యమో.. వాటిని అవసరానికి నగదుగా మార్చడం అంతే ముఖ్యం. ‘నేను ప్లాటు అమ్మాలి.. దానికి రెండు నెలల సమయం కావాలి.. అప్పటి వరకూ కాలేజీలో చేర్పించలేను. సీటును మా కోసం ఉంచండి’ అంటే సాధ్యమవుతుందా? తేదీల ప్రకారం ఫీజులు చెల్లించాల్సి వచ్చినప్పుడు నగదు అందుబాటులో నగదు ఉండాలి. అందుకే, పెట్టుబడులకు ఒక స్పష్టమైన ప్రణాళిక కావాలి.

స్వల్పకాలిక అవసరాలకు.. (1-3 ఏళ్ల కాలానికి): స్వల్పకాలంలో డబ్బులు అవసరం అనుకున్నప్పుడు వీలైనంత వరకూ సురక్షిత పథకాల్లో మదుపు చేయడం ఉత్తమం. వీటిలో తొందరగా నగదుగా మార్చుకునే వీలూ ఉండాలి. లిక్విడ్‌ ఫండ్లు, షార్ట్‌ టర్మ్‌ డెట్‌ ఫండ్లు, ఫిక్స్‌డ్‌ డిపాజిట్లు దీనికి పరిశీలించవచ్చు. నెలనెలా మదుపు చేయాలనుకుంటే.. రికరింగ్‌ డిపాజిట్లను చూడాలి. ఈ పథకాలన్నీ కూడా వెంటనే నగదుగా మారిపోతాయి. 6.5%-7.5% వరకూ రాబడినిస్తాయి.

మధ్యస్థ కాలానికి (3-5 ఏళ్లకు): మనకు డబ్బు అవసరం 3-5 ఏళ్ల మధ్యలో వస్తుందని అనుకున్నప్పుడు హైబ్రీడ్‌ ఈక్విటీ మ్యూచువల్‌ ఫండ్లను ఎంచుకోవచ్చు. ఇందులో 11-12శాతం వరకూ రాబడిని ఆశించవచ్చు. వీటితోపాటు మంచి క్రెడిట్‌ రేటింగ్‌ ఉన్న మీడియం టర్మ్‌ డెట్‌ ఫండ్లను కూడా పరిశీలించాలి. ఇందులో 7-8శాతం వరకూ రాబడి వస్తుందనుకోవచ్చు.

దీర్ఘకాల అవసరాలకు.. (ఐదేళ్లకు మించి వ్యవధి): ఉన్నత చదువులు, వివాహంలాంటి దీర్ఘకాలిక లక్ష్యాలను దృష్టిలో పెట్టుకొని మదుపు చేసేప్పుడు ఈక్విటీ మ్యూచువల్‌ ఫండ్లు ఉపకరిస్తాయి. 4-5 మంచి ఈక్విటీ మ్యూచువల్‌ ఫండ్లను ఎంచుకొని, పెట్టుబడులు పెట్టడం మంచిది. ఇందులో వార్షిక సగటు రాబడి 13శాతం వరకూ అంచనా వేయొచ్చు.

ఈక్విటీ ఫండ్లలో మదుపు చేయడానికి క్రమానుగత పెట్టుబడి విధానం (సిప్‌) ఒక మంచి మార్గం. వీటిలో దీర్ఘకాలిక అవసరాల కోసం మదుపు చేసేప్పుడు గుర్తు పెట్టుకోవాల్సిన విషయం ఏమిటంటే.. మీరు అనుకుంటున్న లక్ష్యం సాధించడానికి ఇంకా రెండుమూడేళ్ల వ్యవధి ఉందనగా.. ఈక్విటీ ఫండ్లలో నుంచి సొమ్మును క్రమానుగతంగా వెనక్కి తీసుకోవాలి. ఇలా తీసుకున్న మొత్తాన్ని సురక్షిత పథకాల్లోకి మళ్లించాలి. దీనివల్ల మీకు అవసరమైనప్పుడు మార్కెట్‌ కాస్త అటూఇటూగా ఉన్నా ఇబ్బంది ఉండదు.

* అమ్మాయిల కోసం ప్రత్యేకంగా ప్రవేశపెట్టిన పథకం సుకన్య సమృద్ధి యోజన (ఎస్‌ఎస్‌వై). పదేళ్లలోపు అమ్మాయిలు ఉన్నవారు ఈ పథకంలో చేరవచ్చు. ప్రస్తుతం దీనిపై 8.4శాతం వడ్డీ లభిస్తోంది. అమ్మాయి చదువు, వివాహం వంటి వాటికోసం దీర్ఘకాలిక పెట్టుబడి పెట్టాలనుకుంటే దీనిని ఎంచుకోవచ్చు. 
* సురక్షితంగా ఉంటూ, దీర్ఘకాలం పాటు మదుపు చేసేందుకు వీలున్న మరో పథకం ప్రజా భవిష్య నిధి (పీపీఎఫ్‌). ఇందులో ప్రస్తుతం 7.9శాతం రాబడి లభిస్తోంది. 15 ఏళ్లపాటు ఇందులో జమ చేయాలి. 
ఉద్యోగులు వాలంటరీ ప్రావిడెంట్‌ ఫండ్‌ (వీపీఎఫ్‌)ను కూడా పరిశీలించవచ్చు. ఇందులో ప్రస్తుతం 8.65శాతం వడ్డీ ఇస్తున్నారు.

ఎస్‌ఎస్‌వై, పీపీఎఫ్‌, వీపీఎఫ్‌లలో మదుపు చేసినప్పుడు ఆదాయపు పన్ను సెక్షన్‌ 80సీ కింద పన్ను మినహాయింపు లభిస్తుంది. వచ్చిన రాబడికీ పన్ను ఉండదు.

వీటన్నింటితోపాటు.. కాస్త తక్కువ రుసుములు ఉన్న యూనిట్‌ ఆధారిత బీమా పాలసీలనూ చూడొచ్చు.

పెట్టుబడి క్రమం తప్పకుండా.. 
మదుపు చేయాలనే ఆలోచన ఒక్కటే సరిపోదు.. క్రమశిక్షణ, క్రమం తప్పకుండా పెట్టుబడి పెట్టడమూ ఎంతో ముఖ్యం. మనం పెట్టే పెట్టుబడులు ద్రవ్యోల్బణం కన్నా కనీసం 3-4శాతం అధిక రాబడినివ్వాలి. అప్పుడే పిల్లల కలలు నెరవేర్చేందుకు మనం సిద్ధంగా ఉన్నట్లు.

మీ పిల్లల చదువుల కోసం నెలకు రూ.10,000 మదుపు చేస్తూ వెళ్లారనుకుందాం.. ఆ మొత్తం ఏ వ్యవధిలో ఎంత అవుతుందో చూద్దాం..

భవిష్యత్తులో ఎంత అవసరం అవుతుందన్నది గణించి, ఆ ప్రకారం పెట్టుబడి మొత్తాన్ని పెంచుకోవడం అవసరం.

ఇవి చేయొద్దు.. 
పెట్టుబడులు ఎప్పుడూ పన్నుపరంగానూ కలిసి వచ్చేలా ఉండాలి. అంటే, వచ్చిన రాబడిపై పెద్దగా పన్ను భారం ఉండకూడదు. పన్ను, ద్రవ్యోల్బణం పోను కనీసం 3%-4% కన్నా అధిక రాబడి ఇవ్వని దీర్ఘకాలిక పథకాల జోలికి వెళ్లకూడదు. 
మనం ఒక మొక్క నాటామనుకోండి.. అది పెద్దదై, ఫలాలను ఇవ్వడానికి కాస్త సమయం పడుతుంది.  స్టాక్‌ మార్కెట్‌ పెట్టుబడులనూ ఇలాగే పోల్చవచ్చు. పిల్లల చదువు కోసం కేటాయించిన దీర్ఘకాలిక పెట్టుబడుల విషయంలోనూ అంతే. మార్కెట్‌ పడినప్పుడు ఆందోళన అవసరం లేదు. నిజానికి దీర్ఘకాలిక పెట్టుబడులు పెట్టేవారికి మార్కెట్లో వచ్చే దిద్దుబాట్లు మంచి అవకాశంగా భావించాలి. ఏడాది రెండేళ్లకోసారి సమీక్ష మాత్రం తప్పనిసరి. మీరు ఆశించిన పనితీరు లేని ఫండ్లను వదిలించుకోవాలి. మంచి పనితీరు ఉన్న ఫండ్లను కొనసాగించాలి.

- తుమ్మ బాల్‌రాజ్‌,  సర్టిఫైడ్‌ ఫైనాన్షియల్‌ ప్లానర్‌

Tags :

బిజినెస్‌

రాజకీయం

జనరల్‌

సినిమా

క్రైమ్

స్పోర్ట్స్

జాతీయ-అంతర్జాతీయ

జిల్లా వార్తలు

దేవతార్చన

+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.