close
Array ( ) 1

తాజా వార్తలు

Updated : 15/07/2020 00:17 IST
Facebook Share Twitter Share WhatsApp Share Telegram Share

దక్షిణాయన మహా పుణ్యపర్వం

‘పురోడాశం’ అంటే యజ్ఞప్రసాదం. దక్షిణాయన మహా యాగానికి ఉత్తరాయణ పుణ్యఫలమే పురోడాశం.
సకల వృక్ష జంతు జాలానికి వర్షరుతువే జీవ ధాతువు, ప్రాణహేతువు. దక్షిణాయనానికి వర్షరుతువే తొలకరి. శ్రావణం దక్షిణాయన కాల తరువుకు తొలిపూత. శ్రావణంలో వేదశ్రవణం అత్యంత ప్రధానం. వేద సభలు శ్రావణంలో విరివిగా జరగడానికి అదే ముఖ్య కారణం. కుండలినీ జాగృతికి అది గొప్ప ఉత్ప్రేరకం. మూలాధార చక్రం పూర్తిగా విప్పారినప్పుడు ఆ శక్తి చైతన్యం- సహస్రారం వరకు పురోగమించడం సాధ్యం. అదే మోక్షం.
గణపతి మూలాధార క్షేత్రజ్ఞుడు. మూలాధారానిది పృథివీతత్వం. మట్టి గణపతి రూపంలో పృథివీ తత్వాన్ని ఆరాధించమన్నది మహర్షుల ఆదేశం. కుండలినీ ఉత్తేజానికి అదే మూలం. భాద్రపదంలో బ్రహ్మదేవుడు గణపతిగా ఆవిర్భవిస్తాడు. తొలి పూజలందుకునే ‘ఇలువేలుపు’గా భక్తులను అలరిస్తాడు. చవితి అంటే నాలుగో తిథి. సత్వ రజస్తమాలనే  త్రిగుణాలకు అతీతమైనదని దాని అర్థం. ఆ స్థితిని సాధించడమే గణపతి ఆరాధన పరమార్థం.
సకల శక్తిస్వరూపిణిగా అమ్మవారి ఆరాధనం ఆశ్వయుజంలో ఎంతో శుభప్రదం. మన లోపలి శత్రువులను జయించడానికి అవసరమైన శక్తి యుక్తులను అమ్మ అనుగ్రహించే సమయమది. దేవీ నవరాత్రులు దానికి బాగా అనుకూలం. అంతశ్శత్రువులపై సాధించిన విజయానికి సంకేతాలు-  దసరావేళ విజయదశమి సంబరాలు.
కార్తికం పరమశివుడికి ప్రీతికరమైంది. శివారాధనం జ్ఞాన ప్రాప్తికి గొప్ప సాధనం. మోక్షానికి జ్ఞానసాధనమే ఆయుధం. కర్మ పాశాలకు బంధితులు కనుక జీవులందరినీ పశువులనే అంటుంది వేదాంతశాస్త్రం. వాటి యజమాని పరమశివుడు. కాబట్టి ‘పశుపతి’ అని ఆయనకు పేరు. మోక్షానికి ఆటంకంగా నిలిచే పాశాల నుంచి జీవకోటిని విడిపించేవాడు పశుపతి. కార్తికంలో శివారాధనతోనే కర్మబంధాల నుంచి సఫలత. అదే జీవుడికి మోక్ష పరీక్షలో ఉత్తీర్ణత.
మోక్షాన్ని అందించేవాడు మహావిష్ణువు. అది అనుగ్రహంతో సంభవించేదే గాని, ప్రయత్నంతో సాధించేది కాదు. శ్రావణ భాద్రపద ఆశ్వయుజ కార్తికాలలో చేసిన నిరంతర సాధన మోక్షార్హతను ఆపాదిస్తుంది. దుర్లభమైన మానవ జన్మకు మోక్షమే పరమలక్ష్యం. దాన్ని విష్ణువు అనుగ్రహిస్తాడు. మార్గశిరంలో లభించే వరమది. ‘మాసాల్లో నేను మార్గశీర్షాన్ని’ అని గీతలో భగవానుడు చెప్పిన మాటకు అదే తాత్పర్యం.
మార్గశిరం అనంతరం వచ్చే పుష్యమాఘాలు సూర్యుడికి ఇష్టమైన మాసాలు. పుష్యంలో సూర్యారాధనం పరమ శ్రేయోదాయకం. పుష్యంలోనే దక్షిణాయనం ముగిసి ఉత్తరాయణం ఆరంభమవుతుంది. శ్రావణంలో మొదలైన సాధకుడి తపస్సు, భాద్రపదంలో గణపతిని, ఆశ్వయుజంలో అమ్మవారిని, కార్తికంలో శివుడిని మార్గశిరంలో మహావిష్ణువును, పుష్యమాఘాల్లో ప్రత్యక్ష నారాయణుణ్ని ఉపాసిస్తూ- ఉత్తరాయణంలో ఫలప్రదం అవుతుంది. అంటే- గాణాపత్యం, శాక్తేయం, శైవం, వైష్ణవం, సౌరం...అనే అయిదింటి ‘పంచాయతన మహాయాగం’తో యోగసిద్ధి కలుగుతుంది. దక్షిణాయనంలో దశలవారీగా సాగిన అఖండ మహాసాధన పంచాయతన ఆరాధనగా పర్యవసించి, ఉత్తరాయణంలో ఫలిస్తుంది. ఆ కారణంగా ఉత్తరాయణం ‘పుణ్యకాలం’ అవుతుంది. ఆ అమృతత్వ సిద్ధికి దక్షిణాయనమే పునాదిగా నిలుస్తుంది.

- ఎర్రాప్రగడ రామకృష్ణ


Tags :

రాజకీయం

జనరల్‌

సినిమా

క్రైమ్

స్పోర్ట్స్

బిజినెస్‌

జాతీయ-అంతర్జాతీయ

జిల్లా వార్తలు
మరిన్ని

దేవతార్చన

+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.