close

తాజా వార్తలు

Updated : 27/03/2021 01:01 IST
Facebook Share Twitter Share WhatsApp Share Telegram Share

సేంద్రియ సేద్యం... తెచ్చింది పురస్కారం!

ముఫ్పై ఏళ్లు నిండకుండానే భర్త చనిపోతే... సేద్యాన్ని చేతిలోకి తీసుకుందీమె. ఒంటరిగా పొలంలోకి అడుగుపెట్టింది. స్వీయశిక్షణతో పంటను లాభాలబాట పట్టించింది  ఆరెకరాల్లో సేంద్రియ పద్ధతిలో చేసిన వ్యవసాయం.. ఈమెను ‘ఉత్తమ మహిళారైతు’గా నిలిపింది. కేరళకు చెందిన డాలీ జోసెఫ్‌ స్ఫూర్తి కథనమిది.
కాసర్‌గోడ్‌లోని పతిక్కరా గ్రామానికి చెందిన డాలీకు జోసెఫ్‌తో వివాహమైంది. ఉన్న కాస్త పొలంలో వ్యవసాయం చేసేవాడు భర్త. ముగ్గురు పిల్లలతో ఆ కుటుంబం సంతోషంగా ఉండేది. అయితే జోసెఫ్‌ అకస్మాత్తుగా అనారోగ్యంతో చనిపోయాడు. అప్పటికి డాలీ వయసు 28 ఏళ్లు. భర్త సేద్యం చేసే ఆరెకరాల పొలం తప్ప చేతిలో ఏమీ లేదు. అప్పటికి కొబ్బరి మొక్కలు, వరి మాత్రం ఉండే తమ పొలంలో వేరే పంటలకూ చోటు ఇవ్వాలనుకుంది. అలా అల్లం, పసుపు వంటివి వేసింది. అలాగే ఇంటి మిద్దెపై కూరగాయలు, ఆకుకూరలు పెంచడం మొదలుపెట్టింది. సమీపంలోని పడన్నెకాడ్‌లోని వ్యవసాయ విశ్వవిద్యాలయం నుంచి విత్తనాలను సేకరించి తెచ్చుకునేది. సేద్యంలో మెలకువలను నేర్చుకుంటూ 20 కేజీల విత్తనాలు వేస్తే 80 కేజీల వరి పండేలా కృషి చేసింది.
అతి పెద్ద క్యాలీఫ్లవర్‌... మిద్దెతోటను గ్రీన్‌హౌస్‌గా మార్చింది డాలీ. అందులో నాణ్యమైన విత్తనాలతో ఉల్లి, క్యాలీఫ్లవర్‌, క్యాబేజీ, క్యారెట్‌, టొమాటోలు, వంకాయలు వంటి కూరగాయలను పెద్ద ఎత్తున పండించడం మొదలుపెట్టింది. ఇక్కడ పండే క్యాలీఫ్లవర్‌, క్యాబేజీల పరిమాణం చూసి చాలామంది సలహాలు, సూచనలకు ఈమె వద్దకు వచ్చేవారు. వ్యవసాయ విశ్వవిద్యాలయం తరఫున పరిశోధన నిమిత్తం విద్యార్థులు వచ్చేస్థాయికి ఈమె మిద్దెతోట ఎదిగింది. ‘సేంద్రియ క్రిమిసంహారక మందులను తయారుచేయడం నేర్చుకున్నా. రసాయనరహితంగా  పండిస్తున్న కాయగూరలు, ఆకుకూరలకు డిమాండ్‌ పెరిగింది. వీటిని ఎకో షాప్స్‌, వెల్లారికుండ్‌ రైతు బజారులో విక్రయించి లాభాలు ఆర్జిస్తున్నా. ‘డాలీ పచ్చకరి’ పేరుతో యూట్యూబ్‌ ఛానెల్‌ను నిర్వహిస్తున్నా. ఇందులో వ్యవసాయంతోపాటు క్రిమిసంహారక మందుల తయారీ నుంచి వినియోగించడం వరకు చెబుతుంటా. దీనికి లక్షకు పైగానే  వీక్షకులున్నారు. నేను చేస్తున్న సేద్యాన్ని వీడియో రూపంలో కేరళ రాష్ట్ర ప్రభుత్వానికి గతేడాది అందజేశా. నా వ్యవసాయ పద్ధతులకుగాను ‘ఉత్తమ మహిళారైతు’ అవార్డు వరించింది. నా ముగ్గురు పిల్లలు చక్కగా చదువుకుంటున్నారు వారికి ఆసక్తి ఉంటే వ్యవసాయమూ నేర్పుతా’ అంటోంది డాలీ.


Tags :

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని