close
Array ( ) 1

తాజా వార్తలు

పదవీ విరమణలో తోడు..

మరో రెండు వారాల్లో ప్రస్తుత ఆర్థిక సంవత్సరం ముగిసిపోనుంది. ఈ సమయంలో పన్ను ఆదా కోసం అవసరమైన అన్ని పథకాల గురించీ తెలుసుకునేందుకు అందరూ చూస్తుంటారు. అదనంగా పెట్టుబడి పెట్టేందుకు ఉన్న అన్ని అవకాశాలనూ సద్వినియోగం చేసుకునేందుకు ప్రయత్నిస్తుంటారు. ఈ నేపథ్యంలో జాతీయ పింఛను పథకం (ఎన్‌పీఎస్‌) గురించి తెలుసుకోవడమూ ముఖ్యమే. అందులో ఎలా పెట్టుబడి పెట్టాలి? అందే ప్రయోజనాలేమిటి? చూద్దామా!

 

పదవీ విరమణ తర్వాత క్రమం తప్పకుండా ఆదాయం కోసం చూసే వారు.. ముందు నుంచే తగిన ప్రణాళికలు వేసుకోవాలి. భవిష్యత్తులో ఆదుకుంటూ.. ఇప్పుడు పన్ను ప్రయోజనం కూడా అందించే పథకాల్లో జాతీయ పింఛను పథకం (ఎన్‌పీఎస్‌) ముందు వరుసలో ఉంటుంది. ఇదో దీర్ఘకాలిక పెట్టుబడి పథకం. 
 

ఏమిటీ ఎన్‌పీఎస్‌? ఎవరి కోసం? 
జాతీయ పింఛను పథకం లేదా ఎన్‌పీఎస్‌.. ప్రభుత్వం ప్రవేశ పెట్టిన ఒక పదవీ విరమణ పింఛను పథకమిది. దీన్ని పీఎఫ్‌ఆర్‌డీఏ (పెన్షన్‌ ఫండ్‌ రెగ్యులేటరీ అండ్‌ డెవలప్‌మెంట్‌ అథారిటీ) నిర్వహిస్తుంది. దీర్ఘకాలంపాటు చిన్న చిన్న మొత్తాలతో పదవీ విరమణ నాటికి పెద్ద నిధిని సమకూర్చుకునేందుకు ఈ పథకం ఉపయోగపడుతుంది.

ప్రభుత్వ, ప్రైవేటు, అసంఘటిత రంగంలో పనిచేసే ఉద్యోగులందరూ ఈ పథకంలో చేరేందుకు అర్హులు. సాయుధ బలగాలలో పనిచేసే వారికి ప్రభుత్వమే ఇలాంటి పథకాన్నే అందిస్తోంది కాబట్టి, వారికి ఇందులో మదుపు చేసే అవకాశం ఉండదు. ఖాతా ప్రారంభించడానికి 18-60 ఏళ్ల వయసు వారు అర్హులు. ఒక వ్యక్తి ఒకే ఖాతాను ప్రారంభించగలరు. మతిస్థిమితం సరిగా లేనివారు ఈ పథకంలో చేరలేరు. ఉద్యోగం చేస్తున్నప్పుడు ఈ పథకంలో మదుపు చేయడం ద్వారా పదవీ విరమణ అనంతరం పింఛను వచ్చే ఏర్పాటు చేసుకునేందుకు వీలు కల్పించడమే ఈ పథకం ప్రధాన లక్ష్యం. పదవీ విరమణ చేసిన తర్వాత ఇందులో జమైన మొత్తం నుంచి కొంత శాతాన్ని వెనక్కి తీసుకోవచ్చు. మిగిలిన మొత్తంలో నుంచి మీకు నెలనెలా పింఛను వచ్చే ఏర్పాటు జరుగుతుంది. మీరు ఉద్యోగాలు మారినా.. దేశంలో ఎక్కడినుంచి ఎక్కడికి వెళ్లినా.. మీ ఖాతా మీ వెంటే ఉంటుంది. సెక్షన్‌ 80సీ, సెక్షన్‌ 80సీసీడీ కింద ఈ పథకం పన్ను మినహాయింపు ప్రయోజనాలను కల్పిస్తుంది.

ఎలా ప్రారంభించాలి? 
ఎన్‌పీఎస్‌ను ప్రారంభించేందుకు అనేక చోట్ల అవకాశం ఉంటుంది. పీఎఫ్‌ఆర్‌డీఏ వెబ్‌సైటులో మీకు అవసరమైన సమాచారం సులభంగానే అందుబాటులో ఉంటుంది. మీకు సమీపంలో ఉన్న పీఓపీ-పీఎస్‌ని సంప్రదించి, అవసరమైన కేవైసీ (మీ ఖాతాదారు గురించి తెలుసుకోండి) నిబంధనలను పూర్తి చేసి, ఖాతాను ప్రారంభించవచ్చు. అప్పుడు మీకు ఒక ప్రాన్‌ (పర్మినెంట్‌ రిటైర్‌మెంట్‌ అకౌంట్‌ నెంబర్‌) లభిస్తుంది. 
ఒకవేళ మీరు టైర్‌-2 ఖాతాను ప్రారంభించాలనుకుంటే.. అప్పుడు ఈ పద్ధతి కాస్త భిన్నంగా ఉంటుంది. ప్రాన్‌ పొందాక, టైర్‌-2 ఖాతాను ప్రారంభించేందుకు ప్రత్యేక పత్రాలను సమర్పించాలి. 
ఎన్‌పీఎస్‌ ఖాతా ప్రారంభించగానే.. కొంత పెట్టుబడి పెట్టాల్సి ఉంటుంది. టైర్‌-1 ఖాతా కోసం కనీస పెట్టుబడి రూ.500. టైర్‌-2 ఖాతా కోసం రూ.1,000. ఈ రెండు ఖాతాల్లోనూ ఎలాంటి గరిష్ఠ పరిమితి లేకుండా మదుపు చేసుకోవచ్చు.

ఎన్‌పీఎస్‌ ఖాతాను ఆన్‌లైన్‌లోనూ ప్రారంభించవచ్చు. పెట్టుబడి మొత్తాన్ని ఆన్‌లైన్‌లోనూ చెల్లించవచ్చు. పలు బ్రోకరేజీ సంస్థలు, బ్యాంకులు ఈ అవకాశాన్ని కల్పిస్తున్నాయి. 
 

వ్యత్యాసం ఏమిటంటే.. 
ఎన్‌పీఎస్‌లో రెండు రకాల ఖాతాలుంటాయి.. 
టైర్‌-1: ఇది ప్రధాన ఎన్‌పీఎస్‌ ఖాతా. ఇందులో పెట్టిన పెట్టుబడికే సెక్షన్‌ 80సీసీడీ కింద పన్ను మినహాయింపు లభిస్తుంది. ఈ ఖాతాలో జమైన మొత్తాన్ని వెనక్కి తీసుకోవాలంటే ఎన్‌పీఎస్‌ ఉపసంహరణ నిబంధనలు వర్తిస్తాయి. 
టైర్‌-2: ఈ ఖాతాను ప్రారంభించాలంటే.. టైర్‌-1 ఖాతా ఉండాల్సిందే. ఈ ఖాతాలో పెట్టిన పెట్టుబడికి ఎలాంటి పన్ను మినహాయింపులూ వర్తించవు. పెట్టుబడి మొత్తాన్ని కావాల్సినప్పుడు వెనక్కి తీసుకునే అవకాశం ఉంటుంది. 
 

పన్ను మినహాయింపుల మాటేమిటి? 
పెట్టుబడి పెట్టినప్పుడు: ఎన్‌పీఎస్‌లో పెట్టిన పెట్టుబడికి పన్ను మినహాయింపు పొందేందుకు రెండు సెక్షన్లు ఉంటాయి. ఒకటి 80సీ. ఇంకోటి సెక్షన్‌ 80సీసీడీ. 
మీ యాజమాన్యం ఉద్యోగ భవిష్య నిధి (ఈపీఎఫ్‌)కి బదులు ఎన్‌పీఎస్‌ ఎంచుకున్నట్లయితే.. మీ వేతనం నుంచి జమ అయ్యేదీ, యాజమాన్యం చెల్లించే మొత్తం సెక్షన్‌ 80సీ కింద వస్తాయి. ఈ సెక్షన్‌ నిబంధనల ప్రకారం రూ.1,50,000ల వరకే మినహాయింపు లభిస్తుంది. 
దీనికి అదనంగా మీరు ఎన్‌పీఎస్‌లో పెట్టుబడి పెట్టినప్పుడు సెక్షన్‌ 80సీసీడీ కింద గరిష్ఠంగా రూ.50,000 వరకూ అదనపు పన్ను మినహాయింపు లభిస్తుంది. 
ఉదాహరణకు కుమార్‌ ఆదాయపు పన్ను చట్టం సెక్షన్‌ 80సీ కింద ఈపీఎఫ్‌/ఎన్‌పీస్‌, బీమా ప్రీమియం, పిల్లల ఫీజులు, ఈఎల్‌ఎస్‌ఎస్‌లు తదితరాలు కలిపి రూ.1,50,000 మినహాయింపు పొందారు. ఇతను అదనంగా ఎన్‌పీఎస్‌లో రూ.50,000 పెట్టుబడి పెట్టి, సెక్షన్‌ 80సీసీడీ కింద పన్ను మినహాయింపు పొందవచ్చు. ఇలా రూ.2,00,000 వరకూ కుమార్‌ పన్ను మినహాయింపు కోసం చూపించుకోవచ్చు. 
పదవీ విరమణ తర్వాత: తాజాగా ప్రభుత్వ ప్రతిపాదనల ప్రకారం ఎన్‌పీఎస్‌లో జమైన మొత్తంలో నుంచి 60శాతం వరకూ ఎలాంటి పన్ను లేకుండా వెనక్కి తీసుకోవచ్చు. మిగతా 40శాతంతో పీఎఫ్‌ఆర్‌డీఏ అనుమతించిన బీమా సంస్థల నుంచి యాన్యుటీ పథకాలను కొనుగోలు చేయాలి. ఈ యాన్యుటీల నుంచి వచ్చే పింఛను మీ ఆదాయంతో కలిపి చూపించి, నిబంధనలను బట్టి, పన్ను చెల్లించాలి. 
 

పెట్టుబడి వ్యూహం... 
ఎన్‌పీఎస్‌లో పెట్టుబడి పెట్టేందుకు మూడు రకాల ఫండ్లు అందుబాటులో ఉన్నాయి.. 
* ఈక్విటీ పథకాలు: దీన్ని ‘అసెట్‌ క్లాస్‌- ఇ’గా పేర్కొంటారు. దీన్ని ఎంచుకుంటే పెట్టుబడులను ఈక్విటీలకు మళ్లిస్తారు. అధిక రాబడికి వీలుంటుంది. అదే సమయంలో కాస్త నష్ట భయం కూడా ఉంటుంది. ఈ వ్యూహాన్ని ఎంచుకున్నప్పుడు గరిష్ఠంగా 50శాతం వరకే ఈక్విటీల్లో మదుపు చేయొచ్చు. ఈ నిబంధన కాస్త ఇబ్బంది పెట్టేదే. అధిక నష్టభయం ఉన్నప్పటికీ దీర్ఘకాలంలో మంచి రాబడి కూడా లభించే పెట్టుబడులివి. పెట్టుబడిలో 50శాతానికే పరిమితం చేయడం వల్ల మంచి రాబడిని ఆర్జించే వీలు కోల్పోయే అవకాశం ఉంది. 
* స్థిరాదాయ పథకాలు:  ప్రభుత్వ సెక్యూరిటీలను మినహాయించి.. స్థిరాదాయం అందించే ఇతర పథకాల్లో మదుపు చేస్తుంది. దీన్ని ‘అసెట్‌ క్లాస్‌ -సి’గా పేర్కొంటారు. ఇందులో నష్టభయం మధ్యస్థంగా ఉంటుంది. 
* తక్కువ నష్టభయంతో: ప్రభుత్వ సెక్యూరిటీల్లో మాత్రమే మదుపు చేయాలనుకుంటే ‘అసెట్‌ క్లాస్‌- జి’ని ఎంచుకోవచ్చు. ఇందులో రాబడి తక్కువగా ఉంటుంది. నష్టభయం కూడా చాలా స్వల్పం. 
* మన ఇష్టాన్ని బట్టి: పైన తెలిపిన అసెట్‌ క్లాస్‌లలో ఎందులో ఎంత శాతాన్ని మదుపు చేయాలని మనమే నిర్ణయించుకోవచ్చు. దీన్ని ‘యాక్టివ్‌ ఛాయిస్‌’ అంటారు. 
* వయసు ఆధారంగా: ఎన్‌పీఎస్‌ ఖాతాదారుడి వయసును బట్టి, ఏ పెట్టుబడి వ్యూహాన్ని ఎంచుకోవాలన్నది పీఎఫ్‌ఆర్‌డీఏ నిర్ణయిస్తుంది. దాన్ని బట్టి పెట్టుబడి మొత్తాన్ని నిర్వహిస్తుంది. 
ఏడాదికోసారి పెట్టుబడి వ్యూహాన్ని మార్చుకునే వెసులుబాటును ఖాతాదారుడికి ఉంటుంది. 
 

ఎవరు నిర్వహిస్తారు? 
జాతీయ పింఛను పథకం (ఎన్‌పీఎస్‌) నిర్వహణ కోసం పీఎఫ్‌ఆర్‌డీఏ 7 ఫండ్‌ మేనేజర్లను నియమించింది. 
హెచ్‌డీఫ్‌సీ పెన్షన్‌ మేనేజ్‌మెంట్‌ కంపెనీ 
ఎల్‌ఐసీ పెన్షన్‌ ఫండ్‌ 
ఐసీఐసీఐ ప్రుడెన్షియల్‌ పెన్షన్‌ ఫండ్‌ 
కొటక్‌ మహీంద్రా పెన్షన్‌ ఫండ్‌ 
రిలయన్స్‌ పెన్షన్‌ ఫండ్‌ 
ఎస్‌బీఐ పెన్షన్‌ ఫండ్‌ 
యూటీఐ రిటైర్‌మెంట్‌ సొల్యూషన్స్‌ 
ఎన్‌పీఎస్‌లో మీరు పెట్టిన పెట్టుబడిని ఎవరు నిర్వహించాలనేది మీరే నిర్ణయించుకోవచ్చు. ఒక ఫండ్‌ మేనేజర్‌ నుంచి మరొకరికి మారే వెసులుబాటు ఉంది. అయితే, ఇది ఏడాదికి ఒకసారి మాత్రమే. 
 

పింఛను కోసం.. 
ఎన్‌పీఎస్‌ ఖాతాదారుడికి 60 ఏళ్లు వచ్చాక.. పింఛను తీసుకోవడానికి యాన్యుటీలను కొనుగోలు చేయాలి. అందుకోసం.. అనుమతి పొందిన బీమా కంపెనీలు ఇవి.. 
లైఫ్‌ ఇన్సూరెన్స్‌ కార్పొరేషన్‌ ఆఫ్‌ ఇండియా (ఎల్‌ఐసీ) 
ఎస్‌బీఐ లైఫ్‌ ఇన్సూరెన్స్‌ 
ఐసీఐసీఐ ప్రుడెన్షియల్‌ లైఫ్‌ ఇన్సూరెన్స్‌ 
బజాజ్‌ అలియాంజ్‌ లైఫ్‌ ఇన్సూరెన్స్‌ 
స్టార్‌-దైచీ లైఫ్‌ ఇన్సూరెన్స్‌ 
రిలయన్స్‌ లైఫ్‌ ఇన్సూరెన్స్‌ 
హెచ్‌డీఎఫ్‌సీ స్టాండర్డ్‌ లైఫ్‌ ఇన్సూరెన్స్‌.

- సాయి కృష్ణ పత్రి, సర్టిఫైడ్‌ ఫైనాన్షియల్‌ ప్లానర్‌.

Tags :

బిజినెస్‌

రాజకీయం

జనరల్‌

సినిమా

క్రైమ్

స్పోర్ట్స్

జాతీయ-అంతర్జాతీయ

జిల్లా వార్తలు
సినిమా

దేవతార్చన

+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.