ఆ సీఎం ఆస్తి ₹54లక్షలు: సొంత కారు లేదు! 
close

తాజా వార్తలు

Published : 16/03/2021 18:09 IST
Facebook Share Twitter Share WhatsApp Share Telegram Share Link Share

ఆ సీఎం ఆస్తి ₹54లక్షలు: సొంత కారు లేదు! 

తిరువనంతపురం: అసెంబ్లీ ఎన్నికల వేళ  కేరళలో నామినేషన్ల కోలాహలం నెలకొంది. సీపీఎం నేత, ముఖ్యమంత్రి పినరయి విజయన్‌ సోమవారం కన్నూరు జిల్లా ధర్మడం నుంచి నామినేషన్‌ వేశారు. ఈ సందర్భంగా ఎన్నికల సంఘానికి సమర్పించిన అఫిడవిట్‌లో తన ఆస్తుల వివరాలను ప్రకటించారు. వీటి ప్రకారం.. ముఖ్యమంత్రి విజయన్‌ మొత్తం ఆస్తుల విలువ రూ.54లక్షలు. 2020-21లో తన వార్షిక ఆదాయం రూ.2.87లక్షలుగా పేర్కొన్న ఆయన.. రెండు సొంత ఇళ్లు ఉన్నాయని, వ్యక్తిగత వాహనం లేదని వెల్లడించారు. తన పేరిట రూ.51.95లక్షల విలువైన స్థిరాస్తులు, 2.04 లక్షల విలువ చేసే చరాస్తులు ఉన్నట్టు విజయన్‌ పేర్కొన్నారు. ఉపాధ్యాయురాలిగా పనిచేసి రిటైరైన తన సతీమణి పేరిట రూ.35లక్షల విలువ చేసే స్థిరాస్తులు, రూ.29.7లక్షల చరాస్తులు ఉన్నట్టు ఎన్నికల అఫిడవిట్‌లో వెల్లడించారు. ఇద్దరి పేరిటా అప్పులేమీ లేవని తెలిపారు.

2016-17 నుంచి 2020-21 మధ్య కాలంలో తన వార్షిక ఆదాయం రూ.2లక్షల నుంచి 3లక్షల మధ్య ఉన్నట్టు విజయన్‌ తెలిపారు. 2018-19లో మాత్రం వార్షికాదాయం అత్యధికంగా రూ.3.40లక్షలుగా ఉన్నట్టు పేర్కొన్నారు.  2020-21 ఆర్థిక సంవత్సరంలో తన సతీమణి ఆదాయం రూ.16,400లుగా ఉందని తెలిపారు. తన పేరుతో సొంత వాహనం గానీ, బంగారు ఆభరణాలు గానీ లేవని అఫిడవిట్‌లో స్పష్టం చేశారు.

తన సతీమణికి మాత్రం రూ.3.3లక్షలు విలువైన 80 గ్రాముల బంగారు ఆభరణాలు ఉన్నట్టు తెలిపారు. ఇక విజయన్‌ స్థిరాస్తుల విషయానికి వస్తే.. తన సొంత జిల్లా కన్నూరులో 0.78 ఎకరాల వ్యవసాయ భూమితో పాటు ఇల్లు ఉందని పేర్కొన్నారు. అలాగే, పథిరియాడ్‌లో మరో నివాస భవనం ఉన్నట్టు సీఎం తెలిపారు. తనపై రెండు క్రిమినల్‌ కేసులు ఉన్నాయని ఎన్నికల అఫిడవిట్‌లో పేర్కొన్నారు.


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
జనరల్
మరిన్ని
జాతీయ- అంతర్జాతీయ
మరిన్ని