Pfizer: 5-11 ఏళ్లలోపు చిన్నారులకు ఫైజర్‌ టీకా సురక్షితం

తాజా వార్తలు

Updated : 21/09/2021 05:05 IST

Pfizer: 5-11 ఏళ్లలోపు చిన్నారులకు ఫైజర్‌ టీకా సురక్షితం

ఫైజర్‌, బయోఎన్‌టెక్‌ సంయుక్త ప్రకటనలో వెల్లడి

న్యూయార్క్‌: ఐదేళ్ల నుంచి 11 ఏళ్లలోపు చిన్నారుల విషయంలో తాము రూపొందించిన కొవిడ్‌ వ్యాక్సిన్‌ సమర్థంగా పనిచేస్తున్నట్లు క్లినికల్‌ ట్రయల్స్‌లో వెల్లడైందని ఫైజర్, బయోఎన్‌టెక్‌ సంస్థలు సోమవారం ఓ సంయుక్త ప్రకటనలో తెలిపాయి. వారికి ఈ టీకాలు సురక్షితమని వెల్లడించాయి. డెల్టా వేరియంట్‌ విజృంభిస్తున్న ప్రస్తుత తరుణంలో చిన్నారులకూ మహమ్మారి నుంచి రక్షణ అందించేందుకు ఎదురుచూస్తున్నామని ఫైజర్ ఛైర్మన్, సీఈవో ఆల్బర్ట్ బౌర్లా తెలిపారు. ‘జులై నుంచి అమెరికావ్యాప్తంగా చిన్నారుల్లో కొవిడ్‌ కేసులు దాదాపు 240 శాతం పెరిగాయి. ఈ ప్రమాదకర పరిస్థితి.. టీకా ఆవశ్యకతను తెలుపుతోంద’న్నారు.

2,268 మందిపై క్లినికల్‌ ట్రయల్స్‌

క్లినికల్‌ ట్రయల్స్‌లో భాగంగా 5- 11 ఏళ్ల మధ్య వయస్సుగల 2,268 మంది చిన్నారులకు రెండు డోసుల టీకా ఇచ్చారు. 12 ఏళ్లు దాటినవారికి ఇస్తున్న మోతాదుతో పోల్చితే కొంత తక్కువ ఇచ్చారు. ఈ క్రమంలో వారిలో టీకా ప్రభావవంతంగా పని చేస్తున్నట్లు తేలిందని చెప్పారు. పెద్ద మొత్తంలో యాంటీబాడీలనూ ఉత్పత్తి చేసిందని తెలిపారు. ఈ ట్రయల్స్‌ వివరాలను త్వరలో అమెరికా ఫుడ్ అండ్ డ్రగ్ అడ్మినిస్ట్రేషన్(ఎఫ్‌డీఏ), యూరోపియన్ మెడిసిన్స్ ఏజెన్సీ, ఇతర దేశాల ఔషధ నియంత్రణ సంస్థలకు సమర్పిస్తామని, అమెరికాలో అత్యవసర వినియోగానికి దరఖాస్తు చేస్తామని బౌర్లా తెలిపారు. ప్రస్తుతం 2-5 ఏళ్లు, ఆరు నెలల నుంచి రెండేళ్ల వయస్సు మధ్య చిన్నారులపై ట్రయల్స్‌ జరుగుతున్నాయని, ఏడాది చివరినాటికి ఫలితాలు రావొచ్చని ఫైజర్‌, బయోఎన్‌టెక్‌ వెల్లడించాయి.


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జాతీయ- అంతర్జాతీయ
మరిన్ని