Breaking | Feedback | ePratibha | E-PAPER | Pratibha

Odisha Train Accident: రైల్వే ట్రాక్‌ పునురుద్ధరణ.. 51 గంటల తర్వాత ఎట్టకేలకు రైలు ప్రారంభం

Updated : 04 Jun 2023 23:02 IST

ఒడిశాలో మాటలకందని మహా విషాదం చోటుచేసుకుంది. బాలేశ్వర్‌ జిల్లాలో శుక్రవారం అనూహ్య రీతిలో జరిగిన ఘోర రైలు ప్రమాదంలో 275 మంది దుర్మరణం చెందారు. 1,175 మందికి పైగా గాయాలపాలయ్యారు. క్షతగాత్రుల్లో పలువురి పరిస్థితి విషమంగా ఉందని అధికార వర్గాలు తెలిపాయి.

04/06/2023 22:40(IST)

భువనేశ్వర్‌-హావ్‌డా మధ్య గూడ్స్‌ రైలు

రైల్వే ట్రాక్‌ పునరుద్ధరణ పూర్తయినట్లు రైల్వేశాఖ మంత్రి అశ్వినీ వైష్ణవ్‌ వెల్లడించారు. 51 గంటల ఆపరేషన్ తర్వాత గూడ్స్‌ రైలును నడుపుతున్నట్లు చెప్పారు. ఈ రైలు భువనేశ్వర్‌-హావ్‌డా మార్గంలో ప్రయాణిస్తుందని, ఈ రైలును పరిశీలించిన తర్వాత యథావిధిగా రైళ్లు నడుపుతామని తెలిపారు.

04/06/2023 21:49(IST)

మొత్తం 123 రైళ్లు రద్దు: రైల్వేశాఖ

ఒడిశా రైలు దుర్ఘటన నేపథ్యంలో జూన్‌ 3 నుంచి జూన్‌ 7 తేదీల మధ్య ప్రయాణించాల్సిన 123 రైళ్లను రద్దు చేసినట్లు రైల్వేశాఖ వెల్లడించింది. మరో 56 రైళ్లను దారిమళ్లించినట్లు చెప్పింది. 10 రైళ్లను గమ్యస్థానాలు చేరుకోవడానికి ముందే నిలిపేయగా.. 14 రైళ్లను రీషెడ్యూల్‌ చేసినట్లు పేర్కొన్నారు.

04/06/2023 21:28(IST)

ఒడిశాలో 260 మందికి కొనసాగుతున్న చికిత్స

రైలు దుర్ఘటనలో క్షతగాత్రులైన వారిలో 260 మందికి ఒడిశాలోని వివిధ ఆస్పత్రుల్లో చికిత్స కొనసాగుతున్నట్లు అక్కడి వైద్యారోగ్యశాఖ అధికారులు వెల్లడించారు. క్షతగాత్రుల్లో కొందరిని ఇప్పటికే స్వస్థలాలకు చేర్చినట్లు చెప్పారు. దాదాపు 900 మందిని ఇప్పటి వరకు వివిధ ఆస్పత్రుల నుంచి డిశ్ఛార్జి చేసినట్లు పేర్కొన్నారు.

04/06/2023 20:31(IST)

లోకో పైలట్‌ తప్పిదం లేదు..!

ఒడిశాలో జరిగిన ఘోర రైలు ప్రమాదం (Odisha Train Accident) పూర్తి కారణాలపై ఇంకా స్పష్టత రానప్పటికీ.. డ్రైవర్‌ తప్పిదం లేకపోవచ్చని రైల్వేశాఖ ఉన్నతాధికారులు (Indian Railways) పేర్కొన్నారు. ఘటన సమయంలో రెండు రైళ్లు కూడా పరిమిత వేగానికి లోబడే వెళ్తున్నాయన్నారు. ఎలక్ట్రానిక్‌ ఇంటర్‌లాకింగ్‌ వ్యవస్థ (Interlocking System) సరిగ్గానే ఉన్నప్పటికీ.. అందులో ఎవరో ట్యాంపరింగ్‌కు పాల్పడ్డారనే అనుమానాలు వ్యక్తం చేశారు. ఈ నేపథ్యంలో విధ్వంసం కోణంలోనూ రైల్వే అధికారులు దర్యాప్తు ముమ్మరం చేశారు.

మరింత సమాచారం కోసం క్లిక్‌ చేయండి

04/06/2023 19:32(IST)

మృతుల పిల్లలకు ఉచిత విద్య: అదానీ గ్రూప్‌

వందలాది కుటుంబాల్లో పెను విషాదం నింపిన రైలు ప్రమాదంలో మృతి చెందిన వారి పిల్లలకు చేయూత నిచ్చేందుకు అదానీ గ్రూప్‌ సంస్థలు ముందుకొచ్చాయి. ఈ ఘటనలో అనాథలుగా మారిన చిన్నారులకు పాఠశాల విద్య వరకు ఉచితంగా అందిస్తామని ఆ సంస్థల అధినేత గౌతమ్‌ అదానీ ప్రకటించారు.

04/06/2023 19:18(IST)

రైలు దుర్ఘటనకు మతం రంగు పులిమితే కఠిన చర్యలు: పోలీసుల వార్నింగ్‌

భువనేశ్వర్‌: ఒడిశాలోని బాలేశ్వర్‌లో జరిగిన ఘోర రైలు ప్రమాదంపై కొందరు వదంతులు వ్యాప్తి చేస్తుండటంతో పోలీసులు తీవ్ర హెచ్చరికలు జారీ చేశారు. ఈ విషాద ఘటనకు కొందరు మతం రంగు పులిమేలా సామాజిక మాధ్యమాల్లో పోస్టులు పెట్టడం దురదృష్టకరమన్నారు. ఈ మేరకు పోలీసులు ట్వీట్‌ చేశారు. పుకార్లు వ్యాప్తి చేసేవారిపై కఠిన చర్యలు తీసుకుంటామని హెచ్చరించారు. అసత్యాలను వ్యాప్తి చేయడం ద్వారా మత సామరస్యతను దెబ్బతీసేందుకు ప్రయత్నిస్తున్న వారిపై కఠిన చర్యలు తీసుకుంటామని తెలిపారు. చెడు ప్రేరేపిత పోస్టులను సర్క్యులేట్‌ చేయడం మానుకోవాలని విజ్ఞప్తి చేశారు. రైలు దుర్ఘటనపై ప్రభుత్వ రైల్వే పోలీసులు(GRP) అన్ని కోణాల్లో దర్యాప్తు చేస్తున్నారని పేర్కొన్నారు.

04/06/2023 18:59(IST)

ఇవేం లెక్కలు..: మమతా బెనర్జీ

ఒడిశా రైలు ప్రమాద ఘటనలో మృతుల సంఖ్యపై పశ్చిమ్‌బెంగాల్‌ ముఖ్యమంత్రి మమతా బెనర్జీ ప్రశ్నలు లేవనెత్తారు. బెంగాల్‌ నుంచి 61 మంది ప్రాణాలు కోల్పోయినట్లు రైల్వే శాఖ చెబుతోందని, కానీ, ఇప్పటి వరకు 182 మంది ఆచూకీ లభ్యం కాలేదని ఆమె అన్నారు. వందేభారత్‌ రైళ్లు ఎన్ని ప్రారంభించారన్న దానిపై స్పష్టమైన లెక్కలు చెబుతున్న కేంద్రం.. ఈ విషయంలో ఎందుకు పొరపాట్లు చేస్తోందని విమర్శించారు. ‘‘ ఒక రాష్ట్రం నుంచి 182 మంది కనిపించకపోతే.. కేవలం 61 మంది మాత్రమే మృతి చెందినట్లు చెబుతున్నారు. ఈ లెక్కలేంటి?’’ అని మమతా బెనర్జీ ప్రశ్నించారు.

04/06/2023 18:47(IST)

రైలు దుర్ఘటనపై సీబీఐ విచారణకు సిఫారసు

ఒడిశాలో జరిగిన ఘోర రైలు ప్రమాదంపై సీబీఐతో విచారణ చేపట్టాలని రైల్వేశాఖ నిర్ణయించింది. ఈ మేరకు రైల్వే బోర్డు సీబీఐకి సిఫారసు చేసినట్లు రైల్వేశాఖ మంత్రి అశ్వినీ వైష్ణవ్‌ తెలిపారు. ఈ దుర్ఘటనపై సీబీఐ సమగ్రంగా దర్యాప్తు చేస్తుందని ఆయన మీడియాకు వెల్లడించారు.

మరింత సమాచారం కోసం క్లిక్‌ చేయండి

04/06/2023 18:39(IST)

తప్పుడు సమాచారం వ్యాప్తి చేస్తే కఠిన చర్యలు: ఒడిశా పోలీసులు

ఒడిశా రైలు ప్రమాదం (Osisha Train Accident)తో ఎంతో మంది కుటుంబాల్లో తీవ్ర విషాదం నెలకొంది. అయితే, ఈ ఘటనపై కొందరు సామాజిక మాధ్యమాల్లో (Social Media) తప్పుడు సమాచారం వ్యాప్తి చేస్తున్నారు. అలాంటి వారిపై కఠిన చర్యలు తీసుకుంటామని ఒడిశా పోలీసులు (Odisha Police) హెచ్చరించారు. ఈ మేరకు ఒడిశా పోలీసులు ఆదివారం ఒక ప్రకటన చేశారు.‘‘బాలేశ్వర్‌లో జరిగిన ఘోర రైలు ప్రమాదానికి సంబంధించి కొందరు వ్యక్తులు సామాజిక మాధ్యమాల్లో రెచ్చగొట్టే పోస్టులు చేస్తున్నారు. ఇది ఎంతో దురదృష్టకరం. ప్రమాదానికి గల కారణాలపై పూర్తిస్థాయి విచారణ జరుగుతోంది. కాబట్టి, సామాజిక మాధ్యమాల్లో వచ్చే సమాచారాన్ని ఎవరు నమ్మొద్దు. అనుచిత వ్యాఖ్యలు, మోసపూరిత సమాచారంపట్ల అప్రమత్తంగా ఉండాలని యూజర్లను కోరుతున్నాం. రైలు ప్రమాదానికి సంబంధించి రెచ్చగొట్టే వ్యాఖ్యలు, నకిలీ సమాచారం వ్యాప్తి చేసే వారిపై చట్టపరంగా కఠిన చర్యలు చేపడతాం’’ అని ఒడిశా పోలీసులు ట్వీట్ చేశారు.

04/06/2023 18:20(IST)

రైల్వే హెల్ప్‌లైన్‌లో ప్రత్యేక ఏర్పాట్లు

ఒడిశా రైలు దుర్ఘటన నేపథ్యంలో రైల్వే హెల్ప్‌లైన్‌ సెంటర్‌లో ప్రత్యేక ఏర్పాట్లు చేశారు. బాధితుల బంధువులు, స్నేహితులకు ఎప్పటికప్పుడు కచ్చితమైన సమాచారం అందించేలా హెల్ప్‌లైన్‌ నెంబర్‌ 139ను ప్రత్యేక సిబ్బందితో 24×7 అందుబాటులో ఉంచినట్లు అధికారులు వెల్లడించారు. ఈ నెంబర్‌కు వచ్చే ఫోన్లకు సీనియర్‌ అధికారులు సమాధానాలివ్వాలని అంతర్గత ఉత్తర్వులు జారీ అయ్యాయి. బాధితుల కుటుంబాలకు స్నేహ హస్తం అందించడమే హెల్ప్‌లైన్‌ నెంబర్‌ ముఖ్య ఉద్దేశమని, వాళ్లు సంతృప్తి చెందేలా స్పష్పమైన సమచారం ఇచ్చేందుకు ప్రయత్నిస్తామని రైల్వే అధికారులు పేర్కొన్నారు.

04/06/2023 18:07(IST)

మార్చురీల వద్దే భారీగా ‘గుర్తుపట్టని’ మృతదేహాలు.. భద్రపరచడం పెద్ద సవాలే!

మార్చురీల వద్ద భారీగా పేరుకుపోయిన మృతదేహాలను భద్రపరచడం ఒడిశా(Odisha) అధికార యంత్రాంగానికి పెను సవాల్‌గా తయారైంది. ఎవరూ క్లెయిమ్‌ చేయని మృతదేహాలే భారీ సంఖ్యలో ఉండంతో అధికారులు బాలేశ్వర్‌ నుంచి భువనేశ్వర్‌కు 187 మృతదేహాలను తరలించారు. అయితే, వీటిని భద్రపరిచేందుకు శవాగారాల్లో స్థలం లేకపోవడంతో మృతుల బంధువులు గుర్తించేలా తగిన ఏర్పాట్లపై అధికార యంత్రాంగం దృష్టిసారించింది.

పూర్తి సమాచారం కోసం క్లిక్‌ చేయండి

04/06/2023 17:35(IST)

అప్‌లైన్‌ ట్రాక్‌ లింకింగ్‌ పూర్తయింది: అశ్వనీ వైష్ణవ్‌

ఒడిశా రైలు దుర్ఘటన తర్వాత ట్రాక్‌ పునరుద్ధరణ పనులు శరవేగంగా జరుగుతుట్లు రైల్వేశాఖ మంత్రి అశ్వినీ వైష్ణవ్‌ తెలిపారు. సాయంత్రం 4.45 సమయానికి హవ్‌డా నుంచి చెన్నై వైపు వెళ్లే అప్‌ ట్రాక్‌ లింకింగ్‌ పనులు పూర్తయ్యాయని, విద్యుదీకరణ పనులు కొనసాగుతున్నాయని ట్విటర్‌ వేదికగా వెల్లడించారు.

04/06/2023 16:35(IST)

సహాయక చర్యలు దాదాపు పూర్తయినట్లే: అతుల్‌ కార్వాల్‌

ఒడిశా రైలు దుర్ఘటకు సంబంధించిన సహాయక చర్యలు దాదాపు పూర్తయ్యాయని ఎన్‌డీఆర్‌ఎఫ్‌ డీజీ అతుల్‌ కార్వాల్‌ తెలిపారు. సహాయక చర్యలను స్వయంగా పర్యవేక్షిస్తున్న ఆయన జాతీయ మీడియాతో మాట్లాడారు. మొత్తం 9 బృందాలకు చెందిన 300 మంది ఎన్‌డీఆర్‌ఎఫ్‌ సిబ్బంది ప్రస్తుతం సంఘటన స్థలంలో ఉన్నట్లు చెప్పారు.

04/06/2023 15:59(IST)

రైలు దుర్ఘటన బాధితులకు పరిహారం ప్రకటించిన ఏపీ

ఒడిశా రైలు దుర్ఘటన బాధితులకు ఏపీ ప్రభుత్వం పరిహారం ప్రకటించింది. మృతుల కుటుంబాలకు రూ.10లక్షలు, తీవ్రంగా గాయపడిన వారికి రూ.5లక్షలు, స్వల్పగాయాలతో బయటపడిన వారికి రూ.1 లక్ష పరిహారంగా ఇవ్వాలని సీఎం జగన్‌ మోహన్‌ రెడ్డి అధికారులను ఆదేశించారు.

04/06/2023 15:34(IST)

ఏమిటీ ఎలక్ట్రానిక్‌ ఇంటర్‌లాకింగ్‌ వ్యవస్థ..?

రైల్వేలో ప్రమాదాల నివారణకు ఈ వ్యవస్థ చాలా కీలకంగా పనిచేస్తుంది. ఒకే పట్టాలపై ఏకకాలంలో రెండు రైళ్లు ఉండకుండా చూస్తూ పట్టాలను కేటాయించే సమగ్రమైన సిగ్నల్‌ వ్యవస్థ ఇది. పూర్తి కథనం కోసం క్లిక్‌ చేయండి..

04/06/2023 15:15(IST)

తమిళనాడుకు చెందిన ఆ 8 మంది వీళ్లే!

ఇప్పటివరకు మిగతా ఎనిమిది మంది కాంటాక్టులోకి రాలేదని చెప్పిన తమిళనాడు ప్రభుత్వం తాజాగా వారి వివరాలను వెల్లడించింది. వీరిలో ఇద్దరు మహిళలు కాగా.. ఆరుగురు పురుషులు ఉన్నట్టు ప్రభుత్వం వెల్లడించింది. ఇంకా ఆచూకీ దొరకని వారిలో నరకాని గోపి (34), కార్తిక్‌ (19), రఘునాథ్‌ (21), మీనా (66), జగదీశన్‌ (47), కమల్‌(26) కల్పన (19, అరుణ్‌ (21) ఉన్నారు. వీరి గురించి సమాచారం ఉంటే బంధువులు, స్నేహితులు ఎవరైనా SEOCకి సమాచారం ఇవ్వాలని అధికారులు కోరారు. ఇందుకోసం టోల్‌ఫ్రీ నంబర్‌ 1070, మొబైల్ నంబర్‌ 9445869843లను సంప్రదించవచ్చని ప్రభుత్వం కోరింది.

04/06/2023 15:12(IST)

మృతుల సంఖ్య 288 మంది కాదు 275: ఒడిశా సీఎస్‌

కోరమాండల్‌ రైలు దుర్ఘటనలో 288 మంది మృతి చెందినట్లు వెల్లడించిన అధికారులు.. తాజాగా ఆ సంఖ్యను సవరించారు. లెక్కింపులో పొరపాటువల్ల మృతుల సంఖ్య 288 అని పేర్కొన్నామని, నిజానికి ఈ ఘటనలో మృతి చెందిన వారు 275 మంది అని తాజాగా ఒడిశా సీఎస్‌ వెల్లడించారు.

04/06/2023 14:31(IST)

ఓ రైలు రద్దు.. మరో రైలు రూట్‌ ఛేంజ్‌

కోరమాండల్‌ దుర్ఘటన నేపథ్యంలో ఇవాళ చెన్నై సెంట్రల్‌ నుంచి హవ్‌డా వెళ్లాల్సిన హవ్‌డా మెయిల్‌ను రద్దు చేస్తున్నట్లు దక్షిణమధ్య రైల్వే ప్రకటించింది. మరోవైపు సికింద్రాబాద్‌ నుంచి గువాహటి వెళ్లాల్సిన ఎక్స్‌ప్రెస్‌ రైలును ఖరగ్‌పుర్‌, టాటా,రూర్కలా, ఝార్సుగూడ మీదుగా మళ్లించనున్నారు.

04/06/2023 14:16(IST)

ప్రమాద తీవ్రతకు ఇదీ ఓ కారణం : రైల్వే బోర్డు

‘ఒడిశా రైలు ప్రమాద ఘటనలో గూడ్స్ రైలు పట్టాలు తప్పలేదు. అయితే, ఆ గూడ్స్ రైలులో ఇనుప ఖనిజం ఉన్నందున.. దాన్ని ఢీకొన్న కోరమాండల్ ఎక్స్‌ప్రెస్‌పై తీవ్ర ప్రభావం పడింది. ఇది భారీ సంఖ్యలో మరణాలు, గాయాలకు దారితీసింది. ఈ క్రమంలోనే పట్టాలు తప్పిన కోరమాండల్ ఎక్స్‌ప్రెస్ బోగీలు డౌన్‌లైన్‌లోకి వచ్చి.. దానిపై 126 కి.మీ వేగంతో వెళ్తోన్న యశ్వంత్‌పూర్ ఎక్స్‌ప్రెస్ చివరి రెండు బోగీలను ఢీకొట్టాయి’ అని రైల్వే బోర్డు (ఆపరేషన్ అండ్ బిజినెస్ డెవలప్‌మెంట్) సభ్యురాలు జయవర్మ సిన్హా వెల్లడించారు. బాధిత కుటుంబీకులు హెల్ప్‌లైన్ నంబర్ 139ను సంప్రదించవచ్చని సూచించారు. వారి ప్రయాణం, ఇతర ఖర్చులు భరిస్తామని తెలిపారు.

మరింత సమాచారం కోసం క్లిక్‌ చేయండి

04/06/2023 14:03(IST)

382 మందికి కొనసాగుతోన్న చికిత్స..

ఒడిశా ముఖ్యమంత్రి నవీన్‌ పట్నాయక్‌ (Naveen Patnaik) ఆదివారం ప్రధాని నరేంద్ర మోదీ (Narendra Modi)తో ఫోన్‌లో మాట్లాడారు. ప్రమాదానికి సంబంధించిన తాజా పరిస్థితుల (Train Accident Latest Situation)ను వివరించారు. ముఖ్యంగా గాయపడిన ప్రయాణికులకు పూర్తిస్థాయిలో వైద్యసేవలు అందిస్తున్నట్లు చెప్పారు. ‘ప్రమాద అనంతరం రాష్ట్రంలోని వివిధ ప్రభుత్వ, ప్రైవేటు ఆసుపత్రుల్లో మొత్తం 1,175 మంది క్షతగాత్రులు చేశారు. వారిలో 793 మంది ఇప్పటికే డిశ్ఛార్జి అయ్యారు. ప్రస్తుతం 382 మంది ప్రయాణికులు చికిత్స పొందుతున్నారు. గాయపడినవారిలో చాలామంది పరిస్థితి నిలకడగా ఉంది’ అని సీఎం పట్నాయక్‌ తెలిపారు.

04/06/2023 14:00(IST)

సిగ్నలింగ్‌లో లోపమే కారణం..: రైల్వే బోర్డు

దిల్లీ: సిగ్నలింగ్‌ (Signalling)లో సమస్య కారణంగా ఒడిశా రైలు ప్రమాదం (Odisha Train Accident) చోటుచేసుకున్నట్లు ప్రాథమిక దర్యాప్తులో తేలిందని రైల్వే బోర్డు (Railway Board) తెలిపింది. అయితే, ఈ ఘటనపై రైల్వే సేఫ్టీ కమిషనర్ (Commissioner of Railway Safety) నుంచి పూర్తిస్థాయి నివేదిక రావాల్సి ఉందని వెల్లడించింది. ఈ ఘటనలో కోరమాండల్ ఎక్స్‌ప్రెస్ మాత్రమే ప్రమాదానికి గురయినట్లు తెలిపింది. ఆ సమయంలో రైలు దాదాపు గంటకు 128 కి.మీ వేగంతో ఉన్నట్లు పేర్కొంది. అయితే, అతి వేగం ప్రమాదానికి కారణం కాదని పేర్కొంది.

04/06/2023 13:59(IST)

8 మందిని ఇంకా కాంటాక్ట్‌ చేయలేకపోయాం: తమిళనాడు ప్రభుత్వం

దుర్ఘటనకు గురైన కోరమాండల్‌ ఎక్స్‌ప్రెస్‌లో తమిళనాడుకు చెందిన మొత్తం 127 మంది టికెట్‌ రిజర్వ్‌ చేసుకున్నట్లు ఆ రాష్ట్ర ప్రభుత్వం తెలిపింది. ఇప్పటి వరకు ఉన్న సమాచారం ప్రకారం.. రాష్ట్రానికి చెందిన ఎవరూ మరణించలేదని ఓ ప్రకటనలో తెలిపింది. అయితే, ఎనిమిది మందిని మాత్రం ఇంకా సంప్రదించలేకపోయామని పేర్కొంది. మిగతా వారంతా సురక్షితంగా ఉన్నారని వెల్లడించింది.

04/06/2023 13:44(IST)

క్షతగాత్రుల వివరాలు వెబ్‌సైట్లలో..

రైలు ప్రమాదంలో తీవ్రంగా గాయపడిన వారి జాబితాను ఒడిశా ప్రభుత్వం మూడు వెబ్‌సైట్లలో అప్‌లోడ్‌ చేసింది. ఇప్పటికే ఈ ప్రమాదంలో గాయపడిన పలువురు వేర్వేరు ఆస్పత్రుల్లో చికిత్స పొందుతున్నారు. ఈ వెబ్‌సైట్లలో ప్రయాణికుల ఫొటోలు ఇతర వివరాలను కూడా పొందు పర్చినట్లు ఆ రాష్ట్ర ప్రభుత్వం పేర్కొంది.

04/06/2023 13:23(IST)

పశ్చిమబెంగాల్‌ బాధితుల కోసం ఉచిత బస్సులు..

పశ్చిమబెంగాల్‌కు చెందిన బాధితులను కోల్‌కతా చేర్చేందుకు భువనేశ్వర్‌, కటక్‌, పురి ప్రాంతాల నుంచి ఉచిత బస్సులను ఏర్పాటు చేసినట్లు ఒడిశా ప్రభుత్వం ప్రకటించింది. ఇప్పటికే ఇక్కడి నుంచి కోల్‌కతాకు రైలు సేవలు నిలిచిపోయాయి. ఈ ప్రయాణ ఖర్చులను ముఖ్యమంత్రి సహాయ నిధి భరిస్తుందని ఒడిశా సీఎంవో ఓ ప్రకటనలో పేర్కొంది. ఈ ఘటనలో మరణించిన వారిలో అత్యధిక మంది పశ్చిమబెంగాల్‌లోని సుందర్‌బన్స్ ప్రాంతానికి చెందిన దక్షిణ 24 పరగాణల జిల్లాకు చెందిన వారున్నారు.

04/06/2023 13:00(IST)

28 మంది ఇంకా ఫోన్‌కి అందుబాటులోకి రాలేదు: మంత్రి బొత్స

ప్రమాదానికి గురైన కోరమాండల్‌, యశ్వంత్‌పూర్‌ ఎక్స్‌ప్రెస్‌ల్లో మొత్తం 695 మంది ఏపీ వాసులు ప్రయాణించారని మంత్రి బొత్స సత్యనారాయణ తెలిపారు. వారిలో 553 మంది సురక్షితంగా ఉన్నారని.. 92 మంది తాము ట్రావెల్‌ చేయలేదని తెలిపినట్లు చెప్పారు. మిగిలిన వారిలో 28 మంది ఇంకా ఫోన్‌కి అందుబాటులోకి రాలేదన్నారు. మరో 22 మంది స్వల్పంగా గాయపడినట్లు బొత్స వివరించారు. విశాఖపట్నంలో నిర్వహించిన మీడియా సమావేశంలో మంత్రి వివరాలు వెల్లడించారు.

04/06/2023 12:54(IST)

రైలు ప్రమాదంపై సుప్రీం కోర్టులో పిల్‌..

ఒడిశాలో కోరమాండల్‌ ఎక్స్‌ప్రెస్‌ రైలు ప్రమాదానికి గురైన ఘటనపై సుప్రీం కోర్టులో ప్రజాహిత వాజ్యం దాఖలైంది. ఈ ప్రమాదంలో ఇప్పటి వరకు 290 మందికిపైగా మరణించగా.. 1,100 మంది గాయపడిన విషయం తెలిసిందే. ఈ ఘటన నేపథ్యంలో రైల్వేలో రిస్క్‌ అండ్‌ సేఫ్టీ కొలమానాలను విశ్లేషించి సూచనలు జారీ చేసేలా ఓ కమిటీని ఏర్పాటు చేయాలని ఈ పిటిషన్‌లో కోరారు. సుప్రీం కోర్టు విశ్రాంత న్యాయమూర్తి నేతృత్వంలో నిపుణులను సభ్యులుగా ఏర్పాటు చేసేలా ప్రభుత్వానికి డైరెక్షన్స్‌ ఇవ్వాలని విజ్ఞప్తి చేశారు.

04/06/2023 12:38(IST)

294కు చేరిన మృతుల సంఖ్య..

ఒడిశా రైలు ప్రమాదంలో మృతుల సంఖ్య 294కు చేరింది. ఈ ఉదయం ట్రాక్‌ పక్కన మరో నాలుగు మృతదేహాలు లభ్యమైనట్లు అధికారులు తెలిపారు. మరోవైపు సహాయక చర్యలు పూర్తయ్యాయి. ట్రాక్‌ పునరుద్ధరణ పనులు కొనసాగుతున్నాయి.

04/06/2023 12:28(IST)

అతి కష్టం మీద కోరమాండల్‌ ఇంజిన్‌ తొలగింపు..

ఒడిశా రైలు ప్రమాద ఘటనాస్థలిలో ట్రాక్ పునరుద్ధరణ పనులు జరుగుతున్నాయి. గూడ్స్‌ రైలు బోగీల పైకి ఎక్కిన కోరమాండల్‌ ఎక్స్‌ప్రెస్‌ ఇంజిన్‌ను తొలగించారు. అతికష్టంగా ఈ ఇంజిన్‌ను తొలగించినట్లు సహాయక సిబ్బంది తెలిపారు. తెగిపోయిన రైల్వే పవర్‌ లైన్‌ను సిబ్బంది పునరుద్ధరిస్తున్నారు.

04/06/2023 12:07(IST)

ఒడిశా రైలు ప్రమాదంపై ప్రపంచ దేశాల విచారం

ఒడిశాలో ఘోరరైలు ప్రమాదం (Odisha Train Accident)పై ప్రపంచ దేశాలు విచారం వ్యక్తంచేశాయి. ఐరాసతో పాటు వివిధ దేశాలు.. మృతుల కుటుంబాలకు సంతాపం తెలిపాయి. రష్యా, చైనా, బ్రిటన్, ఫ్రాన్స్ దేశాల అధినేతలు.. ప్రధాని నరేంద్ర మోదీకి సంఘీభావం ప్రకటించాయి. క్షతగాత్రులంతా త్వరగా కోలుకోవాలని ఆకాంక్షించాయి.

04/06/2023 11:42(IST)

ట్రాక్‌ పునరుద్ధరణ చర్యల్లో 1,000 మంది సిబ్బంది.. భారీ యంత్రాలు..

బాలేశ్వర్‌లో కోరమాండల్‌ ఎక్స్‌ప్రెస్‌ ప్రమాదానికి గురైన ప్రదేశంలో పరిస్థితిని సాధారణ స్థితికి తీసుకొచ్చేందుక భారీ సంఖ్యలో అధికారులు, సిబ్బంది పనిచేస్తున్నారు. దాదాపు 1,000 మంది రైల్వే సిబ్బంది, ఏడు పాకెటింగ్‌ యంత్రాలు, భారీ రైల్వే క్రేన్‌, నాలుగు రోడ్‌క్రేన్లు నిర్విరామంగా కృషి చేస్తున్నాయి. బాలేశ్వర్‌లో రైళ్ల రాకపోకలను పునరుద్ధరించడమే లక్ష్యంగా ఇక్కడ పనులు జరుగుతున్నాయి. ఇప్పటి వరకు ఇక్కడ 288 మృతదేహాలను వెలికి తీయగా.. 1,100 మంది గాయపడినట్లు గుర్తించారు.

04/06/2023 11:32(IST)

రైలు ప్రమాదంపై సింగపూర్‌ ప్రధాని దిగ్భ్రాంతి..

ఒడిశా రైలు ప్రమాదంపై సింగపూర్‌ ప్రధాని లీ సీన్‌ లూంగ్‌ తీవ్ర దిగ్భ్రాంతి వ్యక్తం చేశారు. ఈ మేరకు ప్రధాని మోదీకి ఓ లేఖ రాశారు. ఈ దుర్ఘటన ఎంతో బాధాకరమని.. మృతుల కుటుంబాలకు సానుభూతి ప్రకటించారు.

04/06/2023 10:54(IST)

రూ.5 లక్షల పరిహారం.. ప్రకటించిన ఒడిశా ప్రభుత్వం

ఒడిశాకు చెందిన రైలు ప్రమాద బాధితులకు ఆ రాష్ట్ర ప్రభుత్వం ఆర్థిక సాయం ప్రకటించింది. చనిపోయిన వారి కుటుంబాలకు రూ.5 లక్షలు, తీవ్రంగా గాయపడిన వారికి రూ.1 లక్ష చొప్పున పరిహారం అందజేస్తామని సీఎం నవీన్‌ పట్నాయక్‌ కార్యాలయం వెల్లడించింది.

04/06/2023 10:31(IST)

ఎన్డీఆర్‌ఎఫ్‌ను తొలుత అప్రమత్తం చేసింది అతడే..

షాలీమార్‌-చెన్నై కోరమాండల్‌ సూపర్‌ఫాస్ట్‌ ఎక్స్‌ప్రెస్‌ రైలు ప్రమాదానికి గురైన దాదాపు అర్ధగంటలోపే ఎన్డీఆర్‌ఎఫ్‌ తొలి బృందం ఘటనాస్థలికి చేరుకొని సహాయక చర్యలు చేపట్టింది. ఈ బృందం అంత వేగంగా అక్కడకు చేరుకోవడానికి కోరమాండల్‌లో ప్రయాణిస్తున్న ఓ ఎన్డీఆర్‌ఎఫ్‌ జవాన్‌ కారణం. ప్రమాదం జరిగిన నిమిషాల్లోనే జీపీఎస్‌ లొకేషన్‌, ప్రమాదం ఫొటోలను ఉన్నతాధికారులకు చేరవేశాడు.

మరింత సమాచారం కోసం క్లిక్‌ చేయండి

04/06/2023 10:15(IST)

నా హృదయం ముక్కలైంది: అమెరికా అధ్యక్షుడు బైడెన్‌

ఒడిశాలో జరిగిన ఘోర రైలు ప్రమాదంపై అమెరికా అధ్యక్షుడు జో బైడెన్‌ తీవ్ర దిగ్భ్రాంతి వ్యక్తం చేశారు. ఈ హృదయ విదారక వార్త వినగానే తన మనసు చలించిపోయిందని తెలిపారు. మృతుల కుటుంబాలకు తన ప్రగాఢ సానుభూతి ప్రకటించారు.

పూర్తి వార్త కోసం క్లిక్‌ చేయండి

04/06/2023 10:10(IST)

బుధవారానికి పనులు పూర్తిచేస్తాం: రైల్వే మంత్రి అశ్వినీ వైష్ణవ్‌

ఘటనాస్థలంలో రైల్వే ట్రాక్‌ పునరుద్ధరణ పనులను రైల్వేశాఖ మంత్రి అశ్వినీ వైష్ణవ్‌ మరోసారి పరిశీలించారు. ట్రాక్‌ను నేడు పునరుద్ధరిస్తామని.. బుధవారం ఉదయానికి మిగతా పనులను పూర్తిచేసి రైళ్ల రాకపోకలు కొనసాగేలా లక్ష్యాన్ని నిర్దేశించుకున్నట్లు తెలిపారు. ప్రమాదానికి మూల కారణమేంటో తాము గుర్తించామన్నారు.

04/06/2023 08:56(IST)

పట్టాలెందుకు తప్పుతున్నాయి?

రైల్వే ప్రమాదం అనగానే తరచూ వినిపించే పదం పట్టాలు తప్పిందని! తాజాగా ఒడిశా ఘటనలోనూ కారణాలు స్పష్టంగా తెలియకున్నా రైలు పట్టాలు తప్పిందనేది తెలిసిపోతోంది.

ఇదొక్కటనే కాదు... మన దేశంలో ప్రతి ఏటా రైల్వే ప్రమాదాలు సర్వసాధారణమైపోయాయి. అధికారిక లెక్కల ప్రకారం 2021లో 18 వేల రైలు ప్రమాదాలు చోటు చేసుకున్నాయి. వాటిలో ఎక్కువ పట్టాలు తప్పటం వల్లే! అసలెందుకింతగా దేశంలో రైల్వే ప్రమాదాలు జరుగుతున్నాయి? ఎందుకని రైళ్లు పదేపదే పట్టాలు తప్పుతున్నాయి?

పూర్తి కథనం కోసం క్లిక్‌ చేయండి

04/06/2023 08:21(IST)

వందలాది రైల్వే కార్మికులతో నిరంతరాయంగా సహాయక చర్యలు..

ఘటనా స్థలంలో ట్రాక్‌ పునరుద్ధరణ పనులు యుద్ధప్రాతిపదికన కొనసాగుతున్నాయి. గూడ్స్‌ రైలు పైకి ఎక్కిన కోరమాండ్‌ ఎక్స్‌ప్రెస్‌ ఇంజిన్‌ను కిందికి దించిన రైల్వే సిబ్బంది.. అక్కడ తెగిపోయిన పవన్‌ లైన్‌కు మరమ్మతు చేపట్టారు. శుక్రవారం రాత్రి నుంచి సహాయక చర్యలు నిరంతరాయంగా కొనసాగుతున్నాయి. వందల సంఖ్యలో రైల్వే కార్మికులు, నిపుణులు, ఇంజినీర్‌లు పనిచేస్తున్నారు. మరోవైపు ట్రాక్‌ పక్కన ఆదివారం ఉదయానికి మరో నాలుగు మృతదేహాలు ఉండటంతో వాటిని అంబులెన్స్‌లో ఆస్పత్రికి తరలించారు.

04/06/2023 08:17(IST)

తేరుకునేలోగా తునాతునకలు.. కోరమాండల్‌ ఎక్స్‌ప్రెస్‌లోని కృష్ణా జిల్లా వాసుల వేదన

‘‘వేగంగా వెళ్తున్న రైలు..ఒక్కసారిగా భారీ కుదుపు.. అంతలోనే పెద్ద శబ్దం.. క్షణాల్లో బోగీలు ఎగిరిపడ్డాయి.. ఏమైందో అర్థం కాలేదు.. తేరుకొని చూసేలోగా... తునాతునకలైన రైళ్లు.. ప్రయాణికుల శరీర భాగాలు.. భయంతో వణికిపోయాం.. ఘటనాస్థలిలో విగతజీవులుగా కొందరు.. తీవ్ర గాయాలై మరికొందరు.. మిన్నంటిన ఆర్తనాదాలు.. బాధితుల హాహాకారాలతో గుండె తరుక్కుపోయిందని’’ కోరమాండల్‌ ఎక్స్‌ప్రెస్‌లో ప్రయాణించి.. ప్రాణాలతో బయటపడిన ఉమ్మడి కృష్ణా, గుంటూరు జిల్లాల ప్రయాణికులు ‘‘ఈనాడు’’తో తమ ఆవేదనను పంచుకున్నారు. శనివారం రాత్రి విజయవాడ చేరిన మృత్యుంజయులు.. ఆప్తులను చూసి ఉద్వేగంతో బోరున విలపించారు.

పూర్తి వివరాల కోసం క్లిక్‌ చేయండి

04/06/2023 07:53(IST)

భారతీయ రైల్వేలో మహా విషాదాలివీ..

మన దేశంలో రైల్వే తన ప్రస్థానాన్ని మొదలుపెట్టి 170 ఏళ్లు అయ్యింది. ప్రగతిపథంలో దూసుకెళుతూ కోట్ల మంది ప్రయాణికులకు కీలక రవాణా మార్గంగా నిలిచింది. ఈ క్రమంలో మానవ తప్పిదాలు, సిగ్నలింగ్‌ వ్యవస్థలో లోపం, ప్రకృతి వైపరీత్యాల కారణంగా పలు దుర్ఘటనలు కూడా చోటుచేసుకున్నాయి.

పూర్తి కథనం కోసం క్లిక్ చేయండి

04/06/2023 07:07(IST)

ట్రాక్‌ మారడంతోనే ‘ఘోరం!’.. అంతా క్షణాల్లో..

ఒడిశాలో బాలేశ్వర్‌ సమీపంలోని బహానగాబజార్‌ స్టేషన్‌ వద్ద జరిగిన ఘోర రైలు ప్రమాద ఘటనకు ముఖ్య కారణం.. ప్రధాన లైన్‌లో వెళ్లాల్సిన కోరమాండల్‌ ఎక్స్‌ప్రెస్‌, ఆకస్మికంగా లూప్‌లైన్‌లోకి దూసుకెళ్లి అక్కడున్న గూడ్స్‌ను ఢీకొనడమేనని రైల్వే అధికారులు పేర్కొంటున్నారు. ఈ ప్రమాదానికి సంబంధించి అధికారులు శనివారం ప్రాథమిక నివేదిక రూపొందించారు.

పూర్తి వివరాల కోసం క్లిక్‌చేయండి

04/06/2023 07:03(IST)

90 రైళ్ల రద్దు.. 46 రైళ్ల దారి మళ్లింపు

ఒడిశాలో జరిగిన ఘోర ప్రమాదంతో దక్షిణ, ఆగ్నేయ రైల్వేజోన్లలో 90 రైళ్లను రద్దు చేసి, 46 రైళ్లను దారి మళ్లించినట్లు రైల్వేశాఖ ప్రకటించింది. 11 రైళ్ల గమ్య స్థానాలను కుదించినట్లు అధికారులు తెలిపారు. ప్రమాదం జరిగిన సమయానికి ఖరగ్‌పుర్‌లో ఉన్న చెన్నై సెంట్రల్‌ - హావ్‌డా (12480) రైలును జరోలీ మీదుగా పంపించారు. అలాగే వాస్కోడగామా - షాలిమార్‌ (18048) రైలును కటక్‌ మీదుగా పంపారు. సికింద్రాబాద్‌ - షాలిమార్‌ వీక్లీ (22850) రైలును కటక్‌ మీదుగా నడుపుతున్నారు.

పూర్తి కథనం కోసం క్లిక్‌ చేయండి

04/06/2023 06:49(IST)

కోరమాండల్‌ ఇంజిన్‌ను కిందికి దించిన సిబ్బంది

ఘటనాస్థలంలో ట్రాక్‌ పునరుద్ధరణ పనులు వేగంగా సాగుతున్నాయి. ప్రమాదంలో గూడ్స్‌ బోగీపైకి ఎక్కిన కోరమాండల్‌ ఇంజిన్‌ను భారీ క్రేన్ల సహాయంతో రైల్వే సిబ్బందికి కిందికి దించారు.

04/06/2023 04:34(IST)

నిద్ర లేకుండా కష్టపడుతున్నాం

సహాయ చర్యల్లో మూడు ఎన్డీఆర్‌ఎఫ్‌ బలగాలు శుక్రవారం రాత్రి నుంచి శ్రమిస్తున్నాయి. శనివారం ఎన్డీఆర్‌ఎఫ్‌ ఉద్యోగి భాస్కర్‌రెడ్డి మరో ఇద్దరితో కలసి ‘న్యూస్‌టుడే’తో మాట్లాడుతూ శుక్రవారం రాత్రి నుంచి నిద్ర లేకుండా బాధితులను రక్షించేందుకు ప్రయత్నిస్తున్నట్లు చెప్పారు. మరో మూడు బోగీలు ఒకదానిపై ఒకటి ఉండడం వల్ల అందులో కూడా మృతదేహాలు ఉన్నట్లు భావిస్తున్నామన్నారు. గ్యాస్‌ కట్టర్లతో బోగీలను కత్తిరిస్తూ లోపల ఉన్న మృతదేహాలను బయటకు తీసేందుకు ప్రయత్నిస్తున్నట్లు వివరించారు. కష్టమైనా పలువురిని ఆదుకున్నందుకు ఆనందంగా ఉందన్నారు.

04/06/2023 04:28(IST)

తల్లి పెద్దకర్మకు వచ్చి... అనంత లోకాలకు..

ఒడిశాలోని బాలేశ్వర్‌ ప్రాంతానికి చెందిన రమేష్‌ జెనా అనే యువకుడు తల్లి పెద్దకర్మలో పాల్గొనేందుకు చెన్నై నుంచి బాలేశ్వర్‌ వచ్చాడు. తిరిగి చెన్నై వెళుతుండగా రైళ్ల ప్రమాదంలో దుర్మరణం పాలయ్యాడు. ఈయన సోదరుడు సురేష్‌ బాలేశ్వర్‌లో ‘న్యూస్‌టుడే’తో మాట్లాడుతూ రమేష్‌ 14 ఏళ్ల క్రితం చెన్నై వెళ్లి స్థిరపడ్డాడని, తల్లి చనిపోవడంతో ఇంటికి వచ్చాడన్నారు. నాలుగు రోజుల క్రితం తల్లి పెద్దకర్మ జరిగిందని, తర్వాత తిరిగి చెన్నై బయలుదేరాడన్నారు. శుక్రవారం సాయంత్రం ఆరు గంటలకు రైల్వేస్టేషన్లో తాను ఆయనను విడిచిపెట్టానని, తనను వెళ్లిపోమన్నాడని, రైలు ఎక్కిన తర్వాత ఫోన్‌ చేస్తానని చెప్పాడన్నారు. ఇంతలో కోరమాండల్‌ ఎక్స్‌ప్రెస్‌ ప్రమాదానికి గురైందన్న సమాచారం తెలుసుకుని రమేష్‌కు ఫోన్‌ చేసినా స్పందించలేదని, కొంతసేపటి తర్వాత మళ్లీ చేస్తే వేరెవరో ఫోన్‌ లిఫ్ట్‌ చేశారని, ఫోన్‌ యజమాని (రమేష్‌) మృతిచెందాడని చెప్పాడన్నారు.

04/06/2023 04:05(IST)

ఏమయ్యారో.. ఎక్కడున్నారో!.. పనిచేయని 141 మంది ప్రయాణికుల ఫోన్లు

ఒడిశాలో జరిగిన ఘోర రైలు ప్రమాదంలో చిక్కుకున్నవారు ఏమయ్యారో, ఎక్కడున్నారో అనే అంశం ఆందోళన కలిగిస్తోంది. ప్రమాదానికి గురైన రెండు ప్రయాణికుల రైళ్లలో రాష్ట్రానికి చెందినవారు పెద్ద సంఖ్యలోనే ఉన్నారు. వీరిలో ఎంతమంది సురక్షితంగా ఉన్నారన్న విషయంపై శనివారం రాత్రి వరకూ స్పష్టత రాలేదు. ప్రయాణించిన వారిలో చాలామంది ఫోన్లు పని చేయడం లేదు. స్విచ్ఛాఫ్‌లో ఉన్నాయి. కొన్ని రింగవుతున్నా సమాధానం ఇవ్వడం లేదు. కొన్ని బీప్‌ శబ్దం వచ్చి ఆగిపోతున్నాయి. వారంతా ఏమయ్యారు, ఎలా ఉన్నారో అధికారులూ చెప్పలేకపోతున్నారు. ప్రమాదానికి గురైన కోరమాండల్‌ ఎక్స్‌ప్రెస్‌, యశ్వంత్‌పూర్‌- హావ్‌డా ఎక్స్‌ప్రెస్‌ రైళ్లలో ఏపీలోని విశాఖ, విజయవాడ, రాజమహేంద్రవరం, ఏలూరు, తాడేపల్లిగూడెం, ఇతర ప్రాంతాల నుంచి 571 మంది రిజర్వేషన్‌ చేయించుకున్నారు. ఇందులో 141 మంది ఫోన్లు పనిచేయటం లేదు.

03/06/2023 22:22(IST)

విజయవాడ చేరుకున్న ప్రత్యేక రైలు

బాలేశ్వర్‌లో రైలు ప్రమాద స్థలం నుంచి సురక్షితంగా బయటపడిన ప్రయాణికులను స్వస్థలాలకు తరలిస్తున్నారు. ఈ మేరకు ఇవాళ మధ్యాహ్నం ఒడిశా నుంచి బయల్దేరిన ప్రత్యేక రైలు విజయవాడ చేరుకుంది. కృష్ణా, ఎన్టీఆర్‌ జిల్లాలకు చెందిన ఏడుగురు ప్రయాణికులు ఈ రైలులో వచ్చారు. వీరిని రైల్వేస్టేషన్ నుంచి కలెక్టర్‌ దిల్లీరావు వారివారి ఇళ్లకు పంపారు.

03/06/2023 22:02(IST)

ఒడిశా రైలు దుర్ఘటన.. ఏ క్షణంలో ఏం జరిగింది?

ఒడిశా రైలు దుర్ఘటనలో (Odisha Train Tragedy) మృతుల సంఖ్య క్రమంగా పెరుగుతోంది. ఇప్పటివరకు 288 మంది మృతి చెందినట్లు అధికారులు వెల్లడించారు. మరో 56 మంది పరిస్థితి విషమంగా ఉన్నట్లు తెలుస్తోంది. మృతుల సంఖ్య ఇంకా పెరిగే అవకాశం ఉన్నట్లు అధికారులు భావిస్తున్నారు. శుక్రవారం రాత్రి రైలు ప్రమాదం జరిగిన సమయంలో ఏ క్షణం ఏం జరిగిందనేది అధికారులు ఆరా తీశారు.

పూర్తి సమాచారం కోసం క్లిక్‌ చేయండి

03/06/2023 21:38(IST)

ఒడిశా రైలు ప్రమాద ఘటనలో సిక్కోలు వాసి మృతి

సంతబొమ్మాలి: మండలంలోని జగన్నాథపురం గ్రామానికి చెందిన గురుమూర్తి(63) బాలేశ్వర్‌ వద్ద జరిగిన రైలు ప్రమాదంలో మృతి చెందాడు. శనివారం సాయంత్రం కుటుంబ సభ్యులు దహన సంస్కారాలు పూర్తి చేశారు. గురుమూర్తి మే 30న పింఛన్ తీసుకోవడానికి జగన్నాథపురం గ్రామానికి వచ్చారు. అనంతరం శుక్రవారం తిరుగు ప్రయాణంలో యశ్వంత్‌పూర్‌- హౌరా ఎక్స్‌ప్రెస్‌ ఎక్కాడు. ఈ క్రమంలో బాలేశ్వర్‌లో జరిగిన రైలు ప్రమాదంలో బోగీల మధ్య ఇరుక్కొని అక్కడికక్కడే మృతి చెందాడు. గత కొన్నేళ్లుగా గురుమూర్తి బాలేశ్వర్‌లో ఉంటూ జీవనం సాగిస్తున్నాడు. మృతునికి భార్య, ఇద్దరు కుమార్తెలు, ఇద్దరు కుమారులు ఉన్నారు.

03/06/2023 20:48(IST)

బాధితులను పరామర్శించిన తెదేపా ఎమ్మెల్యే అశోక్‌

తెదేపా అధినేత చంద్రబాబు ఆదేశాల మేరకు కటక్‌లోని ఎస్‌సీబీ వైద్య కళాశాల ఆసుపత్రిలో చికిత్స పొందుతున్న ఒడిశా రైలు ప్రమాద బాధితులను ఆ పార్టీ నేతలు పరామర్శించారు. ఇచ్ఛాపురం ఎమ్మెల్యే బెందాళం అశోక్‌, పాతపట్నం మాజీ ఎమ్మెల్యే కలమట వెంకటరమణ ఆస్పత్రికి వెళ్లి క్షతగాత్రుల బాగోగులు అడిగి తెలుసుకున్నారు. వైద్యులతో మాట్లాడి వారి ఆరోగ్య పరిస్థితిని గురించి ఆరా తీశారు.తెలుగు రాష్ట్రాల ప్రయాణికుల గురించి వివరాలు తెలుసుకున్నారు

03/06/2023 20:27(IST)

రాజకీయాలకు అతీతంగా ముందుకు రండి: ఖర్గే

రైలు ప్రమాద ఘటనలో బాధితులకు సాయం చేసేందుకు రాజకీయాలకు అతీతంగా ముందుకు రావాలని కాంగ్రెస్‌ జాతీయ అధ్యక్షుడు మల్లికార్జున ఖర్గే కోరారు. మృతుల కుటుంబాలకు తమ వంతు సాయాన్ని అందించాలని రాజకీయ పార్టీలను కోరారు.

03/06/2023 20:21(IST)

160 మృతదేహాలు ఎవరివో తెలియడం లేదు

ఇప్పటి వరకు 160 మృతదేహాలు ఎవరివో గుర్తించలేదని, వాటన్నిటినీ భువనేశ్వర్‌ తరలిస్తామని ఒడిశా చీఫ్‌ సెక్రెటరీ తెలిపారు. మరోవైపు రైలు శకలాల మధ్యలో ఇంకేమైనా మృతదేహాలు ఉన్నాయేమోనని గాలిస్తున్నారు.

03/06/2023 20:12(IST)

మరో 8 రైళ్ల రద్దు

రైలు ప్రమాద ఘటన నేపథ్యంలో సౌత్‌, సౌత్‌ ఈస్ట్‌ రైల్వే జోన్ల పరిధిలో ఇప్పటి వరకు 48 రైళ్లను తాత్కాలికంగా రద్దు చేస్తున్నట్లు రైల్వేశాఖ వెల్లడించింది. ఇప్పటికే 40 రైళ్లను రద్దు చేసినట్లు చెప్పిన భారతీయ రైల్వే.. తాజాగా మరో 8 రైళ్లను నిలిపివేసినట్లు పేర్కొంది. తాజాగా రద్దు చేసిన వాటిలో చెన్నై-హవ్‌డా మెయిల్‌, దర్బంగా - కన్యాకుమారి ఎక్స్‌ప్రెస్‌, కామాఖ్య-ఎల్‌టీటీ ఎక్స్‌ప్రెస్‌ రైళ్లు ఉన్నాయి. ఆదివారం నడవాల్సిన పట్నా-పూరి ప్రత్యేక రైలును కూడా రద్దు చేశారు. దక్షిణ రైల్వే పరిధిలో మంగుళూరు-సంత్రాగచి వివేక్‌ సూపర్‌ ఫాస్ట్‌ ఎక్స్‌ప్రెస్‌ కూడా తాత్కాలికంగా నిలిచిపోనుంది.

03/06/2023 19:52(IST)

సహాయక చర్యలకు సిద్ధంగా ఉన్నాం: తెలంగాణ ప్రభుత్వం

రైలు ప్రమాద ఘటనపై ఒడిశా ప్రభుత్వం, దక్షిణమధ్య రైల్వేశాఖ అధికారులను తెలంగాణ ప్రభుత్వం సంప్రదించింది. తగిన సహాయక చర్యలు, సహకారం అందించేందుకు సిద్ధంగా ఉన్నట్లు ప్రభుత్వ అధికారులు వారి దృష్టికి తీసుకెళ్లారు. సహాయక, పునరావాస కార్యక్రమాల్లో తోడ్పాటు అందిస్తామని చెప్పారు. మృతి చెందిన, క్షతగాత్రులైన వారిలో ఇప్పటి వరకు తెలంగాణకు చెందిన వారెవరూ లేరని అధికారులు వెల్లడించారు.

03/06/2023 19:28(IST)

ఉన్నత స్థాయి విచారణకు ఆదేశించిన రైల్వే శాఖ

ఒడిశా రైలు దుర్ఘటనపై ఉన్నత స్థాయి విచారణకు రైల్వేశాఖ ఆదేశించింది. ఇప్పటికే ఓ ప్రత్యేక కమిటీని ఏర్పాటు చేసిన రైల్వేశాఖ.. ప్రధాని సంఘటన స్థలాన్ని పరిశీలించిన అనంతరం ఉన్నత స్థాయి విచారణకు ఆదేశించడం గమనార్హం. మరోవైపు ప్రతిపక్షాల నుంచి కూడా విమర్శలు ఎదురవుతుండటంతో ప్రభుత్వం ఈ నిర్ణయం తీసుకున్నట్లు తెలుస్తోంది.

03/06/2023 19:11(IST)

20 ఏళ్లలో 3 సార్లు కోరమాండల్‌కు ప్రమాదం.. రెండు ఒడిశాలోనే!

ఒడిశాలో కోరమాండల్‌ ఎక్స్‌ప్రెస్‌ (Coromandel Express) ప్రమాద ఘటన యావత్‌ దేశాన్ని కుదిపేసింది. ఎన్నో కుటుంబాల్లో విషాదాన్ని నింపింది. దేశంలో జరిగిన అతిపెద్ద రైలు ప్రమాద ఘటనల్లో ఒకటిగా నిలిచింది. శుక్రవారం నాటి ఘటనతో కలిపి ఇదే కోరమాండల్‌ ఎక్స్‌ప్రెస్‌ గడిచిన 20 ఏళ్లలో మూడు సార్లు ప్రమాదానికి గురైంది. హవ్‌డా- చెన్నై మధ్య నడిచే ఈ రైలు.. మూడుసార్లూ చెన్నై వెళ్లే క్రమంలోనే ప్రమాదం చోటుచేసుకుంది. అదీ మూడుసార్లూ శుక్రవారం రోజే ప్రమాదం జరిగింది. ఇందులో రెండుసార్లు ఒడిశాలో, ఒకసారి ఏపీలో జరిగింది.

మరింత సమాచారం కోసం క్లిక్‌ చేయండి

03/06/2023 19:07(IST)

రాష్ట్రప్రభుత్వ చర్యలపై ఏపీ మంత్రుల సమీక్ష

రైలు ప్రమాద ఘటనలో రాష్ట్ర ప్రభుత్వం చేపడుతున్న చర్యలపై మంత్రులు బొత్స సత్యనారారాయణ, జోగి రమేశ్‌, కారుమూరి నాగేశ్వరరావు విశాఖపట్నంలో సమీక్ష నిర్వహించారు. ఎలాంటి చర్యలు తీసుకోవాలన్న దానిపై అధికారులకు దిశానిర్దేశం చేశారు.

03/06/2023 18:58(IST)

చెన్నై నుంచి ప్రమాద స్థలికి ప్రత్యేక రైలు

ఒడిశాలోని బాలేశ్వర్‌ జిల్లాలో రైలు ప్రమాదం జరిగిన ప్రదేశానికి ఓ ప్రత్యేక రైలును నడుపుతోంది. ఇవాళ సాయంత్రం 6.30కి చెన్నై సెంట్రల్‌లో ప్రారంభమైన ఈ రైలు..భువనేశ్వర్‌ వరకు వెళ్తుంది. రైలు ప్రమాద ఘటన బాధితుల బంధువులు, కుటుంబ సభ్యుల విజ్ఞప్తి మేరకు ఈ నిర్ణయం తీసుకున్నట్లు రైల్వే వర్గాలు వెల్లడించాయి. ఈ రైలులో ప్రయాణించాలనుకునేవారు హెల్ప్‌లైన్‌ నెంబర్‌కు ఫోన్‌ చేసి రిజిస్టర్‌ చేసుకోవాలని అన్నారు.

03/06/2023 18:51(IST)

ఇద్దరు లోకో పైలట్లు.. ఇద్దరు గార్డులకు గాయాలు

ఒడిశాలో మూడు రైళ్లు ఢీకొన్న ఘటనలో ఇద్దరు లోకో పైలట్లు, ఇద్దరు గార్డులు గాయపడ్డారు. వీరంతా ఒడిశాలోని వేర్వేరు ఆస్పత్రుల్లో చికిత్స పొందుతున్నారని రైల్వే వర్గాలు తెలిపాయి. గూడ్స్‌ రైలు లోకో పైలట్‌, గార్డ్‌ ప్రమాదం నుంచి తప్పించుకున్నారని రైల్వే వర్గాలు తెలిపాయి. ‘‘కోరమాండల్‌ ఎక్స్‌ప్రెస్‌లోని లోకో పైలట్‌, అసిస్టెంట్‌ లోకోపైలట్‌, అదే ట్రైన్‌లోని గార్డు గాయపడ్డారు. బెంగళూరు-హవ్‌డా సూపర్‌ ఫాస్ట్‌ రైలులోని గార్డుకు ఈ ప్రమాదంలో గాయాలయ్యాయి’’ అని రైల్వే అధికారులు తెలిపారు.

03/06/2023 18:25(IST)

288కి చేరిన మృతుల సంఖ్య

ఒడిశా రైలు ప్రమాదఘటనలో మృతుల సంఖ్య 288కి చేరింది. అధికారులు తాజాగా వెల్లడించిన వివరాల ప్రకారం..56 మంది తీవ్రంగా గాయపడగా. మరో 747 మందికి స్వల్పంగా గాయాలయ్యాయి. మొత్తంగా ఈ ఘటనలో 1091 మంది బాధితులైనట్లు రైల్వే అధికారులు చెబుతున్నారు.

03/06/2023 18:09(IST)

‘కోరమాండల్‌’ కాస్త ముందొచ్చుంటే మరింత ఘోరం జరిగేది!

ఒడిశా (Odisha)లోని బాలేశ్వర్‌ జిల్లాలో జరిగిన ఘోర రైలు ప్రమాదం యావత్‌ దేశాన్ని తీవ్రంగా కలచివేసింది. ప్రమాదం ఎలా జరిగిందన్న దానిపై భిన్న వాదనలు వినిపిస్తున్నాయి. మూడు రైళ్లు ఎలా ఢీకొన్నాయనే దానిపై పలు సందేహాలు వ్యక్తమవుతున్నాయి. రైల్వే అధికారులు మాత్రం సిగ్నల్‌ లోపం కారణంగా కోరమాండల్‌ ఎక్స్‌ప్రెస్‌ (Coromandel Express) గూడ్సు రైలు ఆగి ఉన్న లూప్‌లైన్‌లోకి వెళ్లడం వల్లే ఘోరం జరిగిందని ప్రాథమిక దర్యాప్తులో తేల్చారు. ఈ దుర్ఘటనపై రైల్వే కన్సల్టేటివ్ కమిటీ మాజీ సభ్యులు ఉప్పులూరి శశిధర్ తన అభిప్రాయాన్ని వెల్లడించారు.

మరింత సమాచారం కోసం క్లిక్‌ చేయండి

03/06/2023 18:03(IST)

రైల్వే వ్యవస్థను నాశనం చేసేశారు: లాలూ ప్రసాద్‌ యాదవ్‌

పట్నా: ఒడిశా రైలు ప్రమాద ఘటనపై రైల్వేశాఖ మాజీ మంత్రి లాలూప్రసాద్‌ యాదవ్‌ స్పందించారు. ఈ దుర్ఘటనపై అత్యున్నత స్థాయి దర్యాప్తు జరపాలని డిమాండ్ చేశారు. భాజపా ప్రభుత్వం అధికారంలోకి వచ్చిన తర్వాత రైల్వే వ్యవస్థను నాశనమైందని విమర్శించారు.

03/06/2023 17:57(IST)

కోరమాండల్‌ ఎక్స్‌ప్రెస్‌లో 267 మంది ఏపీ ప్రయాణికులు సురక్షితం

కోరమాండల్‌ ఎక్స్‌ప్రెస్‌ రైలులో ప్రయాణించిన ఏపీవారిలో 267 మంది సురక్షితంగా బయటపడినట్లు అధికారులు వెల్లడించారు. వీరిలో విశాఖ-165, రాజమహేంద్రవరం-22, విజయవాడ -80 మంది ఉన్నారు. 20 మందికి స్వల్ప గాయాలయ్యాయి. 113 మంది ఫోన్లు స్విచ్చాఫ్‌ వస్తోంది. మరోవైపు హవ్‌డాలో ప్రయాణించిన ఏపీ వారిలో 49 మంది సురక్షితంగా బయటపడ్డారు. ఇద్దరికి స్వల్పగాయాలయ్యాయి. 28 మంది ఫోన్లు స్విచ్ఛాఫ్‌ వస్తున్నాయి.

మరింత సమాచారం కోసం క్లిక్‌ చేయండి

03/06/2023 17:40(IST)

సాయం చేసేందుకు ఎంపీలంతా కలిసి రావాలి: వరుణ్‌ గాంధీ

ఒడిశా రైలు ప్రమాద బాధిత కుటుంబాలకు సాయం చేసేందుకు ఎంపీలంతా కలిసి రావాలని భాజపా ఎంపీ వరుణ్‌ గాంధీ కోరారు. వేతనంగా వచ్చే దాంట్లో కొంతభాగం బాధిత కుటుంబాలకు సాయంగా అందివ్వాలని పిలుపునిస్తూ ట్వీట్‌ చేశారు. ఈ ఘటన తనను తీవ్రంగా కలచివేసిందని పేర్కొన్నారు.

03/06/2023 17:39(IST)

కారకులను కఠినంగా శిక్షిస్తాం: మోదీ

ఒడిశాలో రైలు ప్రమాద ఘటనా స్థలాన్ని ప్రధాని మోదీ పరిశీలించారు. అనంతరం కటక్‌ ఆస్పత్రుల్లో చికిత్స పొందుతున్న క్షతగాత్రులను పరామర్శించారు. ఈ సందర్భంగా ఆయన మాట్లాడుతూ.. ఈ దుర్ఘటనకు కారణమైన వారిని కఠినంగా శిక్షిస్తామన్నారు. బాధిత కుటుంబాలకు ప్రభుత్వం అండగా ఉంటుందని భరోసా ఇచ్చారు.

03/06/2023 17:32(IST)

250 మంది ప్రయాణికులతో చెన్నైకి ప్రత్యేకరైలు

ఒడిశా రైలు ప్రమాద ఘటనలో క్షేమంగా బయటపడిన 250 మంది ప్రయాణికులను ప్రత్యేక రైలులో చెన్నై తరలిస్తున్నట్లు రైల్వే అధికారులు వెల్లడించారు. రైలు నెంబర్‌ P/13671 రైలు భద్రక్‌ స్టేషన్ నుంచి బయల్దేరి.. బహనాగలో ప్రయాణికులను ఎక్కించుకొని.. ఇవాళ రాత్రి 9.30కి విజయవాడ చేరుకుంటుందని తెలిపారు. పూర్తి వివరాల కోసం క్లిక్‌చేయండి

03/06/2023 16:59(IST)

ట్రాక్ నిర్వహణ, భద్రతా లోపాలే ప్రమాదానికి కారణం కావొచ్చు: శశిధర్

ట్రాక్ నిర్వహణ, భద్రతా లోపాలే ఒడిశాలో రైలు ప్రమాదానికి (Odisha Train Accident) కారణం కావొచ్చని రైల్వే కన్సల్టేటివ్ కమిటి మాజీ సభ్యులు ఉప్పులూరి శశిధర్ అభిప్రాయపడ్డారు. మూడు రైళ్లు ఒకేసారి ప్రమాదానికి గురవడం గతంలో జరగలేదన్నారు.

03/06/2023 16:33(IST)

Train tragedies: భారతీయ రైల్వేలో.. మహా విషాదాలు!

మన దేశంలో రైల్వే (Indian Railways) తన ప్రయాణాన్ని మొదలుపెట్టి 170 ఏళ్లు అయ్యింది. ఈ పదిహేడు దశాబ్దాల్లో భారత రైల్వే ప్రగతి సాధిస్తూ.. కోట్ల మంది ప్రయాణికుల కీలక రవాణా మార్గంగా నిలిచింది. ఈ క్రమంలో రైల్వేలో మానవ తప్పిదాలు, సిగ్నలింగ్‌ వ్యవస్థలో లోపం, ప్రకృతి వైపరీత్యాల కారణంగా ఎన్నో ప్రమాదాలు కూడా చోటుచేసుకున్నాయి. ఇలా గత మూడు దశాబ్దాల్లో దేశంలో తీవ్ర విషాదాన్ని నింపిన భారీ రైలు ప్రమాదాలు కొన్ని సంఘటనలు.. పూర్తి వివరాల కోసం క్లిక్‌ చేయండి

03/06/2023 16:25(IST)

ప్రమాదం జరిగినప్పుడు రైలు వేగం 110 కి.మీ. ఉంది!

కోరమాండల్‌ ఎక్స్‌ప్రెస్‌కు ప్రమాదం జరిగిన సమయంలో దాని వేగం సుమారు 110 కి.మీ. ఉంటుందని ప్రత్యక్షసాక్షి అనుభవ్‌ దాస్‌ అన్నారు. ప్రమాదం జరిగిన నిమిషంలోనే చాలా మంది చనిపోయారని, క్షతగాత్రుల ఆర్తనాదాలు, హాహాకారాలతో ఆ ప్రాంతమంతా భయానక వాతావరణంలా మారిపోయిందని అన్నారు.

03/06/2023 15:54(IST)

బాలేశ్వర్‌ చేరుకున్న ప్రధాని మోదీ

ఒడిశాలో రైలు ప్రమాదం జరిగిన బాలేశ్వర్‌ ప్రాంతానికి ప్రధాని నరేంద్రమోదీ చేరుకున్నారు. ప్రమాద స్థలాన్ని పరిశీలించి, ఘటనకు సంబంధించిన వివరాలను అడిగి తెలుసుకున్నారు. అక్కడే ఉన్న కేంద్రమంత్రులు, అధికారులు ప్రాథమిక నివేదిక వివరాలను ప్రధానికి వివరించారు.

03/06/2023 15:40(IST)

రైల్వేలను నాశనం చేశారు: రైల్వేశాఖ మాజీ మంత్రి లాలూ ప్రసాద్‌ యాదవ్‌

ఒడిశాలో జరిగిన ఘోర రైలు దుర్ఘటనపై కేంద్ర రైల్వేశాఖ మాజీ మంత్రి లాలూ ప్రసాద్‌ యాదవ్‌ స్పందించారు. ‘ప్రమాదం జరిగిన తీరు చూస్తుంటే, కేవలం నిర్లక్ష్యం వల్ల జరిగినట్లు అర్థమవుతోంది. ముందే అప్రమత్తమై ఉంటే ఇన్ని ప్రాణాలు పోయి ఉండేవి కావు. ఉన్నతస్థాయి విచారణ అవసరం. దీనికి బాధ్యులైన వారిపై కఠిన చర్యలు తీసుకోవాలి. నిజంగా ఇది ఓ పెద్ద నిర్లక్ష్యం. కేంద్ర ప్రభుత్వం రైల్వేలను నాశనం చేసింది’ అని ఆరోపించారు

03/06/2023 15:20(IST)

సిగ్నల్‌ లోపం కారణంగానే ప్రమాదం: రైల్వేశాఖ ప్రాథమిక నివేదిక

ఒడిశా రైలు ప్రమాదంపై రైల్వే శాఖ ప్రాథమిక నివేదిక వెల్లడించింది. సిగ్నల్‌ లోపం కారణంగా ప్రమాదం జరిగినట్లు తెలిపింది. ఈ ఘటనపై పూర్తి స్థాయిలో దర్యాప్తు జరిపేందుకు ఓ కమిటీని ఏర్పాటు చేసినట్లు పేర్కొంది. ‘‘ లూప్‌లైన్‌ వద్ద ఆగి ఉన్న గూడ్స్‌ను కోరమాండల్‌ ఎక్స్‌ప్రెస్‌ రైలు ఢీ కొట్టింది. మెయిన్‌లైన్‌పై వెళ్లేందుకే కోరమాండల్‌కు సిగ్నల్‌ ఇచ్చారు. కోరమాండల్‌ రైలు మాత్రం పొరపాటున లూప్‌లైన్‌లోకి వెళ్లింది. అప్పటికే లూప్‌లైన్‌లో ఉన్న గూడ్స్‌ రైలును ఢీ కొట్టింది. అదే సమయంలో బెంగళూరు-హవ్‌డా ఎక్స్‌ప్రెస్‌ రైలు వచ్చింది. హవ్‌డా ఎక్స్‌ప్రెస్‌ సాయంత్రం 6.50కి బహనగ స్టేషన్‌ దాటింది. కోరమాండల్‌ హక్స్‌ప్రెస్‌ ఖాంతాపార స్టేషన్‌ను సాయంత్రం 6.52కి దాటింది.’’ అని రైల్వేశాఖ తన నివేదికలో పేర్కొంది.

03/06/2023 15:14(IST)

అర్ధరాత్రి వేల మంది రక్తదానం.. స్థానికుల మానవత్వం

ఒడిశాలో జరిగిన ఘోర రైలు ప్రమాదం (Odisha Train Accident)లో వందల మంది ప్రయాణికులు తీవ్రంగా గాయపడ్డారు. వీరందరినీ హుటాహుటిన ఆస్పత్రులకు తరలించారు. తీవ్ర గాయాల వల్ల క్షతగాత్రులకు రక్తం ఎక్కువగా పోయింది. ప్రమాద బాధితులకు చికిత్స చేసేందుకు రక్తం అత్యవసరమైంది. ఈ సమయంలో పోలీసులు, స్థానిక ప్రజలు మానవత్వం చాటుకున్నారు. స్వచ్ఛందంగా ముందుకు వచ్చిన వేలాది మంది అర్ధరాత్రి సమయంలో రక్తదానం చేసి మంచి మనసు చాటుకున్నారు.

03/06/2023 14:57(IST)

రైలు ప్రమాదానికి కారణాలను ఇప్పుడే చెప్పలేం: అశ్వినీ వైష్ణవ్‌

రైలు ప్రమాదానికి గల కారణాలను ఇప్పటికిప్పుడు చెప్పలేమని రైల్వేశాఖ మంత్రి అశ్వినీ వైష్ణవ్‌ తెలిపారు. ఘటనాస్థలంలో సాధారణ పరిస్థితులు ఏర్పడేందుకు చర్యలు తీసుకుంటున్నట్లు చెప్పారు. ‘‘ ప్రస్తుతం సహాయక చర్యలపై పూర్తిగా దృష్టి సారించాం. ప్రమాద ఘటనపై నిపుణులతో కమిటీ ఏర్పాటు చేశాం. కమిటీ నివేదిక వచ్చాక ప్రమాద కారణాలు తెలుస్తాయి.’’ అని అశ్వినీ వైష్ణవ్‌ పేర్కొన్నారు.

03/06/2023 14:28(IST)

ఒడిశా రైలు ప్రమాదం: నంద్యాలలో హెల్ప్‌లైన్‌ నంబర్లు

ఒడిశా బాలేశ్వర్‌ సమీపంలో జరిగిన హౌరా - చెన్నై కోరమాండల్ ఎక్స్‌ప్రెస్ (12841), బెంగళూర్ - హౌరా ఎక్స్‌ప్రెస్‌ (12864) రైలు ప్రమాద దుర్ఘటనకు సంబంధించి ఏదైనా సమాచారం కోసం నంద్యాల జిల్లా కలెక్టరేట్‌లో హెల్ప్‌లైన్ నంబర్లు ఏర్పాటు చేసినట్లు జిల్లా కలెక్టర్‌ తెలిపారు. నంద్యాల కలెక్టరేట్‌లోని హెల్ప్‌లైన్ నంబర్లు 7815959528, 9398098914ను సంప్రదించగలరని చెప్పారు.

03/06/2023 14:21(IST)

కోరమాండల్‌ ఎక్స్‌ప్రెస్‌లో 178 మంది ఏపీ ప్రయాణికులు: వాల్తేరు డీఆర్‌ఎం

ప్రమాదానికి గురైన కోరమాండల్‌ ఎక్స్‌ప్రెస్‌ రైలులో ఏపీకి చెందిన 178 మంది ప్రయాణికులు ఉన్నట్లు వాల్తేరు డీఆర్‌ఎం వెల్లడించారు. వందమందికి పైగా విశాఖకు రిజర్వేషన్‌ చేయించుకున్నట్లు చెప్పారు. వీరితోపాటు జనరల్‌ బోగీలో ఎంతమంది ప్రయాణికులు ఉన్నారన్నదానిపై స్పష్టత రావాల్సి ఉందన్నారు. బాలేశ్వర్‌ నుంచి ప్రత్యేక రైలు మరో 2 గంటల్లో విశాఖ రానున్నట్లు చెప్పారు. మరోవైపు విశాఖ నుంచి మరమ్మతు సిబ్బందితో ఒక రైలు బాలేశ్వర్‌ వెళ్తోందని చెప్పారు. యశ్వంత్‌పూర్‌ ఎక్స్‌ప్రెస్‌లో ఎంతమంది ఏపీ వాసులున్నారో తేలాల్సి ఉందని అన్నారు.

03/06/2023 14:14(IST)

మానవత్వం చూపించిన యువత.. 3వేల యూనిట్ల రక్తం సేకరణ

బాలేశ్వర్ జిల్లా బహనాగా ప్రాంతంలో శుక్రవారం రాత్రి జరిగిన రైలు ప్రమాదంలో గాయపడిన వారికి సహాయం అందించేందుకు పెద్ద ఎత్తున స్థానిక యువత ముందుకు వచ్చింది. ప్రమాదంలో 900కి పైగా ప్రయాణికులు గాయపడగా, చికిత్సకు రక్తం కొరత లేకుండా ఉండేందుకు స్థానిక యువకులు రాత్రంతా రక్తదానం చేయడానికి ముందుకు వచ్చారు. వందల మంది యువకులు రక్తదానం చేశారు. ఇప్పటివరకూ 3వేల యూనిట్ల రక్తాన్ని సేకరించినట్లు ఎస్‌సీబీ మెడికల్ కాలేజ్‌ ప్రొఫెసర్‌ డాక్టర్‌ జయంత్‌ పండా తెలిపారు. యువకులు చూపించిన మానవత్వంపై రాష్ట్ర ప్రధాన కార్యదర్శి ప్రదీప్‌జైన్‌ ప్రశంసించారు.

03/06/2023 14:08(IST)

కోరమాండల్ ఎక్స్‌ప్రెస్‌ ప్రమాదం.. ప్రత్యక్ష సాక్షి చెప్పిన వివరాలివే

ఒడిశాలో శుక్రవారం రాత్రి చోటు చేసుకున్న ఘోర రైలు ప్రమాదంలో మృతుల సంఖ్య అంతకంతకూ పెరుగుతోంది. ఇప్పటివరకు 278 మంది ప్రాణాలు కోల్పోగా 900 మందికిపైగా గాయపడ్డారు. భారత రైల్వే చరిత్రలో ఇది నాలుగో అతిపెద్ద ప్రమాదంగా అధికారులు పేర్కొన్నారు. ఈ ప్రమాదంపై ఓ ప్రత్యక్ష సాక్షి చెప్పిన వివరాలివే.

03/06/2023 13:56(IST)

అవసరమైతే ఎయిర్‌ లిఫ్ట్‌ చేయాలని సీఎం ఆదేశించారు : మంత్రి అమర్నాథ్‌

అమరావతి : ముగ్గురు ఐఏఎస్‌, ముగ్గురు ఐపీఎస్ అధికారుల బృందంతో కలిసి రైలు ప్రమాద ఘటనా స్థలానికి ఏపీ మంత్రి గుడివాడ అమర్నాథ్ వెళ్లారు. ఈ సందర్భంగా ఆయన మీడియాతో మాట్లాడుతూ.. ‘క్షతగాత్రులకు మెరుగైన వైద్య సౌకర్యాలు కల్పిస్తాం. అవసరమైతే ఎయిర్ లిఫ్ట్ చేయమని ముఖ్యమంత్రి ఆదేశించారు. ఇప్పటికే రాష్ట్రానికి చెందిన వైద్య బృందాలు ఘటనా స్థలికి మరికాసేపట్లో చేరుకుంటాయి. జిల్లాల్లో కంట్రోల్ రూమ్స్ ఏర్పాటు చేశాం. మొబైల్ ఫోన్లకు రెస్పాండ్ కాని ప్రయాణికులను గుర్తించే పనిలో ఉన్నాం. ఖరగ్‌పూర్‌, షాలిమార్ ప్రాంతాల నుంచి తెలుగువారు కోరమాండల్‌ ఎక్స్‌ప్రెస్‌లో ప్రయాణిస్తున్నారు. శ్రీకాకుళం పరిసర జిల్లాలో ఉన్న ఆసుపత్రి సిబ్బందిని, వైద్యులను, అంబులెన్స్‌లను ఘటనా స్థలానికి పంపించాలని సీఎం ఆదేశించారు. క్షతగాత్రులను ఆసుపత్రులకు తరలించేందుకు ఎంత ఖర్చైనా వెనకాడమని సీఎం చెప్పారు. శ్రీకాకుళం జిల్లా నుంచి 104, 108 వాహనాలతో పాటు డాక్టర్లను కూడా తరలిస్తున్నాం’ అని తెలిపారు.

పూర్తి సమాచారం కోసం క్లిక్‌ చేయండి

03/06/2023 13:43(IST)

ఘటనాస్థలికి శ్రీకాకుళం జిల్లా ఇంఛార్జ్‌ కలెక్టర్‌..

ఒడిశాలో రైలు ప్రమాద ఘటనాస్థలికి శ్రీకాకుళం జిల్లా ఇంఛార్జ్‌ కలెక్టర్ వెళ్లారు. ఏపీ ప్రయాణికుల సమాచారం తెలుసుకునేందుకు, బాధితులకు సహకారం అందించేందుకు వెళ్లినట్లు తెలిపారు. మరోవైపు శ్రీకాకుళం కలెక్టర్ కార్యాలయంలో కంట్రోల్ రూమ్(08942 240557) కూడా ఏర్పాటు చేశారు.

03/06/2023 13:34(IST)

తల్లి మరణంతో 14 ఏళ్ల తర్వాత ఇంటికి వచ్చి..

కటక్ : రైలు ప్రమాద ఘటనలో హృదయ విదారక ఘటనలు ఒక్కొక్కటిగా వెలుగులోకి వస్తున్నాయి. బాలేశ్వర్ ప్రాంతానికి చెందిన రమేశ్‌ జెన అనే యువకుడు తన తల్లి పెద్దకర్మ కార్యక్రమంలో పాల్గొనేందుకు చెన్నై నుంచి బాలేశ్వరం వచ్చాడు. తిరిగి చెన్నై వెళ్తుండగా.. కోరమాండల్‌ ఎక్స్‌ప్రెస్‌ ప్రమాదంలో మృతి చెందాడు. మృతుడి సోదరుడు సురేష్ మీడియాతో మాట్లాడుతూ.. ‘అన్నయ్య రమేశ్‌ 14 ఏళ్ల క్రితం చెన్నై వెళ్లి అక్కడ స్థిరపడ్డాడు. తల్లి చనిపోయాక 14 ఏళ్ల తర్వాత ఇంటికి వచ్చాడు. నాలుగు రోజుల క్రితం తల్లి పెద్దకర్మ జరిగింది. తిరిగి చెన్నై బయలుదేరాడు. శుక్రవారం సాయంత్రం ఆరు గంటలకి రైల్వేస్టేషన్లో నేను విడిచి పెట్టాను. కోరమాండల్‌ ఎక్కాక ఫోన్ చేస్తానని తెలిపాడు. నన్ను వెళ్లిపోమన్నాడు. అయితే.. రాత్రి కోరమాండల్‌ ఎక్స్‌ప్రెస్‌ ప్రమాదానికి గురైందని సమాచారం తెలుసుకుని రమేశ్‌కు ఫోన్ చేయగా తీయలేదు. కాసేపటి తర్వాత మళ్లీ ఫోన్ చేయగా ఎవరో వ్యక్తి ఫోన్లో మాట్లాడుతూ రమేశ్‌ మృతి చెందినట్లు తెలిపాడు. వెంటనే ప్రమాదం జరిగిన ప్రాంతానికి వచ్చి సోదరుడి కోసం గాలించాను. అక్కడ ఉన్న అధికారులు మృతదేహాలను ఆసుపత్రికి తీసుకెళ్లారని తెలిపారు. ఏ హాస్పిటల్లో ఉన్నాడో వివరాలు లభించక బాలేశ్వర్ జిల్లా ప్రధాన ఆరోగ్య కేంద్రానికి వచ్చాను. అక్కడ మృతదేహం చూసి ఆవేదన చెందాను’ అని బోరున విలపించాడు.

03/06/2023 13:23(IST)

దిల్లీ నుంచి ఒడిశాకు బయలుదేరిన మోదీ..

ఒడిశా రైలు ప్రమాద స్థలిని పరిశీలించేందుకు ప్రధాని నరేంద్ర మోదీ దిల్లీ నుంచి బయలుదేరారు. ఘటనాస్థలిలో అధికారులతో సమీక్షించి.. అనంతరం కటక్‌ ఆస్పత్రిలో క్షతగాత్రులను ఆయన పరామర్శించనున్నారు. ఈ ఉదయం ప్రధాని రైలు ప్రమాదంపై ఉన్నతాధికారులతో సమీక్షించారు.

03/06/2023 13:15(IST)

బాధితులకు సరైన వైద్యం అందాలి: సీఎం మమతా బెనర్జీ

ఒడిశా రైలు ప్రమాదంలో బాధితులకు సరైన వైద్యం అందించాలని పశ్చిమ బెంగాల్‌ సీఎం మమతా బెనర్జీ అన్నారు. ప్రమాద ఘటన వెనుక కుట్ర కోణం ఉండవచ్చని అనుమానం వ్యక్తం చేశారు. బాలేశ్వర్‌లో రైలు ప్రమాదం జరిగిన ప్రాంతాన్ని ఆమె సందర్శించారు. అధికారులతో మాట్లాడి సహాయకచర్యల వివరాలను అడిగి తెలుసుకున్నారు. తాను మూడుసార్లు రైల్వే మంత్రిగా పనిచేశానని, గతంలో జరిగిన ఘటనలకు జరిగినట్లే ఈ ప్రమాదంపైనా విచారణ జరపాలని అన్నారు. రాష్ట్రం తరపున బాధితులకు సహాయం అందించనున్నట్లు తెలిపారు.

03/06/2023 13:02(IST)

ఒడిశా రైలు ప్రమాదంపై జెలెన్‌స్కీ దిగ్భ్రాంతి

ఒడిశా రైలు ప్రమాదంపై ఉక్రెయిన్‌ అధ్యక్షుడు జెలెన్‌స్కీ దిగ్భ్రాంతి వ్యక్తం చేశారు. ఉక్రెయిన్ ప్రజల తరఫున బాధితుల కుటుంబాలు, సన్నిహితులకు ప్రగాఢ సానుభూతి తెలిపారు. గాయపడిన వారందరూ త్వరగా కోలుకోవాలని ఆకాంక్షిస్తున్నట్లు ట్వీట్ చేశారు.

03/06/2023 12:59(IST)

ఏపీ విపత్తుల నిర్వహణ సంస్థ ఎమర్జెన్సీ ఆపరేషన్‌ సెంటర్‌

కోరమాండల్ ఎక్స్‌ప్రెస్‌ ప్రమాద ఘటనపై ఏపీ విపత్తుల నిర్వహణ సంస్థ ఎమర్జెన్సీ ఆపరేషన్ సెంటర్‌ను ఏర్పాటు చేసింది. రైలు ప్రమాదంలో బాధితుల గురించి సమాచారం కోసం ఎమర్జెన్సీ ఆపరేషన్ సెంటర్ 24/7 కంట్రోల్ రూమ్ నంబర్స్‌ : 1070, 112, 18004250101

03/06/2023 12:49(IST)

బోగీలు గాల్లోకి లేచి.. ఒకదానిపై మరొకటి దూసుకెళ్లి..!

బాలేశ్వర్‌: శుక్రవారం రాత్రి జరిగిన రైలు ప్రమాదంతో ఒడిశా ఒక్కసారిగా ఉలిక్కి పడింది. కోరమాండల్‌ ప్రయాణించే నాలుగు రాష్ట్రాలూ తీవ్ర అలజడికి గురయ్యాయి. ప్రమాదం జరిగిన తీరు, అక్కడి దృశ్యాలు కలవరపెడుతున్నాయి. ఒకరైలు బోగీపై మరొకటి వెళ్లిపోవడం, సహాయక సిబ్బంది మృతదేహాలన్నింటిని ఒక వరుసలో ఉంచిన దృశ్యాలు దుర్ఘటన తీవ్రతను తెలియజేస్తున్నాయి.

పూర్తి కథనం కోసం క్లిక్‌ చేయండి..

03/06/2023 12:43(IST)

సహాయక చర్యలు పూర్తి.. పునరుద్ధరణ పనులు మొదలు పెట్టాం: అశ్వినీ వైష్ణవ్‌

ఒడిశాలోని బాలేశ్వర్‌ రైలు ప్రమాదంలో సహాయక చర్యలు పూర్తయినట్లు కేంద్ర రైల్వేశాఖ మంత్రి అశ్విని వైష్ణవ్‌ తెలిపారు. మరోవైపు రైల్వే ట్రాకుల పునరుద్ధరణ పనులు కూడా మొదలు పెట్టినట్లు చెప్పారు. ఈ ప్రమాద ఘటనపై పూర్తిస్థాయి విచారణ చేపడతామని, భవిష్యత్‌లో ఇలాంటి ప్రమాదాలు జరగకుండా చర్యలు తీసుకుంటామని ఆయన అన్నారు.

03/06/2023 12:18(IST)

ఎక్స్‌గ్రేషియా: 100 మందికి పైగా మృతుల వివరాలు సిద్ధం!

ఒడిశా రైలు ప్రమాదంలో దుర్మరణం పాలైన వారి కుటుంబాలకు కేంద్ర ప్రభుత్వం ప్రకటించిన ఎక్స్‌గ్రేషియా త్వరగా అందేలా చర్యలు తీసుకుంటున్నట్లు రైల్వేబోర్డ్‌ సమాచార విభాగ ఎగ్జిక్యూటివ్‌ డైరెక్టర్‌ అమితాబ్‌ శర్మ తెలిపారు. ఇప్పటివరకూ 100మందికి పైగా మృతులకు సంబంధించిన పూర్తి వివరాలను సేకరించినట్లు తెలిపారు. మిగిలిన వారి వివరాలు కూడా వీలైనంత త్వరగా సేకరించి, పరిహారం అందేలా చూస్తామన్నారు. ఈ ప్రమాదంలో మృతిచెందినవారి కుటుంబాలకు రూ.10 లక్షలు, తీవ్రంగా గాయపడ్డవారికి రూ.2 లక్షలు, స్వల్పంగా గాయపడినవారికి రూ.50 వేల చొప్పున ఇవ్వనున్నట్లు కేంద్ర రైల్వేశాఖ మంత్రి అశ్వినీ వైష్ణవ్‌ ప్రకటించిన సంగతి తెలిసిందే.

03/06/2023 12:17(IST)

కర్ణాటక ప్రయాణికులు సురక్షితం..

ఒడిశాలో చోటుచేసుకున్న ఘోర రైలు ప్రమాదంలో కర్ణాటక రాష్ట్ర ప్రయాణికులు సురక్షితంగా ఉన్నట్లు రైల్వే డీఐడీ సాయికుమార్‌ వెల్లడించారు. వివరాల కోసం పలు స్టేషన్లలో హెల్ప్‌లైన్లు ఏర్పాటు చేసినట్లు తెలిపారు.

03/06/2023 12:12(IST)

ప్రమాదం జరిగిన మార్గంలో ‘కవచ్‌’ సౌకర్యం లేదు : అమితాబ్‌ శర్మ

ఘటనాస్థలిలో బోగీల తొలగింపు, ట్రాక్‌ల పునరుద్ధరణ పనులు జరుగుతున్నాయని రైల్వే శాఖ అధికార ప్రతినిధి అమితాబ్‌ శర్మ వెల్లడించారు. ప్రమాదం జరిగిన మార్గంలో ‘కవచ్‌’ సౌకర్యం లేదని తెలిపారు.

03/06/2023 12:08(IST)

17 బోగీలు దెబ్బతిన్నాయి..

ఒడిశా రైలు ప్రమాదంలో 17 బోగీలు దెబ్బతిన్నాయని ఎన్డీఆర్‌ఎప్‌ ఐజీ వెల్లడించారు. ఘటనాస్థలిలో 9 బృందాలు సహాయచర్యల్లో పాల్గొంటున్నాయని తెలిపారు. ఈ ప్రమాదంపై విచారణ తర్వాత అన్ని విషయాలు బయటికొస్తాయని వెల్లడించారు.

03/06/2023 11:54(IST)

సరిగ్గా 14 ఏళ్ల క్రితం.. ఇదే శుక్రవారం..!

ఒడిశాలో శుక్రవారం రాత్రి జరిగిన ఘోర రైలు ప్రమాదం పెను విషాదాన్ని మిగిల్చింది. అయితే ప్రస్తుత ఘటన 2009 నాటి రైలు ప్రమాదాన్ని గుర్తుకుతెస్తోంది. అప్పుడు కూడా సరిగ్గా శుక్రవారం రాత్రి ఏడుగంటల సమయంలో ఇదే కోరమండల్ ఎక్స్‌ప్రెస్‌ ప్రమాదానికి గురైంది.

పూర్తి వార్త కోసం క్లిక్‌ చేయండి..

03/06/2023 11:50(IST)

విపత్తు వేళ మానవత్వం.. రక్తదానానికి కదిలొచ్చిన యువకులు

ఒడిశా రైలు ప్రమాదంలో వేలాది మంది క్షతగాత్రులు ఆసుపత్రిల్లో చికిత్స పొందుతున్నారు. వారిని కాపాడేందుకు స్థానికులు స్వచ్ఛందంగా ముందుకొచ్చారు. ఆసుపత్రికి పోటెత్తిన యువకులు గంటల తరబడి క్యూలైన్లలో నిల్చుని మరీ.. వారికి రక్తదానం చేస్తున్నారు.

పూర్తి కథనం కోసం క్లిక్‌ చేయండి

03/06/2023 11:44(IST)

విజయవాడ రైల్వేస్టేషన్‌లో ప్రయాణికులు అవస్థలు

విజయవాడ రైల్వే స్టేషన్‌లో ప్రయాణికుల రద్దీ పెరిగింది. ఒడిశా మీదుగా వెళ్లే పలు రైళ్ల రద్దు కాగా.. మరికొన్నింటిని దారిమళ్లించారు. విజయవాడ మీదుగా ఇవాళ, రేపు నడిచే 21 రైళ్లు రద్దు చేయగా.. 11 రైళ్లను దారి మళ్లించారు. రైళ్ల రద్దు, దారి మళ్లింపుతో ప్రయాణికులు తీవ్ర అవస్థలు పడుతున్నారు. రైళ్ల వివరాలు వెల్లడించేందుకు అధికారులు హెల్ప్ లైన్ ఏర్పాటు చేశారు.

03/06/2023 11:37(IST)

ఇది నిజంగా ఎన్నడూ జరగకూడని విషాదం : కేటీఆర్‌

ఒడిశాలో జరిగిన ఘోర రైలు ప్రమాదంపై తెలంగాణ మంత్రి కేటీఆర్‌ తీవ్ర దిగ్భ్రాంతి వ్యక్తం చేశారు. తమ వారిని కోల్పోయిన బాధిత కుటుంబాలకు ప్రగాఢ సానుభూతి తెలిపారు. యాంటీ కొలిజన్ పరికరాలు ఏమయ్యాయని ప్రశ్నించారు. ఇది నిజంగా ఎన్నడూ జరగకూడని విషాదమని పేర్కొన్నారు.

03/06/2023 11:28(IST)

ఏపీకి చెందిన వారి వివరాలివే..

ప్రమాదానికి గురైన కోరమండల్‌ ఎక్స్‌ప్రెస్‌ రైలులో ఎపీకి చెందిన వారి వివరాలను రైల్వే శాఖ వెల్లడించింది. కోరమండల్ ఎక్స్‌ప్రెస్‌లో షాలిమర్‌లో 39 మంది, సంత్రగచిలో ఆరుగురు, ఖరగ్‌పూర్‌లో ముగ్గురు రైలు ఎక్కినట్లు అధికారులు తెలిపారు. కోరమండల్‌ ఎక్స్‌ప్రెస్‌లో ఎపీకి మొత్తం 48 మంది ప్రయాణికులు రావాల్సి ఉందని వెల్లడించారు. వీరిలో 16 మంది మహిళలు ఉన్నట్లు చెప్పారు. విజయవాడలో దిగాల్సిన వారు 33 మంది ఉండగా.. ఏలూరులో దిగాల్సిన వారు ఇద్దరు.. తాడేపల్లి గూడెంలో ఒకరు, రాజమహేంద్రవరంలో దిగాల్సిన వారు 12 మంది ఉన్నట్లు రైల్వే శాఖ అధికారులు తెలిపారు. ఏపీకి చెందిన ప్రయాణికుల ఫోన్ నంబర్లు, ప్రయాణించిన కోచ్, బెర్తుల వివరాలను విజయవాడ స్టేషన్‌లోని హెల్ప్‌ లైన్‌ కేంద్రానికి అధికారులు పంపారు.

03/06/2023 11:17(IST)

రైలు ప్రమాద స్థలికి వెళ్లనున్న ప్రధాని మోదీ

ఒడిశాలో ఘోర రైలు ప్రమాదం చోటుచేసుకున్న ఘటనాస్థలికి ప్రధాని నరేంద్ర మోదీ వెళ్లనున్నారు. మధ్యాహ్నం 2.30 గంటలకు ప్రమాద స్థలిలో అధికారులతో పరిస్థితిని సమీక్షించనున్నారు. అనంతరం కటక్‌ ఆస్పత్రిలో క్షతగాత్రులను పరామర్శించనున్నారు.

03/06/2023 11:04(IST)

తెలుగు రాష్ట్రాల ప్రభుత్వాలు తగిన ఏర్పాట్లు చేయాలి : పవన్‌ కల్యాణ్‌

ఒడిశా రైలు ప్రమాద ఘటనపై జనసేన అధినేత పవన్‌ కల్యాణ్‌ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. ఈ ప్రమాదంలో చిక్కుకున్నవారిలో తెలుగు రాష్ట్రాల ప్రయాణికులు ఉండే అవకాశం ఉందని చెప్పారు. వారి కోసం ఏపీ, తెలంగాణ ప్రభుత్వాలు తగిన ఏర్పాట్లు చేయాలని కోరారు.

03/06/2023 11:01(IST)

ప్రమాదంపై విరాట్‌ కోహ్లీ దిగ్భ్రాంతి..

ఒడిశాలో ఘోర రైలు ప్రమాద ఘటనపై టీమ్‌ఇండియా క్రికెటర్‌ విరాట్‌ కోహ్లీ దిగ్భ్రాంతి వ్యక్తం చేశారు. మృతుల కుటుంబాలకు సానుభూతి తెలిపారు. క్షతగాత్రులు త్వరగా కోలుకోవాలని ఆకాంక్షించారు. ఈ మేరకు విరాట్‌ ట్వీట్‌ చేశారు.

03/06/2023 10:53(IST)

278కి చేరిన మృతుల సంఖ్య..

ఒడిశాలో జరిగిన ఘోర రైలు ప్రమాదంలో మృతుల సంఖ్య అంతకంతకూ పెరుగుతోంది. ఈ ప్రమాదంలో ఇప్పటి వరకూ ప్రాణాలు కోల్పోయిన వారి సంఖ్య 278కి చేరింది. క్షతగాత్రుల్లో పలువురి పరిస్థితి విషమంగా ఉన్నట్లు సమాచారం. ఘటనాస్థలిలో సహాయక చర్యలు కొనసాగుతున్నాయి.

03/06/2023 10:43(IST)

పలు రైళ్ల ఆలస్యం.. ప్రయాణికుల నిరీక్షణ

ఒడిశాలో రైలు ప్రమాదం కారణంగా పలు రైళ్లు ఆలస్యంగా నడుస్తున్నాయి. తూర్పు గోదావరి జిల్లా రాజమహేంద్రవరం ప్రధాన రైల్వే స్టేషన్లో ప్రయాణికులు గంటల తరబడి నిరీక్షిస్తున్నారు.

03/06/2023 10:14(IST)

అంతా 20 నిమిషాల వ్యవధిలోనే..

కేవలం నిమిషాల వ్యవధిలోనే పట్టాలపై ఈ భారీ విషాదం చోటుచేసుకుందని తెలుస్తోంది. శుక్రవారం సాయంత్రం 6.50 గంటల నుంచి 7.10 మధ్యలో ఈ ఘోరం జరిగింది. ఆ సమయంలో ప్రయాణికులు నిద్రలో ఉన్నట్లు తెలుస్తోంది.

పూర్తి కథనం కోసం క్లిక్‌ చేయండి

03/06/2023 10:12(IST)

రైలు ప్రమాదంపై ఏపీ సీఎం జగన్‌ ఉన్నతస్థాయి సమీక్ష

ఒడిశా రైలు ప్రమాదంపై ఏపీ సీఎం జగన్‌ ఉన్నతస్థాయి సమీక్ష నిర్వహించారు. ఘటనాస్థలికి ముగ్గురు అధికారుల బృందాన్ని పంపాలని ఆదేశించారు. మంత్రి అమర్‌నాథ్‌ నేతృత్వంలో ముగ్గురు ఐఏఎస్‌ల బృందం ఘటనాస్థలికి వెళ్లనుంది. ఆయా కలెక్టరేట్లలో విచారణ విభాగాలు ఏర్పాటు చేయాలని సీఎం ఆదేశించారు. అవసరమైతే అంబులెన్స్‌లు సన్నద్ధం చేయాలని సూచించారు. ఎమర్జెన్సీ సేవలకు సరిహద్దు జిల్లాల్లో ఆస్పత్రులను అప్రమత్తం చేయాలని ఆదేశించారు.

03/06/2023 09:55(IST)

ఎన్టీఆర్‌ దిగ్భ్రాంతి..

ప్రమాదంపై సినీనటుడు ఎన్టీఆర్‌ తీవ్ర దిగ్భ్రాంతి వ్యక్తం చేశారు. ‘‘బాధిత కుటుంబాలకు ప్రగాఢ సానుభూతి తెలియజేస్తున్నారు. ఈ క్లిష్ట సమయంలో వారు ధైర్యంగా ఉండాలని భగవంతుడిని ప్రార్థిస్తున్నా’’ అని ఆయన ట్వీట్‌ చేశారు.

03/06/2023 09:36(IST)

ఒడిశాకు తమిళనాడు మంత్రులు..

రైలు ప్రమాదంపై తమిళనాడు ముఖ్యమంత్రి ఎంకే స్టాలిన్‌ ఉన్నతాధికారులతో సమావేశమయ్యారు. చెన్నైలోని రాష్ట్ర ఎమర్జెన్సీ ఆపరేషన్ సెంటర్‌కు వెళ్లి పరిస్థితిని సమీక్షించారు. మరోవైపు ప్రమాదం జరిగిన ఒడిశాలోని బాలాసోర్‌ ప్రాంతానికి తమిళనాడు ముఖ్యమంత్రులు ఉదయనిధి స్టాలిన్‌, శివ శంకర్‌, అనిల్‌ మహేశ్‌ బయల్దేరారు.

03/06/2023 09:11(IST)

ప్రమాదంలో ఏపీవాసుల వివరాలపై జగన్‌ ఆరా..

ఒడిశా రైలు ప్రమాదంపై ఏపీ సీఎం జగన్‌ దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. గాయపడినవారు త్వరగా కోలుకోవాలని ఆకాంక్షించారు. ప్రమాదంలో రాష్ట్రవాసులు ఉన్నారా లేదా అనేదానిపై దృష్టిపెట్టాలని అధికారులను ఆదేశించారు. ఎలాంటి సహాయం కావాలన్నా సిద్ధంగా ఉండాలని ఆదేశించారు. రైల్వే అధికారుల నుంచి నిరంతరం సమాచారం తీసుకోవాలన్నారు.

03/06/2023 08:59(IST)

ఘటనాస్థలికి హెలికాప్టర్‌లో ప్రత్యేక బృందం..

రైలు ప్రమాదం చోటుచేసుకున్న ఘటనాస్థలిలో సహాయక చర్యలు చేపట్టేందుకు హెలికాప్టర్‌లో ప్రత్యేక బృందాలను పంపారు. సహాయక చర్యల్లో ఎన్టీఆర్‌ఎఫ్‌, ఓడిఆర్‌ఎప్‌, అగ్నిమాపక సిబ్బంది పాల్గొంటున్నారు. సహాయక చర్యలను రైల్వే ఉన్నతాధికారులు పర్యవేక్షిస్తున్నారు.

03/06/2023 08:55(IST)

ప్రమాదంపై విచారణకు ఉన్నతస్థాయి కమిటీ : రైల్వే మంత్రి

ఘటనాస్థలిలో సహాయ చర్యలను రైల్వే మంత్రి అశ్విని వైష్ణవ్‌ పరిశీలించారు. సహాయ చర్యలు ముమ్మరంగా సాగుతున్నాయని.. క్షతగాత్రులను ఆస్పత్రులకు తరలించి చికిత్స అందిస్తున్నట్లు చెప్పారు. ప్రమాదానికి గల కారణాలపై దర్యాప్తు చేపట్టినట్లు తెలిపారు. విచారణకు ఉన్నతస్థాయి కమిటీ ఏర్పాటు చేసినట్లు పేర్కొన్నారు. ఘటనాస్థలిలో సాధారణ పరిస్థితులు ఏర్పడేందుకు చర్యలు తీసుకున్నట్లు వివరించారు.

03/06/2023 08:49(IST)

ఘటనాస్థలిలో 200 అంబులెన్స్‌లు.. : ఒడిశా సీఎస్‌

ఘటనాస్థలిలో సహాయక చర్యలను ఒడిశా సీఎస్‌ సహా ఉన్నతాధికారులు పర్యవేక్షిస్తున్నారు. క్షతగాత్రులను తరలించేందుకు 200 అంబులెన్స్‌లను సిద్ధంగా ఉంచినట్లు సీఎస్‌ తెలిపారు. బాధితులను పలు ఆస్పత్రులకు తరలించి చికిత్స అందిస్తున్నట్లు చెప్పారు. ప్రభుత్వ యంత్రాంగమంతా ప్రమాద స్థలంలోనే ఉన్నట్లు తెలిపారు.

03/06/2023 07:46(IST)

దశాబ్దకాలంలో జరిగిన పెను రైలు ప్రమాదాలివీ..

* 2012 మే 22: హుబ్బళ్లి-బెంగళూరు హంపి ఎక్స్‌ప్రెస్‌ ఆంధ్రప్రదేశ్‌కు సమీపంలో ఓ గూడ్స్‌ రైలును ఢీ కొట్టింది. ఇందులో 25 మంది చనిపోగా, 43 మంది గాయపడ్డారు. ఈ ప్రమాదంలో హంపి ఎక్స్‌ప్రెస్‌కు సంబంధించిన నాలుగు బోగీలు పట్టాలు తప్పాయి. అందులో ఒకటి మంటల్లో చిక్కుకుంది.

* 2014 మే 26: ఉత్తర్‌ప్రదేశ్‌లోని సంత్‌ కబీర్‌ నగర్‌ ప్రాంతంలో గోరఖ్‌పుర్‌ వెళుతున్న గోరఖ్‌ధామ్‌ ఎక్స్‌ప్రెస్‌.. ఆగి ఉన్న గూడ్స్‌ రైలును ఢీ కొట్టింది. ఈ దుర్ఘటనలో 25 మంది దుర్మరణం పాలయ్యారు. 50 మందికిపైగా గాయపడ్డారు.

పూర్తి కథనం కోసం క్లిక్‌ చేయండి

03/06/2023 07:35(IST)

18 దూరప్రాంత రైళ్ల రద్దు

ఈనాడు, విశాఖపట్నం: ఒడిశాలో ఘోర రైలు ప్రమాదం నేపథ్యంలో దూర ప్రాంతాలకు వెళ్లే 18 రైళ్లను అధికారులు తాత్కాలికంగా రద్దు చేశారు. టాటానగర్‌ స్టేషన్‌ మీదుగా మరో ఏడు రైళ్లను మళ్లించినట్లు వెల్లడించారు. రద్దైన రైళ్లలో.. హావ్‌డా-పూరీ సూపర్‌ఫాస్ట్‌ (12837), హావ్‌డా-బెంగళూరు సూపర్‌ఫాస్ట్‌ (12863), హావ్‌డా-చెన్నై మెయిల్‌ (12839), హావ్‌డా-సికింద్రాబాద్‌(12703), హావ్‌డా-హైదరాబాద్‌(18045), హావ్‌డా-తిరుపతి(20889), హావ్‌డా-పూరీ సూపర్‌ఫాస్ట్‌ (12895), హావ్‌డా-సంబల్‌పుర్‌ ఎక్స్‌ప్రెస్‌ (20831), సంత్రగాచి-పూరీ ఎక్స్‌ప్రెస్‌ (02837) ఉన్నట్లు అధికారులు తెలిపారు.

* బెంగళూరు-గువాహటి(12509) రైలును విజయనగరం, టిట్లాగఢ్‌, జార్సుగుడా, టాటా మీదుగా దారి మళ్లించారు. ఖరగ్‌పుర్‌ డివిజన్‌లో ఉన్న చెన్నై సెంట్రల్‌-హావ్‌డా(12840) రైలును జరోలి మీదుగా, వాస్కోడగామా-షాలిమార్‌(18048), సికింద్రాబాద్‌-షాలిమార్‌(22850) వారాంతపు రైళ్లను కటక్‌, అంగోల్‌ మీదుగా దారి మళ్లించినట్లు రైల్వే అధికారులు తెలిపారు.

03/06/2023 07:33(IST)

యశ్వంత్‌పూర్‌ ఎక్స్‌ప్రెస్‌లో ఎందరో?

కర్ణాటకలోని యశ్వంత్‌పూర్‌ నుంచి హావ్‌డా వెళ్తున్న ఎక్స్‌ప్రెస్‌ మన రాష్ట్రంలోని తిరుపతి, రేణిగుంట, గూడూరు, నెల్లూరు, ఒంగోలు, చీరాల, బాపట్ల, తెనాలి, విజయవాడ, ఏలూరు, తాడేపల్లిగూడెం, రాజమహేంద్రవరం, సామర్లకోట, విశాఖపట్నం, విజయనగరం, శ్రీకాకుళం రోడ్‌, పలాస స్టేషన్లు మీదుగా వెళ్లింది. వీటిలో ఎక్కువ మంది యశ్వంత్‌పూర్‌, తిరుపతి, రేణిగుంట స్టేషన్లలో ఎక్కారు. అలాగే మనరాష్ట్ర పరిధిలో వివిధ స్టేషన్లలో దిగారు. అలాగే తిరుపతి, రేణిగుంట, చీరాల స్టేషన్ల నుంచి ఖరగ్‌పూర్‌, హావ్‌డా వైపు 52 మందికిపైగా ప్రయాణికులు వెళ్లినట్లు జాబితాలో వివరాలు ఉన్నాయి.

03/06/2023 07:27(IST)

ఏపీ ప్రయాణికులు ఎందరో?

ఈనాడు, అమరావతి: ఒడిశాలోని బాలేశ్వర్‌ సమీపంలోని బహనాగ్‌బజార్‌ రైల్వేస్టేషన్‌ వద్ద జరిగిన ఘోర రైలు ప్రమాదంలో ఏపీకి చెందిన ప్రయాణికులు ఎక్కువ సంఖ్యలోనే ఉన్నట్లు సమాచారం. షాలిమార్‌ నుంచి చెన్నై వస్తున్న కోరమండల్‌ ఎక్స్‌ప్రెస్‌, యశ్వంత్‌పూర్‌ నుంచి హావ్‌డా వెళ్తున్న ఎక్స్‌ప్రెస్‌ ప్రమాదానికి గురయ్యాయి. ఈ రెండింటిలోనూ తెలుగువాళ్లు ఉన్నారు. ముఖ్యంగా కోరమండల్‌ ఎక్స్‌ప్రెస్‌లో ఎక్కువ మంది ప్రయాణికులు ఏపీకి వస్తున్నట్లు రైల్వే అధికారుల వద్ద ఉన్న జాబితా బట్టి తెలుస్తోంది.

* కోరమండల్‌ ఎక్స్‌ప్రెస్‌లో.. షాలిమార్‌, సంత్రగచ్చి, ఖరగ్‌పూర్‌, బాలేశ్వర్‌ స్టేషన్లలో ఎక్కిన ప్రయాణికుల్లో విజయవాడలో 47 మంది, రాజమహేంద్రవరంలో 22 మంది, ఏలూరుకు ఒకరు కలిపి మొత్తంగా 70 మంది వరకు దిగాల్సి ఉంది.

* ఇదే రైలులో రాజమహేంద్రవరం స్టేషన్‌ నుంచి 56 మంది, తాడేపల్లిగూడెంలో 10మంది, ఏలూరులో 44 మంది, విజయవాడలో 120 మంది ప్రయాణికులు ఎక్కి.. చెన్నై సెంట్రల్‌ స్టేషన్‌కు వెళ్లేలా రిజర్వేషన్లు చేసుకున్నారు.

03/06/2023 07:24(IST)

హెల్ప్‌లైన్‌ నంబర్లు ఇవీ..

రైలు ప్రమాదంపై వివరాలు అందించేందుకు పలు హైల్ప్‌లైన్‌ నంబర్లను ఏర్పాటుచేశారు.

ఒడిశా ప్రభుత్వం ఏర్పాటుచేసిన నంబరు- 06782-262286.
రైల్వే హెల్ప్‌లైన్లు: హావ్‌డా 033-26382217; ఖరగ్‌పుర్‌ 8972073925
బాలేశ్వర్‌ 8249591559; చెన్నై 044-25330952

వాల్తేరు డివిజన్‌ పరిధిలో..
విశాఖపట్నం(రైల్వేస్టేషన్‌), న్యూస్‌టుడే: వాల్తేరు డివిజన్‌ కూడా హెల్ప్‌లైన్లను అందుబాటులోకి తెచ్చింది. విశాఖకు 08912 746330, 08912 744619, విజయనగరానికి 08922-221202, 08922-221206.

ద.మ.రైల్వే పరిధిలో..
ఈనాడు, హైదరాబాద్‌: సికింద్రాబాద్‌ రైల్‌ నిలయం (040 27788516), విజయవాడ రైల్వే స్టేషన్‌ (0866 2576924), రాజమండ్రి రైల్వే స్టేషన్‌ (0883 2420541), రేణిగుంట రైల్వే స్టేషన్‌ (9949198414), తిరుపతి రైల్వే స్టేషన్‌ (7815915571) సహాయ కేంద్రాలకు ఫోన్‌ చేసి సమాచారం తెలుసుకోవచ్చని రైల్వే వర్గాలు తెలిపాయి. నెల్లూరు రైల్వే స్టేషన్‌ (08612342028)లోనూ సహాయ కేంద్రాన్ని ఏర్పాటు చేశారు.

03/06/2023 07:06(IST)

మృతుల కుటుంబాలకు రూ.10 లక్షల పరిహారం

తాజా దుర్ఘటనపై రైల్వే మంత్రి అశ్వినీ వైష్ణవ్‌ తీవ్ర విచారం వ్యక్తం చేశారు. భువనేశ్వర్‌, కోల్‌కతాల నుంచి సహాయక బృందాలను ఘటనాస్థలానికి ఇప్పటికే పంపించినట్లు తెలిపారు. ఎన్‌డీఆర్‌ఎఫ్‌, ఎస్‌డీఆర్‌ఎఫ్‌, వాయుసేన బృందాలనూ తరలిస్తున్నట్లు చెప్పారు. ఈ ప్రమాదంలో మృతిచెందినవారి కుటుంబాలకు రూ.10 లక్షల చొప్పున పరిహారం అందించనున్నట్లు ప్రకటించారు. తీవ్రంగా గాయపడ్డవారికి రూ.2 లక్షలు, స్వల్పంగా గాయపడినవారికి రూ.50 వేల చొప్పున ఇవ్వనున్నట్లు తెలిపారు. ఘటనాస్థలంలో తాజా పరిస్థితిపై సమీక్ష నిర్వహించినట్లు ఒడిశా సీఎం నవీన్‌ పట్నాయక్‌ వెల్లడించారు. శనివారం తాను అక్కడికి వెళ్లనున్నట్లు చెప్పారు. మృతుల కుటుంబాలకు రూ.2 లక్షలు, క్షతగాత్రులకు రూ.50 వేల చొప్పున ప్రధాని కూడా పరిహారం ప్రకటించారు.

03/06/2023 07:05(IST)

ప్రమాదం ఎలా జరిగిందంటే..

స్థానిక అధికారుల కథనం ప్రకారం- బెంగళూరు నుంచి పశ్చిమ బెంగాల్‌లోని హావ్‌డాకు వెళ్తున్న బెంగళూరు-హావ్‌డా సూపర్‌ఫాస్ట్‌ ఎక్స్‌ప్రెస్‌ బాలేశ్వర్‌ సమీపంలోని బహానగా బజార్‌ వద్ద శుక్రవారం రాత్రి దాదాపు 7 గంటల సమయంలో తొలుత పట్టాలు తప్పింది. ఫలితంగా దాని పలు బోగీలు పక్కనే ఉన్న ట్రాక్‌పై పడిపోయాయి. వాటిని షాలిమార్‌-చెన్నై సెంట్రల్‌ కోరమండల్‌ ఎక్స్‌ప్రెస్‌ ఢీకొట్టింది. దాంతో కోరమండల్‌ ఎక్స్‌ప్రెస్‌కు చెందిన 15 బోగీలు బోల్తాపడ్డాయి. ఈ ప్రమాదం అక్కడితో ఆగిపోలేదు. బోల్తాపడ్డ కోరమండల్‌ కోచ్‌లను పక్కనున్న ట్రాక్‌పై దూసుకొచ్చిన గూడ్సు రైలు ఢీకొంది. మూడు రైళ్లు ఒకదానితో ఒకటి ఢీకొట్టుకోవడంతో ప్రమాదం తీవ్రత భారీగా పెరిగింది. ప్రమాదానికి గురైన సమయంలో కోరమండల్‌ ఎక్స్‌ప్రెస్‌ కోల్‌కతా నుంచి చెన్నైకి వెళ్తోంది. అయితే రైల్వే అధికార ప్రతినిధి అమితాబ్‌ శర్మ కథనం మాత్రం మరోలా ఉండటం గమనార్హం. తొలుత కోరమండల్‌ ఎక్స్‌ప్రెస్‌ పట్టాలు తప్పిందని అమితాబ్‌ చెప్పారు. దాని 10-12 బోగీలు బెంగళూరు-హావ్‌డా సూపర్‌ఫాస్ట్‌ రైలు మార్గంలో పడ్డాయని పేర్కొన్నారు. అనంతరం ఆ సూపర్‌ఫాస్ట్‌ బోగీలు పక్క ట్రాక్‌పై బోల్తాపడ్డాయని వివరించారు.

03/06/2023 07:04(IST)

పట్టాలపై మరణమృదంగం.. ఒడిశాలో మూడు రైళ్ల ఢీ

బాలేశ్వర్‌, హావ్‌డా, న్యూస్‌టుడే-భువనేశ్వర్‌ అర్బన్‌: ఒడిశాలో మాటలకందని మహా విషాదం చోటుచేసుకుంది. బాలేశ్వర్‌ జిల్లాలో శుక్రవారం అనూహ్య రీతిలో జరిగిన ఘోర రైలు ప్రమాదంలో 233 మంది దుర్మరణం పాలయ్యారు. 900 మందికి పైగా గాయాలపాలయ్యారు. క్షతగాత్రుల్లో పలువురి పరిస్థితి విషమంగా ఉందని అధికార వర్గాలు తెలిపాయి. దీంతో మృతుల సంఖ్య మరింత పెరిగే అవకాశాలు కనిపిస్తున్నాయి. రాత్రివేళ ప్రమాదం చోటుచేసుకోవడంతో.. బోల్తాపడిన బోగీల్లో ఇంకా ఎంతమంది చిక్కుకొని ఉండొచ్చనేది అధికారులు సరిగా అంచనా వేయలేకపోతున్నారు. తాజా దుర్ఘటనపై రాష్ట్రపతి ద్రౌపదీ ముర్ము, ప్రధానమంత్రి నరేంద్ర మోదీ తీవ్ర దిగ్భ్రాంతి వ్యక్తం చేశారు. ఇటీవలి కాలంలో మన దేశంలో చోటుచేసుకున్న అతిపెద్ద రైలుప్రమాదం ఇదేనని పలువురు చెబుతున్నారు. ప్రమాదంపై పశ్చిమ బెంగాల్‌ ముఖ్యమంత్రి మమతా బెనర్జీ దిగ్భ్రాంతి వ్యక్తం చేశారు. బాధితుల్లో బెంగాల్‌వాసులే ఎక్కువమంది ఉన్నట్లు తెలుస్తోంది.

App

Odisha Train Accident: రైల్వే ట్రాక్‌ పునురుద్ధరణ.. 51 గంటల తర్వాత ఎట్టకేలకు రైలు ప్రారంభం

తాజా వార్తలు (Latest News)

సూర్యాపేట జిల్లాలో ఘోర రోడ్డు ప్రమాదం.. ఆరుగురు మృతి

జూదరులతో కలిసి పుట్టిన రోజు వేడుకలు.. మంగళ్‌హాట్‌ డీఐ సస్పెన్షన్‌ ?

ఒకే ద్విచక్రవాహనంపై ప్రయాణం.. బస్సు ఢీకొని నలుగురు ఇంటర్‌ విద్యార్థుల మృతి

టీ20 ప్రపంచకప్‌నకు టీమ్‌ ఇండియాను మీరే ఎంపిక చేయండి!

సరిహద్దు దాటిన మానవత్వం.. భారతీయుడి దానంతో పాక్‌ యువతికి కొత్త జీవితం

టీ20 వరల్డ్ కప్‌.. ‘‘ధోనీ వైల్డ్ కార్డ్ ఎంట్రీ ఇస్తే బాగుంటుంది’’

సుఖీభవ

చదువు