Breaking | Feedback | ePratibha | E-PAPER | Pratibha

Munugode Bypoll Result : భాజపా అహంకారాన్నిఅణచివేశారు: హరీశ్‌

మునుగోడు ఉప ఎన్నికలో తెరాస విజయం సాధించింది. సమీప ప్రత్యర్థి, భాజపా అభ్యర్థి కోమటిరెడ్డి రాజగోపాల్‌రెడ్డిపై తెరాస అభ్యర్థి కూసుకుంట్ల ప్రభాకర్‌రెడ్డి విజయం సాధించారు.

Updated : 06 Nov 2022 22:09 IST

06/11/2022 22:05(IST)

ఎప్పటికైనా తెలంగాణలో కారుదే జోరు: వేముల

తెలంగాణ ముఖ్యమంత్రి కేసీఆర్‌ జాతీయ రాజకీయాల జైత్ర యాత్రకు ఓటు రూపంలో మద్దతు పలికి మునుగోడు ప్రజలు విప్లాత్మకమైన నిర్ణయం తీసుకున్నారని మంత్రి వేముల ప్రశాంత్‌రెడ్డి అన్నారు. ఇది ప్రజాస్వామ్య విజయమని అన్నారు. ఎప్పటికైనా తెలంగాణలో కారుదే జోరు కోనసాగుతుందని అన్నారు. కేసీఆర్‌ నాయకత్వమే రాష్ట్రానికి, దేశానికి శ్రీరామ రక్ష అనీ, ప్రభుత్వాలను కూల దోసే కుట్రలు చేస్తున్న భాజపాకి ఓటుతో మునుగోడు ప్రజలు గుణ పాఠం చెప్పారని అన్నారు. ఘన విజయం సాధించిన కూసుకుంట్ల ప్రభాకర్‌ రెడ్డికి శుభాకాంక్షలు తెలిపారు.

06/11/2022 21:21(IST)

భాజపా కుట్రలను ఛేదించిన మునుగోడు ఓటర్లకు ధన్యవాదాలు: హరీశ్‌రావు

‘తెలంగాణ ప్రజల ఆత్మగౌరవానికి, భాజపా కుట్రలకు మధ్య జరిగిన పోరాటంలో తెరాస పక్షాన నిలిచిన మునుగోడు ప్రజలకు ధన్యవాదాలు’ అని మంత్రి హరీశ్‌రావు అన్నారు. తెలంగాణ సమాజం తెరాస పక్షాన ఉన్నదని మరోసారి రుజువైందన్నారు. భాజపా అహంకారాన్ని మునుగోడు ప్రజలు అణచివేశారన్నారు. భవిష్యత్తులో ఇదే స్ఫూర్తి కొనసాగాలని ఆకాంక్షించారు. ముఖ్యమంత్రి కేసీఆర్‌ నాయకత్వంలో దేశరాజకీయాల్లో గుణాత్మకమార్పునకు మునుగోడు ఫలితం నాంది పలికిందన్నారు.

06/11/2022 21:14(IST)

మునుగోడు ప్రజలు అభివృద్ధికి పట్టం కట్టారు: అసదుద్దీన్‌ ఓవైసీ

మునుగోడు ఉపఎన్నికలో తెరాస విజయం సాధించడంపై ముఖ్యమంత్రి కేసీఆర్‌కు, పార్టీకి ఏఐఎంఐఎం అధినేత అసదుద్దీన్‌ ఓవైసీ అభినందనలు తెలిపారు. మునుగోడు ప్రజలు ద్వేషాన్ని వ్యతిరేకించి అభివృద్ధికి పట్టం కట్టారన్నారు.

06/11/2022 21:03(IST)

నైతిక విజయం భాజపాదే: ఈటల

మునుగోడు ఉపఎన్నికలో నైతిక విజయం భాజపాదేనని ఆ పార్టీ నేత ఈటల రాజేందర్‌ అన్నారు. ఓట్ల లెక్కింపు అనంతరం కోమటిరెడ్డి రాజగోపాల్‌రెడ్డి క్యాంపు కార్యాలయంలో పార్టీ నేత ఏనుగు రవీందర్‌రెడ్డితోపాటు ఆయన్ని కలిశారు. ఉపఎన్నిక ఓటమిపై చర్చించారు.

06/11/2022 19:58(IST)

కేఏ పాల్‌కు 805 ఓట్లు

ప్రజాశాంతి పార్టీ అధ్యక్షుడు కేఏ పాల్‌కు మునుగోడు ఉపఎన్నికలో 805 ఓట్లు వచ్చాయి. అన్ని రౌండ్లలోనూ రెండు డిజిట్లకే పరిమితమైన ఆయన.. అత్యధికంగా పదమూడో రౌండ్‌లో 86 ఓట్లు, అత్యల్పంగా 15వ రౌండ్‌లో 11 ఓట్లు సాధించారు.

06/11/2022 19:33(IST)

రాజగోపాల్‌ హీరోలా పోరాటం చేశారు: బండి సంజయ్‌

మునుగోడు ఉపఎన్నికలో భాజపాకు 40శాతం ఓట్లు వచ్చాయని ఆ పార్టీ రాష్ట్ర అధ్యక్షుడు బండిసంజయ్‌ అన్నారు. హైదరాబాద్‌లోని పార్టీ కార్యాలయంలో ఆయన మీడియాతో మాట్లాడారు. రాజగోపాల్‌రెడ్డి ఒక మంచి ఆలోచనతో భాజపాలో చేరారని, మునుగోడులో హీరోలా పోరాటం చేశారని కితాబిచ్చారు. మునుగోడు ఉపఎన్నిక కోసం తెరాస రూ.వెయ్యి కోట్లు ఖర్చు చేసిందని బండి విమర్శించారు. తెరాసను ఎదుర్కొనే దమ్మున్న పార్టీ భాజపా అని ప్రజలు నిరూపించారని అన్నారు. మునుగోడు ప్రజల తీర్పును శిరసావహిస్తామని, ఓడినా.. గెలిచినా..ధర్మం కోసం, దేశం కోసం పని చేస్తామని అన్నారు. ఇచ్చిన హామీ మేరకు మునుగోడు సమస్యలను 15 రోజుల్లో నెరవేర్చాలని బండి డిమాండ్‌ చేశారు.

06/11/2022 19:29(IST)

ఓట్ల లెక్కింపు ప్రశాంతంగా ముగిసింది: వికాస్‌రాజ్‌

మునుగోడులో ఓట్ల లెక్కింపు ప్రక్రియ ప్రశాంతంగా ముగిసిందని రాష్ట్ర ఎన్నికల ప్రధానఅధికారి వికాస్‌రాజ్‌ తెలిపారు. ఎక్కడా పక్షపాతం లేకుండా ఎన్నికల ప్రక్రియ నిర్వహించామన్నారు. వ్యక్తిగత తప్పిదం వల్లనే మునుగోడు రిటర్నింగ్‌ అధికారిపై వేటుపడిందని అన్నారు.

06/11/2022 18:21(IST)

మునుగోడు ఎన్నికల్లో మా విజయాన్ని ఆపలేకపోయారు: కేటీఆర్‌

హైదరాబాద్‌: మునుగోడు ఎన్నికల్లో తిమ్మిని బమ్మిని చేసైనా గెలవాలని భాజపా భావించిందని, కానీ, తెరాస విజయాన్ని ఆపలేకపోయిందని మంత్రి కేటీఆర్‌ అన్నారు. మునుగోడు ఎన్నికల్లో తెరాస అభ్యర్థి కూసుకుంట్ల ప్రభాకర్‌రెడ్డి విజయం సాధించిన అనంతరం కేటీఆర్‌ విలేకరులతో మాట్లాడారు.

‘‘గెలుపు, ఓటములను సమానంగా స్వీకరిస్తాం. కారు గుర్తులను పోలిన గుర్తుల్ని ఈసీ బలవంతంగా తీసుకొచ్చింది. ఫలితంగా మా అభ్యర్థి 6వేల ఓట్లు కోల్పోయారు. పలివెలలో మమ్మల్ని కోరి కయ్యం పెట్టుకున్నారు. మా ఎమ్మెల్సీ, జడ్పీ ఛైర్మన్‌లపై దాడి చేశారు. మా మెజార్టీ తగ్గించగలిగారేమో కానీ, మా విజయాన్ని ఆపలేకపోయారు. గత 8ఏళ్లలో ఎన్నో ఎన్నికలు వచ్చినా ఇటువంటి పరిస్థితి రాలేదు. హుజూరాబాద్‌, మునుగోడు ఎన్నికలు డబ్బుమయం కావడానికి ఈటల, రాజగోపాల్‌ ఇద్దరూ కారణం. తిమ్మిని బమ్మిని చేసైనా గెలవాలని భాజపా అధిష్ఠానం ఆదేశించింది. వాళ్లే వందల కోట్లు ఇచ్చి, ఈ ఎన్నికను డబ్బు మయం చేశారు. ఎన్ని ప్రయత్నాలు చేసినా, మా అభ్యర్థి వేల ఓట్ల అధికంగా సాధించారు. మునుగోడులో మా పార్టీ 43శాతం ఓట్లు సాధించింది’’ అని కేటీఆర్‌ అన్నారు.

06/11/2022 17:31(IST)

కమ్యూనిస్టుల మద్దతుతోనే మునుగోడులో తెరాస విజయం: కూనంనేని

హైదరాబాద్‌: మునుగోడు ఉప ఎన్నికలో భాజపా ఓటమి ఒక్క రాజగోపాల్‌రెడ్డికే కాదు, నరేంద్రమోదీకి చెంపపెట్టు లాంటి తీర్పు అని సీపీఐ తెలంగాణ రాష్ట్ర కార్యదర్శి కూనంనేని సాంబశివరావు అన్నారు. హైదరాబాద్‌లోని ముగ్దూం భవన్‌ వద్ద ఆయన మీడియాతో మాట్లాడారు. ‘‘ఎమ్మెల్యే పదవికి రాజీనామా చేస్తే డబ్బులు ఉన్నాయి, భాజపా అండ ఉంది కాబట్టి గెలవొచ్చని భావించారు. కానీ, ఇవాళ మా నైతిక విజయమని రాజగోపాల్‌రెడ్డి చెబుతున్నారు. మునుగోడులో భాజపా ఓటమి, తెరాస గెలుపు.. ప్రజాస్వామ్యానికి లభించిన విజయంగా మేం భావిస్తున్నాం. మునుగోడు ఫలితం భాజపా వ్యతిరేక శక్తులన్నింటినీ ఒక తాటిపైకి తీసుకురావడానికి దోహద పడుతుందని భావిస్తున్నాం. భాజపాను ఓడించే శక్తితో కలిసి పనిచేసేందుకు వామపక్షాలు సిద్ధంగా ఉన్నాయి. ఎట్టి పరిస్థితుల్లో భాజపాను తెలంగాణలో అడుగుపెట్టనివ్వకుండా చేస్తాం. కమ్యూనిస్టుల మద్దతుతోనే మునుగోడులో తెరాస గెలిచింది. భాజపాను ఓడించేందుకు అందరం కలవాల్సిన అవసరముంది’’ అని కూనంనేని సాంబశివరావు అన్నారు.

06/11/2022 17:14(IST)

మునుగోడులో కారు జోరు.. 10వేల ఓట్ల మెజార్టీతో ప్రభాకర్‌రెడ్డి విజయం

మునుగోడు ఉప ఎన్నికలో తెరాస విజయం సాధించింది. సమీప ప్రత్యర్థి, భాజపా అభ్యర్థి కోమటిరెడ్డి రాజగోపాల్‌రెడ్డిపై తెరాస అభ్యర్థి కూసుకుంట్ల ప్రభాకర్‌రెడ్డి విజయం సాధించారు. 14 రౌండ్లు ముగిసే సమయానికి తెరాస 10వేల ఓట్ల పైచిలుకుతో ఉంది. 14వ రౌండ్‌లో తెరాసకు 6608, భాజపాకు 5,553 ఓట్లు రాగా, ఈ రౌండ్‌లో తెరాస 1,055 ఓట్ల ఆధిక్యంలో నిలిచింది. మొత్తంగా 10,191 ఓట్ల మెజార్టీతో కారు జోరు చూపించింది. తెరాస విజయంతో ఆ పార్టీ శ్రేణులు సంబరాల్లో మునిగి తేలారు. టపాసులు, బాణసంచా కాలుస్తూ సంబరాలు చేసుకున్నారు. ఇక కాంగ్రెస్‌ పార్టీ ఇక్కడ సిట్టింగ్‌ స్థానాన్ని కోల్పోవడమే కాదు, తాజా ఉప ఎన్నికలో డిపాజిట్‌ను కూడా దక్కించుకోలేకపోయింది.

06/11/2022 16:35(IST)

13వ రౌండ్‌లోనూ తెరాసదే హవా.. మొత్తం 9వేల ఓట్ల ఆధిక్యం..

మునుగోడు ఉప ఎన్నిక ఓట్ల లెక్కింపు చివరి దశకు వచ్చింది. 13 రౌండ్లు ముగిసే సమయానికి అధికార తెరాస 9వేలకు పైచిలుకు ఓట్ల ఆధిక్యంలో కొనసాగుతోంది. 13వ రౌండ్‌లో తెరాస 6619, భాజపాకు 5406 ఓట్లు వచ్చాయి. దీంతో ఈ రౌండ్‌లో తెరాస 1285 ఓట్ల ఆధిక్యాన్ని సాధించింది. మొత్తంగా 9136 ఓట్లతో తెరాస లీడ్‌లో కొనసాగుతోంది.

06/11/2022 16:00(IST)

ఇది తెరాస అధర్మ గెలుపు: రాజగోపాల్‌రెడ్డి

మునుగోడు ఉప ఎన్నికలో అధికార తెరాసకు స్పష్టమైన ఆధిక్యం కనపడుతున్న వేళ, భాజపా అభ్యర్థి రాజగోపాల్‌రెడ్డి స్పందించారు. ప్రజా తీర్పుని గౌరవిస్తున్నానని అన్నారు. ఈ సందర్భంగా విలేకరులతో మాట్లాడుతూ.. ‘తెరాస అధికార దుర్వినియోగానికి పాల్పడింది. కనీసం ప్రచారం కూడా చేసుకోనివ్వలేదు. కేసీఆర్‌, కేటీఆర్‌ అధికారులపై ఒత్తిడి తెచ్చారు. ఇది తెరాస అధర్మ గెలుపు. అధికార పార్టీ నిబంధనలు ఉల్లంఘించింది. పోలీసు వ్యవస్థను తెరాస తన సొంతానికి వాడుకొంది. మునుగోడులో నైతికంగా విజయం నాదే’’ అని అన్నారు.

06/11/2022 15:49(IST)

12 రౌండ్లు పూర్తి.. 7వేల పైచిలుకు ఓట్ల ఆధిక్యంలో తెరాస

మునుగోడు ఉప ఎన్నిక ఓట్ల లెక్కింపు ప్రక్రియ కొనసాగుతోంది. 12 రౌండ్లు ముగిసే సమయానికి అధికార తెరాస 7వేలకు పైచిలుకు ఓట్ల ఆధిక్యంలో కొనసాగుతోంది. 12వ రౌండ్‌లో తెరాసకు 7,440, భాజపాకు 5,398 ఓట్లు వచ్చాయి. మొత్తం 7836 ఓట్ల ఆధిక్యంలో తెరాస అభ్యర్థి కూసుకుంట ప్రభాకర్‌రెడ్డి కొనసాగుతున్నారు.

06/11/2022 15:23(IST)

తెలంగాణ భవన్‌లో తెరాస సంబరాలు

మునుగోడు ఉప ఎన్నికలో అధికార తెరాసకు స్పష్టమైన ఆధిక్యం వస్తుండటంతో ఆ పార్టీ శ్రేణులు సంబరాలు చేసుకుంటున్నాయి. హైదరాబాద్‌లోని తెలంగాణ భవన్‌లో తెరాస నాయకులు, కార్యకర్తలు టపాసులు పేలుస్తూ, స్వీట్లు పంచుకుంటున్నారు. ఇందుకు సంబంధించిన ఫొటోలు వైరల్‌ అవుతున్నాయి.

06/11/2022 15:10(IST)

11 రౌండ్లు ముగిశాయి.. 5వేల ఓట్ల ఆధిక్యంలో తెరాస..

మునుగోడు ఉప ఎన్నిక ఓట్ల లెక్కింపు ప్రక్రియ కొనసాగుతోంది. 11 రౌండ్లు ముగిసే సమయానికి అధికార తెరాస 5వేల పైచిలుకు ఓట్ల ఆధిక్యంలో కొనసాగుతోంది. 11వ రౌండ్‌లో తెరాసకు 7,235, భాజపాకు 5,877 ఓట్లు వచ్చాయి. మొత్తంగా తెరాస 5,774 ఓట్ల ఆధిక్యంలో ఉంది.

06/11/2022 15:07(IST)

తెరాస మెజార్టీని దెబ్బతీస్తున్న కారును పోలిన గుర్తులు

మునుగోడు ఉప ఎన్నికల్లో అభ్యర్థుల ఎన్నికల గుర్తులు అధికార తెరాస ఆధిక్యాన్ని కొంత మేర దెబ్బతీశాయని తాజా ఫలితాలను చూస్తే అర్థమవుతోంది. కారును పోలిన గుర్తులకు కూడా చెప్పుకోదగ్గ ఓట్లు పడ్డాయి. 8 రౌండ్లు ముగిసే సమయానికి రోడ్‌రోలర్‌కు 904, చెప్పులకు 1,142, చపాతి మేకర్‌కు 1,169 ఓట్లు వచ్చాయి.

06/11/2022 14:53(IST)

నాలుగు వేలు దాటిన తెరాస ఆధిక్యం

మునుగోడు ఉప ఎన్నిక ఓట్ల లెక్కింపు ప్రక్రియ కొనసాగుతోంది. 10వ రౌండ్‌లోనూ అధికార తెరాస ఆధిక్యంలో కొనసాగుతోంది. ఈ రౌండ్‌లో తెరాసకు 7499, భాజపాకు 7015 ఓట్లు వచ్చాయి. దీంతో తెరాస 484 ఓట్ల ఆధిక్యం సాధించింది. మొత్తంగా 4416 ఓట్ల ఆధిక్యంలో కొనసాగుతోంది.

06/11/2022 14:20(IST)

9వ రౌండ్‌లోనూ తెరాస ఆధిక్యం

మునుగోడు ఉప ఎన్నిక ఓట్ల లెక్కింపు ప్రక్రియ కొనసాగుతోంది. 9వ రౌండ్‌లోనూ అధికార తెరాస ఆధిక్యంలో కొనసాగుతోంది. ఈ రౌండ్‌లో తెరాసకు 7497, భాజపాకు 6665 ఓట్లు వచ్చాయి. దీంతో తెరాస 832 ఓట్ల ఆధిక్యం సాధించింది.

06/11/2022 14:14(IST)

తెరాస ఆధిక్యాన్ని దెబ్బ తీస్తోన్న కారును పోలిన గుర్తులు..

మునుగోడు ఉప ఎన్నిక ఫలితాల్లో తెరాస ఆధిక్యాన్ని.. కారును పోలిన గుర్తులు కొంత దెబ్బ తీస్తున్నట్లు కనిపిస్తోంది. ఈవీఎంలలో కారు మాదిరిగా చపాతీ రోలర్, రోడ్డు రోలర్ గుర్తులు ఉన్నాయి. ఏడు రౌండ్లు పూర్తయ్యేసరికి చపాతీ రోలర్‌కు 994, రోడ్డు రోలర్‌కు 746 ఓట్లు వచ్చాయి.

06/11/2022 13:49(IST)

8వ రౌండ్‌ పూర్తి.. మూడు వేలు దాటిన తెరాస ఆధిక్యం

మునుగోడు ఉప ఎన్నిక కౌంటింగ్ ప్రక్రియలో 8వ రౌండ్‌ పూర్తయ్యింది. అధికార తెరాస ఈ రౌండ్‌లోనూ ఆధిక్యంలో ఉంది. 8వ రౌండ్‌లో తెరాసకు 6624 ఓట్లు రాగా.. భాజపాకు 6088 ఓట్లు పోలయ్యాయి. దీంతో ఇప్పటి వరకూ అన్ని రౌండ్లలో కలిపి ఆ పార్టీ 3091 ఓట్ల ఆధిక్యాన్ని సంపాదించింది.

06/11/2022 13:24(IST)

ఏడు రౌండ్లు పూర్తి.. తెరాస ఆధిక్యం 2555

మునుగోడు ఉప ఎన్నిక కౌంటింగ్‌ కొనసాగుతోంది. ఏడో రౌండ్‌ ఫలితాలు వెల్లడయ్యాయి. ఈ రౌండ్‌లోనూ తెరాస ఆధిక్యం కొనసాగింది. ఏడో రౌండ్‌లో తెరాసకు 7189 ఓట్లు రాగా.. భాజపాకు 6803 ఓట్లు పోలయ్యాయి. ఇక మొత్తం ఏడు రౌండ్లు ముగిసే సరికి తెరాస ఆధిక్యం 2555కు చేరింది.

06/11/2022 13:14(IST)

ఫలితాల వెల్లడిలో ఆలస్యం అనుమానాలకు తావిస్తోంది : రఘునందన్‌

ఎన్నికల సంఘం రౌండ్ల వారీగా వెనువెంటనే ఫలితాలను విడుదల చేయాలని భాజపా ఎమ్మెల్యే రఘునందన్‌ రావు డిమాండ్‌ చేశారు. ఎలాంటి అవగాహన లేని అధికారులను, గతంలో పనిచేయని సిబ్బందిని కౌంటింగ్‌ కోసం తీసుకువచ్చారని విమర్శించారు. వీరికి తగిన శిక్షణ కూడా ఇవ్వలేదన్నారు. 47 మంది అభ్యర్థులు ఉండటం వల్లే ఫలితాల వెల్లడి ఆలస్యమవుతోందని ఎన్నికల అధికారులు చెప్పడం సరికాదన్నారు. ఫలితాల వెల్లడిలో ఆలస్యం అనుమానాలకు తావిస్తోందని అన్నారు.

06/11/2022 12:52(IST)

కౌంటింగ్‌ టేబుల్‌పైకి ఏడో రౌండ్‌ ఈవీఎంలు..

ఏడో రౌండ్‌ ఈవీఎంలు కౌంటింగ్‌ టేబుల్ పైకి చేరుకున్నాయి. ఓట్ల లెక్కింపునకు భారత ఎన్నికల సంఘం పరిశీలకులు అనుమతించిన తర్వాతనే ఏడో రౌండ్‌ కౌంటింగ్ ప్రారంభమవుతుందని కలెక్టర్‌ తెలిపారు.

06/11/2022 12:10(IST)

లెక్కింపు పారదర్శకంగా జరుగుతోంది : సీఈవో

మునుగోడు ఉప ఎన్నిక కౌంటింగ్‌ ప్రక్రియ పారదర్శకంగా జరుగుతోందని సీఈవో వికాస్‌ రాజ్‌ వెల్లడించారు. ‘‘ఓట్ల లెక్కింపులో ఎలాంటి అవకతవకలు లేవు. 47 మంది అభ్యర్థులు ఉన్నందున ఎక్కువ సమయం పడుతోంది. ప్రతి టేబుల్‌ వద్ద అబ్జర్వర్లు, ఏజెంట్లు ఉన్నారు. జాప్యం లేకుండా ఓట్ల లెక్కింపు పూర్తి చేస్తాం’ అని చెప్పారు.

06/11/2022 12:09(IST)

పొరపాటు జరిగితే అది మీకే మచ్చ: సీఈవోకు ఈటల ఫోన్‌

రాష్ట్ర ఎన్నికల ప్రధానాధికారి (సీఈవో)తో వికాస్‌రాజ్‌తో భాజపా ఎమ్మెల్యే ఈటల రాజేందర్‌ ఫోన్‌లో మాట్లాడారు. మునుగోడు ఉప ఎన్నిక ఫలితాల వెల్లడిలో ఆలస్యమెందుకని ఆయన ప్రశ్నించారు. ‘‘ఫలితాల్లో పొరపాటు జరిగితే అది మీకే మచ్చ. మునుగోడులో జరిగిన దాడులు, మద్యం.. డబ్బు పంపిణీతో ఈసీపై రాంగ్‌ ఒపీనియన్‌ వచ్చింది. ఫలితాలు సక్రమంగా వెల్లడించండి. గెలుపోటములు సహజం. కానీ మీపై మచ్చ తెచ్చుకోకుండా ఉండండి’’ అని వికాస్‌రాజ్‌తో ఈటల అన్నారు.

06/11/2022 12:07(IST)

మైక్రో అబ్జర్వర్ల నుంచి కూడా కౌంటింగ్ వివరాలు తీసుకుంటున్నాం..

ఉప ఎన్నిక కౌంటింగ్‌ ప్రక్రియపై జిల్లా కలెక్టర్‌ స్పందించారు. ఇప్పటి వరకూ ఐదు రౌండ్ల కౌంటింగ్‌ పూర్తయిందని.. మైక్రో అబ్జర్వర్ల నుంచి కూడా కౌంటింగ్ వివరాలు తీసుకొని రెండింటిని సరిపోల్చిన తర్వాతే ఫలితాలను అధికారికంగా ప్రకటించడానికి అనుమతిస్తున్నట్లు తెలిపారు.

06/11/2022 12:01(IST)

మీడియాకు అధికారులు లీకులు ఇస్తున్నారు : జగదీశ్‌రెడ్డి

ఉప ఎన్నిక ఓట్ల లెక్కింపులో జాప్యంపై తెరాస ఆగ్రహం వ్యక్తం చేసింది. రౌండ్ల వారీ ఫలితాల వెల్లడిలో ఆలస్యంపై మంత్రి జగదీశ్‌రెడ్డి మండిపడ్డారు. మీడియాకు అధికారులు లీకులు ఇస్తున్నారన్న వార్తలపై ఈసీ స్పందించాలని డిమాండ్‌ చేశారు. ప్రతి రౌండ్‌ పూర్తయ్యాక అధికారులే మీడియాకు తెలిపాలని సూచించారు.

06/11/2022 11:48(IST)

నైతిక విజయం నాదే : రాజగోపాల్‌ రెడ్డి

మునుగోడు ఉప ఎన్నికలో నైతిక విజయం తనదేనని భాజపా అభ్యర్థి రాజగోపాల్‌ రెడ్డి అన్నారు. ‘ఈ ఎన్నికల కోసం 84 మంది ఎమ్మెల్యేలను, 16 మంది మంత్రులను రంగంలోకి దించినప్పుడే నా విజయం ఖాయమైంది. ఇది హోరాహోరీ పోరాటం. ఫలితాలు కచ్చితంగా భాజపాకు అనుకూలంగా వస్తాయి. ఎన్నికల కమిషన్‌ సమన్వయ లోపం స్పష్టంగా కనిపిస్తోంది. ఫలితాలు ఎందుకు ఆలస్యం అవుతున్నాయో ఆర్వోను అడిగి తెలుసుకుంటాం’ అని రాజగోపాల్‌రెడ్డి అన్నారు.

06/11/2022 11:43(IST)

మునుగోడు ఉప ఎన్నిక: అయిదో రౌండ్‌లో తెరాస లీడ్‌

మునుగోడు ఉప ఎన్నిక కౌంటింగ్‌ ప్రక్రియ కొనసాగుతోంది. అయిదు రౌండ్లు ముగిసే సమయానికి అధికార తెరాస లీడ్‌లో ఉంది. ఈ రౌండ్‌లో తెరాసకు 6162, భాజపాకు 5245 ఓట్లు వచ్చాయి. దీంతో తెరాస 917 ఓట్ల ఆధిక్యం సాధించింది. మొత్తంగా 1631 ఓట్ల లీడ్‌లో ఉంది.

06/11/2022 11:40(IST)

ఆ 200 ఖాళీ ఈవీఎంల సంగతేంటి?: కేఏ పాల్‌

మునుగోడు ఉస ఎన్నికలో అవినీతి జరిగిందని ప్రజాశాంతి పార్టీ అధ్యక్షుడు కేఏ పాల్ ఆరోపించారు. 200 ఖాళీ ఈవీఎంలను మిగతావాటితో కలిపి భద్రపరచడంపై అనుమానం వ్యక్తం చేశారు. ఎలక్షన్‌ను రద్దు చేయాలని డిమాండ్‌ చేశారు.

06/11/2022 11:31(IST)

ఫలితాల వెల్లడిలో సీఈవో వైఖరి అనుమానాస్పదం : బండి సంజయ్‌

మునుగోడు ఉప ఎన్నిక ఫలితాల వెల్లడిలో రాష్ట్ర ఎన్నికల ప్రధానాధికారి వైఖరి అనుమానాస్పదంగా ఉందని భాజపా రాష్ట్ర అధ్యక్షుడు బండి సంజయ్‌ ఆరోపించారు. తెరాస లీడ్‌లోకి వస్తే తప్ప రౌండ్ల వారీగా ఫలితాలను అప్‌డేట్‌ చేయడం లేదని మండిపడ్డారు. భాజపా లీడ్‌లోకి వచ్చినప్పటికీ ఫలితాలను సీఈవో వెల్లడించడం లేదని తెలిపారు. రౌండ్ల వారీగా ఫలితాల వెల్లడిలో జాప్యానికి కారణమేంటో చెప్పాలని డిమాండ్‌ చేశాడు. ఎన్నికల ఫలితాల వెల్లడిలో ఎన్నడూ లేని ఆలస్యం ఇప్పుడే ఎందుకు జరుగుతోందని ప్రశ్నించారు. ఫలితాల విషయంలో ఏమాత్రం పొరపాటు జరిగినా.. కేంద్ర ఎన్నికల సంఘానికి ఫిర్యాదు చేస్తామని హెచ్చరించారు.

06/11/2022 11:22(IST)

ఫలితాల వెల్లడిలో జాప్యంపై కిషన్‌రెడ్డి ఆగ్రహం..

మునుగోడు ఉప ఎన్నిక ఫలితాల వెల్లడిలో సీఈవో తీరుపై భాజపా ఆగ్రహం వ్యక్తం చేసింది. రౌండ్ల వారీగా ఫలితాల వెల్లడిలో జాప్యంపై కేంద్ర మంత్రి కిషన్‌రెడ్డి అసంతృప్తి వ్యక్తం చేశారు. దీనిపై రాష్ట్ర ఎన్నికల ప్రధానాధికారి వికాస్‌ రాజ్‌కు కిషన్‌రెడ్డి ఫోన్‌ చేశారు. ఎప్పటికప్పుడు ఎందుకు ఫలితాలు వెల్లడించడం లేదని ప్రశ్నించారు. కేంద్ర మంత్రి ఫోన్‌ చేసిన 10 నిమిషాల్లోనే 4 రౌండ్ల ఫలితాలను సీఈవో అప్‌లోడ్‌ చేశారు.

06/11/2022 11:05(IST)

నాలుగు రౌండ్లు పూర్తి.. తెరాస ఆధిక్యం 714 ఓట్లు

మునుగోడు ఉప ఎన్నిక కౌంటింగ్‌ కొనసాగుతోంది. ఇప్పటి వరకూ నాలుగు రౌండ్ల లెక్కింపు పూర్తి కాగా.. తెరాస 714 ఓట్ల ఆధిక్యంలో ఉంది. ఇప్పటి వరకూ తెరాస అభ్యర్థికి 26,433 ఓట్లు రాగా.. భాజపా అభ్యర్థికి 25,729 ఓట్లు వచ్చాయి. కాంగ్రెస్‌ అభ్యర్థికి 7.380 ఓట్లు పోలయ్యాయి.

06/11/2022 10:43(IST)

కౌంటింగ్‌ కేంద్రం నుంచి బయటకు వచ్చిన రాజగోపాల్‌రెడ్డి

మునుగోడు ఉప ఎన్నిక కౌంటింగ్‌ కొనసాగుతోంది. ఇప్పటి వరకూ నాలుగు రౌండ్ల లెక్కింపు పూర్తయ్యింది. స్వల్ప ఆధిక్యంలో తెరాస కొనసాగుతోంది. ఈ నేపథ్యంలో కౌంటింగ్‌ కేంద్రం నుంచి భాజపా అభ్యర్థి రాజగోపాల్‌రెడ్డి బయటకు రావడం గమనార్హం. అక్కడ మీడియాతో మాట్లాడుతూ.. చౌటుప్పల్‌లో తాను అనుకున్న మెజార్టీ రాలేదని.. భాజపా గెలుస్తుందనే నమ్మకం తనకుందని అన్నారు.

06/11/2022 10:26(IST)

నాలుగో రౌండ్‌లో తెరాస ఆధిక్యం..

రెండు, మూడు రౌండ్లలో భాజపా ఆధిక్యంలో కొనసాగగా.. నాలుగో రౌండ్‌ ఫలితాలు వెల్లడయ్యాయి. ఈ రౌండ్‌లో తెరాస ఆధిక్యంలోకి వచ్చేసింది. నాలుగు రౌండ్లు పూర్తయ్యేసరికి ఆ పార్టీకి 714 ఓట్ల ఆధిక్యం లభించింది.

06/11/2022 10:20(IST)

మూడు రౌండ్లు పూర్తి.. స్వల్ప ఆధిక్యంలో తెరాస

మునుగోడు ఉప ఎన్నికలో అధికార తెరాస, భాజపాల మధ్య హోరాహోరీ పోరు నెలకొంది. తొలి రౌండ్‌లో తెరాస ముందంజలో ఉండగా.. రెండు, మూడు రౌండ్లలో భాజపా ఆధిక్యంలో వచ్చేసింది. మొత్తం మూడు రౌండ్లు పూర్తయ్యేసరికి 35 ఓట్ల స్వల్ప ఆధిక్యంలో తెరాస ఉంది.

06/11/2022 09:54(IST)

మునుగోడులో హోరాహోరీ.. మూడో రౌండ్‌ భాజపాదే..

మునుగోడు ఉప ఎన్నిక కౌంటింగ్‌ కొనసాగుతోంది. తెరాస, భాజపాల మధ్య నువ్వా, నేనా? అన్నట్లు పోరు నెలకొంది. రౌండ్‌ రౌండ్‌కు ఆధిక్యం మారుతోంది. తొలి రౌండ్‌లో తెరాస ముందంజలో ఉండగా.. రెండు, మూడో రౌండ్లలో భాజపా ఆధిక్యంలో కొనసాగుతోంది.

06/11/2022 09:36(IST)

రెండు రౌండ్లు పూర్తి.. 563 ఓట్ల ఆధిక్యంలో తెరాస

మునుగోడు ఉప ఎన్నిక కౌంటింగ్‌ కొనసాగుతోంది. రెండు రౌండ్ల కౌంటింగ్‌ పూర్తయ్యింది. తొలి రౌండ్‌లో తెరాస ఆధిక్యంలో ఉండగా.. రెండో రౌండ్‌ పూర్తయ్యేసరికి భాజపా ముందంజలోకి వచ్చేసింది. మొత్తం రెండు రౌండ్లు పూర్తయ్యాక.. 563 ఓట్ల ఆధిక్యంలో తెరాస కొనసాగుతోంది.

06/11/2022 08:59(IST)

తొలి రౌండ్‌ ఫలితం : ఆధిక్యంలో తెరాస

మునుగోడు ఉప ఎన్నిక కౌంటింగ్‌ కొనసాగుతోంది. మొదటి రౌండ్‌ ఓట్ల లెక్కింపు పూర్తికాగా.. తెరాస ఆధిక్యంలో కొనసాగుతోంది. వెయ్యికిపైగా ఓట్లతో ఆ పార్టీ అభ్యర్థి కూసుకుంట్ల ప్రభాకర్‌రెడ్డి ఆధిక్యంలో ఉన్నారు.

06/11/2022 08:41(IST)

కాంగ్రెస్‌ విజయాన్ని ఎవరూ ఆపలేరు : పాల్వాయి స్రవంతి

మునుగోడు ఉప ఎన్నికలో కాంగ్రెస్‌ విజయాన్ని ఎవరూ ఆపలేరని ఆ పార్టీ అభ్యర్థి పాల్వాయి స్రవంతి అన్నారు. కౌంటింగ్‌ ప్రక్రియను పరిశీలించిన అనంతరం ఆమె మాట్లాడారు. ప్రజలు పెద్ద ఎత్తున కాంగ్రెస్‌కు మద్దతు పలికారని తెలిపారు.

06/11/2022 08:36(IST)

కౌంటింగ్‌ కేంద్రంలోనికి వాహనాలకు అనుమతి లేదు..

మునుగోడు ఉప ఎన్నిక కౌంటింగ్‌ కొనసాగుతోంది. ఎన్నికల కమిషన్‌ నిబంధనల మేరకు కౌంటింగు కేంద్రానికి 200 మీటర్లలోపు వాహనాల రాకపోకలను నియంత్రిస్తున్నారు. కౌంటింగు కేంద్రం లోపలి వరకు వాహనాలు రావడానికి అనుమతి లేదని అధికారులు స్పష్టం చేశారు. పోటీ అభ్యర్థుల కౌంటింగు ఏజెంట్ల వాహనాల పార్కింగు లక్ష్మీగార్డెన్‌లో ఏర్పాటు చేసినట్లు తెలిపారు.

06/11/2022 08:08(IST)

ఒంటి గంటకు చివరి రౌండ్‌ ఫలితం..

మునుగోడు ఉప ఎన్నిక ఓట్ల లెక్కింపు కొనసాగుతోంది. మొత్తం 15 రౌండ్లలో లెక్కింపు చేపట్టనున్నారు. చివరి రౌండ్‌ ఫలితం మధ్యాహ్నం ఒంటి గంటకు వచ్చే అవకాశం ఉంది. ఓట్ల లెక్కింపు కోసం 21 టేబుళ్లు ఏర్పాటు చేశారు.

06/11/2022 08:01(IST)

కౌంటింగ్‌ ప్రారంభం.. పోస్టల్‌ బ్యాలెట్‌ లెక్కింపు..

రాష్ట్ర వ్యాప్తంగా ఎంతో ఉత్కంఠగా ఎదురుచూస్తోన్న మునుగోడు ఉప ఎన్నిక ఓట్ల లెక్కింపు ప్రారంభమైంది. ఉదయం 8 గంటలకు పోస్టల్‌ బ్యాలెట్‌ లెక్కింపు చేపట్టారు. 8.30 నుంచి ఈవీఎం ఓట్ల లెక్కింపు ప్రారంభించనున్నారు. ఉదయం 9 తర్వాత తొలి రౌండ్‌ ఫలితం వెలువడే అవకాశం ఉంది.

06/11/2022 07:55(IST)

ఓట్ల లెక్కింపు విధుల్లో 250 మంది సిబ్బంది..

మునుగోడు ఓట్ల లెక్కింపు విధుల్లో మొత్తం 250 మంది సిబ్బంది పాల్గొంటున్నారు. లెక్కింపు కోసం 100 మంది.. ఇతర కార్యకలాపాలకు 150 మందిని కేటాయించారు. ముందుగా చౌటుప్పల్‌, నారాయణపురం, మునుగోడు మండలాల ఓట్ల లెక్కింపు చేపడతారు.

06/11/2022 07:28(IST)

గుబులుతో నాయకులు.. గుంభనంగా అనుచరులు

మునుగోడు ఉప ఎన్నికలు ఫలితాలు ఆదివారం వెలువడనున్న నేపథ్యంలో నియోజకవర్గంలోని ముఖ్య నాయకులు నల్గొండకు మకాం మార్చారు. అనుచరులు మాత్రం గ్రామాల్లోనే ఫలితాల కోసం వేచి చూస్తున్నారు. గతంలో ఏ ఎన్నిక జరిగినా ఫలితాలు రాక ముందే తమదంటే తమదే విజయమని సమాచార సాధనాల్లో ప్రకటనలు చేసే రాజకీయ పార్టీల నాయకులు ప్రస్తుతం అందుకు భిన్నంగా మౌనం వహిస్తుండటం గమనార్హం. ఉప ఎన్నికలో ఓటర్లు ఎవరిని ఆదరించారోననేది తేల్చుకోలేకపోతున్నారు. ఆదివారం వచ్చే ఫలితం నాయకులకు గుబులు రేపుతుండగా అనుచరులు మాత్రం ఏమీ మాట్లాడకుండా గుంభనంగా వ్యవహరిస్తున్నారు.

పూర్తి కథనం కోసం క్లిక్‌ చేయండి

06/11/2022 07:08(IST)

ఎవరి లెక్కల్లో వారు..

పోలింగ్‌ అనంతరం గ్రామాలు, మండలాల వారీగా సమీక్షలు చేసిన అభ్యర్థులు, పార్టీ నాయకులు తమకే అవకాశముంటుందని నమ్ముతున్నారు. సర్వేల ఆధారంగా తెరాస విజయంపై ధీమాతో ఉంది. పోలింగ్‌ సరళిపై ఇప్పటికే బూత్‌ల వారీగా ఉన్న ఏజెంట్లతో వివరాలు తెప్పించుకొని అంశాలన్నింటినీ పార్టీ క్రోడీకరించింది. ఎంపీటీసీ పరిధిలో ఇన్‌ఛార్జులను నియమించడంతో ఆయా ప్రాంతాల్లో పోలింగ్‌ శాతం తదితర అంశాలను సమీక్షించింది. మరోవైపు మధ్యాహ్నం అనంతరం పెరిగిన పోలింగ్‌ శాతాన్ని బట్టి తమకు కచ్చితంగా అవకాశముంటుందని భాజపా ఆశాభావంతో ఉంది. చండూరు, చౌటుప్పల్‌ పురపాలికలతో పాటూ మండల కేంద్రాల్లో తమకు అనుకున్నదానికేంటూ ఎక్కువ ఓట్లు పడ్డాయని పార్టీ నాయకులు వెల్లడిస్తున్నారు. మహిళలు, సైలెంట్‌ ఓటింగ్‌ తమకు విజయం చేకూరుస్తుందని కాంగ్రెస్‌ శ్రేణులు నమ్ముతున్నాయి. వివిధ వర్గాల్లో పార్టీ అభ్యర్థిపై ఉన్న సానుభూతి కలిసొస్తుందని పార్టీ నాయకులు నమ్ముతున్నారు. మరోవైపు బీఎస్పీ, రోడ్‌రోలర్‌ గుర్తుల అభ్యర్థులు సైతం తాము ప్రభావం చూపుతామని చెబుతున్నారు. అభ్యర్థులు విజయంపై ఎవరికి వారు ధీమా వ్యక్తం చేస్తున్నారు.

06/11/2022 07:07(IST)

నేడు తేలనున్న మునుగోడు ఫలితం

‘ఉప ఎన్నిక ఓట్ల లెక్కింపు కోసం మూడంచెల భద్రతను ఏర్పాటు చేశాం. ఓట్ల లెక్కింపు హాలులో కేంద్ర బలగాలు భద్రత నిర్వహిస్తాయి. మిగిలిన రెండంచెల్లో రాష్ట్ర పోలీసులుంటారు’ అని కేంద్ర ఎన్నికల సంఘం తెలంగాణ రాష్ట్ర ముఖ్య ఎన్నికల అధికారి వికాస్‌ రాజ్‌ వెల్లడించారు. నియోజకవర్గంలో 80 సంవత్సరాలు దాటిన 686 మంది పోస్టల్‌ బ్యాలెట్‌ను ఉపయోగించుకున్నారన్నారు. ఎలక్ట్రానిక్‌ విధానంలో సర్వీసు ఓట్ల(ఆర్మీకి చెందినవారి)ను ఆదివారం ఉదయం ఎనిమిది గంటల వరకు అనుమతిస్తామని.. వాటినీ లెక్కిస్తామన్నారు. శనివారం నిర్వహించిన మాక్‌ కౌంటింగ్‌ విజయవంతమైందని జిల్లా ఎన్నికల అధికారి, కలెక్టరు వినయ్‌కృష్ణారెడ్డి ‘ఈనాడు’తో చెప్పారు. లెక్కింపు కేంద్రం వద్ద 500 మంది పోలీసు అధికారులు, సిబ్బందితో భద్రతా ఏర్పాట్లు చేసినట్లు ఎస్పీ రెమా రాజేశ్వరి తెలిపారు. మూడు కంపెనీల కేంద్ర బలగాలు కూడా భద్రతా విధుల్లో పాల్గొంటాయన్నారు. ఉదయం 8 గంటలకు ప్రారంభమవనున్న లెక్కింపు ప్రక్రియలో తొలుత పోస్టల్‌ బ్యాలెట్‌, సర్వీసు ఓట్లను లెక్కించిన అనంతరం 8.30 గంటలకు ఈవీఎంలలోని ఓట్లను గణిస్తారు. పోస్టల్‌ బ్యాలెట్‌ లెక్కింపునకు రెండు టేబుళ్లు.. ఈవీఎంల లెక్కింపునకు మొత్తం 21 టేబుళ్లను ఏర్పాటు చేశారు. మొత్తం 15 రౌండ్లలో (14 పూర్తిగా, 15వ రౌండ్లో నాలుగు టేబుళ్లు) లెక్కించనున్నారు. అనంతరం డ్రా పద్ధతిన అయిదు పోలింగ్‌ బూత్‌లకు సంబంధించిన ఈవీఎంలలోని వీవీస్లిప్‌లను లెక్కించి సరిచూస్తారు. మధ్యాహ్నం 3 గంటలలోపు తుది ఫలితాలు వెల్లడవుతాయని అధికారులు వెల్లడించారు. రౌండ్ల వారీగా ఫలితాలను కౌంటింగ్‌ కేంద్రంలో ఏర్పాటు చేసిన స్క్రీన్‌లపై ప్రదర్శించనున్నారు.