Breaking | Feedback | ePratibha | E-PAPER | Pratibha

Telangana Budget Live Updates: ఏప్రిల్‌ నుంచి కాంట్రాక్టు ఉద్యోగుల సర్వీసుల క్రమబద్ధీకరణ

తెలంగాణ ప్రభుత్వం బడ్జెట్‌ (Telangana Budget 2023)ను శాసనసభ (TS Assembly)లో ప్రవేశపెట్టింది. ఆర్థిక మంత్రి హరీశ్‌రావు రూ.2,90,396కోట్లతో బడ్జెట్‌ను సభ ముందుకు తీసుకొచ్చారు. ఎన్నికల సంవత్సరంలో ప్రవేశపెడుతున్న కీలక బడ్జెట్‌ కావడంతో రాష్ట్ర ప్రభుత్వం భారీ కసరత్తు చేసింది.

Updated : 06 Feb 2023 12:39 IST

06/02/2023 16:20(IST)

ఇది అమలయ్యే బడ్జెట్‌ కాదు.. ఆనవాయితీ బడ్జెట్‌: జీవన్‌రెడ్డి

గతేడాది బడ్జెట్‌నే రాష్ట్ర ప్రభుత్వం రిపీట్‌ చేసిందని ఎమ్మెల్సీ జీవన్‌రెడ్డి విమర్శించారు. విడతల వారీగా రుణమాఫీ ఇవ్వాల్సి ఉన్నప్పటికీ ఇప్పటికీ పూర్తి చేయలేదని అన్నారు. ‘‘డబుల్‌ బెడ్‌రూమ్‌ ఇళ్లు లేవు.. దళితబంధు గతేడాది ఎంత కేటాయించారో ఇప్పుడు కూడా అంతే కేటాయించారు. హౌసింగ్‌ బోర్డును ఎత్తేశారు. సెల్ఫ్‌ ఎంప్లాయ్‌మెంట్‌, ఉపాధి అవకాశాలపై ఆశ కల్పించలేకపోయారు. నిరుద్యోగ భృతి లేదు, ఉద్యోగాల భర్తీ సరిగ్గా చేయడం లేదు. ఉత్తర తెలంగాణలో గల్ఫ్‌ బాధితులు పెరుగుతున్నారు. గల్ఫ్‌ సహాయనిధి పెంచాలి. రాష్ట్రం వచ్చిన తర్వాత శంషాబాద్‌ ఎయిర్‌పోర్టుకు గల్ఫ్‌ నుంచి 2 వేల శవపేటికలు వచ్చాయి. అయినా ఆ కుటుంబాలకు సాయం చేసే దిశగా చర్యలు లేవు’’ అని జీవన్‌రెడ్డి అన్నారు. వారి సంక్షేమం కోసం రూ.5 వేల కోట్లు కేటాయించాలని డిమాండ్‌ చేశారు. ఇది అమలయ్యే బడ్జెట్‌ కాదని.. ఆనవాయితీ బడ్జెట్‌ అని విమర్శించారు.

06/02/2023 15:31(IST)

బలహీన వర్గాలకు ఇంత తక్కువ కేటాయింపులా?: భట్టి

బడ్జెట్‌లో బలహీనవర్గాలకు తక్కువగా కేటాయించారని సీఎల్పీనేత భట్టి విక్రమార్క ఆరోపించారు. కేవలం రూ.6,229 కోట్లు మాత్రమే కాటాయించారని అన్నారు. ఎనిమిదేళ్లుగా ఎస్సీ, ఎస్టీ సబ్‌ప్లాన్‌ నిధులు పక్కదారి పట్టిస్తున్నారని ఆరోపించారు. పాత పింఛన్‌ ఇవ్వాలని ఉద్యోగులు కోరుతున్నా.. బడ్జెట్‌లో సీపీఎస్‌ ఊసే ఎత్తలేదని అన్నారు. 16 లక్షల మంది రైతుల కాతాలు ఎన్‌పీఏగా మారిపోయాయని, దీనివల్ల రైతులు బ్యాంకుల్లో రుణాలు తీసుకోలేని పరిస్థితి ఏర్పడిందని విమర్శించారు. తెరాస ప్రభుత్వం ప్రవేశపెట్టిన బడ్జెట్‌ అంతా ఆర్థికమంత్రి హరీశ్‌రావు అంకెల గారడీ మాత్రమేనని అన్నారు.

06/02/2023 13:34(IST)

బడ్జెట్‌ అంతా అంకెల గారడీయే: ఈటల

రాష్ట్ర ప్రభుత్వం ప్రవేశపెట్టిన బడ్జెట్‌ అంతా అంకెల గారడీయేనని భాజపా ఎమ్మెల్యే ఈటల రాజేందర్‌ విమర్శించారు. ఈ కేటాయింపుల్లో 70-80 శాతం నిధులు విడుదల కావని చెప్పారు. చాలా శాఖలకు కోతలు పెట్టారని ఆయన ఆరోపించారు. పూర్తిగా రుణమాఫీ చేయాలని రైతులు కోరుతున్నారన్నారు.

06/02/2023 13:29(IST)

సంక్షేమ రంగానికి బడ్జెట్‌లో పెద్దపీట: ఎమ్మెల్యే బిగాల గణేశ్‌ గుప్తా

బడ్జెట్‌లో వ్యవసాయం, నీటిపారుదల, విద్యుత్తు, విద్య, వైద్య రంగాలకు పెద్దపీట వేశారని భారాస ఎమ్మెల్యే బిగాల గణేశ్‌ గుప్తా అన్నారు. రాష్ట్రంలోని అన్ని రంగాల్లో సమూల మార్పులు చేస్తున్నారని.. సీఎం కేసీఆర్‌ మాటల్లో కాకుండా చేతల్లో చూపించారని కొనియాడారు. సంక్షేమ రంగానికి బడ్జెట్‌లో భారీగా నిధులు కేటాయించారని చెప్పారు.

06/02/2023 12:19(IST)

పూర్తయిన బడ్జెట్ ప్రసంగం.. శాసనసభ వాయిదా

2023-24 సంవత్సరానికి సంబంధించి తెలంగాణ రాష్ట్ర బడ్జెట్‌ను ఆర్థిక మంత్రి హరీశ్‌రావు అసెంబ్లీలో ప్రవేశపెట్టారు. హరీశ్‌రావు బడ్జెట్‌ ప్రసంగం పూర్తయిన తర్వాత శాసనసభ వాయిదా పడింది. బుధవారం ఉదయం 10 గంటలకు తిరిగి అసెంబ్లీ సమావేశాలు ప్రారంభం కానున్నాయి.

06/02/2023 12:15(IST)

ఏప్రిల్‌ నుంచి కాంట్రాక్టు ఉద్యోగుల సర్వీసుల క్రమబద్ధీకరణ

‘‘రాష్ట్ర అభివృద్ధిలో ఉద్యోగులది కీలకమైన భాగస్వామ్యం. ప్రభుత్వ ఉద్యోగులతో పాటు సమానంగా అంగన్ వాడీ, ఆశా, ఇంకా ఔట్ సోర్సింగ్ ఉద్యోగులకు ఫిట్ మెంట్ ఇవ్వటం, దానిని ఏకకాలంలో వర్తింపచేయటం దేశంలోనే ప్రథమం. ఉద్యోగ, ఉపాధ్యాయ సంఘాల విజ్ఞప్తుల మేరకు కొత్త ఈహెచ్ ఎస్ విధానాన్ని ఈ ఆర్థిక సంవత్సరంలో తీసుకురావాలని ప్రభుత్వం నిర్ణయించింది. గతంలో స్థానికులకు 60 నుంచి 80 శాతం వరకు మాత్రమే లోకల్ రిజర్వేషన్లు ఉండేది. ఇప్పుడు అమలు చేస్తున్న నూతన నియామక విధానంతో అటెండర్ నుంచి ఆర్డీవో దాకా స్థానికులకే 95 శాతం ఉద్యోగాలు లభిస్తాయి. కొత్త నియామకాలు ఈ పద్ధతిలోనే జరుగుతున్నాయి. ఇది తెలంగాణ ప్రభుత్వం సాధించిన చారిత్రాత్మక విజయం. 2014 జూన్ నుంచి ఫిబ్రవరి 2022 దాకా ప్రత్యక్ష నియామక విధానం ద్వారా 1,61,572 ఉద్యోగాల భర్తీకి ప్రభుత్వం అనుమతి ఇచ్చింది. వీటిలో 1,41735 పోస్టుల ప్రక్రియ పూర్తయింది. కొత్త ఉద్యోగుల జీతభత్యాల కోసం ఈ బడ్జెట్‌లో రూ.1000 కోట్లు అదనంగా ప్రతిసాదిస్తున్నాం ఇచ్చిన మాటప్రకారం ఏప్రిల్‌ నుంచి కాంట్రాక్టు ఉద్యోగుల సర్వీసులను క్రమబద్ధీకరణ, సెర్ఫ్‌ ఉద్యోగుల పేస్కేల్‌ సవరణ చేయబోతున్నాం’’

06/02/2023 12:10(IST)

హోంశాఖకు రూ.9,599 కోట్లు

‘‘రాష్ట్రంలో శాంతి భద్రతల నిర్వహణ సమర్థంగా ఉంది. ఇప్పటివరకు ప్రభుత్వం కొత్తగా 31,198 పోలీసు ఉద్యోగాల కల్పన చేశాం. రాష్ట్రంలో నిఘా వ్యవస్థను పటిష్ఠం చేయడం కోసం ప్రభుత్వం రాష్ట్ర వ్యాప్తంగా 9.8 లక్షల సీసీ కెమెరాలను ఏర్పాటు చేశాం. రాష్ట్రంలో విపత్తుల సహాయ నిర్వహణను సమర్థంగా జరపడం కోసం 2022లో కొత్తగా 18 ఫైర్ స్టేషన్లను ప్రభుత్వం ఏర్పాటు చేశాం. ఈ సంవత్సరం బడ్జెట్లో హోంశాఖకు రూ.9,599 కోట్లు ప్రతిపాదిస్తున్నాం’’

06/02/2023 12:08(IST)

పరిశ్రమలశాఖకు రూ.4,037 కోట్లు

‘‘తెలంగాణ ప్రభుత్వం ప్రతిష్టాత్మకంగా ప్రవేశపెట్టిన టీఎస్ ఐపాస్ చట్టం విప్లవాత్మకమైన మార్పులను తీసుకొచ్చింది. పరిశ్రమల స్థాపనకు సంబంధించిన అనుమతుల ప్రక్రియ అత్యంత సులభతరంగా మారింది. ఐటీ ఉద్యోగాల నియామకాల్లో కూడా 156 శాతం వృద్ధి ఉండటం విశేషం. ఐటీ ఎగుమతుల్లో 2021-22 సంవత్సరానికి గాను 26.14 శాతం వృద్ధితో తెలంగాణ దేశంలోనే నంబర్ వన్ స్థానానికి చేరుకుంది. ఐటీరంగాన్ని ద్వితీయ శ్రేణి నగరాలకూ విస్తరించాలనే లక్ష్యంతో ప్రభుత్వం వరంగల్, కరీంనగర్, ఖమ్మంలలో ఐటీ టవర్లను నిర్మించింది. నిజామాబాద్, మహబూబ్ నగర్, నల్లగొండ మరియు సిద్దిపేటలో ఐటీ టవర్లు నిర్మాణంలో ఉన్నాయి. వీటిని ఈ ఆర్థిక సంవత్సరంలో ప్రారంభిస్తాం. పరిశ్రమల శాఖకు ఈ బడ్జెట్లో రూ.4,037 కోట్లు ప్రతిపాదిస్తున్నా’’

06/02/2023 12:06(IST)

రహదారుల నిర్వహణ మరమ్మతుల కోసం రూ.2500 కోట్లు

తెలంగాణ ఏర్పడిన తర్వాత వందల కి.మీ. మేర రహదారులను అభివృద్ధి చేశాం. రాష్ట్ర ప్రభుత్వం 29 జిల్లాల్లో 1581 కోట్లతో సమీకృత కలెక్టరేట్ల నిర్మాణం చేపట్టింది. అధునాతన వసతులతో 7 లక్షల చదరపు అడుగుల విస్తీర్ణంతో 7 అంతస్తుల సచివాలయ భవనం నిర్మాణం పూర్తయింది. ఈ సచివాలయాన్ని ఫిబ్రవరి 17న ముఖ్యమంత్రి కేసీఆర్ ప్రారంభిస్తారు. ఈ సంవత్సరం రాష్ట్రంలో రోడ్లు భవనాల శాఖ ద్వారా రహదారుల నిర్వహణ మరమ్మతుల కోసం బడ్జెట్‌లో రూ.2500 కోట్లు ప్రతిపాదిస్తున్నాం’’

06/02/2023 11:57(IST)

పురపాలకశాఖకు రూ.11,372 కోట్లు

‘‘ప్రజల అవసరాలకు అనుగుణంగా పట్టణాల్లో మౌలిక వసతులను కల్పిస్తున్నాం. శ్మశాసనాలను ఆధునిక వసతులతో వైకుంఠ ధామాలుగా మార్చేందుకు రూ.346 కోట్లు కేటాయించాం. అర్బన్‌ మిషన్‌ భగీరథ కింద 141 మున్సిపాలిటీల్లో 6578 కోట్లతో ఇంటింటికీ సురక్షిత తాగునీటి జలాలను అందిస్తున్నాం. ఎస్సార్డీపీ కింద 42 కీలక రహదారులు, ఫ్లైఓవర్లు, అండర్‌పాస్‌లు అభివృద్ధి చేస్తున్నాం. పెరుగుతున్న విమాన ప్రయాణికుల రవాణా సౌకర్యం కోసం హైదరాబాద్‌ నలుమూలల నుంచి ఎయిర్‌పోర్ట్‌కు మెట్రోరైలును ఎయిర్‌పోర్ట్‌కు అనుసంధానిస్తూ ‘ఎయిర్‌పోర్ట్‌ మెట్రో’ రూపకల్పన చేశాం. రూ.6250 కోట్ల మూడేళ్లలో పూర్తి చేస్తాం. హెచ్‌ఎండీఏ పరిధిలో రూ.387 కోట్లతో అభివృద్ధి కార్యక్రమాలు జీహెచ్‌ఎంసీ పరిధిలో 32.218 డబుల్‌ బెడ్‌రూమ్‌ ఇళ్ల నిర్మాణం వివిధ దశల్లో ఉంది. ఈ బడ్జెట్‌లో రూ.11,372 కోట్లు ప్రతిపాదిస్తున్నాం’’

06/02/2023 11:50(IST)

పంచాయతీరాజ్‌ శాఖకు రూ.31,426 కోట్లు

‘‘స్థానిక సంస్థలకు మరో శుభవార్త. ఈ ఆర్థిక సంవత్సరం నుంచి రాష్ట్ర ప్రభుత్వం విడుదల చేసే పట్టణ, పల్లె ప్రగతి నిధులతో పాటు, ఫైనాన్స్‌ కమిషన్‌ నిధులు కూడా నేరుగా స్థానిక సంస్థల ఖాతాల్లోకి బదిలీ చేయాలని నిర్ణయించాం. 9243 కి.మీ. మేర రహదారులకు ఇరువైపులా మొక్కలను నాటి సంరక్షిస్తోంది. దెబ్బతిన్న పంచాయతీరాజ్‌ పాత రోడ్ల మరమ్మతుల నిర్వహణ కోసం బడ్జెట్‌లో రూ.2వేల కోట్లు ప్రతిపాదన. అలాగే, పంచాయతీ రాజ్‌ శాఖకు బడ్జెట్‌లో రూ.31,426 కోట్లు ప్రతిపాదిస్తున్నాం’’

06/02/2023 11:45(IST)

వైద్య, ఆరోగ్య రంగానికి రూ.12,161 కోట్లు

‘‘పేద ప్రజలకు ఉత్తమమైన వైద్య సేవలందించడంలో తెలంగాణ రాష్ట్రం దేశంలో మూడో స్థానంలో నిలిచింది. ప్రతి లక్ష జనాభాకు సగటున 19 ఎంబీబీఎస్‌ సీట్లతో వైద్య విద్యలో తెలంగాణ మొదటి స్థానంలో ఉంది. కంటి వెలుగు ద్వారా 1 కోటి 54లక్షల మందికి పరీక్షలు నిర్వహించి 40లక్షలకు పైగా కళ్లద్దాలను పంపిణీ చేసింది. హైదరాబాద్‌ నగరం నలువైపులా సూపర్‌ స్పెషాలిటీ ఆస్పత్రులను నిర్మిస్తోంది. 1100 కోట్ల ఖర్చుతో రెండు వేల బెడ్ల సామర్థ్యంతో వరంగల్‌లో హెల్త్‌ సిటీ నిర్మాణాన్ని ప్రారంభించింది. డయాలసిస్‌ సేవలు, మాతాశిశు ఆరోగ్యం.. పౌష్టికాహారం, కేసీఆర్‌ కిట్‌, కేసీఆర్‌ న్యూట్రిషన్‌ కిట్‌ వంటి వాటితో పాటు, క్యాన్సర్‌, ఎయిడ్స్‌ వ్యాధులతో అవసాన దశకు చేరిన రోగులకు ప్రభుత్వం పాలియేటివ్‌ కేర్‌ను తెలంగాణ ప్రభుత్వం చేపట్టింది. వైద్య, ఆరోగ్య రంగానికి ఈ బడ్జెట్‌లో రూ.12,161 కోట్లు ప్రతిపాదిస్తున్నాం’’

06/02/2023 11:39(IST)

విద్యాశాఖకు రూ.19,093కోట్లు

రాష్ట్రంలో విద్యారంగాన్ని బలోపేతం చేయడానికి ప్రభుత్వం చిత్తశుద్ధితో కృషి చేస్తోంది. ‘మన ఊరు మన బడి’ ద్వారా పాఠశాలల అభివృద్ధి, యూనివర్సిటీల్లో మౌలిక వసతుల కల్పన, ఆంగ్ల మాధ్యమంలో బోధన ఇలాంటి ఎన్నో వినూత్న కార్యక్రమాలు ప్రభుత్వం చేపడుతోంది. విద్యార్థులకు సన్నబియ్యంతో భోజనం అందిస్తున్న ఏకైక రాష్ట్రంగా తెలంగాణ నిలిచింది. విద్యాశాఖ అభివృద్ధి కోసం ఈ బడ్జెట్‌లో రూ.19,093కోట్లు ప్రతిపాదిస్తున్నాం’’

06/02/2023 11:35(IST)

అటవీశాఖ, తెలంగాణ హరితహారానికి రూ.1471 కోట్లు

‘‘హరితహారం కార్యక్రమంలో ప్రజలు ఉద్యమ స్ఫూర్తితో పాల్గొంటున్నారు. తెలంగాణలో మొత్తం గ్రీన్‌ కవర్‌ 1.70శాతం పెరిగింది. రూ.1500 కోట్ల వ్యయంతో 13లక్షల ఎకరాల అడవికి తెలంగాణ ప్రభుత్వం పునరుజ్జీవం కల్పించింది. రాష్ట్రంలో పులుల సంఖ్య 26కు చేరింది. చిరుతల సంఖ్య 341 అయింది. అటవీశాఖ, తెలంగాణ హరితహారానికి ఈ బడ్జెట్‌లో రూ.1,471 కోట్లు ప్రతిపాదిస్తున్నాం’’

06/02/2023 11:32(IST)

జర్నలిస్టుల, న్యాయవాదుల సంక్షేమం కోసం..

జర్నలిస్టుల సంక్షేమం కోసం తెలంగాణ ప్రభుత్వం రూ.100కోట్ల నిధిని కార్పస్‌ ఫండ్‌కు కేటాయించింది. రూ.15కోట్ల నిర్మిస్తున్న మీడియా అకాడమీ భవన నిర్మాణం తుది దశకు చేరుకుంది. న్యాయవాదుల సంక్షేమం కోసం కూడా రూ.100కోట్ల నిధిని సమకూర్చింది.

06/02/2023 11:28(IST)

కళ్యాణలక్ష్మి/ షాదీ ముబారక్‌ కోసం రూ.3,210కోట్లు

కళ్యాణలక్ష్మి/ షాదీ ముబారక్‌ పథకం కింద కుల, మతాలకతీతంగా పేదింటి ఆడపిల్లల కోసం తెలంగాణ ప్రభుత్వం 1,00,166 రూపాయలు ఆర్థికసాయం అందిస్తోంది. ఈ బడ్జెట్‌లో ఇందుకోసం రూ.3,210కోట్లు కేటాయిస్తున్నాం. మహిళా శిశు సంక్షేమానికి ఈ బడ్జెట్‌లో రూ.2.131కోట్ల ప్రతిపాదిస్తున్నాం. మైనార్టీ సంక్షేమం కోసం రూ.2,200 కోట్లు కేటాయిస్తున్నాం.’’

06/02/2023 11:23(IST)

బీసీ వర్గాల సంక్షేమం కోసం రూ.6,229 కోట్లు

‘‘వృత్తి పనులపై ఆధారపడి జీవిస్తున్న బడుగు బలహీన వర్గాల అభ్యున్నతి కోసం ప్రత్యేక పథకాలు రూపొందించడంలో తెలంగాణ ప్రభుత్వం ప్రత్యేక శ్రద్ధతో పనిచేస్తోంది. గొర్రెల పెంపకంపై ఆధారపడి జీవిస్తున్న గొల్ల కురుమలకు చేయూతనివ్వడం కోసం.. తెలంగాణ ప్రభుత్వం భారీఎత్తున గొర్రెల పంపిణీ చేపట్టింది. ఇక స్వరాష్ట్రంలో తెలంగాణ ప్రభుత్వం చేనేతలకు గొప్ప అండదండలను అందిస్తోంది. బతుకమ్మ పండుగ సందర్భంగా పంపిణీ చేసే చీరల తయారీ ఆర్డర్లను చేనేత, పవర్ లూమ్ పరిశ్రమలకు అప్పగిస్తోంది. రాష్ట్రవ్యాప్తంగా డిజిటల్ సర్వే నిర్వహించి చేనేత, పవర్ లూమ్ కార్మికులను గుర్తించి వారికి జియోట్యాగింగ్ ఇవ్వడం ద్వారా ప్రభుత్వం అందించే ప్రోత్సాహకాలు, పథకాల ప్రయోజనాలు పారదర్శకంగా, నేరుగా లబ్ధిదారుల ఖాతాల్లోకి బదిలీ అవుతున్నాయి. చేనేత కార్మికులకు ఆసరా పింఛన్ అందించడమే కాకుండా, నేతన్నకు బీమా పథకం కింద 5 లక్షల బీమాను అందిస్తున్నాం. గీత కార్మికులకు మరింత లబ్ధి చేకూర్చేందుకు రాష్ట్ర ప్రభుత్వం నీరాను సాఫ్ట్ డ్రింక్‌గా మార్చి అందించే ప్రాజెక్టును చేపట్టింది. ప్రమాదవశాత్తూ మరణించిన గీత కార్మికుల కుటుంబాలకు ప్రభుత్వం 5 లక్షల పరిహారాన్ని అందిస్తున్నది. తెలంగాణ ప్రభుత్వం బీసీ గురుకులాల సంఖ్యను గణనీయంగా పెంచింది. బీసీ సంక్షేమం కోసం ఈ బడ్జెట్‌లో రూ.6229 కోట్లు కేటాయిస్తున్నాం’’

06/02/2023 11:13(IST)

షెడ్యూల్‌ కులాల ప్రత్యేక ప్రగతికి రూ.36,750

‘‘షెడ్యూల్‌ కులాలు, తెగల అభివృద్ధే లక్ష్యంగా ప్రత్యేక ప్రగతి నిధి చట్టాన్ని రాష్ట్ర ప్రభుత్వం అమలు చేస్తోంది. ఈ బడ్జెట్‌లో షెడ్యూలు కులాల ప్రత్యేక ప్రగతి నిధి కింద రూ.36,750 కోట్లు ప్రతిపాదిస్తున్నాం. దళిత విద్యార్థులు విదేశాల్లో ఉన్నత విద్యను అభ్యసించడానికి అంబేడ్కర్‌ ఓవర్సీస్‌ స్కాలర్‌షిప్‌ కింద రూ.20లక్షల ఆర్థికసాయాన్ని ప్రభుత్వం అందిస్తోంది. ఇక గిరిజన సంక్షేమం కోసం షెడ్యూల్‌ తెగల ప్రత్యేక నిధి కింది రూ.15,233కోట్లు ప్రతిపాదిస్తున్నాం’’

06/02/2023 11:10(IST)

దళిత బంధు కోసం రూ.17,700 కోట్లు

‘‘అణగారిన దళితజాతి సమగ్ర అభ్యుదయం కోసం తెలంగాణ ప్రభుత్వం ప్రత్యేక శ్రద్ధ వహిస్తోంది. చరిత్రలో మునుపెన్నడూ లేనివిధంగా రాష్ట్ర ప్రభుత్వం ప్రతి దళిత కుటుంబానికి 10 లక్షల రూపాయల ఆర్థిక సహాయాన్ని అందిస్తోంది. దళితబంధు సాయం వారి కుటుంబాలను ఆర్థికంగా బలోపేతం చేయడమే కాకుండా.. ఆ సంపద సామాజిక పెట్టుబడిగా మారి రాష్ట్ర ఆర్థిక వ్యవస్థ బలపడటానికి తోడ్పడుతోంది. ఈ క్రమంలో దళితబంధు పథకం కోసం ఈ బడ్జెట్లో రూ.17,700 కోట్లు ప్రతిపాదిస్తున్నాం’’

06/02/2023 11:06(IST)

ప్రజాపంపిణీ వ్యవస్థకు రూ.3,117 కోట్లు

‘‘తెలంగాణ రాష్ట్ర ప్రభుత్వం ఏర్పడగానే పేదలకు రేషన్ బియ్యం. పంపిణీపై గత ప్రభుత్వాలు విధించిన పరిమితులను ఎత్తివేసింది. కుటుంబంలో ఎంతమంది ఉంటే అంతమందికి ఆరు కిలోల చొప్పున రేషన్ బియ్యం అందజేస్తోంది. ఇందుకోసం రాష్ట్ర ప్రభుత్వం ఇప్పటివరకు 20,638 కోట్లు ఖర్చు చేసింది. కరోనా సమయంలో కూడా 4,072 కోట్లు ఖర్చు పెట్టి ప్రజలకు ఉచితంగా బియ్యం పంపిణీ చేసింది. ఈ సంవత్సరం ప్రజా పంపిణీ వ్యవస్థకు రాష్ట్ర బడ్జెట్ లో రూ.3,117 కోట్లు ప్రతిపాదిస్తున్నాం’’

06/02/2023 11:03(IST)

విద్యుత్‌శాఖకు రూ.12,727 కోట్లు

‘‘అన్నిరంగాలకూ 24 గంటలపాటు నిరంతరాయంగా, వ్యవసాయానికి ఉచితంగా నాణ్యమైన విద్యుత్తును సరఫరా చేస్తున్న ఏకైక రాష్ట్రం తెలంగాణ. 7778 మెగావాట్ల సామర్థ్యం నుంచి ప్రస్తుతం విద్యుదుత్పత్తి సామర్థ్యం 18,453 మెగావాట్లకు పెరిగింది. భద్రాద్రిలో 1080 మెగావాట్లు, కొత్తగూడెం విద్యుత్‌ ప్లాంట్‌లో 800 మెగావాట్లు, మంచిర్యాల జిల్లా జైపూర్‌లో 1200 మెగావాట్ల సామర్థ్యంతో సింగరేణి నిర్మించిన విద్యుదుత్పత్తి కేంద్రాల్లో ఉత్పత్తి ప్రారంభమైంది. దీనికి అదనంగా 8,085 మెగావాట్ల ఉత్పత్తి సామర్థ్యం కలిగిన విద్యుత్తు ప్లాంట్ల నిర్మాణ పనులు కొనసాగుతున్నాయి. ఇక తెలంగాణ ప్రభుత్వం తీసుకున్న ప్రత్యేక చర్యల వల్ల నేడు రాష్ట్రంలో 5,741 మెగావాట్ల సోలార్ పవర్ ఉత్పత్తి జరుగుతోంది. ఈ బడ్జెట్‌లో రూ.12,727 కోట్లను విద్యుత్‌శాఖకు ప్రతిపాదిస్తున్నాం’’

06/02/2023 10:59(IST)

నీటిపారుదల రంగానికి రూ.26,885 కోట్లు

‘‘రాష్ట్ర ప్రభుత్వం రూ.3,825 కోట్లతో 1200 చెక్ డ్యామ్‌ల నిర్మాణం చేపట్టింది. వీటిలో మొదటి దశ 650 చెక్ డ్యాంల నిర్మాణం పూర్తయింది. ఉమ్మడి పాలమూరు, రంగారెడ్డి జిల్లాలను సంపూర్ణంగా సస్యశ్యామలం చేసే విధంగా తెలంగాణ ప్రభుత్వం పాలమూరు- రంగారెడ్డి ఎత్తిపోతల ప్రాజెక్టును నిర్మిస్తున్నది. ఈ ప్రాజెక్టు నిర్మాణం దాదాపు 60 శాతం పూర్తయింది. ఉమ్మడి ఖమ్మం జిల్లాను సస్యశ్యామలం చేసే సీతారామ ప్రాజెక్టు పనులు శరవేగంగా జరుగుతున్నాయి. కాళేశ్వరం ప్రాజెక్టు నిర్మాణం దేశ చరిత్రలోనే అపూర్వ ఘట్టం. రాష్ట్రంలో మొత్తంగా 73 లక్షల 33 వేల ఎకరాలకు సాగునీటి వసతి ఏర్పడింది. రానున్న రెండు మూడేళ్లలో మరో 50 లక్షల 24 వేల ఎకరాలకు సాగు నీరు అందుతుంది. ప్రజల ఆశీస్సులే కొండంత అండగా భావించి తెలంగాణ ప్రభుత్వం 1 కోటి 25 లక్షల ఎకరాలకు సాగునీరు అందించే లక్ష్యాన్ని అతి త్వరలోనే చేరుకునేందుకు కృతనిశ్చయంతో ముందుకు సాగుతున్నది. ఇందుకోసం నీటిపారుదల రంగానికి బడ్జెట్ రూ.26,885 కోట్లు ప్రతిపాదిస్తున్నాం’’

06/02/2023 10:55(IST)

ఆయిల్‌ పామ్‌ సాగుకు బడ్జెట్‌లో రూ.1000 కోట్లు

‘‘పామాయిల్‌ సాగు ద్వారా రైతులకు ప్రతి ఎకరానికి దాదాపు లక్షా 50వేల రూపాయల వరకూ నికర ఆదాయం వస్తోంది ఆయిల్‌పామ్‌ సాగు విస్తీర్ణాన్ని 20లక్షల ఎకరాలకు పెంచాలనేది లక్ష్యం. ఇందులో భాగంగానే ఆయిల్‌ పామ్‌ సాగుకు బడ్జెట్‌లో రూ.1000 కోట్లు ప్రతిపాదిస్తున్నాం’’

06/02/2023 10:51(IST)

వ్యవసాయానికి కేటాయింపులు రూ.26,831 కోట్లు

‘‘సుసంపన్నమైన వ్యవసాయానికి ప్రతీకగా తెలంగాణ నేడు దేశానికి దిశా నిర్దేశనం చేస్తోంది. తెలంగాణలో అమలవుతున్న విధంగా రైతు సంక్షేమ విధానాలు తమ రాష్ట్రాలలోనూ అమలు చేయాలని రైతులు ఆయా రాష్ట్ర ప్రభుత్వాల మీద ఒత్తిడి తెస్తున్నారు. రాష్ట్రం ఏర్పాటుకు ముందు పదేళ్ల వ్యవసాయం, వ్యవసాయ అనుబంధాల రంగాలకు అప్పటి ప్రభుత్వాలు కేవలం రూ.7,994 కోట్ల నిధులు ఖర్చు చేయగా, రాష్ట్రం ఆవిర్భవించినప్పటినుంచి 2023 జనవరి వరకు తెలంగాణ ప్రభుత్వం 1 లక్షా 91 వేల 612 కోట్ల రూపాయలు, అంటే 20 రెట్లు నిధులు అధికంగా ఖర్చు చేసింది. గతంలో ఏ ముఖ్యమంత్రి చేయని విధంగా రైతు బంధు, రైతు బీమా, వ్యవసాయానికి 24 గంటలపాటు నిరంతరాయంగా నాణ్యమైన ఉచిత విద్యుత్తు, రైతు రుణమాఫీ, చెరువుల పునరుద్ధరణ, పెండింగ్ ప్రాజెక్టులను పూర్తి చేయడం, భారీ ప్రాజెక్టుల నిర్మాణం, సకాలంలో ఎరువులు, విత్తనాల పంపిణీ, కల్తీ విత్తనాల నియంత్రణ, వ్యవసాయ విస్తారణాధికారుల నియామకం, రైతు వేదికలు, పంట కల్లాల నిర్మాణం, రైతు బంధు సమితుల ఏర్పాటు చేశారు’’

06/02/2023 10:44(IST)

వ్యవసాయానికి కేటాయింపులు రూ.26,831 కోట్లు

* నీటి పారుదల శాఖకు రూ.26,885కోట్లు
* విద్యుత్‌ కేటాయింపులు రూ.12,727కోట్లు
* ఆసరా ఫించన్ల కోసం రూ.12వేల కోట్లు
* దళిత బంధు కోసం రూ.17,700 కోట్లు
* ఎస్సీ ప్రత్యేక నిధి కోసం రూ.36,750 కోట్లు
* ఎస్టీ ప్రత్యేక నిధి కోసం రూ.15,233కోట్లు
* బీసీ సంక్షేమం కోసం రూ.6,229 కోట్లు
* మహిళా, శిశు సంక్షేమం కోసం రూ.2,131కోట్లు

06/02/2023 10:36(IST)

తెలంగాణ బడ్జెట్‌ 2023-24 ను ప్రవేశపెట్టిన మంత్రి హరీశ్‌రావు

2023-24 సంవత్సరానికి సంబంధించి తెలంగాణ రాష్ట్ర బడ్జెట్‌ను ఆర్థికశాఖ మంత్రి టి.హరీశ్‌రావు అసెంబ్లీలో ప్రవేశపెట్టారు. ప్రగతిశీల రాష్ట్రంగా తెలంగాణ అభివృద్ధి చెందుతోందని, తెలంగాణ ఆచరిస్తుంది, దేశం అనుసరిస్తోంది అంటూ బడ్జెట్‌ ప్రసంగాన్ని కొనసాగించారు.

06/02/2023 10:28(IST)

శాసనసభకు చేరుకున్న సీఎం కేసీఆర్‌

మరికొద్దిసేపట్లో తెలంగాణ బడ్జెట్‌ను శాసనసభలో ప్రవేశపెట్టనున్నారు. కొద్దిసేపటి క్రితమే సీఎం కేసీఆర్‌ సభకు చేరుకున్నారు. బడ్జెట్‌ ప్రతులను సీఎంకు మంత్రులు హరీశ్‌, ప్రశాంత్‌రెడ్డి అందజేశారు.

06/02/2023 10:15(IST)

అసెంబ్లీ ఎన్నికలకు ముందు ఇదే పూర్తిస్థాయి బడ్జెట్‌

తెలంగాణ అసెంబ్లీ ఎన్నికలు ఈ ఏడాది చివర్లో జరగనున్నాయి. ఈ నేపథ్యంలో ఎన్నికలకు ముందు ప్రవేశపెట్టే పూర్తిస్థాయి బడ్జెట్‌ ఇదే కానుంది. దీంతో ఏయే రంగాలకు ఎంత కేటాయింపులు ఉంటాయనేది ఆసక్తికరంగా మారింది.

06/02/2023 09:35(IST)

తెలంగాణ ప్రజల ఆకాంక్షలకు అనుగుణంగా బడ్జెట్‌: హరీశ్‌

రాష్ట్ర బడ్జెట్‌ తెలంగాణ ప్రజల ఆకాంక్షలకు అనుగుణంగా ఉంటుందని మంత్రి హరీశ్‌రావు తెలిపారు. అసెంబ్లీకి బయల్దేరే ముందు జూబ్లీహిల్స్‌లో శ్రీవారి ఆలయంలో ఆయన ప్రత్యేక పూజలు నిర్వహించారు. అనంతరం మీడియాతో ఆయన మాట్లాడారు. సంక్షేమానికి, అభివృద్ధికి బడ్జెట్‌లో సమ ప్రాధాన్యత ఉంటుందని చెప్పారు. ప్రజా సంక్షేమమే ధ్యేయంగా బడ్జెట్‌ను ప్రవేశపెడుతున్నట్లు హరీశ్‌ తెలిపారు.

06/02/2023 09:31(IST)

బడ్జెట్‌ దస్త్రాలతో బయల్దేరిన మంత్రి హరీశ్‌రావు

తెలంగాణ బడ్జెట్‌ను కాసేపట్లో శాసనసభలో ప్రవేశపెట్టనున్నారు. ఆర్థిక మంత్రి హరీశ్‌రావు బడ్జెట్ దస్త్రాలతో ఇంటి నుంచి బయల్దేరారు. ఉదయం 10.30గంటలకు బడ్జెట్‌ను ఆయన ప్రవేశపెడతారు.

06/02/2023 09:13(IST)

ప్రభుత్వ పథకాలకు గత ఏడాది కంటే భారీగా..

ప్రభుత్వ ప్రాధాన్య పథకాలకు గత ఏడాది కంటే ఈసారి నిధులు పెంచుతున్నట్లు సమాచారం. సొంత రాబడులపై పూర్తి విశ్వాసంతో ప్రతిపాదనలను రూపొందించినట్లు తెలుస్తోంది. ప్రస్తుత ఆర్థిక సంవత్సరంలో డిసెంబరు వరకు వచ్చిన రాబడి ఆధారంగా.. ఆర్థికశాఖ వచ్చే ఏడాది పన్నుల ఆదాయాన్ని సుమారు రూ. 1.5 లక్షల కోట్లుగా, పన్నేతర ఆదాయం, రుణాలు, గ్రాంట్‌ ఇన్‌ ఎయిడ్‌ను మరో రూ. లక్షన్నర కోట్లుగా అంచనా వేసినట్లు తెలిసింది.

06/02/2023 09:12(IST)

బాహుబలి బడ్జెట్‌.. రూ.3 లక్షల కోట్లు దాటనున్న పద్దు!

తెలంగాణ ప్రభుత్వం మరో భారీ బడ్జెట్‌ను కాసేపట్లో శాసనసభలో ప్రవేశపెట్టనుంది. రాష్ట్ర బడ్జెట్‌ తొలిసారిగా రూ.3 లక్షల కోట్ల స్థాయిని దాటనుంది. ఎన్నికల సంవత్సరంలో ప్రవేశపెడుతున్న కీలక బడ్జెట్‌ కావడంతో రాష్ట్ర ప్రభుత్వం భారీ కసరత్తు చేసింది. సంక్షేమం, పేదరిక నిర్మూలన, అభివృద్ధి దీని లక్ష్యంగా కనిపిస్తోంది. 2022-23 ఆర్థిక సంవత్సరానికి రూ.2,56,958 కోట్ల బడ్జెట్‌ను ప్రవేశపెట్టిన రాష్ట్ర ప్రభుత్వం వచ్చే ఏడాది వృద్ధిరేటును 15 నుంచి 17 శాతం మేర అంచనా వేసినట్లు విశ్వసనీయ సమాచారం. ఈ నేపథ్యంలో 2023-24 రాష్ట్ర బడ్జెట్‌ రూ.3 లక్షల కోట్లు దాటినట్లు తెలిసింది. రాష్ట్ర ఆర్థికశాఖ మంత్రి హరీశ్‌రావు బడ్జెట్‌ను ప్రవేశపెట్టనున్నారు. శాసనమండలిలో మంత్రి ప్రశాంత్‌రెడ్డి బడ్జెట్‌ను ప్రవేశపెడతారు

App

Telangana Budget Live Updates: ఏప్రిల్‌ నుంచి కాంట్రాక్టు ఉద్యోగుల సర్వీసుల క్రమబద్ధీకరణ

తాజా వార్తలు (Latest News)

వీలైతే ఒకసారి వీళ్లపై తీసిన సినిమాలు చూడండి: పూరి జగన్నాథ్‌

గూగుల్‌ మ్యాప్స్‌లో మరో కొత్త ఫీచర్‌.. ఈవీ స్టేషన్లు వెతకడం ఇక సులువే!

స్వీపర్‌ తనయుడు.. సివిల్స్‌లో సత్తా చాటాడు

40 గంటల బ్యాటరీ లైఫ్‌తో నథింగ్‌ నుంచి 2 కొత్త ఇయర్‌బడ్స్‌

కాలేజీ క్యాంపస్‌లో ఘోరం.. కార్పొరేటర్‌ కుమార్తె దారుణ హత్య

అమ్మ చనిపోయారు.. నేను పోటీ చేయలేను: ‘హిమాచల్‌’ డిప్యూటీ సీఎం కుమార్తె

సుఖీభవ

చదువు