Breaking | Feedback | ePratibha | E-PAPER | Pratibha

oscars 2023-Naatu Naatu: నా బిడ్డకు కడుపునిండా సంగీతమే: కీరవాణి తండ్రి ఆనందం

oscars 2023 live updates: ఆస్కార్ అవార్డ్స్ 2023 వేడుక అంగరంగ వైభవంగా జరిగింది. భారతీయ సినీ ప్రేక్షకుల కలను సాకారం చేస్తూ, ‘ఆర్‌ఆర్‌ఆర్‌’లోని ‘నాటు నాటు’ (Naatu Naatu Song) బెస్ట్‌ ఒరిజినల్‌ సాంగ్‌ కేటగిరిలో ఆస్కార్‌ను సొంతం చేసుకుంది. అలాగే భారతీయ డాక్యుమెంటరీ షార్ట్‌ ‘ది ఎలిఫెంట్‌ విస్పరర్స్‌’ను కూడా ఆస్కార్‌ వరించింది. రెండు సినిమాలకు అవార్డులు రావడం పట్ల సినీ, రాజకీయ ప్రముఖులు శుభాకాంక్షలు చెప్పారు.

Updated : 13 Mar 2023 16:24 IST

13/03/2023 18:04(IST)

‘నాటు నాటు’కు ఆస్కార్‌.. గర్వకారణం: నిర్మాతల మండలి

‘‘95వ ఆస్కార్ పురస్కార వేడుకల్లో తెలుగు సినిమా ‘RRR’లోని ‘నాటు నాటు...’ పాటకు ఆస్కార్ పురస్కారం రావడం తెలుగు సినిమా పరిశ్రమే కాకుండా భారతదేశం మొత్తం సినిమా పరిశ్రమకు గర్వకారణం’’అని తెలుగు చలన చిత్ర నిర్మాతల మండలి పేర్కొంది. RRR నిర్మాత D.V.V దానయ్యకు, దర్శకుడు S.S రాజమౌళికి, సంగీతం అందించిన M.M కీరవాణికి, పాట రాసిన చంద్ర బోస్‌కి, గాత్రం అందించిన కాలభైరవ, రాహుల్ సిప్లిగంజ్‌కి, డాన్స్ చేసిన నందమూరి తారక రామారావుకి, కొణిదెల రామ్ చరణ్‌కి, కొరియోగ్రఫీ అందించిన ప్రేమ్ రక్షిత్‌కి.. వారితోపాటు మొత్తం టీమ్‌కు మ ప్రత్యేక అభినందనలు, శుభాకాంక్షలు తెలియజేసింది. భవిష్యత్తులో తెలుగు సినిమా పరిశ్రమకు ఇటువంటి ఆస్కార్ అవార్డులు మరిన్ని రావాలని తెలుగు చలన చిత్ర నిర్మాతల మండలి ఆకాంక్షించింది.

13/03/2023 15:36(IST)

‘నాటు నాటు’కు ఆస్కార్‌.. చంద్రబోస్‌ కుటుంబంలో ఆనందాల వెల్లువ

‘ఆర్‌ఆర్‌ఆర్‌’లోని ‘నాటు నాటు...’ పాటకు ఆస్కార్ పురస్కారం దక్కడంపై.. ఆ పాట రచయిత చంద్రబోస్ సతీమణి, ప్రముఖ డాన్స్ మాస్టర్ సుచిత్ర, వారి కుటుంబసభ్యులు ఆనందంలో మునిగిపోయారు.

13/03/2023 15:19(IST)

12 ఏళ్ల కష్టానికి ఆస్కార్‌ సలాం కొట్టింది..

‘అవతార్‌ 2’, ‘టాప్‌గన్‌ : మావెరిక్‌’ వంటి విశేష ప్రేక్షకాదరణ సొంతం చేసుకున్న హాలీవుడ్‌ చిత్రాలను వెనక్కి నెట్టి ఈ ప్రతిష్ఠాత్మక వేదికపై ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’ (Everything Everywhere All At Once) విజయకేతనం ఎగురవేసింది. ఒకటి కాదు రెండు కాదు ఏకంగా ఏడు విభాగాల్లో ఆస్కార్‌ను ముద్దాడింది. ఈ నేపథ్యంలో ఈ సినిమాకు సంబంధించిన పలు విశేషాలు..!

పూర్తి కథనం కోసం క్లిక్‌ చేయండి..

13/03/2023 14:42(IST)

సాంగ్‌ షూట్‌ చేసేటప్పుడు ఎవరిని చూడాలో అర్థం కాలేదు: సెంథిల్‌

‘నాటు నాటు’ పాట షూట్‌ చేసేటప్పుడు ఎన్టీఆర్‌, రామ్‌చరణ్‌లలో ఎవరిని చూడాలో అర్థమయ్యేది కాదని, అంత గొప్ప డ్యాన్స్‌ చేసేవారని, ‘ఆర్ఆర్‌ఆర్’ సినిమాటోగ్రాఫర్‌ కె.కె.సెంథిల్‌ అన్నారు. ‘నాటు నాటు’కు ఆస్కార్‌ వచ్చిన సందర్భంగా ఆయన మాట్లాడుతూ.. ‘‘ఎంత గుర్తు చేసుకున్నా నాకు చాలా గర్వంగా ఉంది. సాంగ్‌ షూట్‌ చేస్తున్నప్పుడు చరిత్ర సృష్టిస్తుందని అనుకోలేదు. ఒక మంచి సాంగ్‌ చేశామనుకున్నాం. భారతీయ సినీ ఇండస్ట్రీలో ఎన్టీఆర్‌, చరణ్‌ గొప్ప డ్యాన్సర్లు. ఇద్దరూ కలిసి ఒక పాటకు డ్యాన్‌ చేయడం ఊహించని ఘట్టం. షూటింగ్‌ చేసేటప్పుడు ఎవరిని చూడాలో నాకు అర్థమయ్యేది కాదు. ఇది మాటల్లో చెప్పలేని అనుభూతి. జీవితంలో ఒకసారే వచ్చే అవకాశం అంటారు కదా! అలాంటిది. ఈ పాటను షూట్‌ చేసిన అవకాశం వచ్చినందుకు సంతోషంగా ఉంది’’ అని అన్నారు.

13/03/2023 14:27(IST)

కీరవాణి అసాధారణ ప్రజ్ఞావంతుడు: శివశక్తిదత్త

కీరవాణికి చిన్నప్పటి నుంచే సంగీతం అంటే ఎంతో ఆసక్తి ఉండేదని ఆయన తండ్రి శివశక్తి దత్త అన్నారు. ‘నాటు నాటు’ పాటకు ఆస్కార్‌ వచ్చిన సందర్భంగా ఆయన మాట్లాడుతూ.. ‘‘కీరవాణికి మూడో ఏట నుంచే సంగీతం నేర్పించా. అతడి కడుపునిండా సంగీతమే. నేను తాళాలు తెరిచానంతే. అసాధారణ ప్రజ్ఞావంతుడు. కీరవాణి సాధిస్తున్న విజయాలకు ముగ్ధుడిని అవుతూనే ఉన్నా. ఇప్పుడు ఆస్కార్‌ తెచ్చి నన్నెంతో ఆనందపరిచాడు’’ అని అన్నారు.

13/03/2023 13:54(IST)

‘ఆర్ఆర్‌ఆర్‌’ టీమ్‌కు రజనీకాంత్‌ అభినందన

బెస్ట్‌ ఒరిజినల్‌ స్కోరు విభాగంలో ఆస్కార్‌ గెలుచుకున్న ‘ఆర్‌ఆర్‌ఆర్‌’ చిత్ర బృందానికి స్టార్‌ హీరో రజనీకాంత్‌ అభినందనలు తెలిపారు. కీరవాణి, రాజమౌళిలతో పాటు, ‘ది ఎలిఫెంట్‌ విస్పరర్స్‌’ చిత్రాన్ని తెరకెక్కించిన కార్తికి గోస్‌సెల్వెస్‌కు కూడా శుభాకాంక్షలు చెప్పారు. ఒక భారతీయుడిగా గర్వంతో సెల్యూట్‌ చేస్తున్నానని అన్నారు.

13/03/2023 13:25(IST)

RRR: విశ్వవేదికపై ‘నాటు నాటు’ పాటకు దక్కిన పురస్కారాలివే..!

ప్రతిష్ఠాత్మక ఆస్కార్‌ అవార్డు సొంతం చేసుకున్న ‘నాటు నాటు’ పాట.. ఇంతకు ముందు పలు అంతర్జాతీయ పురస్కారాలను సొంతం చేసుకుంది. విమర్శకుల ప్రశంసలను అందుకుంది. ఇప్పటివరకు ఏ ఆసియా గీతానికీ దక్కని గోల్డెన్‌ గ్లోబ్‌ అవార్డును సైతం ఒడిసి పట్టింది. ‘నాటు నాటు’ పాటకు దక్కిన అంతర్జాతీయ అవార్డులపై ప్రత్యేక కథనం.

13/03/2023 13:10(IST)

ఎన్టీఆర్‌.. నీతో మళ్లీ డ్యాన్స్‌ చేయాలని ఉంది: రామ్‌చరణ్‌

‘‘మా జీవితాల్లోనే కాకుండా భారతీయ చలన చిత్ర చరిత్రలో ‘ఆర్‌ఆర్‌ఆర్‌’ ఎంతో ప్రత్యేకమైనది. ‘ఆస్కార్‌’ అవార్డు సొంతమయ్యేలా చేసిన ప్రతి ఒక్కరికీ ధన్యవాదాలు. నేనింకా కలలోనే ఉన్న భావన కలుగుతోంది. రాజమౌళి, కీరవాణి.. భారతీయ చలన చిత్ర పరిశ్రమలో అత్యంత విలువైన రత్నాలు. ‘ఆర్‌ఆర్‌ఆర్‌’ వంటి మాస్టర్‌పీస్‌లో నన్ను భాగం చేసిన వారిద్దరికీ ధన్యవాదాలు. ప్రపంచవ్యాప్తంగా ‘నాటు నాటు’ అనేది ఒక భావోద్వేగం. ఆ ఎమోషన్‌కు రూపమిచ్చిన గేయరచయిత చంద్రబోస్‌, గాయకులు రాహుల్‌ సిప్లిగంజ్‌, కాలభైరవ, కొరియోగ్రాఫర్‌ ప్రేమ్‌రక్షిత్‌కు ధన్యవాదాలు. నా బ్రదర్‌ ఎన్టీఆర్‌, కో-స్టార్‌ అలియాభట్‌కు ధన్యవాదాలు. తారక్‌.. నీతో మళ్లీ డ్యాన్స్‌ చేసి రికార్డ్స్‌ క్రియేట్‌ చేయాలని ఆశపడుతున్నా. భారతీయ నటీనటులందరికీ ఈ అవార్డు సొంతం. మాకు ఎంతగానో సపోర్ట్‌ అందించిన అభిమానులందరికీ నా కృతజ్ఞతలు’’-రామ్‌చరణ్‌

13/03/2023 12:40(IST)

నాటు నాటు సరిహద్దులను చెరిపేసింది: మహేశ్‌బాబు

‘నాటు నాటు’ పాట సరిహద్దులను చెరిపేసిందని అగ్ర కథానాయకుడు మహేశ్‌బాబు అన్నారు. ‘ఆర్‌ఆర్‌ఆర్‌’కు ఆస్కార్‌ అవార్డు వచ్చిన నేపథ్యంలో ఎం.ఎం.కీరవాణి, చంద్రబోస్‌ సహా మొత్తం చిత్ర బృందానికి శుభాకాంక్షలు చెప్పారు. భారతీయ సినిమా ఉత్సాహంతో చిందులేసే సమయమని అన్నారు.

13/03/2023 12:22(IST)

చాలా ఆనందంగా ఉంది: నిర్మాత డీవీవీ దానయ్య

‘ఆర్‌ఆర్‌ఆర్‌’కు ఆస్కార్‌ రావడం ఎంతో ఆనందంగా ఉందని ఆ చిత్ర నిర్మాత డీవీవీ దానయ్య అన్నారు. సినిమా విడుదలైనప్పటి కంటే ఇప్పుడు ఎంతో సంతోషంగా ఉన్నానని చెప్పారు. భారతదేశం గర్వించదగ్గ రోజని అన్నారు. తెలుగు సినిమాను ఆస్కార్‌ స్థాయికి తీసుకెళ్లిన ఘనత రాజమౌళికి దక్కుతుందన్నారు. కీరవాణి స్వరాలు, చంద్రబోస్‌ సాహిత్యం, ప్రేమ్‌ రక్షిత్‌ నృత్యాలు ఎంతగానో అలరించాయని అన్నారు. ‘నాటు నాటు’పాటకోసం రామ్‌చరణ్‌, ఎన్టీఆర్‌30 రోజులకు పైగా ప్రాక్టీస్‌ చేశారని చెప్పుకొచ్చారు.

13/03/2023 12:08(IST)

ఆస్కార్‌ 2023 విజేతల జాబితా ఇదే!

ప్రపంచవ్యాప్తంగా సినీ ప్రియులు ఆసక్తిగా ఎదురుచూసిన ‘ఆస్కార్‌’ (Oscars 2023) అవార్డుల ప్రదానోత్సవం ఘనంగా జరిగింది. లాస్‌ ఏంజిల్స్‌లోని డాల్బీ థియేటర్‌లో జరిగిన ఈ వేడుకల్లో ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’ (everything everywhere all at once) చిత్రం ఏకంగా ఏడు అవార్డులను అందుకుని విజయకేతనం ఎగురవేసింది. ఉత్తమ దర్శకుడు, ఉత్తమ చిత్రం, ఉత్తమ నటి అవార్డులు ఆ చిత్రానికే వరించాయి. మరోవైపు, మన దేశం నుంచి నామినేట్‌ అయిన ‘ఆర్‌ఆర్‌ఆర్‌’ ఉత్తమ ఒరిజినల్‌ సాంగ్‌ కేటగిరిలో ‘నాటు నాటు’పాటకు ఆస్కార్‌ దక్కింది. ఉత్తమ డాక్యుమెంటరీ షార్ట్‌ ఫిల్మ్‌ విభాగం నుంచి ‘ది ఎలిఫెంట్‌ విస్పరర్స్‌’ అవార్డును సొంతం చేసుకుంది.

పూర్తి కథనం కోసం క్లిక్‌ చేయండి

13/03/2023 11:50(IST)

మన దేశంలో టాలెంట్‌కు కొదవ లేదు: విజయేంద్రప్రసాద్‌

‘ఆర్‌ఆర్‌ఆర్‌(RRR)’ నుంచి ‘నాటు నాటు’కు ఆస్కార్‌ అవార్టు వచ్చినందుకు ఆ చిత్ర దర్శకుడు రాజమౌళి తండ్రి, రచయిత విజయేంద్రప్రసాద్‌ సంతోషం వ్యక్తం చేశారు. చిత్ర బృందానికి శుభాకాంక్షలు తెలిపారు. మన దేశంలో టాలెంట్‌కు కొదవ లేదని .. అందరూ వచ్చిన అవకాశాలను సద్వినియోగం చేసుకోవాలన్నారు.

13/03/2023 10:59(IST)

నిజంగా ఇది కలలాగే ఉంది: ఎస్‌.ఎస్‌.రాజమౌళి

95వ ఆస్కార్‌ అవార్డుల్లో ‘ఆర్‌ఆర్‌ఆర్’లోని నాటు నాటు పాటకు అవార్డు రావడం పట్ల ఆ చిత్ర దర్శకుడు ఎస్‌.ఎస్‌.రాజమౌళి తెగ సంబరపడిపోయారు. అవార్డుల కార్యక్రమం ముగిసిన తర్వాత ఆయన మాట్లాడుతూ.. ‘నిజంగా ఇది కలలాగానే ఉంది. అయితే, మాకు అవార్డు వస్తుందని నమ్మకంతో ఉన్నాం. మీ జీవితంలో అత్యంత అమూల్య క్షణం మీ సినిమా అవార్డును గెలుచుకోవడమా? లేక ఆస్కార్‌ వేదికపై మీ సినిమాలోని పాటను ప్రదర్శించడమా అని అడిగితే, ఎంపిక చేసుకోవడం నిజంగా నాకు కష్టమే. రెండింటినీ చూడటం ఎంతో సంతోషంగా ఉంది. సాంగ్‌ ప్రదర్శించినంత సేపు ప్రేక్షకులు చప్పట్లు కొట్టడం, పూర్తయ్యాక స్టాండింగ్‌ ఒవేషన్‌ ఇవ్వడం చూస్తే ప్రపంచంలోనే అత్యున్నత శిఖరంపై నన్ను నిలబెట్టినట్లు ఉంది. అలాగే ఆస్కార్‌ అవార్డు ఆయన్ను (కీరవాణి) శిఖరాగ్రాన నిలబెట్టింది’’ అని రాజమౌళి తెగ ఆనందపడిపోయారు.

13/03/2023 10:47(IST)

మరింత పెద్ద కలలను కనేలా చేశారు: విజయ్‌ దేవరకొండ

‘నాటు నాటు’ పాటకు ఆస్కార్‌ రావడం పట్ల కథానాయకుడు విజయ్‌ దేవరకొండ ఆనందం వ్యక్తం చేశారు. అందరినీ గర్వపడేలా చేశారని, మరింత పెద్ద కలలను కనేలా చేశారని పేర్కొన్నారు. భారతీయ సినిమాకు ఇదొక పెద్ద అడుగు అని అన్నారు. అలాగే, ఉత్తమ డాక్యుమెంటరీ ఫిల్మ్‌గా ఆస్కార్‌ను సొంతం చేసుకున్న ‘ఎలిఫెంట్‌ విస్పరర్స్‌’ చిత్ర బృందానికీ శుభాకాంక్షలు తెలిపారు. భారతీయ దర్శకులు పెద్ద పెద్ద అడుగులు వేస్తున్నారని, మరింత శక్తిమంతంగా అవుతున్నారని విజయ్‌ దేవరకొండ అన్నారు.

13/03/2023 10:37(IST)

తెలుగు సినిమా జెండా రెపరెపలాడింది: వైఎస్‌ జగన్‌

‘నాటు నాటు’ పాటకు ఆస్కార్‌ రావడంపై ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డి ఆనందం వ్యక్తం చేశారు. ఆర్‌ఆర్‌ఆర్‌ చిత్ర బృందానికి శుభాకాంక్షలు తెలిపారు. తెలుగు పాటకు అంతర్జాతీయంగా గుర్తింపు రావడం పట్ల గర్వంతో ఉప్పొంగిపోతున్నట్లు చెప్పారు. దర్శకుడు రాజమౌళి, నటులు ఎన్టీఆర్‌, రామ్‌చరణ్‌, సంగీత దర్శకుడు కీరవాణి, గీత రచయిత చంద్రబోస్‌, గాయకులు కాలభైరవ, రాహుల్‌ సిప్లిగంజ్‌ సహా మొత్తం చిత్ర బృందాన్ని అభినందించారు. తనతో సహా కోట్లాది తెలుగు ప్రజలు, భారతీయులు గర్వపడేలా చేసినందుకు ధన్యవాదాలు తెలిపారు.

13/03/2023 10:22(IST)

కోట్లాది భారతీయుల సంబరాల్లో నేనూ చేరా: కేటీఆర్‌

‘నాటు నాటు’ సాంగ్‌కు ఆస్కార్‌ రావడంపై తెలంగాణ ఐటీశాఖ మంత్రి కేటీఆర్‌ ఆనందం వ్యక్తం చేశారు. కోట్లాది భారతీయుల సంబరాల్లో తానూ చేరానని అన్నారు. ట్విటర్‌ వేదికగా స్పందించిన ఆయన ‘ఆర్ఆర్‌ఆర్‌’ చిత్ర బృందానికి అభినందనలు తెలిపారు. ‘ఎం.ఎం.కీరవాణి, చంద్రబోస్‌ చరిత్ర సృష్టించారు. ఈ గొప్ప క్షణానికి కారకుడు, అద్భుతమైన కథకుడు రాజమౌళి భారతదేశాన్ని గర్వపడేలా చేశారు. నా సోదరులు, సూపర్‌స్టార్స్‌ రామ్‌చరణ్‌, తారక్‌ తమ డ్యాన్స్‌తో రంజింపజేశారు’’ అని ట్వీట్ చేశారు.

13/03/2023 10:16(IST)

మా బిడ్డ ఆ స్థాయికి వెళ్లడం గర్వంగా ఉంది: రాహుల్‌ తల్లిదండ్రులు

‘ఆర్‌ఆర్‌ఆర్‌(RRR)’ చిత్రం నుంచి ‘నాటు నాటు’ పాటకు ఆస్కార్‌(Oscars 2023) దక్కడం పట్ల సింగర్‌ రాహుల్‌ సిప్లిగంజ్‌ తల్లిదండ్రులు సంతోషం వ్యక్తం చేశారు. ఆ పాట ప్రయాణంలో తమ బిడ్డ భాగమైనందుకు గర్వంగా ఉందని చెప్పారు.

13/03/2023 10:13(IST)

‘నాటు నాటు..’ తెలుగు ప్రజల అభిరుచికి నిదర్శనం: కేసీఆర్‌

‘నాటు నాటు..’కు ఆస్కార్‌ దక్కడంపై తెలంగాణ ముఖ్యమంత్రి కేసీఆర్‌ హర్షం వ్యక్తం చేశారు. విశ్వ సినీ యవనికపై తెలుగు సినిమా సత్తా చాటిందన్నారు. ప్రతిష్టాత్మక ఆస్కార్‌ అవార్డు గెలుచుకోవడం తెలుగువారికి గర్వకారణమని కొనియాడారు. నాటు నాటు.. పాట తెలంగాణ సంస్కృతికి అద్దం పట్టిందని.. తెలుగు ప్రజల అభిరుచికి నిదర్శనమని కేసీఆర్‌ పేర్కొన్నారు. ఈ పాట ద్వారా తెలుగులోని మట్టి వాసనలను గీత రచయిత చంద్రబోస్‌ వెలుగులోకి తీసుకొచ్చారని అన్నారు.

13/03/2023 10:10(IST)

సంతోషంతో ఉబ్బితబ్బిబ్బైపోయాను: సురేశ్‌ బాబు

‘నాటు నాటు’కు ఆస్కార్‌(Oscars 2023) అవార్డు రావడంపై ప్రముఖ నిర్మాత దగ్గుబాటి సురేశ్‌ బాబు సంతోషం వ్యక్తం చేశారు. ఆస్కార్‌ వేదికపై కీరవాణి, చంద్రబోస్‌లను చూసి సంతోషంతో ఉబ్బితబ్బిబ్బైపోయానని చెప్పారు. మనమూ ఆస్కార్‌ కొట్టొచ్చనే ధైర్యాన్ని ‘ఆర్‌ఆర్‌ఆర్‌(RRR)’ ఇచ్చిందని తెలిపారు.

13/03/2023 09:58(IST)

‘నాటునాటు’కు ఆస్కార్‌.. ప్రధాని మోదీ అభినందన

95వ ఆస్కార్‌ అవార్డుల వేడుకలో ఈ ఏడాది బెస్ట్‌ ఒరిజినల్‌ సాంగ్‌ కేటగిరిలో అవార్డును అందుకున్న ‘ఆర్‌ఆర్‌ఆర్‌’ చిత్ర బృందానికి ప్రధాని నరేంద్రమోదీ అభినందనలు తెలిపారు. ‘నాటు నాటు’ పాపులారిటీ ప్రపంచవ్యాప్తమైందన్నారు. చరిత్రలో మరుపురాని పాటగా ఇది నిలిచిపోతుందని, ఏళ్ల తరబడి ఈ పాటను గుర్తు చేసుకుంటూనే ఉంటారని కితాబిచ్చారు. కీరవాణి, చంద్రబోస్‌లతో పాటు మొత్తం చిత్ర బృందానికి అభినందనలు తెలిపారు. అలాగే బెస్ట్‌ ఫీచర్‌ ఫిల్మ్ కేటగిరిలో అవార్డు అందుకున్న ‘ఎలిఫెంట్‌ విస్పరర్స్‌’ చిత్ర బృందాన్ని మోదీ అభినందించారు.

13/03/2023 09:45(IST)

భారతీయ సినిమాకు ఇదొక చారిత్రక ఘట్టం: నాగార్జున

‘నాటు నాటు’సాంగ్‌కు ఆస్కార్‌ రావడంపై భారతీయ సినీ పరిశ్రమ ప్రశంసలు కురిపిస్తోంది. సినీ నటుడు నాగార్జున ట్విటర్‌ వేదికగా స్పందిస్తూ ‘భారతీయ సినిమాకు ఇదొక చారిత్రక ఘట్టం’ అని అన్నారు. సినీ అభిమానులనే కాదు, ప్రతి భారతీయుడిని గర్వపడేలా చేశారని కితాబిచ్చారు.

13/03/2023 09:30(IST)

‘ఆర్‌ఆర్‌ఆర్‌’ చిత్ర బృందానికి అభినందనలు: తమిళిసై

బెస్ట్‌ ఒరిజినల్‌ సాంగ్‌ కేటగిరిలో ఆస్కార్‌ దక్కించుకున్న ‘ఆర్‌ఆర్‌ఆర్‌’ టీమ్‌కు తెలంగాణ గవర్నర్‌ తమిళిసై అభినందనలు తెలిపారు. ఆర్‌ఆర్‌ఆర్‌ బృందం భారతీయులను, తెలుగు సినిమాను గర్వించేలా చేశారని అన్నారు.

13/03/2023 09:28(IST)

భారతీయులు గర్విస్తున్న క్షణాలివి: పవన్‌కల్యాణ్‌

భారతీయులందరూ గర్వపడేలా ఆస్కార్ వేదికపై పురస్కారాన్ని స్వీకరించిన ‘ఆర్‌ఆర్‌ఆర్‌’ చిత్ర సంగీత దర్శకులు ఎం.ఎం.కీరవాణి, గీత రచయిత చంద్రబోస్‌లకు జనసేన అధినేత పవన్‌కల్యాణ్‌ అభినందనలు తెలిపారు. ఈ మేరకు ట్విటర్‌ వేదికగా శుభాకాంక్షలు తెలిపారు. ‘ఆస్కార్ బెస్ట్ ఒరిజినల్ సాంగ్‌గా నిలిచిన ‘RRR’లోని ‘నాటు నాటు...’ గీతంలోని తెలుగు పదం నేల నలుచెరగులా ప్రతి ఒక్కరితో పదం కలిపేలా చేసి హుషారెత్తించింది. ఈ గీతాన్ని ఆస్కార్‌ వేదికపై ప్రదర్శించడంతో పాటు... అవార్డు పొందటం ద్వారా భారతీయ సినిమా స్థాయి మరో స్థాయికి చేరింది. ఇంతటి ఘనత పొందేలా ‘ఆర్.ఆర్.ఆర్.’ చిత్రాన్ని రూపొందించిన దర్శకులు ఎస్.ఎస్.రాజమౌళికి ప్రత్యేక అభినందనలు. ఎన్టీఆర్‌, రామ్‌చరణ్ తమ పాత్రల్లో ఒదిగిపోయారు. కాలభైరవ, రాహుల్‌ సిప్లిగంజ్‌, నృత్య దర్శకులు ప్రేమ్‌ రక్షిత్‌, నిర్మాత డీవీవీ దానయ్యలకు అభినందనలు’’ అని పవన్‌కల్యాణ్‌ కితాబిచ్చారు.

13/03/2023 09:13(IST)

ఉత్తమ చిత్రం ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’

ఈ ఏడాది ఆస్కార్‌ అవార్డుల వేడుకలో ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’ చిత్రం అదరగొట్టింది. ఇప్పటికే పలు కేటగిరిల్లో అవార్డులను దక్కించుకున్న ఈ సినిమా ఈ ఏడాది ఉత్తమ చిత్రంగా పురస్కారాన్ని అందుకుంది. అంతేకాదు, ఈ సినిమాకు దర్శకత్వం వహించిన డానియల్‌ క్వాన్‌, డానియల్‌ షైనెర్ట్‌లు ఉత్తమ దర్శకులుగా అవార్డును అందుకున్నారు. ఇక ఉత్తమ నటిగా మిచెల్లీ యోహో కూడా పురస్కారాన్ని దక్కించుకుంది.

13/03/2023 09:04(IST)

భారతీయుడు గర్వించేలా చేశారు: చిరంజీవి

‘ఆర్ఆర్‌ఆర్‌’లోని నాటు నాటుకు ఆస్కార్‌ రావడం పట్ల అగ్ర కథానాయకుడు చిరంజీవి ఆనందం వ్యక్తం చేశారు. ఈ సందర్భంగా మీడియాతో మాట్లాడుతూ.. చిత్ర బృందానికి అభినందనలు తెలిపారు. చరణ్‌ కూడా ఇందులో భాగస్వామి కావడం ఎంతో ఆనందంగా ఉందన్నారు. ‘ఆర్ఆర్‌ఆర్‌’ను ఆస్కార్‌కు తీసుకెళ్లేందుకు కృషి చేసిన ప్రతి ఒక్కరికీ ప్రశంసలు దక్కాలన్నారు. రాజమౌళి, కీరవాణి, తారక్‌, చరణ్‌ ఎంతో కష్టపడ్డారని అన్నారు. ఒక తండ్రిగా గర్వపడుతున్నానని చెప్పిన చిరంజీవి.. రాజమౌళిని కృషిని ప్రశంసించారు.

13/03/2023 08:54(IST)

‘ఆర్‌ఆర్ఆర్‌’ దేశాన్ని గర్వపడేలా చేసింది: కీరవాణి

ఆస్కార్‌ వేదికపై ‘నాటునాటు’ సాంగ్‌ గెలుపు బావుటా ఎగురవేసిన సంగతి తెలిసిందే. హాలీవుడ్‌ పాటలను తలదన్ని బెస్ట్‌ ఒరిజినల్‌ సాంగ్ విభాగంలో అవార్డును సొంతం చేసుకుంది. అవార్డు అందుకున్న అనంతరం సంగీత దర్శకుడు కీరవాణి ఆస్కార్‌ అకాడమీకి కృతజ్ఞతలు తెలిపారు. ఆర్‌ఆర్‌ఆర్‌ దేశాన్ని గర్వపడేలా చేసిందన్నారు. తనని ప్రపంచ శిఖరాగ్రాన నిలబెట్టిందని పేర్కొన్నారు. గీత రచయిత చంద్రబోస్‌ కూడా ‘అందరికీ నమస్తే’ అంటూ ధన్యవాదాలు తెలిపారు.

13/03/2023 08:50(IST)

ఉత్తమ ఎడిటింగ్‌ ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’

ఆస్కార్‌ 2023లో ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’ చిత్రం అదరగొడుతోంది. తాజాగా ఉత్తమ ఫిల్మ్‌ ఎడిటింగ్‌ పురస్కారాన్ని దక్కించుకుంది. ‘ది బాన్‌షీస్‌ ఆఫ్‌ ఇన్‌షరైన్‌, ఎల్విస్‌, టార్‌, టాప్‌గన్‌: మావెరిక్‌ చిత్రాలను వెనక్కి నెట్టి ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’ అవార్డును సొంతం చేసుకుంది.

13/03/2023 08:44(IST)

‘నాటు నాటు’కు అవార్డు అందుకున్న కీరవాణి, చంద్రబోస్‌

ఈ ఏడాది బెస్ట్‌ ఒరిజినల్ సాంగ్ కేటగిరిలో ‘నాటు నాటు’కు ఆస్కార్‌ అవార్డు దక్కింది. ఈ అవార్డును సంగీత దర్శకుడు ఎం.ఎం.కీరవాణి, గీత రచయిత చంద్రబోస్‌లు అందుకున్నారు. వేదికపై అవార్డు అందుకున్న అనంతరం పురస్కారంతో అభివాదం చేశారు.

13/03/2023 08:40(IST)

బెస్ట్‌ సౌండ్‌.. టాప్‌గన్‌: మావెరిక్‌

టామ్‌ క్రూజ్‌ నటించిన ‘టాప్‌గన్‌: మావెరిక్‌’ను ఆస్కార్‌ వరించింది. బెస్ట్‌ సౌండ్‌ కేటగిరిలో ఈ చిత్రం అవార్డును దక్కించుకుంది. మార్క్‌వెనిగర్టెన్‌, జేమ్స్‌ హెచ్‌. మాథర్‌, అల్‌ నీల్సన్‌, క్రిస్‌ బర్డన్‌, మార్క్‌ టేలర్‌లు ఈ అవార్డును అందుకున్నారు.

13/03/2023 08:27(IST)

‘నాటు నాటు’కు ఆస్కార్‌..

ఇంటర్నెట్‌ డెస్క్‌: 2023 ఆస్కార్‌ అవార్డుల వేడుకలో ‘నాటు నాటు...’ (Naatu Naatu Song) బెస్ట్‌ ఒరిజినల్‌ సాంగ్‌ కేటగిరిలో ఉత్తమ పాటగా అవార్డును సొంతం చేసుకుంది. బెస్ట్‌ ఒరిజినల్ సాంగ్ కేటగిరిలో పోటీ పడిన ‘అప్లాజ్‌’ (టెల్‌ ఇట్‌ లైక్‌ ఏ ఉమెన్‌), ‘లిఫ్ట్‌ మి అప్‌’ (బ్లాక్‌ పాంథర్‌: వకాండా ఫెరవర్‌), దిస్‌ ఈజ్‌ ఎ లైఫ్‌ (ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’, ‘హోల్డ్‌ మై హ్యాండ్‌’ (టాప్‌గన్‌ మావెరిక్‌) పాటలను వెనక్కి నెట్టి ‘నాటు నాటు..’(RRR)కు ఆస్కార్‌ దక్కించుకుంది. బెస్ట్‌ ఒరిజినల్‌ సాంగ్‌ కేటగిరిలో ‘నాటు నాటు’ ప్రకటించగానే డాల్బీ థియేటర్‌ కరతాళ ధ్వనులతో దద్దరిల్లిపోయింది. ఆస్కార్‌ అవార్డును అందుకున్న ‘ఆర్ఆర్ఆర్‌’ టీమ్‌ ఆనందోత్సాహల్లో మునిగిపోయింది.

13/03/2023 08:16(IST)

బెస్ట్‌ ఒరిజినల్‌ స్క్రీన్‌ప్లే ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’

2023 ఆస్కార్‌ అవార్డు వేడుకల్లో ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ వన్స్‌’ చిత్రం అదరగొడుతోంది. ఇప్పటికే పలు అవార్డులను గెలుచుకున్న ఈ మూవీ ఇప్పుడు ‘బెస్ట్‌ ఒరిజినల్‌ స్క్రీన్‌ప్లే’ విభాగంలోనూ పురస్కారాన్ని దక్కించుకుంది. డేనియల్‌ క్వాన్‌, డేనియల్‌ షెనెర్ట్‌లు ఈ అవార్డును అందుకున్నారు.

13/03/2023 08:11(IST)

మాకు ఇంకా వణుకు తగ్గలేదు: గునీత్‌ మోంగా

ఆస్కార్‌ అవార్డుల వేడుకలో ఉత్తమ షార్ట్‌ ఫిల్మ్‌ కేటగిరిలో ‘ది ఎలిఫెంట్‌ విస్పరర్స్‌’ పురస్కారాన్ని దక్కించుకున్న సంగతి తెలిసిందే. ఈ క్రమంలో అవార్డు అందుకున్న అనంతరం నిర్మాతల్లో ఒకరైన గునీత్‌ మోంగా తన అనుభూతిని పంచుకున్నారు. ‘ఇప్పుడే మేము తొలి ఆస్కార్‌ను అందుకున్నాం. ఇద్దరు మహిళలు ఈ ఘనత సాధించారు. మాకు ఇంకా వణుకు తగ్గలేదు’ అని ట్వీట్‌ చేశారు.

13/03/2023 08:02(IST)

బెస్ట్‌ విజువల్‌ ఎఫెక్ట్స్‌ మూవీ ‘అవతార్‌: ది వే ఆఫ్‌ వాటర్‌’

జేమ్స్‌ కామెరూన్‌ దర్శకత్వం వహించిన విజువల్‌ వండర్‌కు ఆస్కార్‌ అవార్డు దక్కింది. గతేడాది విడుదలైన ‘అవతార్‌: ది వే ఆఫ్‌ వాటర్‌’ మూవీ బెస్ట్‌ విజువల్‌ ఎఫెక్ట్స్‌ కేటగిరిలో ఆస్కార్‌ను దక్కించుకుంది. ‘ఆల్‌ క్వైట్‌ ఆన్‌ ది వెస్ట్రన్‌ ఫ్రంట్‌’, ‘ది బ్యాట్‌మ్యాన్‌’, ‘బ్లాక్‌ పాంథర్‌: వాకాండ ఫరెవర్‌’, ‘టాప్‌గన్‌: మావెరిక్‌’ చిత్రాలను వెనక్కి నెట్టి ‘అవతార్‌2’ ఈ అవార్డును సొంతం చేసుకుంది. తన కుటుంబాన్ని కాపాడుకోవడం కోసం కథానాయకుడైన జేక్‌ మరో ప్రాంతానికి వెళ్తాడు. అక్కడ నివసించే నావీ తెగతో అనుబంధం జేక్‌ కుటుంబం అనుబంధం పెంచుకుంటుంది. ఈ క్రమంలో మానవుల నుంచి వాళ్లకు ఎలాంటి ఆపద ఎదురైంది? జేక్‌ అతని కుటుంబం మానవులతో ఎలా పోరాడింది? అన్నది ‘అవతార్‌2’ కథ.

13/03/2023 07:54(IST)

బెస్ట్‌ ఒరిజినల్‌ స్కోర్‌ ‘ఆల్‌ క్వైట్‌ ఆన్‌ ది వెస్ట్రన్‌ ఫ్రంట్‌’

ఈ ఏడాది ఆస్కార్‌ అవార్డుల జాబితాలో బెస్ట్‌ ఒరిజినల్‌ స్కోర్‌ కేటగిరిలో నిలిచిన ‘ఆల్‌ క్వైట్‌ ఆన్‌ ది వెస్ట్రన్‌ ఫ్రంట్‌’ అవార్డు దక్కించుకుంది. వాకర్‌ బెర్టెల్‌మాన్‌ సంగీతానికి సినీ ప్రేక్షకులే కాదు, ఆస్కార్‌ అవార్డు సైతం ఫిదా అయింది.

13/03/2023 07:42(IST)

బెస్ట్‌ ప్రొడక్షన్‌ డిజైన్‌ ‘ఆల్‌ క్వైట్‌ ఆన్‌ ది వెస్ట్రన్‌ ఫ్రంట్‌’

2023 సంవత్సరానికిగానూ ‘ఆల్‌ క్వైట్‌ ఆన్‌ ది వెస్ట్రన్‌ ఫ్రంట్‌’ చిత్రానికి ఉత్తమ ప్రొడక్షన్‌ డిజైన్‌ విభాగంలో ఆస్కార్‌ వరించింది. క్రిస్టియన్‌ ఎం.గోల్డెబెక్‌ ప్రొడక్షన్‌ డిజైనర్‌గా వ్యవహరించగా, ఎర్నిస్టైన్‌ హిప్పర్‌ సెట్‌ డిజైనర్‌గా ఉత్తమ ప్రదర్శన కనబరిచారు.

13/03/2023 07:37(IST)

ఉత్తమ యానిమేటెడ్‌ షార్ట్‌ ఫిల్మ్‌ ‘ది బాయ్‌, ది మోల్‌, ది ఫాక్స్‌, అండ్‌ ది హార్స్‌’

ఈ ఆస్కార్‌ అవార్డుల జాబితాలో ఉత్తమ యానిమేటెడ్‌ ఫిల్మ్‌ పురస్కారాన్ని ‘ది బాయ్‌, ది మోల్‌, ది ఫాక్స్‌, అండ్‌ ది హార్స్‌’ దక్కించుకుంది. చార్లీ మెక్సీ, మాథ్యూ ఫ్రూడ్‌లు దీన్ని తెరకెక్కించారు.

13/03/2023 07:28(IST)

బెస్ట్‌ షార్ట్‌ ఫిల్మ్‌ విభాగంలో భారత్‌కు ఆస్కార్‌

2023 ఆస్కార్‌ అవార్డుల జాబితాలో భారతీయ చిత్రానికి పురస్కారం దక్కింది. డాక్యుమెంటరీ షార్ట్‌ ఫిల్మ్‌ కేటగిరిలో ‘ది ఎలిఫెంట్‌ విస్పరర్స్‌’ అవార్డును సొంతం చేసుకుంది. కార్తికి గొన్సాల్వేస్‌ తెరకెక్కించిన ఈ డాక్యుమెంటరీని డగ్లస్‌ బ్లష్‌, గునీత్‌ మోంగా, ఆచిన్‌ జైన్‌ నిర్మించారు. రఘు అనే ఏనుగును ఆదరించిన బొమ్మన్‌, బెల్లి జంటకు.. ఆ ఏనుగుకు మధ్య బలమైన బంధం ఏర్పడుతుంది. వారి మధ్య ఉన్న సహజ సాన్నిహిత్యాన్ని, అనుబంధాన్ని ఇందులో చూపించారు. ప్రకృతికి అనుగుణంగా ఉన్న గిరిజన ప్రజల జీవితాన్ని గురించి కూడా ఇందులో చూపించారు. ఈ ప్రస్తుతం ఈ డాక్యుమెంటరీ ప్రముఖ ఓటీటీ వేదిక నెట్‌ఫ్లిక్స్‌లో స్ట్రీమింగ్‌ అవుతోంది.

13/03/2023 07:23(IST)

నాటు నాటు పాటను పరిచయం చేసిన దీపిక పదుకొణె

ఆస్కార్‌ అవార్డుల వేడుకలో బాలీవుడ్‌ కథానాయిక దీపిక పదుకొణె స్పెషల్‌ అట్రాక్షన్‌గా నిలిచారు. ‘ఆర్‌ఆర్ఆర్‌’లోని ‘నాటు నాటు’ పాటను ఆమె ఆస్కార్‌ వేడుకలో పరిచయం చేశారు. ఆ పాట నేపథ్యాన్ని, అవార్డుల వేడుకకు హాజరైన వారికి వివరించారు.

13/03/2023 07:16(IST)

ఆస్కార్‌ వేదికపై కాలభైరవ, రాహుల్‌ సిప్లిగంజ్‌ ప్రదర్శన

ఆస్కార్‌-2023 వేడుకల్లో తెలుగు పాట ‘నాటు నాటు’ అదరగొట్టింది. గాయకులు కాలభైరవ, రాహుల్‌ సిప్లిగంజ్‌ లైవ్‌లో పాడగా, వెస్ట్రన్‌ డ్యాన్సర్‌ తమ డ్యాన్స్‌తో ఉర్రూతలూగించారు. ఈ పాట ప్రదర్శన సమయంలో ఆస్కార్‌ వేడుకకు వేదికైన డాల్బీ థియేటర్‌ మొత్తం కరతాళ ధ్వనులతో మార్మోగిపోయింది.

13/03/2023 07:10(IST)

ఆస్కార్‌ దక్కించుకోలేకపోయిన ‘ఆల్‌దట్‌ బ్రీత్‌’

ఈ ఏడాది ఆస్కార్‌ బరిలో నిలిచిన భారతీయ డాక్యుమెంటరీ ఫీచర్‌ ఫిల్మ్‌ ‘ఆల్‌ దట్‌ బ్రీత్స్‌’ (All That Breathes)అవార్డును దక్కించుకోలేకపోయింది. శౌనకర్‌సేన్‌ దర్శకత్వం వహించిన ఈ చిత్రం ఈ ఏడాది ఆస్కార్‌ అవార్డు తుది జాబితాలో ఎంపికైంది. అయితే, నవానీ (Navalny)కి ఈ అవార్డు దక్కింది.

13/03/2023 07:05(IST)

ఉత్తమ కాస్ట్యూమ్‌ డిజైనర్‌గా రూత్‌ కార్టర్‌

ఆస్కార్‌ అవార్డ్స్‌-2023లో ఉత్తమ కాస్ట్యూమ్‌ డిజైనర్ అవార్డును రూత్‌ కార్టర్‌ సొంతం చేసుకున్నారు. ‘బ్లాక్‌ పాంథర్‌: వకండా ఫరెవర్‌’ చిత్రానికిగానూ ఈ అవార్డు దక్కింది.

13/03/2023 06:56(IST)

ఆస్కార్‌.. భారతీయులకు కొత్త కాదు..

భారతీయ సినిమాకి ఆస్కార్‌ కొత్తేమో కానీ... భారతీయులకి మాత్రం ఇదివరకే పురస్కారాలు దక్కాయి. 1982లో విడుదలైన ‘గాంధీ’ సినిమాకి ఉత్తమ కాస్ట్యూమ్‌ డిజైనర్‌గా భాను అథయ్యా తొలి ఆస్కార్‌ అందుకొని చరిత్ర సృష్టించారు. మహాత్మా గాంధీ జీవితం ఆధారంగా రూపొందిన ఆంగ్ల చిత్రమది. దర్శక దిగ్గజం సత్యజిత్‌ రే సినీ రంగానికి చేసిన విశేష సేవల్ని గుర్తించి 1992లో గౌరవ పురస్కారాన్ని అందజేసింది ఆస్కార్‌ కమిటీ. ఆ తర్వాత 81వ ఆస్కార్‌ వేడుకల్లో ‘స్లమ్‌డాగ్‌ మిలియనీర్‌’ చిత్రానిగానూ ఎ.ఆర్‌.రెహమాన్‌... ఉత్తమ ఒరిజినల్‌ సాంగ్‌, ఉత్తమ ఒరిజినల్‌ స్కోర్‌ విభాగాల్లో రెండు అవార్డులు దక్కించుకున్నారు. బెస్ట్‌ సౌండింగ్‌ మిక్సింగ్‌ విభాగంలో రసూల్‌, బెస్ట్‌ ఓరిజినల్‌ సాంగ్‌ విభాగంలో రచయిత గుల్జార్‌ ఆస్కార్‌ సొంతం చేసుకున్నారు. ‘స్లమ్‌డాగ్‌ మిలియనీర్‌’ కూడా ఆంగ్ల చిత్రమే. 2019లో ఉత్తమ డాక్యుమెంటరీ విభాగంలో దిల్లీకి చెందిన గునీత్‌ మోంగా నిర్మించిన ‘పీరియడ్‌. ఎండ్‌ ఆఫ్‌ ఎ సెంటెన్స్‌’కి ఆస్కార్‌ దక్కింది.

13/03/2023 06:43(IST)

ఆస్కార్‌ వేడుకలో ‘నాటు నాటు’ ప్రదర్శన

ఆస్కార్‌ అవార్డుల వేడుక అట్టహాసంగా జరుగుతోంది. తెలుగు పాట ‘నాటు నాటు’ను ఆస్కార్‌ వేదికగా ప్రదర్శించారు. హాలీవుడ్‌ డ్యాన్సర్లు ఈ పాటకు చిందులేశారు. ఈ పాట ప్రదర్శించినప్పుడు డాల్బీ థియేటర్‌ మొత్తం కరతాళ ధ్వనులతో మార్మోగిపోయింది.

13/03/2023 06:35(IST)

ఉత్తమ సహాయనటుడిగా కే హ్యూ క్వాన్‌

95వ ఆస్కార్‌ అవార్డుల కేటగిరిలో ఉత్తమ సహాయ నటుడిగా కే హ్యూ క్వాన్‌ అవార్డును దక్కించుకున్నారు. ‘ఎవ్రీథింగ్‌ ఎవ్రీవేర్‌ ఆల్‌ ఎట్‌ ది వన్స్‌’ సినిమాలో నటనకు గానూ కే హ్యూ క్వాన్‌ ఈ అవార్డును సొంతం చేసుకున్నారు.

13/03/2023 06:18(IST)

ఆస్కార్ సందడి మొదలు.. మొదటి అవార్డు ఇదే!

ప్రతిష్ఠాత్మక ఆస్కార్‌ పురస్కారాల వేడుక మొదలైంది. తొలి అవార్డుగా ఉత్తమ యానిమేటడ్‌ సినిమాను ప్రకటించారు. గులెర్మో డెల్‌ టోరో తెరకెక్కించిన ‘పినాషియో’ ఉత్తమ యానిమేటడ్‌ మూవీగా ఎంపికైంది.