Feedback | E-PAPER | Pratibha

IND vs AUS Third ODI: భాగస్వామ్యాలు నెలకొల్పడంలో విఫలమయ్యాం: రోహిత్‌

ఆస్ట్రేలియా జరిగిన నిర్ణయాత్మక మూడో వన్డేలో భారత్‌ ఓటమిపాలైంది. టాస్‌ గెలిచి తొలుత బ్యాటింగ్‌ చేసిన ఆసీస్ 269 పరుగులకు ఆలౌటైంది. అనంతరం 270 పరుగుల లక్ష్యంతో బ్యాటింగ్‌ చేసిన భారత్‌ 49.1 ఓవర్లలో 248 పరుగులకు ఆలౌట్‌ అయింది. దీంతో ఆస్ట్రేలియా 2-1 తేడాతో సిరీస్‌ను నెగ్గింది.

Updated : 23 Mar 2023 00:06 IST

22/03/2023 23:54(IST)

సరైన భాగస్వామ్యాలు నెలకొల్పలేదు.. అందుకే ఓటమి: రోహిత్‌

సరైన భాగస్వామ్యాలు నెలకొల్పలేదు.. అందుకే ఓటమి: రోహిత్‌
ఆస్ట్రేలియాతో మూడో వన్డేలో ఓటమి పాలు కావడంపై కెప్టెన్‌ రోహిత్‌ శర్మ మాట్లాడాడు. ఈ మ్యాచ్‌లో మేము సరియైన విధంగా బ్యాటింగ్‌ చేయలేదన్నాడు. ‘‘ఇది పెద్ద లక్ష్యం కాదు. మేము బ్యాటింగ్‌ బాగా చేయలేదు. విజయం సాధించాలంటే భాగస్వామ్యాలే కీలకం. అయితే ఈ మ్యాచ్‌లో మేము సరైన భాగస్వామ్యాలు నెలకొల్పడంలో విఫలమయ్యాము. ఇలాంటి పిచ్‌లపై ఆడేటప్పుడు అవే చాలా కీలకం. ఆటగాళ్లు ఒకరి తర్వాత ఒకరు భాగస్వామ్యాలు నెలకొల్పితే జట్టుకు ఇబ్బంది ఉండదు. కానీ ఈ మ్యాచ్‌లో అలా జరగలేదు. ఇది సమష్టి ఓటమి. మేము ఇంకా మెరుగుపడాలి. ఈ సిరీస్‌ నుంచి ఎంతో నేర్చుకున్నాం. ఆస్ట్రేలియా ఆటగాళ్లు బాగా ఆడారు. స్పిన్నర్లతో పాటు పేసర్లు మాపై ఒత్తిడి తెచ్చారు’’ అని రోహిత్‌ అన్నాడు.

22/03/2023 23:14(IST)

ప్లేయర్‌ ఆఫ్‌ ది సిరీస్‌గా మిచెల్‌ మార్ష్‌

ఆస్ట్రేలియా ఆటగాడు మిచెల్‌ మార్ష్‌ ప్లేయర్‌ ఆఫ్‌ ది మ్యాచ్‌గా ఎంపికయ్యాడు. మూడో వన్డేలో మిచెల్‌ మార్ష్‌ 47 పరుగుల చేసి ఆ జట్టు ఇన్నింగ్స్‌లో టాప్‌ స్కోరర్‌గా నిలిచాడు. తొలి వన్డేలో 81 పరుగులు చేసిన మార్ష్‌, రెండో వన్డేలో 36 బంతుల్లో 66 పరుగులతో నాటౌట్‌గా నిలిచాడు. మొత్తం మూడు ఇన్నింగ్స్‌ల్లో మార్ష్‌ 194 పరుగులు చేసి ఆస్ట్రేలియా సిరీస్‌ నెగ్గడంలో కీలక పాత్ర పోషించాడు.

22/03/2023 22:08(IST)

భారత్‌ ఆలౌట్‌.. ఆసీస్‌దే సిరీస్‌

భారత్‌తో జరిగిన మూడో వన్డేలో ఆస్ట్రేలియా గెలుపొందింది. ఉత్కంఠభరితంగా సాగి ఈ పోరులో ఆసీస్‌ 21 పరుగుల తేడాతో విజయం సాధించింది. 270 పరుగుల లక్ష్యంతో బరిలోకి దిగిన భారత్‌ 49.1 ఓవర్లకు 248 పరుగులు చేసి ఆలౌటైంది. ఈ గెలుపుతో మూడు వన్డేల సిరీస్‌ని కంగారులు 2-1 తేడాతో కైవసం చేసుకున్నారు.

22/03/2023 22:02(IST)

తొమ్మిదో వికెట్

స్టాయినిస్‌ వేసిన 48 ఓవర్‌లో ఫోర్, సిక్స్‌ బాది జోరు మీద కనిపించిన షమి (14) ఈ ఓవర్ల ఐదో బంతికి క్లీన్‌బౌల్డ్ అయ్యాడు. 48 ఓవర్లకు స్కోరు 245/9. కుల్‌దీప్‌(4), సిరాజ్(2) క్రీజులో ఉన్నారు. భారత్‌ విజయానికి 12 బంతుల్లో 25 పరుగులు కావాలి.

22/03/2023 21:49(IST)

ఎనిమిదో వికెట్‌

టీమ్‌ఇండియా ఎనిమిదో వికెట్‌ కోల్పోయింది. ఆడమ్ జంపా వేసిన 46 ఓవర్‌లో తొలి బంతికి జడేజా (18) స్టాయినిస్‌కు క్యాచ్‌ ఇచ్చాడు. 46 ఓవర్లకు స్కోరు 228/8. కుల్‌దీప్‌ (2), షమి (1) క్రీజులో ఉన్నారు. భారత్‌ విజయానికి 24 బంతుల్లో 42 పరుగులు కావాలి.

22/03/2023 21:37(IST)

ఏడో వికెట్

టీమ్‌ఇండియా కీలకమైన వికెట్‌ను కోల్పోయింది. నిలకడగా ఆడుతున్న హార్దిక్‌ పాండ్య (40) ఔటయ్యాడు. జంపా వేసిన 43.4 ఓవర్‌కు స్టీవ్‌ స్మిత్‌కు చిక్కాడు. దీంతో 218 భారత్ పరుగుల వద్ద ఏడో వికెట్ నష్టపోయింది. 44 ఓవర్లకు టీమ్‌ఇండియా 219/7. జడేజా (17), కుల్‌దీప్‌ (1) క్రీజులో ఉన్నారు.

22/03/2023 20:47(IST)

రెండు వికెట్లు

వరుస బంతుల్లో టీమ్‌ఇండియా రెండు వికెట్లు కోల్పోయింది.అగర్‌ వేసిన 36 ఓవర్‌లో తొలి బంతికి కోహ్లీ (54) వార్నర్‌కు చిక్కాడు. తర్వాతి బంతికే సూర్యకుమార్‌ యాదవ్ (0) గోల్డెన్‌ డకౌట్‌గా వెనుదిరిగాడు. మూడు వన్డేల్లోనూ సూర్య గోల్డెన్‌ డక్‌గా ఔట్ కావడం గమనార్హం. 36 ఓవర్లకు స్కోరు 186/6. జడేజా (1), హార్దిక్ పాండ్య (28) క్రీజులో ఉన్నారు. భారత్‌ విజయానికి 84 బంతుల్లో 84 పరుగులు కావాలి.

22/03/2023 20:29(IST)

కోహ్లీ హాఫ్‌ సెంచరీ..

విరాట్ కోహ్లీ హాఫ్‌ సెంచరీ (61 బంతుల్లో) పూర్తి చేసుకున్నాడు. సీన్‌ అబాట్ వేసిన 31 ఓవర్‌లో సింగిల్ తీసి 50 పరుగుల మార్క్‌ను అందుకున్నాడు. ఇదే ఓవర్‌లో మూడో బంతికి హార్దిక్ పాండ్య సిక్సర్‌ బాదాడు. 31 ఓవర్లకు స్కోరు 160/4. కోహ్లీ (50), పాండ్య (7) క్రీజులో ఉన్నారు. భారత్ విజయానికి ఇంకా 110 పరుగులు కావాలి.

22/03/2023 20:20(IST)

అక్షర్‌ రనౌట్‌

టీమ్‌ఇండియా నాలుగో వికెట్‌ కోల్పోయింది. స్టార్క్‌ వేసిన 29 ఓవర్లో ఐదో బంతికి కోహ్లీతో సమన్వయలోపంతో అక్షర్‌ పటేల్ (2) రనౌట్‌ అయ్యాడు. 29 ఓవర్లకు స్కోరు 151/4. విరాట్ కోహ్లీ (48) అర్ధ శతకానికి చేరువలో ఉండగా.. హార్దిక్ పాండ్య (0) క్రీజులో ఉన్నారు.

22/03/2023 20:11(IST)

49 బంతుల తర్వాత బౌండరీ.. రాహుల్ ఔట్‌

టీమ్‌ఇండియా అభిమానుల బౌండరీ నిరీక్షణకు తెరపడింది. జంపా వేసిన 26 ఓవర్‌లో చివరి బంతికి రాహుల్ ఫోర్‌ బాదాడు. 49 బంతుల తర్వాత వచ్చిన బౌండరీ ఇది. స్టార్క్‌ వేసిన 27 ఓవర్‌లో రాహుల్ ఓ సిక్స్‌, ఫోర్‌ బాదాడు.జంపా వేసిన తర్వాతి ఓవర్‌లో మూడో బంతికి కోహ్లీ ఫోర్‌ కొట్టగా.. ఇదే ఓవర్లో ఐదో బంతికి కేఎల్ రాహుల్ (32) భారీ షాట్ ఆడి సీన్‌ అబాట్‌కు చిక్కాడు. దీంతో 146 పరుగుల వద్ద భారత్ మూడో వికెట్ కోల్పోయింది. 28 ఓవర్లకు స్కోరు 147/3. విరాట్ కోహ్లీ (45), అక్షర్‌ పటేల్ (1) క్రీజులో ఉన్నారు.

22/03/2023 20:02(IST)

ఒక్క బౌండరీ లేదు

టీమ్‌ఇండియా బ్యాటర్లు కోహ్లీ, రాహుల్ నెమ్మదిగా ఆడుతున్నారు. వీరిద్దరూ గత ఏడు ఓవర్ల నుంచి ఒక్క బౌండరీ కూడా కొట్టలేదు. చివరగా 18 ఓవర్‌లో బౌండరీ వచ్చింది. మన బ్యాటర్లు గేర్లు మార్చకపోతే లక్ష్య ఛేదన కష్టమవుతుంది. 25 ఓవర్లకు స్కోరు 123/2. రాహుల్ (17), కోహ్లీ (37) క్రీజులో ఉన్నారు. ఇంకా 147 పరుగులు చేస్తే భారత్ విజయం సాధిస్తుంది.

22/03/2023 19:31(IST)

కోహ్లీ దూకుడు

తొలుత నెమ్మదిగా ఆడిన కోహ్లీ క్రమంగా దూకుడు పెంచుతున్నాడు. అగర్‌ వేసిన 18 ఓవర్‌లో ఫోర్‌, సిక్సర్‌ బాదాడు. ఈ క్రమంలో టీమ్‌ఇండియా స్కోరు వంద దాటింది. అంతకుముందు జంపా వేసిన 17 ఓవర్‌లో రెండే పరుగులు వచ్చాయి. 18 ఓవర్లకు స్కోరు 104/2. కేఎల్ రాహుల్ (10), కోహ్లీ (25) క్రీజులో ఉన్నారు.

22/03/2023 19:07(IST)

రెండో వికెట్‌

శుభ్‌మన్‌ గిల్ (37) ఔటయ్యాడు. ఆడమ్‌ జంపా వేసిన 12 ఓవర్‌లో రెండో బంతికి వికెట్ల ముందు దొరికిపోయాడు.తొలుత అంపైర్‌ నాటౌట్‌గా ప్రకటించినా.. ఆసీస్‌ డీఆర్‌ఎస్‌కు వెళ్లింది. సమీక్షలో గిల్ ఔట్‌ అని తేలడంతో 77 పరుగుల వద్ద భారత్ రెండో వికెట్ కోల్పోయింది. 13 ఓవర్లకు స్కోరు 80/2. కోహ్లీ (9), కేఎల్‌ రాహుల్ (2) క్రీజులో ఉన్నారు.

22/03/2023 18:50(IST)

ప్చ్‌.. రోహిత్‌ ఔట్‌

దూకుడుగా ఆడుతున్న రోహిత్‌ శర్మ (30) ఔటయ్యాడు. సీన్‌ అబాట్ వేసిన 10 ఓవర్‌లో తొలి బంతికి మిచెల్ స్టార్క్‌కు చిక్కాడు. దీంతో 65 పరుగుల వద్ద భారత్ మొదటి వికెట్ కోల్పోయింది. 10 ఓవర్లకు స్కోరు 67/1. కోహ్లీ (1), గిల్ (34) క్రీజులో ఉన్నారు.

22/03/2023 18:48(IST)

దూకుడుగా ఆడుతున్న హిట్‌మ్యాన్‌

టీమ్‌ఇండియా కెప్టెన్‌ రోహిత్‌ శర్మ దూకుడుగా ఆడుతున్నాడు. సీన్‌ అబాట్ వేసిన ఎనిమిదో ఓవర్‌లో రెండు బౌండరీలు బాదిన హిట్‌మ్యాన్‌.. జంపా వేసిన తొమ్మిదో ఓవర్‌లో రెండో బంతిని నేరుగా బౌండరీ అవతలికి పంపించాడు. 9 ఓవర్లకు స్కోరు 65/0. రోహిత్‌ (30), గిల్ (33) క్రీజులో ఉన్నారు.

22/03/2023 18:40(IST)

ఫోర్‌, సిక్స్‌

మిచెల్‌ స్టార్క్‌ వేసిన ఏడో ఓవర్‌లో నాలుగో బంతికి గిల్ ఫోర్‌ బాదగా.. చివరి బంతికి రోహిత్‌ సిక్సర్‌ కొట్టాడు. అంతకుముందు స్టాయినిస్‌ వేసిన ఆరో ఓవర్లో నాలుగు పరుగులొచ్చాయి. 7 ఓవర్లకు స్కోరు 44/0. రోహిత్‌ (13), గిల్ (29) క్రీజులో ఉన్నారు.

22/03/2023 18:29(IST)

5 ఓవర్లలో టీమిండియా స్కోరు 27

ఆస్ట్రేలియాతో మ్యాచ్‌లో టీమ్‌ఇండియా ఐదు ఓవర్లలో వికెట్ నష్టపోకుండా 27 పరుగులు చేసింది. మూడో ఓవర్‌లో సిక్సర్‌ కొట్టిన శుభ్‌మన్‌గిల్‌.. ఐదో ఓవర్‌లో వరుసగా రెండు ఫోర్లు బాది స్కోరును కాస్త ముందుకు తీసుకెళ్లాడు. ఆసీస్‌ బౌలర్లు విసిరిన బంతులను మన బ్యాటర్లు దీటుగా ఎదుర్కొంటున్నారు. ప్రస్తుతం రన్‌రేట్‌ 5.40గా ఉంది. రోహిత్‌ (4), గిల్ (21) క్రీజులో ఉన్నారు.

22/03/2023 18:21(IST)

మూడు ఓవర్లలో 13.. శుభ్‌మన్‌ సిక్సర్‌

ఆస్ట్రేలియాతో మ్యాచ్‌లో లక్ష్య ఛేదనకు దిగిన టీమ్‌ఇండియా మూడు ఓవర్లలో 13 పరుగులు చేసింది. మూడో ఓవర్‌లో శుభ్‌మన్‌గిల్‌ సిక్సర్‌ బాదాడు. ఆసిస్‌ బౌలర్లు వేస్తున్న బంతులకు రోహిత్‌ శర్మ, శుభ్‌మన్‌ గిల్‌ ఆచితూచి ఆడుతున్నారు.

22/03/2023 17:37(IST)

ఆసీస్‌ ఆలౌట్‌

భారత్‌తో జరుగుతున్న మూడో వన్డేలో ఆస్ట్రేలియా 49 ఓవర్లకు 269 పరుగులు చేసి ఆలౌటైంది. ట్రావిస్‌ హెడ్‌ (33), మిచెల్ మార్ష్‌ (47), అలెక్స్‌ కెరీ (38) రాణించారు. భారత బౌలర్లలో హార్దిక్ పాండ్య, కుల్‌దీప్‌ పాండ్య చెరో మూడు వికెట్లను తమ ఖాతాలో వేసుకోగా.. అక్షర్‌ పటేల్, సిరాజ్ తలో రెండు వికెట్లు పడగొట్టారు.

22/03/2023 17:18(IST)

స్వల్ప వ్యవధిలో రెండు వికెట్లు

ఆసీస్‌ స్వల్ప వ్యవధిలో రెండు వికెట్లు కోల్పోయింది.అక్షర్‌ వేసిన 45 ఓవర్‌లో చివరి బంతికి అబాట్‌ (26) క్లీన్‌బౌల్డ్ అయ్యాడు. సిరాజ్‌ వేసిన తర్వాతి ఓవర్లో మూడో బంతికి అగర్‌(17) అక్షర్‌కు క్యాచ్‌ ఇచ్చి వెనుదిరిగాడు. 46 ఓవర్లకు ఆసీస్‌ స్కోరు 249/9. ఆడమ్ జంపా (1), మిచెల్ స్టార్క్ (1) క్రీజులో ఉన్నారు.

22/03/2023 16:38(IST)

కెరీ క్లీన్‌బౌల్డ్

ఆసీస్‌ ఏడో వికెట్ కోల్పోయింది. కుల్‌దీప్‌ యాదవ్ వేసిన 39 ఓవర్‌లో తొలి బంతికి అలెక్స్ కెరీ (38) క్లీన్‌బౌల్డ్ అయ్యాడు. ఈ ఓవర్‌లో కుల్‌దీప్‌ ఒక్క పరుగు కూడా ఇవ్వలేదు. 39 ఓవర్లకు ఆసీస్ స్కోరు 203/7.అగర్‌ (0), సీన్‌ అబాట్ (1) క్రీజులో ఉన్నారు.

22/03/2023 16:22(IST)

నిలకడగా ఆడుతున్న స్టాయినిస్‌, కెరీ

ఆసీస్‌ బ్యాటర్లు స్టాయినిస్, అలెక్స్‌ కెరీ నిలకడగా ఆడుతున్నారు. వీరిద్దరూ ఆరో వికెట్‌కు ఇప్పటివరకు 47 పరుగుల భాగస్వామ్యం నెలకొల్పారు. అక్షర్‌ పటేల్‌ వేసిన 35 ఓవర్‌లో ఓ ఫ్రీట్‌ రాగా.. దానిని కెరీ సిక్సర్‌గా మలిచాడు. 35 ఓవర్లకు స్కోరు 186/5. స్టాయినిస్‌ (19), అలెక్స్ కెరీ (28) క్రీజులో ఉన్నారు.

22/03/2023 16:04(IST)

150 దాటిన ఆసీస్‌ స్కోరు

కుల్‌దీప్‌ యాదవ్‌ వేసిన 31 ఓవర్‌లో రెండో బంతికి అలెక్స్‌ కెరీ సింగిల్ తీయడంతో ఆస్ట్రేలియా స్కోరు 150 మార్క్‌ని అందుకుంది. ఇదే ఓవర్‌లో స్టాయినిస్‌ ఓ ఫోర్‌ బాదాడు. వైడ్‌ రూపంలో బౌండరీ కూడా రావడంతో ఈ ఓవర్‌లో మొత్తం 12 పరుగులొచ్చాయి. 31 ఓవర్లకు ఆస్ట్రేలియా స్కోరు 161/5. స్టాయినిస్‌ (9), అలెక్స్‌ కెరీ (14) క్రీజులో ఉన్నారు.

22/03/2023 15:49(IST)

ఐదో వికెట్ డౌన్‌

ఆస్ట్రేలియా ఐదో వికెట్‌ కోల్పోయింది. మార్నస్‌ లబుషేన్‌ (28) ఔటయ్యాడు. కుల్‌దీప్‌ యాదవ్‌ వేసిన 28.1 ఓవర్‌కు అతడు గిల్‌కు క్యాచ్‌ ఇచ్చి వెనుదిరిగాడు. తర్వాత ఇదే ఓవర్‌లో కెరీ ఓ ఫోర్‌ బాదాడు. 29 ఓవర్లకు స్కోరు 145/5. స్టాయినిస్‌ (2), అలెక్స్‌ కెరీ (10) క్రీజులో ఉన్నారు.

22/03/2023 15:34(IST)

వార్నర్‌ ఔట్‌..

డేవిడ్ వార్నర్‌ (23) ఔటయ్యాడు. కుల్‌దీప్‌ యాదవ్‌ వేసిన 25 ఓవర్‌లో మూడో బంతికి హార్దిక్‌ పాండ్యకు క్యాచ్‌ ఇచ్చాడు. దీంతో 125 పరుగుల వద్ద ఆసీస్‌ నాలుగో వికెట్ కోల్పోయింది. 25 ఓవర్లకు ఆసీస్‌ స్కోరు 126/4. అలెక్స్ కెరీ (1), లబుషేన్‌ (20) క్రీజులో ఉన్నారు.

22/03/2023 15:17(IST)

బతికిపోయిన వార్నర్‌

వరుస ఓవర్లలో వికెట్లు పడటంతోపాటు భారత బౌలర్లు కట్టుదిట్టంగా బౌలింగ్‌ చేస్తుండటంతో ఆసీస్‌ బ్యాటర్లు ఆచితూచి ఆడుతున్నారు. గత ఐదు ఓవర్లలో 18 పరుగులు రాబట్టారు. జడేజా వేసిన 20 ఓవర్‌లో చివరి బంతికి వార్నర్‌ ఇచ్చిన క్యాచ్‌ని సిరాజ్‌ అందుకోలేకపోయాడు. 20 ఓవర్లకు ఆస్ట్రేలియా స్కోరు 106/3.మార్నస్‌ లబుషేన్‌ (8), డేవిడ్ వార్నర్ (16) క్రీజులో ఉన్నారు.

22/03/2023 14:51(IST)

హార్దిక్‌ జోరు

టీమ్‌ఇండియా ఆల్‌రౌండర్‌ హార్దిక్‌ పాండ్య బౌలింగ్‌లో విజృంభిస్తున్నాడు. తన వరుస ఓవర్లలో హెడ్, స్మిత్‌లను పెవిలియన్‌ పంపిన పాండ్య.. ఇప్పుడు అర్ధ శతకం దిశగా సాగుతున్న మిచెల్ మార్ష్ (47)ని ఔట్‌ చేశాడు. అతడు వేసిన 14.3 ఓవర్‌కు మార్ష్‌ షాట్‌ ఆడబోయాడు. బంతి బ్యాట్‌ ఎడ్జ్‌కి తగిలి వికెట్లను తగిలింది. దీంతో మార్ష్‌ పెవిలియన్‌ బాట పట్టాడు. 15 ఓవర్లకు ఆస్ట్రేలియా స్కోరు 88/3. డేవిడ్ వార్నర్‌ (6), మార్నస్‌ లబుషేన్‌ (1) క్రీజులో ఉన్నారు.

22/03/2023 14:37(IST)

స్టీవ్‌ స్మిత్ ఔట్‌

తన క్రితం ఓవర్‌లో ట్రావిస్‌ హెడ్‌ని ఔట్‌ చేసిన హార్దిక్‌ పాండ్య.. 12.2 ఓవర్‌కు స్టీవ్‌ స్మిత్‌ (0)ను పెవిలియన్‌కు పంపాడు. అతడు వికెట్ కీపర్‌ కేఎల్ రాహుల్‌కు క్యాచ్‌ ఇచ్చి వెనుదిరిగాడు. 13 ఓవర్లకు ఆస్ట్రేలియా స్కోరు 77/2. డేవిడ్ వార్నర్‌ (1), మిచెల్ మార్ష్‌ (42) క్రీజులో ఉన్నారు.

22/03/2023 14:27(IST)

ట్రావిస్‌ హెడ్‌ ఔట్‌

ఆస్ట్రేలియా మొదటి వికెట్ కోల్పోయింది. ట్రావిస్ హెడ్ (33) ఔటయ్యాడు. హార్దిక్‌ పాండ్య వేసిన 11 ఓవర్‌లో రెండో బంతికి ఫోర్‌ బాదిన అతడు.. ఐదో బంతికి కుల్‌దీప్‌ యాదవ్‌కి క్యాచ్‌ ఇచ్చి పెవిలియన్‌ చేరాడు. 11 ఓవర్లకు స్కోరు 68/1. మిచెల్ మార్ష్‌ (34), స్టీవ్‌ స్మిత్ (0) క్రీజులో ఉన్నారు.

22/03/2023 14:25(IST)

నిలకడగా ఆడుతున్న ఆస్ట్రేలియా ఓపెనర్లు

ఆస్ట్రేలియా ఓపెనర్లు నిలకడగా ఆడుతున్నారు. భారత బౌలర్లు వికెట్ కోసం ప్రయత్నిస్తున్న ఏ మాత్రం అవకాశం ఇవ్వడం లేదు. సిరాజ్‌ వేసిన ఏడో ఓవర్‌లో పరుగులేమీ రాలేదు. అక్షర్‌ వేసిన ఎనిమిదో ఓవర్‌లో ట్రావిస్‌ హెడ్ సిక్స్‌ బాదగా.. మిచెల్ మార్ష్‌ ఫోర్‌ కొట్టాడు. సిరాజ్‌ వేసిన తొమ్మిదో ఓవర్‌లో హెడ్ రెండు ఫోర్లు బాదాడు. 10 ఓవర్లకు స్కోరు 61/0. హెడ్ (27), మార్ష్‌ (33) క్రీజులో ఉన్నారు.

22/03/2023 14:01(IST)

మైదానంలో తొలి ఇన్నింగ్స్‌ సగటు స్కోరు 272

చెపాక్‌ మైదానంలో జరిగిన గత ఐదు మ్యాచ్‌లు చూస్తే.. తొలుత బ్యాటింగ్‌ చేసిన జట్టు మూడు సార్లు గెలిచింది. రెండోసారి బ్యాటింగ్‌ చేసిన టీమ్‌ రెండుసార్లు గెలుపొందింది. ఇక ఈ మైదానంలో సగటు తొలి ఇన్నింగ్స్‌ స్కోరు 272 పరుగులు.

22/03/2023 13:58(IST)

39 పరుగుల్లో 36 బౌండరీలతోనే..

రెండో వన్డేలో భారత బౌలింగ్‌ను ఊచకోత కోసిన ఆసీస్‌ ఓపెనర్లు ఈ మ్యాచ్‌లోనూ అదే పని చేస్తున్నారు. ఐదు ఓవర్లకు 39 పరుగులు చేస్తే అందులో 36 పరుగులు ఫోర్లు, సిక్స్‌ల నుంచే వచ్చాయి. దీంతో ఆరో ఓవర్‌కే స్పిన్నర్‌ అక్షర్‌ పటేల్‌ బంతిని అందుకున్నాడు.

22/03/2023 13:55(IST)

ఐదు ఓవర్లు పూర్తి... ఆసీస్‌ అదే జోరు

మొదట బ్యాటింగ్‌ చేసినా, తర్వాత బ్యాటింగ్‌ చేసినా ఆస్ట్రేలియా జోరు తగ్గడం లేదు. ఓపెనర్లు హెడ్‌, మార్ష్‌ మూడో వన్డేలోనూ అదే జోరు ప్రదర్శిస్తున్నారు. తొలి రెండు వన్డేలను గుర్తు చేస్తూ ఈ మ్యాచ్‌లోనూ బౌండరీలతో రెచ్చిపోతున్నారు. ఐదు ఓవర్లు ముగిసేసరికి కంగారూలు వికెట్‌ నష్టపోకుండా 39 పరుగులు చేశారు. క్రీజులో మార్ష్‌ (27), హెడ్‌ (11) ఉన్నారు.

22/03/2023 13:45(IST)

35 ఏళ్ల క్రితం తండ్రి చేశాడు.. ఇప్పుడు కొడుకు చేస్తాడా?

చెన్నైలోని చెపాక్‌ మైదానంలో మిచెల్‌ మార్ష్‌ సెంచరీ చేస్తాడా? ఇప్పుడు ఆసీస్‌ మీడియా, సోషల్‌ మీడియాలో ఇదే చర్చ జరుగుతోంది. కారణం ఇదే పిచ్‌ మీద సుమారు 35 ఏళ్ల క్రితం అంటే అక్టోబరు 9, 1987లో అతని తండ్రి జి మార్ష్‌ సెంచరీ (110) చేశారట. దీంతో కొడుకు కూడా శతకం సాధిస్తాడా అనే ఉత్సుకత మొదలైంది. మిచెల్‌ మార్ష్‌ ప్రస్తుతం ఉన్న ఫామ్‌లో ఇక్కడ సెంచరీ కొట్టడం పెద్ద విషయం కాదు అంటున్నారు.

22/03/2023 13:34(IST)

వార్నర్‌ కెరీర్‌లో రెండోసారి ఇలా..

ఆస్ట్రేలియా స్టార్‌ బ్యాటర్‌ డేవిడ్‌ వార్నర్‌ ఈ మ్యాచ్‌లో నాలుగో స్థానంలో బ్యాటింగ్‌కి దిగుతున్నాడు. అతని కెరీర్‌లో ఓపెనింగ్‌కి దిగని మ్యాచ్‌ ఇది రెండోది కావడం గమనార్హం. గత రెండు మ్యాచుల్లో ఓపెనింగ్‌లో అదరగొట్టిన మార్ష్‌, హెడ్‌ జోడీని విడగొట్టకూడదనే కారణంతోనే వార్నర్‌ను నాలుగో స్థానానికి పంపారని సమాచారం.

22/03/2023 13:31(IST)

బ్యాటింగ్‌కి దిగిన మార్ష్‌, హెడ్‌.. బంతి షమీ చేతుల్లో...

సిరీస్‌ డిసైడర్‌ మ్యాచ్‌లో తొలి బంతి పడింది. టాస్‌ గెలిచిన ఆసీస్‌ బ్యాటింగ్‌కి దిగింది. మిచెల్‌ మార్ష్‌, ట్రావిస్‌ హెడ్‌ ఓపెనర్లుగా వచ్చారు. తొలి ఓవర్‌ను ఎప్పటిలాగే మహ్మద్‌ షమీ స్టార్ట్‌ చేశాడు.

22/03/2023 13:17(IST)

ఎన్‌సీఏలో చేసింది బాగా ఉపయోగపడుతోంది: జడేజా

గాయంతో టీమ్‌కు దూరమై.. ఎన్‌సీఏలో ఉన్నప్పుడు నా నైపుణ్యాల్ని మెరుగుపరుచుకోవడానికి చాలా కృషి చేశాను అని టీమ్‌ ఇండియా ఆల్‌రౌండర్‌ రవీంద్ర జడేజా చెప్పాడు. ఆసీస్‌తో మూడో వన్డే ముందు జడేజా మట్లాడుతూ.. ‘‘ఎన్‌సీఏలో చేసిన కసరత్తు ఇప్పుడు నాకు టెస్టులు, వన్డేల్లో చాలా ఉపయోగపడింది. ఈ మ్యాచ్‌లో రాణించి సిరీస్‌ను గెలుచుకుంటామని అనుకుంటున్నాను’’ అని జడేజా తెలిపాడు.

22/03/2023 13:06(IST)

టీమ్‌ ఇండియాలో మార్పుల్లేవ్‌!

రెండో వన్డేలో ఆడిన జట్టుతోనే భారత్‌ ఈ మ్యాచ్‌ ఆడబోతోంది. తుది జట్టు ఇది: రోహిత్‌ శర్మ (కెప్టెన్‌), శుబ్‌మన్‌ గిల్‌, విరాట్‌ కోహ్లీ, సూర్య కుమార్‌ యాదవ్‌, కేఎల్‌ రాహుల్‌, హార్దిక్‌ పాండ్య, రవీంద్ర జడేజా, అక్షర్‌ పటేల్‌, కుల్‌దీప్‌ యాదవ్‌, మహ్మద్‌ షమీ, మహ్మద్‌ సిరాజ్‌

22/03/2023 13:04(IST)

రెండు మార్పులతో ఆసీస్‌

మూడో వన్డే కోసం ఆస్ట్రేలియా జట్టులో రెండు మార్పులు చేసింది. ఓపెనర్‌ డేవిడ్‌ వార్నర్‌ తిరిగి జట్టులోకి వచ్చాడు. అలాగే స్పిన్నర్‌ ఆస్టన్‌ ఆగర్‌ను ఫైనల్‌ 11లోకి తీసుకున్నారు. ఎల్లిస్‌, కామెరూన్‌ గ్రీన్‌ బదులు వారిని తీసుకున్నారు. తుది జట్టు: డేవిడ్‌ వార్నర్‌, ట్రావిస్‌ హెడ్‌, మార్నస్‌ లబుషేన్‌, స్టీవ్‌ స్మిత్‌, మిచెల్‌ మార్ష్‌, అలెక్స్‌ కారీ, గ్లెన్‌ మ్యాక్స్‌వెల్‌, ఆస్టన్‌ అగర్‌, సీన్‌ అబాట్‌, మిచెల్‌ స్టార్క్‌, ఆడమ్‌ జంపా.

22/03/2023 12:59(IST)

సాయంత్రం బ్యాటింగ్‌కి బెటర్‌!

పిచ్‌పై పచ్చిక కనిపిస్తోంది. దీంతోపాటు బంతి వేగంలో మార్పులు కనిపించే అవకాశం ఉంది. బంతి వేగాన్ని బాగా కంట్రోల్‌ చేసే బౌలర్‌ల వల్ల బ్యాటర్లకు ఇబ్బంది తప్పదు అని పిచ్‌ రిపోర్ట్‌ చెబుతోంది. మధ్యాహ్నం కంటే సాయంత్రానికి పిచ్‌ బ్యాటింగ్‌కు అనుకూలంగా ఉండొచ్చు అని చెబుతున్నారు.

22/03/2023 12:55(IST)

26 ఏళ్ల రికార్డు నిలబెట్టుకుంటారా?

సొంత దేశంలో గత 26 ఏళ్లుగా భారత్‌కు ద్వైపాక్షిక సిరీస్‌ల్లో ఓటమనేది లేదు. దీంతో ఈ రోజు జరగబోయే సిరీస్‌ డిసైడర్‌పై అందరి చూపు పడింది.భారత్‌ సిరీస్‌ గెలిచి రికార్డు నిలబెట్టుకుంటుందా? లేక భారత్‌ జైత్రయాత్రకు ఆసీస్‌ అడ్డుపడుతుందా అనేది చూడాలి.

22/03/2023 12:48(IST)

‘రోహిత్‌-కోహ్లీ’ మరో రెండు పరుగులు చేస్తే.. ప్రపంచ రికార్డే

భారత్‌-ఆస్ట్రేలియా(IND vs AUS)ల మధ్య సిరీస్‌ ఫలితాన్ని తేల్చే మూడో వన్డే నేడు చెన్నైలో జరగనుంది. తొలి వన్డేలో గెలిచి.. రెండో వన్డేలో అన్ని విభాగాల్లో విఫలమై చిత్తుగా ఓడిన రోహిత్‌ సేనకు కీలక పోరు ఇది. అయితే.. ఈ సిరీస్‌లో పెద్దగా రాణించని రోహిత్‌-కోహ్లీ (Rohit Sharma-Virat Kohli)ల ముందు ఓ ప్రపంచ రికార్డు వేచి ఉంది. వీరిద్దరూ కలిసి మరో 2 పరుగులు చేస్తే.. వన్డేల్లో అత్యంత వేగంగా 5000 పరుగులు పూర్తి చేసిన జంట(fastest pair)గా నిలవనున్నారు. పూర్తి వార్త కోసం క్లిక్‌ చేయండి

22/03/2023 12:46(IST)

ఈ రికార్డులు వస్తాయా?

* వన్డేల్లో అత్యంత వేగంగా 2000 పరుగులు సాధించిన రెండో భారత ఆటగాడిగా నిలిచేందుకు కేఎల్‌ రాహుల్‌కు అవసరమైన పరుగులు 46. అతను ఇప్పటివరకూ 51 వన్డే ఇన్నింగ్స్‌ల్లో 1954 పరుగులు చేశాడు.

* ఆస్ట్రేలియా తరపున వన్డేల్లో అత్యంత వేగంగా 5 వేల పరుగుల మైలురాయి అందుకున్న రెండో ఆటగాడిగా నిలిచేందుకు స్మిత్‌కు అవసరమైన పరుగులు 61.

22/03/2023 12:45(IST)

`పిచ్‌ ఎలా ఉంది?`

చెపాక్‌ పిచ్‌ సంప్రదాయంగా స్పిన్‌కు అనుకూలిస్తుంది. ఈ సారి కూడా స్పిన్నర్లు ఆధిపత్యం చలాయించొచ్చు. కానీ వేడి వాతావరణం కారణంగా పేసర్లు స్వింగ్‌, సీమ్‌ రాబట్టే ఆస్కారముంది. ఈ మైదానంలో ఫలితం తేలిన 21 వన్డేల్లో మొదటి సారి బ్యాటింగ్‌ చేసిన జట్టు 13 సార్లు గెలిచింది. చివరగా ఇక్కడ 2019 డిసెంబర్‌ 15న వన్డే జరిగింది. ఇక్కడ ఆస్ట్రేలియా, భారత్‌ మధ్య జరిగిన రెండు వన్డేల్లో చెరొక విజయం సాధించాయి.

22/03/2023 12:45(IST)

సిరీస్‌ వస్తుందా.. పోతుందా? నేడే ఆస్ట్రేలియాతో మూడో వన్డే

వరుసగా రెండు క్లీన్‌స్వీప్‌ల తర్వాత ఆస్ట్రేలియా నుంచి గట్టి ప్రతిఘటన ఎదుర్కొన్న టీమ్‌ఇండియా.. ఆ జట్టుతో సిరీస్‌ ఫలితాన్ని తేల్చే కీలక పోరుకు సిద్ధమైంది. తొలి వన్డేలో కష్టం మీద గెలిచి, రెండో వన్డేలో చిత్తుగా ఓడిన రోహిత్‌ సేనకు.. బుధవారం చెన్నైలో కంగారూల నుంచి సవాలు తప్పకపోవచ్చు. చెపాక్‌ పిచ్‌ స్పిన్‌కు అనుకూలించే అవకాశాలున్న నేపథ్యంలో మ్యాచ్‌ ఎలాంటి మలుపులు తిరుగుతుందనేది ఆసక్తికరం. పూర్తి వార్త కోసం క్లిక్‌ చేయండి

App

IND vs AUS Third ODI: భాగస్వామ్యాలు నెలకొల్పడంలో విఫలమయ్యాం: రోహిత్‌

తాజా వార్తలు (Latest News)

Kodandaram: అవసరమైతే మా పార్టీ విలీనం: కోదండరామ్‌ ఆసక్తికర వ్యాఖ్యలు

Odisha Train Accident: 382 మందికి కొనసాగుతోన్న చికిత్స.. చెన్నై చేరుకున్న ప్రత్యేక రైలు!

Botsa: 28 మంది ఇంకా ఫోన్‌కి అందుబాటులోకి రాలేదు: మంత్రి బొత్స

AUS vs IND WTC Final: భారత్‌కు వీరు.. ఆసీస్‌కు వారు.. ఎవరిదయ్యేనో పైచేయి?

kishan reddy: హెల్త్‌ టూరిజంలో టాప్‌ 10 దేశాల్లో భారత్: కిషన్‌రెడ్డి

Top Ten News @ 1 PM: ఈనాడు.నెట్‌లో టాప్‌ 10 వార్తలు

సుఖీభవ

చదువు