Breaking | Feedback | E-PAPER | Pratibha

IPL Final: చెన్నైదే టైటిల్.. ప్లేయర్‌ ఆఫ్‌ ది మ్యాచ్‌గా కాన్వే

ఐపీఎల్-16 సీజన్‌ విజేతగా చెన్నై సూపర్‌ కింగ్స్‌ నిలిచింది. గుజరాత్ టైటాన్స్‌తో జరిగిన ఉత్కంఠ పోరులో 5 వికెట్ల తేడాతో విజయం సాధించింది.

Updated : 30 May 2023 02:44 IST

30/05/2023 01:34(IST)

చెన్నైదే గెలుపు

ఐపీఎల్-16 సీజన్‌ విజేతగా చెన్నై సూపర్‌ కింగ్స్‌ నిలిచింది. గుజరాత్ టైటాన్స్‌తో జరిగిన ఉత్కంఠ పోరులో 5 వికెట్ల తేడాతో విజయం సాధించింది. తొలుత గుజరాత్ నిర్ణీత 20 ఓవర్లలో 4 వికెట్ల నష్టానికి 214 పరుగులు చేసింది. వర్షం అంతరాయం కలిగించడతో మ్యాచ్‌ను 15 ఓవర్లకు కుదించి చెన్నై లక్ష్యాన్ని 171 పరుగులుగా ఖరారు చేశారు. ఈ లక్ష్యాన్ని చెన్నై చివరి బంతికి ఛేదించింది. డేవాన్‌ కాన్వే (47), రహానె (27), రుతురాజ్‌ గైక్వాడ్ (26), రాయుడు (19) రాణించారు.

చివరి ఓవర్‌ (మోహిత్ శర్మ)లో 13 పరుగులు అవసరం కాగా.. మొదటి నాలుగు బంతుల్లో మూడే పరుగులు రావడంతో చివరి రెండు బంతుల్లో సమీకరణం 10 పరుగులుగా మారింది. గెలుపుపై తీవ్ర ఉత్కంఠ నెలకొంది. కానీ, జడేజా (15) వరుసగా సిక్స్‌, ఫోర్ బాదడంతో చెన్నై శిబిరం ఆనందంలో మునిగిపోయింది.

30/05/2023 01:03(IST)

వరుసగా రెండు ఫోర్లు

రహానె దూకుడు కొనసాగిస్తున్నాడు. రషీద్‌ఖాన్‌ వేసిన 10వ ఓవర్లో 13 పరుగులు రాగా.. చివరి రెండు బంతులకు ఫోర్లు బాదాడు. 10 ఓవర్లకు స్కోరు 112/2. రహానె (26), శివమ్ దూబె (8) పరుగులతో ఉన్నారు. చెన్నై విజయానికి 30 బంతుల్లో 59 పరుగులు అవసరం.

30/05/2023 00:18(IST)

దూకుడుగా ఆడుతున్న ఓపెనర్లు

చెన్నై విజయానికి 15 ఓవర్లలో 171 పరుగులు ఖరారు చేయడంతో ఆ జట్టు ఓపెనర్లు దూకుడుగా ఆడుతున్నారు. హార్దిక్ పాండ్య వేసిన రెండో ఓవర్‌లో రెండో బంతికి సిక్స్‌ బాదిన డేవాన్‌ కాన్వే ఐదో బంతికి ఫోర్ కొట్టాడు. ఈ ఓవర్‌లో మొత్తం 14 పరుగులు వచ్చాయి. 2 ఓవర్లకు స్కోరు 24/0.

30/05/2023 00:11(IST)

తిరిగి ప్రారంభమైన మ్యాచ్

వర్షం కారణంగా ఆగిపోయిన మ్యాచ్‌ తిరిగి ప్రారంభమైంది. వర్షం పడి మ్యాచ్‌ ఆగిపోయే సమయానికి చెన్నై స్కోరు మూడు బంతుల్లో 4/0. మొదటి ఓవర్‌ చివరి బంతికి రుతురాజ్‌ గైక్వాడ్ (10) ఫోర్ బాదాడు. కాన్వే (0) ఇంకా పరుగుల ఖాతా తెరవలేదు.

29/05/2023 23:51(IST)

గుడ్ న్యూస్..

వర్షం కారణంగా నిలిచిపోయిన మ్యాచ్‌ తిరిగి ప్రారంభంకానుంది. మ్యాచ్‌ను 15 ఓవర్లకు కుదించి చెన్నై లక్ష్యాన్ని 171గా ఖరారు చేశారు. 12:10 గంటలకు మ్యాచ్‌ ప్రారంభంకానుంది. పవర్‌ ప్లేను 4 ఓవర్లకు తగ్గించారు. ఒక్కో బౌలర్ గరిష్ఠంగా 3 ఓవర్లు బౌలింగ్ చేయాలి.

29/05/2023 23:03(IST)

ఇంకా తడిగానే ఉన్న మైదానం

మైదానాన్ని పరిశీలించిన అంపైర్లు.. గ్రౌండ్ ఇంకా తడిగానే ఉందని తేల్చారు. మైదానాన్ని మ్యాచ్ ఆడేందుకు వీలుగా సిద్ధం చేసేందుకు సిబ్బంది తీవ్రంగా శ్రమిస్తున్నారు. 11:30 గంటలకు అంపైర్లు మరోసారి మైదానాన్ని పరిశీలించనున్నారు.

29/05/2023 22:48(IST)

మైదానాన్ని పరిశీలిస్తున్న అంపైర్లు

అంపైర్లు మైదానాన్ని, పిచ్‌ను పరిశీలిస్తున్నారు. గుజరాత్ కెప్టెన్ హార్దిక్ పాండ్య మైదానంలో పరిస్థితి గురించి అంపైర్లతో మాట్లాడాడు. మ్యాచ్‌ రిఫరీ జవగళ్ శ్రీనాథ్‌, అంపైర్లు, హార్దిక్ పాండ్య.. మైదాన సిబ్బందితో మాట్లాడుతున్నారు.

29/05/2023 22:04(IST)

ఓవర్ల కుదింపు అప్పుడే...

నరేంద్ర మోదీ స్టేడియంలో ఇంకా వర్షం కురుస్తూనే ఉంది. ఇదే పరిస్థితి మరో 2 గంటలపాటు కొనసాగితే.. ఓవర్లను కుదించే అవకాశం ఉంది. ఒక వేళ వర్షం ఆగిపోయినా.. మైదానాన్ని సిద్ధం చేసేందుకు కనీసం 20 నుంచి 30 నిమిషాల సమయం పడుతుంది.

29/05/2023 21:43(IST)

వరుణుడు వచ్చాడు.. వెళ్లాడు

గుజరాత్ నిర్దేశించిన 215 పరుగుల లక్ష్యాన్ని ఛేదించేందుకు బరిలోకి దిగేందుకు సీఎస్కే సిద్ధమవుతుండగా.. చిన్నపాటి చినుకులు పడ్డాయి. దీంతో పిచ్‌ను కవర్లతో కప్పేశారు. కొన్ని నిమిషాల తర్వాత చినుకులు పడటం ఆగిపోవడంతో కవర్లను తొలగించారు. మరి కొద్దిసేపట్లో మ్యాచ్ ప్రారంభంకానుంది.

29/05/2023 21:14(IST)

సుదర్శన్‌ సెంచరీ మిస్‌.. చెన్నై ముందు భారీ టార్గెట్

చెన్నై సూపర్‌ కింగ్స్‌తో జరుగుతున్న ఐపీఎల్-16 సీజన్‌ ఫైనల్‌లో గుజరాత్‌ టైటాన్స్‌ భారీ స్కోరు చేసింది. నిర్ణీత 20 ఓవర్లలో నాలుగు వికెట్ల నష్టానికి 214 పరుగులు చేసింది. సాయి సుదర్శన్ (96; 47 బంతుల్లో 8 ఫోర్లు, 6 సిక్స్‌లు) త్రుటిలో శతకం చేజార్చుకున్నాడు. వృద్ధిమాన్ సాహా (54; 39 బంతుల్లో 5 ఫోర్లు, 1 సిక్స్‌) అర్ధ శతకం బాదాడు. శుభ్‌మన్‌ గిల్ (39; 20 బంతుల్లో 7 ఫోర్లు), హార్దిక్ పాండ్య (21*; 12 బంతుల్లో 2 సిక్స్‌లు) దూకుడుగా ఆడారు. చెన్నై బౌలర్లలో మతీశా పతిరన 2, జడేజా, దీపక్ చాహర్‌ ఒక్కో వికెట్ పడగొట్టారు.

29/05/2023 20:56(IST)

దంచికొడుతున్నాడు

హాఫ్‌ సెంచరీ పూర్తి చేసుకున్న తర్వాత సాయి సుదర్శన్ చెలరేగి ఆడుతున్నాడు. తుషార్ దేశ్‌పాండే వేసిన 17వ ఓవర్‌లో వరుసగా 6,4,4,4 బాదేసి స్కోరు బోర్డును పరుగులు పెట్టించాడు. 17 ఓవర్లకు స్కోరు 173/2. సుదర్శన్ (76), హార్దిక్ పాండ్య (2) పరుగులతో ఉన్నాడు.

29/05/2023 20:52(IST)

సుదర్శన్ హాఫ్ సెంచరీ

సాయి సుదర్శన్‌ 33 బంతుల్లో హాఫ్‌ సెంచరీ పూర్తి చేసుకున్నాడు. పతిరన వేసిన 16 ఓవర్లో మూడో బంతికి ఫోర్ బాది అర్ధ శతకం అందుకున్నాడు. 16 ఓవర్లకు స్కోరు 153/2. హార్దిక్ పాండ్య (1), సాయి సుదర్శన్ (57) పరుగులతో ఉన్నాడు.

29/05/2023 19:52(IST)

ఈ సారి గిల్

గత ఓవర్‌లో వృద్ధిమాన్ సాహా దూకుడుగా ఆడగా.. తుషార్‌ దేశ్‌పాండే వేసిన నాలుగో ఓవర్‌లో గిల్ జోరందుకున్నాడు. మొదటి మూడు బంతులను బౌండరీకి పంపి హ్యాట్రిక్‌ ఫోర్లు సాధించాడు. 4 ఓవర్లకు స్కోరు 38/0. గిల్ (17), సాహా (21) పరుగులతో ఉన్నారు.

29/05/2023 19:45(IST)

క్యాచ్‌ డ్రాప్‌

శుభ్‌మన్‌ గిల్ ఔటయ్యే ప్రమాదం నుంచి తప్పించుకున్నాడు. తుషార్‌ దేశ్‌పాండే రెండో ఓవర్‌లో నాలుగో బంతికి గిల్ ఇచ్చిన సులభమైన క్యాచ్‌ను దీపక్ చాహర్‌ అందుకోలేకపోయాడు. ఈ ఓవర్‌లో మొత్తం నాలుగు పరుగులు వచ్చాయి. 2 ఓవర్లకు స్కోరు 8/0. సాహా (4), గిల్ (4) పరుగులతో ఉన్నారు.

29/05/2023 19:32(IST)

మ్యాచ్‌ ప్రారంభం.. బ్యాటింగ్‌కు దిగిన గుజరాత్

గుజరాత్ టైటాన్స్‌, చెన్నై సూపర్‌ కింగ్స్ మధ్య ఫైనల్ మ్యాచ్‌ ప్రారంభమైంది. టాస్ ఓడి గుజరాత్ బ్యాటింగ్‌కు దిగింది. శుభ్‌మన్‌ గిల్, వృద్ధిమాన్ సాహా ఓపెనర్లుగా వచ్చారు. దీపక్‌ చాహర్‌ మొదటి ఓవర్‌ వేస్తున్నాడు.

29/05/2023 19:16(IST)

మేం బౌలింగ్ చేయాలనుకున్నాం: హార్దిక్ పాండ్య

టాస్‌ గెలిస్తే మేం కూడా మొదట బౌలింగ్ చేయాలనుకున్నాం. కానీ, నా హృదయం బ్యాటింగ్ వైపు మొగ్గు చూపింది. కాబట్టి.. టాస్ ఓడిపోయినా పట్టించుకోవడం లేదు. మంచి ఆటతీరును కనబర్చిన జట్టు టైటిల్ విజేతగా నిలుస్తుంది. మా ఆటగాళ్లు బాగా ఆడతారని ఆశిస్తున్నా.

29/05/2023 19:15(IST)

అందుకే బౌలింగ్ ఎంచుకున్నాం: ధోనీ

వర్ష సూచన ఉన్నందున ముందు బౌలింగ్‌ ఎంచుకున్నాం. నిన్న వర్షం కారణంగా మ్యాచ్‌ నిర్వహణ సాధ్యంకాక మేం డ్రెస్సింగ్ రూమ్‌కే పరిమితమయ్యాం. దీంతో అభిమానులు తీవ్ర నిరాశకు గురయ్యారు. ఈ రోజు వారిని మేం అలరిస్తామని ఆశిస్తున్నా.

29/05/2023 19:02(IST)

టాస్‌ గెలిచిన చెన్నై సూపర్‌ కింగ్స్‌

అహ్మదాబాద్‌ వేదికగా మరికాసేపట్లో ఐపీఎల్-16 సీజన్‌ ఫైనల్ ప్రారంభంకానుంది. ఈ టైటిల్ పోరులో చెన్నై సూపర్‌ కింగ్స్‌తో గుజరాత్ టైటాన్స్‌ తలపడనుంది. సీఎస్కే కెప్టెన్ ధోనీ టాస్‌ గెలిచి తొలుత బౌలింగ్ ఎంచుకున్నాడు.

29/05/2023 18:54(IST)

సర్వం సిద్ధం.. కాసేపట్లో టాస్‌

నిన్న జరగాల్సిన ఐపీఎల్‌ ఫైనల్‌ వర్షం కారణంగా నేటికి వాయిదా పడింది. నేడు కూడా అహ్మదాబాద్‌లో వర్షాలు కురిసే అవకాశాలున్నాయని చెప్పినప్పటికీ ప్రస్తుతం వాతావరణం పొడిగా ఉంది. మ్యాచ్‌ నిర్వహణకు నిర్వాహకులు అన్ని ఏర్పాట్లు పూర్తి చేశారు. మరికాసేపట్లో టాస్‌ వేయనున్నారు.

29/05/2023 17:45(IST)

ఫైనల్‌ మ్యాచ్‌పై కొనసాగుతున్న ఉత్కంఠ.. నేడూ వరుణుడు ఆటంకం కలిగిస్తాడా?

చెన్నై సూపర్‌ కింగ్స్‌, గుజరాత్ టైటాన్స్‌ మధ్య ఆదివారం జరగాల్సిన ఐపీఎల్ ఫైనల్ మ్యాచ్‌ భారీ వర్షం కారణంగా సోమవారానికి వాయిదా పడిన సంగతి తెలిసిందే. నేడు కూడా మ్యాచ్‌కు వర్షం ఆటంకం కలిగించే అవకాశాలున్నాయి. అహ్మదాబాద్‌లో కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ అంచనా వేసింది. మ్యాచ్‌ జరగాల్సి ఉన్న నరేంద్ర మోదీ స్టేడియం పరిసర ప్రాంతాల్లో ప్రస్తుతం ఆకాశం మేఘావృతమై ఉంది. అయితే, మ్యాచ్‌ ప్రారంభమయ్యే సమయానికల్లా వర్షం కురిసే అవకాశాలు తక్కువగా ఉన్నాయని పేర్కొంది.

29/05/2023 17:43(IST)

వర్షం కారణంగా నా పదేళ్ల కుమారుడికి ధోనీని చూపించలేకపోయా!

ఎంఎస్ ధోనీని ప్రత్యక్షంగా చూద్దామని ఆశపడిన పదేళ్ల కుర్రాడికి తీవ్ర నిరాశే ఎదురైంది. ఆదివారం రాత్రి అహ్మదాబాద్‌లోని నరేంద్ర మోదీ స్టేడియం వేదికగా చెన్నై సూపర్ కింగ్స్‌, గుజరాత్ టైటాన్స్‌ మధ్య జరగాల్సిన మ్యాచ్‌ వర్షం కారణంగా ఇవాళ్టికి వాయిదా పడింది. మ్యాచ్‌తోపాటు ధోనీని దగ్గరగా చూసేందుకు డగౌట్‌కు సమీపంలోని సీట్లను బుక్‌ చేసుకున్నామని, వర్షం వల్ల ఆశలు ఆవిరైనట్లు ఓ అభిమాని పెట్టిన పోస్టు వైరల్‌గా మారింది. షెడ్యూల్‌ ప్రకారం ఆదివారం రాత్రి మ్యాచ్‌ చూసిన తర్వాత ఇండోర్‌కు వెళ్లిపోవాలని ఓ బిజినెస్‌ మ్యాన్‌ నిర్ణయించుకున్నారు. కానీ, మ్యాచ్‌ వర్షార్పణం కావడం.. రిజర్వే డేకు మారినప్పటికీ పనిఒత్తిడి వల్ల ఇండోర్‌కు తప్పక వెళ్లాల్సి వచ్చిందని వాపోయారు. పూర్తి వార్త కోసం క్లిక్‌ చేయండి

29/05/2023 17:42(IST)

చంద్రుడిపైకి వెళ్లినా సీఎస్‌కే అభిమానులు ఉంటారు : ఇర్ఫాన్‌ పఠాన్‌

‘‘సీఎస్‌కేను ప్రతి జట్టూ అభిమానిస్తుంది. మరీ ముఖ్యంగా తమిళనాడు ప్రజలు ప్రారంభంలో కాస్త సమయం తీసుకున్నారు. ఒక్కసారి వారు ప్రేమించడం మొదలుపెట్టాక పూజిస్తారు. భక్తులుగా మారిపోతారు. సినీ సూపర్ స్టార్‌ రజనీకాంత్‌ను ఎంత అభిమానిస్తారో మహేంద్ర సింగ్ ధోనీని కూడా అంతే ప్రేమిస్తారు. కేవలం తమిళనాడులోనే కాదు భారత్‌ సహా ప్రపంచవ్యాప్తంగా సీఎస్‌కే ఫ్యాన్స్‌ ఉంటారు. మీరు ఎక్కడికి వెళ్లినా వారుంటారు. చంద్రమండలంలోకి వెళ్లినా (నవ్వుతూ) సీఎస్‌కే అభిమానులు ఉంటారు’’ అని టీమ్‌ఇండియా మాజీ ఆల్‌రౌండర్ ఇర్ఫాన్‌ పఠాన్‌ తెలిపాడు.

29/05/2023 17:40(IST)

ఐపీఎల్‌ ఫైనల్‌పై వైరల్‌గా మారిన ఆనంద్‌ మహీంద్రా ట్వీట్!

ఐపీఎల్‌ 16లో భాగంగా ఆదివారం చెన్నై సూపర్‌ కింగ్స్‌, గుజరాత్ టైటాన్స్ మధ్య జరగాల్సిన ఫైనల్‌ మ్యాచ్‌ వర్షం కారణంగా వాయిదా పడింది. దీంతో మ్యాచ్‌ చూసేందుకు వచ్చిన అభిమానులు తీవ్ర నిరాశకు గురయ్యారు. ఈ క్రమంలో సీఎస్‌కే, జీటీ జట్ల మధ్య జరగాల్సిన మ్యాచ్‌ గురించి సోషల్‌ మీడియాలో చర్చ మొదలైంది. ఎంతో మంది అభిమానులు తమ ఫేవరెట్‌ జట్టు, ఆటగాళ్లకు మద్దతుగా ట్వీట్లు చేస్తున్నారు. వాటిలో ప్రముఖ పారిశ్రామికవేత్త ఆనంద్ మహీంద్రా చేసిన ట్వీట్ ప్రస్తుతం సామాజిక మాధ్యమాల్లో వైరల్‌గా మారింది. రెండు టీమ్‌లలో ఏ జట్టుకు మీరు మద్దతు ప్రకటిస్తారని మహీంద్రాను అడగ్గా ఆయన చెప్పిన సమాధానం ఎంతో బావుందని నెటిజన్లు కామెంట్లు చేస్తున్నారు. ఇంతకీ మహీంద్రా ఏ జట్టుకు మద్దతు తెలిపారంటే..? పూర్తి వార్త కోసం క్లిక్‌ చేయండి

29/05/2023 17:39(IST)

ఈ గుంటూరు కుర్రాడికి ఘాటెక్కువే.. ఆటకు అంబటి రాయుడు గుడ్‌బై

గుంటూరు అతడి ఊరు.. మిర్చిలాంటి ఘాటు అతడి బ్యాటింగ్‌తోపాటు మాటల్లోనూ కనిపిస్తుంది.. ఇప్పటికే అర్థమైపోయి ఉంటుంది కదా.. తన ఆటతీరుతోనే కాకుండా మైదానం వెలుపలా దూకుడైన ప్రవర్తనతో పాపులర్‌ అయిన తెలుగు క్రికెటర్‌. ఎలాంటి విషయంలోనైనా ముక్కుసూటిగా ఉండే స్వభావం అతడి సొంతం. తాజాగా ఐపీఎల్‌ 2023 సీజన్‌ ఫైనల్‌ మ్యాచ్‌కు ఇంకాస్త సమయం ఉందనగా ఈ మెగా లీగ్‌ నుంచీ రిటైర్‌ అవుతున్నట్లు సంచలన ప్రకటన చేశాడు. అతడే ‘గుంటూరు మిర్చి’ అంబటి రాయుడు. మరి ఈ ఘాటైన ఆటగాడి గురించి ఆసక్తికర విషయాలను తెలుసుకోవడానికి క్లిక్‌ చేయండి

29/05/2023 16:31(IST)

‘ఇంపాక్ట్‌ ప్లేయర్‌ రూల్‌’ ధోనీకి వర్తించదట.. కారణం చెప్పిన సెహ్వాగ్‌!

ప్రస్తుత ఐపీఎల్ సీజన్‌ నుంచి కొత్తగా ‘ఇంపాక్ట్‌’ ప్లేయర్‌ రూల్‌ అమల్లోకి వచ్చింది. దీని ద్వారా అదనంగా బౌలర్‌/బ్యాటర్‌ను తీసుకొనే వెసులుబాటు జట్లకు లభించింది. ఈ రూల్‌తో కొందరు సీనియర్లు కేవలం బ్యాటింగ్‌కే పరిమితమైన సందర్భాలూ ఉన్నాయి. ముంబయి కెప్టెన్ రోహిత్ శర్మ, బెంగళూరు సారథి డుప్లెసిస్ కూడా ఇలాగే ‘ఇంపాక్ట్‌’గా ఆడినవారే. ఈ క్రమంలో సీఎస్‌కే కెప్టెన్‌ ధోనీ మాత్రం ఒక్కసారి కూడా ఇలా బరిలోకి దిగలేదు. అయితే, ఇదే చివరి సీజన్‌గా భావిస్తున్న తరుణంలో ‘ఇంపాక్ట్’ రూల్‌తో ధోనీ మరికొన్ని సంవత్సరాలు ఆడతాడని చెన్నై సూపర్ కింగ్స్‌ కోచ్‌ డ్వేన్ బ్రావో అభిప్రాయపడ్డాడు. కానీ, టీమ్‌ఇండియా మాజీ ఆటగాడు వీరేంద్ర సెహ్వాగ్ మాత్రం ఆ వ్యాఖ్యలను సమర్థించలేదు. ధోనీకి ఇలాంటి ఇంప్టాక్‌ రూల్ వర్తించదని పేర్కొన్నాడు. దానికిగల కారణాలనూ విశ్లేషించాడు. పూర్తి వార్త కోసం క్లిక్‌ చేయండి

29/05/2023 16:30(IST)

రిజర్వ్‌డే మ్యాచ్‌.. గత చరిత్రను ధోనీ తిరగరాస్తాడా...?

ఇండియన్‌ ప్రీమియర్‌ లీగ్‌ చరిత్రలో తొలిసారి వర్షం కారణంగా ఫైనల్‌ మ్యాచ్‌ రిజర్వ్‌ డేకు వెళ్లింది. అహ్మదాబాద్‌లోని నరేంద్రమోదీ స్టేడియం వేదికగా చెన్నై సూపర్ కింగ్స్‌ - గుజరాత్ టైటాన్స్‌ జట్ల మధ్య ఐపీఎల్ 2023 సీజన్ టైటిల్‌ పోరు ఆదివారం జరగాల్సి ఉంది. అయితే, వర్షం వల్ల నేటికి (సోమవారం) మ్యాచ్‌ వాయిదా పడింది. హార్దిక్‌ నాయకత్వంలోని గుజరాత్ వరుసగా రెండోసారి విజేతగా నిలవాలని భావిస్తుండగా.. ముంబయితో సమంగా ఐదు టైటిళ్లను గెలవాలని ధోనీ సేన ఉవ్విళ్లూరుతోంది. అయితే, రిజర్వ్‌ డే రోజున జరిగిన మ్యాచ్‌లో ధోనీకి ఎలాంటి ఫలితం వస్తుందోనని సీఎస్‌కే అభిమానులు ఆందోళన వ్యక్తం చేస్తున్నారు. పూర్తి వార్త కోసం క్లిక్‌ చేయండి

29/05/2023 16:25(IST)

అలా జరిగితే గుజరాత్‌కే ట్రోఫీ

ఆదివారం వర్ష సూచన లేకపోయినా.. మొతెరాను వరుణుడు ముంచెత్తగా, మరుసటి రోజు వర్షం పడేందుకు ఆస్కారం ఉండటం ఆందోళన రేకెత్తించేదే. సోమవారం 5 ఓవర్ల మ్యాచ్‌కూ పరిస్థితులు సహకరించకుంటే సూపర్‌ ఓవర్‌ ద్వారా విజేతను నిర్ణయిస్తారు. అదీ సాధ్యపడక మ్యాచ్‌ రద్దయితే మాత్రం గుజరాత్‌ టైటాన్స్‌నే ఐపీఎల్‌-16 ట్రోఫీ వరిస్తుంది. ఐపీఎల్‌ నియమావళి ప్రకారం ఫైనల్‌ వర్షం వల్ల రద్దయితే లీగ్‌ దశలో అత్యధిక పాయింట్లు సాధించిన జట్టునే విజేతగా ప్రకటిస్తారు. లీగ్‌ దశలో 20 పాయింట్లతో గుజరాత్‌ అగ్రస్థానంలో నిలవగా.. చెన్నై 17 పాయింట్లతో రెండో స్థానం సాధించింది. గత ఏడాదే ఐపీఎల్‌లో అరంగేట్రం చేసిన గుజరాత్‌.. తొలి సీజన్లోనే విజేతగా నిలిచిన సంగతి తెలిసిందే. సీఎస్కే 2010, 2011, 2018, 2021 సీజన్లలో టైటిల్‌ సాధించింది. ఆ జట్టు మరో ట్రోఫీ సాధిస్తే.. అత్యధికసార్లు ఐపీఎల్‌ విజేతగా నిలిచిన ముంబయి ఇండియన్స్‌ను సమం చేస్తుంది.

29/05/2023 16:23(IST)

ఓ వరుణా.. రేపు రా!

వర్షం వల్ల ఐపీఎల్‌ ఫైనల్‌ నేటికి వాయిదా
ఈ రోజూ మ్యాచ్‌కు వాన ముప్పు

ఇండియన్‌ ప్రిమియర్‌ లీగ్‌లో ఎన్నడూ చూడని చిత్రం! వర్షం వల్ల తొలిసారి ఐపీఎల్‌ ఫైనల్‌ వాయిదా పడింది. 16వ సీజన్‌ టైటిల్‌ కోసం చెన్నై సూపర్‌కింగ్స్‌, గుజరాత్‌ టైటాన్స్‌ ఆదివారం అహ్మదాబాద్‌లోని నరేంద్ర మోదీ స్టేడియంలో తలపడాల్సి ఉండగా.. భారీ వర్షం మైదానాన్ని ముంచెత్తడంతో ఫైనల్‌ను వాయిదా వేయక తప్పలేదు. రిజర్వ్‌ డే అయిన సోమవారం మ్యాచ్‌ను నిర్వహించనున్నారు. పూర్తి వార్త కోసం క్లిక్‌ చేయండి

28/05/2023 23:05(IST)

ఐపీఎల్ ఫైనల్ వాయిదా

చెన్నై సూపర్‌ కింగ్స్‌, గుజరాత్‌ టైటాన్స్‌ మధ్య జరగాల్సిన ఫైనల్‌కు వర్షం అంతరాయం కలిగించింది. దీంతో మ్యాచ్‌ను రిజర్వ్‌ డే రోజున నిర్వహించాలని నిర్ణయించారు. టాస్‌ పడకముందు నుంచే అహ్మదాబాద్‌లోని నరేంద్రమోదీ స్టేడియం పరిసర ప్రాంతాల్లో వర్షం మొదలైంది. మధ్యలో కొన్నిసార్లు వర్షం ఆగినప్పటికీ మళ్లీ విడవకుండా కురవడంతో మ్యాచ్‌ నిర్వహణ సాధ్యం కాదని తేల్చారు. రిజర్వ్‌ డేగా ఉన్న మే 29న ఫైనల్ మ్యాచ్‌ను నిర్వహిస్తామని ప్రకటించారు.

28/05/2023 21:35(IST)

తగ్గిందనుకుంటే మళ్లీ..

కొన్ని నిమిషాల క్రితం వర్షం ఆగిపోవడంతో మైదాన సిబ్బంది కవర్లను తొలగించి నీటిని బయటికి పంపించేందుకు రంగంలోకి దిగారు. అంపైర్లు గ్రౌండ్‌ని పరిశీలించేందుకు వచ్చే క్రమంలో మళ్లీ వర్షం మొదలైంది. ఒకవేళ వర్షం 10:30 గంటలలోపు తగ్గితే 15 ఓవర్ల మ్యాచ్‌ను నిర్వహిస్తారు.

28/05/2023 20:11(IST)

కట్ ఆఫ్‌ టైమ్ 12:06 AM

5 ఓవర్ల ఆటకు కట్‌ ఆఫ్‌ టైమ్ 12:06 AMగా ఖరారు చేశారు. ఆ సమయంలోపు మ్యాచ్‌ నిర్వహణ సాధ్యంకాకపోతే రిజర్వ్‌ డే రోజు (మే 29) ఫైనల్ నిర్వహిస్తారు. ఆ రోజు కూడా మ్యాచ్‌ జరగకపోతే లీగ్‌ దశలో పాయింట్ల పట్టికలో అగ్రస్థానంలో ఉన్న జట్టును ఛాంపియన్‌గా ప్రకటిస్తారు. అలా జరిగితే 14 మ్యాచ్‌ల్లో 10 విజయలు సాధించిన గుజరాత్ టైటాన్స్‌ ఛాంపియన్‌గా నిలుస్తుంది.

28/05/2023 19:56(IST)

గుడ్ న్యూస్.. రిజర్వ్‌ డే ఉంది

నరేంద్ర మోదీ స్టేడియం పరిసర ప్రాంతాల్లో వర్షం ఇంకా కురుస్తూనే ఉంది. ఒక వేళ వర్షం తగ్గకపోతే మ్యాచ్‌ పరిస్థితి ఏంటని అభిమానులు ఆందోళన వ్యక్తం చేస్తున్నారు. ఫైనల్‌కు రిజర్వ్‌ డే ఉందా లేదా అని గందరగోళానికి గురవుతున్నారు. తాజాగా వచ్చిన సమాచారం ప్రకారం.. రిజర్వ్‌ డే ఉన్నట్లు తెలుస్తోంది. వర్షం వల్ల ఇవాళ మ్యాచ్‌ నిర్వహణ సాధ్యం కాకపోతే రేపు ఫైనల్‌ను నిర్వహిస్తారు.

28/05/2023 17:19(IST)

మళ్లీ రిపీట్‌ అవుద్దా...?

గత ఐదు సీజన్లలో తొలి క్వాలిఫయర్‌లో గెలిచిన జట్టే టైటిల్‌ను సొంతం చేసుకుంది. మరి ఈసారికూడా అదే రిపీట్‌ అవుతుందా..? లేదా..? గుజరాత్ టైటాన్స్‌పై చెన్నై సూపర్‌ కింగ్స్‌ తొలి క్వాలిఫయర్‌లో గెలిచి ఫైనల్‌కు చేరింది. అదే సంప్రదాయాన్ని కొనసాగించి టైటిల్‌ను సీఎస్కే గెలుస్తుందో లేదో వేచి చూడాలి.

28/05/2023 17:01(IST)

‘నేను గుజరాతి బిడ్డను.. అయినా నా మనసు చెన్నై గెలవాలనుకుంటోంది’

ఐపీఎల్-16 సీజన్‌ చివరి అంకానికి చేరుకుంది. ఆదివారమే ఫైనల్. ఈ టైటిల్‌ పోరులో డిఫెండింగ్ ఛాంపియన్‌ గుజరాత్ టైటాన్స్‌, చెన్నై సూపర్‌ కింగ్స్‌ తలపడనున్నాయి. రెండూ బలమైన జట్లే కావడంతో ఫైనల్‌ రసవత్తరంగా సాగడం ఖాయంగా కనిపిస్తోంది. చెన్నైని ఓడించి గుజరాత్ వరుసగా రెండో ఏడాది టైటిల్‌ ఎగరేసుకుపోతుందా? లేక ధోనీ తన వ్యూహాలతో సీఎస్కేకు ఐదో కప్‌ను అందిస్తాడా? అనే దానిపై అభిమానుల్లో ఆసక్తి నెలకొంది. ఈ నేపథ్యంలో భారత మాజీ ఆల్‌రౌండర్ ఇర్ఫాన్‌ పఠాన్ ఏ జట్టు ఛాంపియన్‌గా నిలుస్తుందనే దానిపై తన అభిప్రాయాన్ని వ్యక్తం చేశాడు. గుజరాత్, చెన్నై జట్లలో ఏ జట్టుని ఎంపిక చేసుకోవాలనే విషయంలో చాలా గందరగోళానికి గురయ్యానని పేర్కొన్నాడు. కొన్ని కారణాల వల్ల ఐపీఎల్ ఫైనల్ మ్యాచ్ తనకు ఎమోషనల్ అని పఠాన్ చెప్పాడు. ఆటగాడిగా ధోనీకిదే ఆఖరి ఐపీఎల్‌ అని వార్తలు వస్తున్నందున ఈ సీజన్‌లో చెన్నై విజేతగా నిలవాలని కోరుకుంటున్నట్లు ఇర్ఫాన్ పఠాన్ చెప్పాడు. పూర్తి వార్త కోసం క్లిక్ చేయండి

28/05/2023 16:57(IST)

ఐపీఎల్‌లో చరిత్ర సృష్టించనున్న ధోనీ

ఐపీఎల్-16 సీజన్‌ ఫైనల్‌లో చెన్నై సూపర్‌ కింగ్స్‌, గుజరాత్ టైటాన్స్‌ తలపడనున్నాయి. ఈ టైటిల్‌ పోరుకు అహ్మదాబాద్‌లోని నరేంద్ర మోదీ స్టేడియం ఆతిథ్యం ఇవ్వనుంది. ఈ మ్యాచ్‌లో చెన్నై సూపర్‌ కింగ్స్‌ కెప్టెన్ ఎంఎస్ ధోనీ ఐపీఎల్‌ చరిత్రలోనే సరికొత్త రికార్డు సృష్టించనున్నాడు. గుజరాత్‌తో ఫైనల్‌లో ఆడటం ద్వారా ఐపీఎల్‌లో 250 మ్యాచ్‌లు పూర్తి చేసుకున్న తొలి ఆటగాడిగా ధోనీ రికార్డుల్లోకెక్కనున్నాడు. పూర్తి వార్త కోసం క్లిక్‌ చేయండి

28/05/2023 16:54(IST)

‘ధోనీ అంటే కేవలం లీడర్‌ మాత్రమే కాదు.. ఓ ఎమోషన్‌’

ఐపీఎల్‌ ఫైనల్‌ నేడే. ఐదోసారి టైటిల్‌పై కన్నేసిన చెన్నై.. గుజరాత్‌తో తలపడనుంది. ఈసారి విజేతగా నిలిచి.. ముంబయి రికార్డును సమం చేయాలని అభిమానులు కోరుకుంటున్నారు. మరోవైపు సీఎస్కే సారథి ధోనీకిదే చివరి సీజన్‌ అంటూ ప్రచారం జరుగుతోన్న నేపథ్యంలో.. అభిమానులు తమదైన శైలిలో ప్రత్యేక సందేశాలు పెడుతున్నారు. పూర్తి వార్త కోసం క్లిక్‌ చేయండి

28/05/2023 16:51(IST)

‘థ్యాంక్యూ’ చెపాక్‌

ఐపీఎల్‌ టైటిల్‌ కోసం గుజరాత్ టైటాన్స్‌తో తలపడేందుకు చెన్నై సూపర్‌ కింగ్స్‌ అహ్మదాబాద్‌ వేదికగా సిద్ధమైంది. ఈ సీజన్‌లో చెన్నైలోని చెపాక్‌ వేదికగా సీఎస్‌కే తొలి క్వాలిఫయర్‌ ఆడిన విషయం తెలిసిందే. గుజరాత్‌ను ఓడించి మరీ ఫైనల్‌కు వచ్చింది. ఈ క్రమంలో చెపాక్‌ వేదికకు ‘థ్యాంక్యూ’ అంటూ చెన్నై ఆటగాళ్లు చెబుతున్న వీడియోను సీఎస్‌కే తన యూట్యూబ్‌లో పోస్టు చేసింది.

28/05/2023 16:46(IST)

ఈసారి మా గేమ్‌ ప్లాన్‌ మాత్రం అలా ఉండదు: చెన్నై సూపర్ కింగ్స్‌ కోచ్‌

ఇండియన్‌ ప్రీమియర్ లీగ్ సీజన్‌ విజేతను తేల్చే పోరు కోసం చెన్నైసూపర్ కింగ్స్‌, గుజరాత్ టైటాన్స్‌ సిద్ధమవుతున్నాయి. సీఎస్‌కే జట్టులో ధోనీ ప్రధాన ఆకర్షణ కాగా.. గుజరాత్‌లో మాత్రం సెంచరీల హీరో శుభ్‌మన్‌ గిల్‌దే హవా. అతడిని అడ్డుకోవడంపైనే సీఎస్‌కే విజయావకాశాలు ఎక్కువగా ఉంటాయి. ఈ క్రమంలో సీఎస్‌కే ప్రధాన కోచ్‌ స్టీఫెన్‌ ఫ్లెమింగ్‌ తమ జట్టు సన్నద్ధతపై కీలక వ్యాఖ్యలు చేశాడు. గతంలో కంటే ఇప్పుడు తమ ప్రిపరేషన్‌ మరింత ఉత్తమంగా ఉందని పేర్కొన్నాడు. సాధారణంగా తమ గెలుపు - ఓటముల నిష్పత్తి 50 శాతంగా ఉందని తెలిపాడు. పూర్తి వార్త కోసం క్లిక్‌ చేయండి

28/05/2023 16:43(IST)

‘కోహ్లీ, రోహిత్‌ జట్లపై సెంచరీలు.. ఇప్పుడు ధోనీ వంతు’

ప్రస్తుత ఐపీఎల్‌ సీజన్‌లో మంచి ఫామ్‌లో ఉన్న బ్యాటర్ శుభ్‌మన్‌ గిల్. గుజరాత్ ఫైనల్‌కు చేరుకోవడంలో కీలక పాత్ర పోషించాడు. లీగ్ స్టేజ్‌లో బెంగళూరుపై, రెండో క్వాలిఫయర్‌లో ముంబయి ఇండియన్స్‌పై అదిరిపోయే శతకాలు సాధించాడు. ఇప్పుడు చెన్నై సూపర్ కింగ్స్‌తో ఫైనల్‌లోనూ కీలక ఇన్నింగ్స్‌ ఆడాలని గుజరాత్ అభిమానులు ఆశిస్తున్నారు. ప్రస్తుతం 851 పరుగులతో ఆరెంజ్‌ క్యాప్ (అత్యధిక పరుగులు చేసిన బ్యాటర్) రేసులో అందరికంటే ముందున్నాడు. ఈ క్రమంలో టీమ్‌ఇండియా మాజీ పేసర్ అతుల్ వాసన్‌ కీలక వ్యాఖ్యలు చేశాడు. విరాట్ కోహ్లీ, రోహిత్ శర్మ జట్లపై సెంచరీలతో చెలరేగిన గిల్ ఫైనల్‌లో చెన్నై జట్టు మీదా రాణిస్తాడని పేర్కొన్నాడు. సీఎస్‌కే ఐదో టైటిల్‌ కలకు అడ్డంకిగా మారే అవకాశం లేకపోలేదని తెలిపాడు.

28/05/2023 16:41(IST)

ధోనీ నుంచి అక్షింతలు పడ్డాయి.. అభినందనలూ వచ్చాయి: దీపక్ చాహర్‌

చెన్నై సూపర్ కింగ్స్‌ జట్టులో సీనియర్‌ పేసర్‌ దీపక్ చాహర్. ఐదేళ్ల నుంచి సీఎస్‌కేతో ఉంటున్న చాహర్‌కు 2019 సీజన్‌ మాత్రం ఎప్పటికీ మరువలేనిది. ఆ ఏడాది జరిగిన ఐపీఎల్‌ టోర్నీలో 17 మ్యాచుల్లో 22 వికెట్లు తీసి ఉత్తమ ప్రదర్శన ఇచ్చాడు. అయితే, అదే సీజన్‌లో పంజాబ్‌ కింగ్స్‌తో జరిగిన మ్యాచ్‌లో డెత్‌ ఓవర్‌ వేసే సందర్భంగా కెప్టెన్ ధోనీ ఆగ్రహానికి గురైనప్పటికీ.. అద్భుతంగా బంతులను సంధించడంతో అభినందనలూ అందుకున్నట్లు దీపక్ చాహర్‌ తెలిపాడు. డ్వేన్ బ్రావో గాయపడటంతో తొలిసారి డెత్‌ ఓవర్లలో బౌలింగ్‌ చేసే అవకాశం వచ్చిందని గుర్తు చేసుకున్నాడు. పూర్తి వార్త కోసం క్లిక్‌ చేయండి

28/05/2023 16:37(IST)

గుజరాత్ vs చెన్నై ఫైనల్‌ మ్యాచ్‌.. ఈ రికార్డులు నమోదయ్యేనా..?

ఇంటర్నెట్ డెస్క్: ఇండియన్ ప్రీమియర్‌ లీగ్ 2023 సీజన్‌ ఫైనల్‌కు అహ్మదాబాద్‌ వేదిక. గుజరాత్ టైటాన్స్‌- చెన్నై సూపర్‌ కింగ్స్‌ జట్ల మధ్య టైటిల్ పోరు. నేడు రాత్రి 7.30 గంటలకు అసలైన సమరం ప్రారంభం కానుంది. వరుసగా రెండో ఏడాది టైటిల్‌ను పట్టేయాలని గుజరాత్ ఆశిస్తోంది. మరోవైపు ఐదో కప్‌ను ఖాతాలో వేసుకోవాలని చెన్నై ఆశిస్తోంది. ఈ క్రమంలో కొన్ని రికార్డులు నమోదయ్యే అవకాశం ఉంది. మరి అవేంటో తెలుసుకుందాం. పూర్తి కథనం కోసం క్లిక్ చేయండి

28/05/2023 16:35(IST)

ఆ ఆలోచన గిల్‌క్రిస్ట్‌ది: గావస్కర్‌

మొత్తం మీద లీగ్‌ దశలో తొలి రెండు స్థానాల్లో నిలిచిన జట్లు ఇప్పుడు ట్రోఫీపై కన్నేశాయి. రెండు జట్లు కూడా ప్లేఆఫ్స్‌లో మంచి విజయాలతో ఫైనల్‌కు చేరుకున్నాయి. క్వాలిఫయర్స్‌, ఎలిమినేటర్‌ నిర్వహించడం ద్వారా.. లీగ్‌ దశలో నంబర్‌వన్‌, నంబర్‌-2 జట్లకు అదనపు లబ్ధి చేకూర్చాలన్న ఆలోచన గిల్‌క్రిస్ట్‌ది. అప్పుడు నేను ఐపీఎల్‌ పాలవకవర్గంలో ఉన్నా. పోటీని మరింత ఆసక్తిగా మలచడానికి ఏం చేయాలో సూచించాలంటూ ఫ్రాంఛైజీల కెప్టెన్లందరికీ లేఖలు రాశా. ఎనిమిది మందిలో అయిదుగురు జవాబిచ్చారు. అందులో గిల్‌క్రిస్ట్‌ చేసిన ప్రతిపాదనను అంగీకరించి, 2011 సీజన్‌ నుంచి అమలు చేశారు. పూర్తి వార్త కోసం క్లిక్‌ చేయండి

28/05/2023 16:31(IST)

ఆ మార్పులు కలిసొచ్చాయి: గిల్‌

ఈ ఏడాది సూపర్‌ ఫామ్‌లో ఉన్న యువ ఓపెనర్‌ శుభ్‌మన్‌ గిల్‌.. అటు అంతర్జాతీయ క్రికెట్లో, ఇటు ఐపీఎల్‌లో పరుగుల వరద పారిస్తున్నాడు. ఇప్పటికే 16వ సీజన్‌లో మూడు శతకాలు సహా 851 పరుగులు చేసి ‘ఆరెంజ్‌ క్యాప్‌’ ఖాయం చేసుకున్నాడు. గుజరాత్‌ టైటాన్స్‌ వరుసగా రెండో సారి ఫైనల్‌ చేరడంలో అతనిదే కీలక పాత్ర. క్వాలిఫయర్‌-2లో ముంబయిపై 60 బంతుల్లోనే 129 పరుగులు చేసిన గిల్‌.. టీ20 ప్రపంచకప్‌ తర్వాత న్యూజిలాండ్‌తో సిరీస్‌కు ముందు తన ఆటలో టెక్నిక్‌ పరంగా కొన్ని మార్పులు, చిన్న సర్దుబాటు చేసుకోవడం కలిసొచ్చిందని వెల్లడించాడు. పూర్తి వార్త కోసం క్లిక్‌ చేయండి

28/05/2023 16:17(IST)

టాప్‌-3 వికెట్ల వీరులు గుజరాత్‌ బౌలర్లే

ఈ సీజన్లో టాప్‌-3 వికెట్ల వీరులు గుజరాత్‌ బౌలర్లే. షమి (28), రషీద్‌ (27), మోహిత్‌ (24) తొలి మూడు స్థానాల్లో ఉన్నారు. షమి మరో అయిదు వికెట్లు పడగొడితే.. ఒక సీజన్లో అత్యధిక వికెట్లు తీసిన బౌలర్‌గా డ్వేన్‌ బ్రావో, హర్షల్‌ పటేల్‌ (32)ల పేరిట ఉమ్మడిగా ఉన్న రికార్డును బద్దలు కొడతాడు.

28/05/2023 16:16(IST)

విజేతకు రూ.20 కోట్లు

ఐపీఎల్‌- 16 విజేత జట్టు రూ.20 కోట్లు నగదు బహుమతిగా పొందనుంది. రన్నరప్‌ జట్టు రూ.13 కోట్లు ఖాతాలో వేసుకుంటుంది. ఈ సారి మొత్తం రూ.46.5 కోట్లను నగదు బహుమతిగా అందజేయనున్నారు. మూడు, నాలుగు స్థానాల్లో నిలిచిన జట్లు వరుసగా రూ.7 కోట్లు, రూ.6.5 కోట్లు దక్కించుకుంటాయి. అత్యధిక పరుగులు చేసే బ్యాటర్‌కు, అత్యధిక వికెట్లు తీసే బౌలర్‌కు రూ.15 లక్షల చొప్పున అందిస్తారు. టోర్నీ వర్థమాన ఆటగాడికి రూ.20 లక్షలు, అత్యంత విలువైన ఆటగాడికి రూ.12 లక్షలు ఇవ్వనున్నారు.

28/05/2023 16:15(IST)

ఇంపాక్ట్‌.. వీళ్లే

ఈ సీజన్లో ప్రవేశ పెట్టిన ‘ఇంపాక్ట్‌ ప్లేయర్‌’ సౌలభ్యాన్ని గుజరాత్‌, చెన్నై జట్లు బాగానే ఉపయోగించుకున్నాయి. వేరే జట్లు అవసరాన్ని బట్టి ఇంపాక్ట్‌ ప్లేయర్లను మారుస్తున్నాయి కానీ.. కొన్ని మ్యాచ్‌లుగా ఈ రెండు జట్లు ఇద్దరినే ఉపయోగించుకున్నాయి. చెన్నై మొదట బ్యాటింగ్‌ చేస్తే దూబెను తుది జట్టులోకి తీసుకుని.. బౌలింగ్‌లో పతిరనను ఇంపాక్ట్‌ ప్లేయర్‌గా ఉపయోగించుకుంటోంది. మొదట బౌలింగ్‌ చేస్తే పతిరనను తుది జట్టులో ఆడించి.. తర్వాత దూబెను ఇంపాక్ట్‌ ప్లేయర్‌గా తీసుకుంటోంది. గుజరాత్‌ శుభ్‌మన్‌, జోష్‌ లిటిల్‌లను ఇలాగే ఆడిస్తోంది. ఫైనల్లో కూడా రెండు జట్లూ ఇదే కొనసాగించవచ్చు.

28/05/2023 16:15(IST)

వాళ్లొకటి.. వీళ్లొకటి.. మరి ఇది?

ఈ సీజన్‌ ఆరంభ పోరులో తలపడ్డ చెన్నై, గుజరాత్‌లే ఫైనల్లోనూ తలపడుతుండటం విశేషం. అహ్మదాబాద్‌లో ఆరంభ పోరులో గుజరాత్‌ 5 వికెట్ల తేడాతో నెగ్గింది. అయితే చెన్నైలో గుజరాత్‌తో జరిగిన క్వాలిఫయర్‌-1లో సీఎస్‌కే 15 పరుగుల తేడాతో గెలిచి ప్రతీకారం తీర్చుకుంది. ఇప్పుడు ఫైనల్లో ఎవరిది పైచేయి అవుతుందో చూడాలి. అహ్మదాబాద్‌లో ఆడిన మూడు మ్యాచ్‌ల్లోనూ ఓడటం చెన్నైకి ప్రతికూలాంశం.

28/05/2023 16:13(IST)

ఆ ముగ్గురు × ఈ ముగ్గురు

ఈ సీజన్లో సమష్టిగా, నిలకడగా రాణిస్తున్న బ్యాటింగ్‌ విభాగం చెన్నైది అయితే.. బౌలింగ్‌లో అదే శైలిని అనుసరిస్తున్నది గుజరాత్‌. చెన్నై ఏ ఒక్కరి మీదో ఆధారపడలేదు. ఓపెనర్లు కాన్వే, రుతురాజ్‌ ఆ జట్టుకు అద్భుత ఆరంభాలనిస్తే.. రహానె కొన్ని మ్యాచ్‌ల్లో, శివమ్‌ దూబె మరి కొన్ని మ్యాచ్‌ల్లో మెరుపులు మెరిపించారు. రాయుడు, జడేజా, ధోని అప్పుడప్పుడూ కాస్త మెరిశారు. ప్రధానంగా బ్యాటింగ్‌లో చెన్నైకి కాన్వే, రుతురాజ్‌, దూబెలే బలంగా నిలిచారు. ఫైనల్‌ ముంగిట వీరి మీదే అందరి దృష్టీ నిలిచి ఉంది. అటు గుజరాత్‌ బౌలింగ్‌ విభాగంలో టోర్నీలోనే అత్యుత్తమంగా నిలుస్తోంది. టోర్నీలో టాప్‌-3 వికెట్ల వీరులు ఆ జట్టులోని షమి, రషీద్‌, మోహిత్‌లే. ఈ ముగ్గురూ ఒకరితో ఒకరు పోటీ పడి వికెట్లు పడగొడుతున్నారు. షమి ఆరంభంలో వికెట్లు తీసి ప్రత్యర్థులను దెబ్బ కొడుతుంటే.. మధ్య ఓవర్లలో రషీద్‌ చూసుకుంటున్నాడు. చివరి ఓవర్లలో మోహిత్‌ హవా సాగుతోంది. ముంబయితో క్వాలిఫయర్‌-2లో కూడా సరిగ్గా ఇలాగే జరిగింది. ఆ జట్టులో నూర్‌ అహ్మద్‌, జోష్‌ లిటిల్‌ కూడా అవసరానికి బాగానే ఉపయోగపడుతున్నారు. ఫైనల్లో చెన్నై బ్యాటర్లకు, గుజరాత్‌ బౌలర్లకు ఆసక్తికర పోరు ఖాయం.

28/05/2023 16:08(IST)

మహి మళ్లీ కనిపించడా?

ఇంకో 40 రోజుల్లోనే 42వ పుట్టిన రోజు జరుపుకోనున్న ధోని.. ఇంకా ఐపీఎల్‌లో కొనసాగుతుండటం ఆశ్చర్యమే. కానీ కష్టం మీద ఫిట్‌నెస్‌ను, అభిమానుల ఆకాంక్షలను నిలబెడుతూ లీగ్‌లో కొనసాగుతూ వచ్చాడు. కానీ మోకాలి నొప్పి, వయసు రీత్యా మహి ఈ సీజన్‌తోనే ఐపీఎల్‌తో పాటు మొత్తంగా క్రికెట్‌కు టాటా చెప్పేస్తాడన్న ఆంచనాలున్నాయి. ధోని కూడా ఈ దిశగా సంకేతాలు ఇవ్వడంతో ఈ సీజన్‌ అంతా తన రిటైర్మెంట్‌ గురించి చర్చ జరిగింది. కానీ మహి ఇంకో సీజన్‌ ఆడాలని అభిమానులతో పాటు చెన్నై ఫ్రాంఛైజీ కోరుకుంటోంది. మరి మహి మనసులో ఏముందో చూడాలి. రిటైర్మెంట్‌ నిర్ణయం తీసుకునేట్లయితే మాత్రం మహిని చివరగా ఆటగాడిగా చూసేది ఆదివారమే.

28/05/2023 16:08(IST)

అతణ్ని ఆపేదెవరు?

గుజరాత్‌ అగ్రస్థానంతో గ్రూప్‌ దశను ముగించి.. క్వాలిఫయర్‌-2లో అలవోకగా ముంబయిని ఓడించి ఫైనల్‌ చేరిందంటే బ్యాటింగ్‌లో శుభ్‌మన్‌ గిల్‌ మెరుపులే ప్రధాన కారణం. 16 మ్యాచ్‌ల్లో అతను ఏకంగా 851 పరుగులు బాదేశాడు. జట్టులో అతడి తర్వాతి స్కోరర్‌ 325 చేసిన హార్దిక్‌ పాండ్యనే అంటే.. గుజరాత్‌ బ్యాటింగ్‌ను అతనెలా ముందుకు నడిపిస్తున్నాడో అర్థం చేసుకోవచ్చు. జట్టులో మరే బ్యాటర్‌ నిలకడగా ఆడట్లేదు. కానీ ఒక వైపు గిల్‌ మాత్రం నిలబడిపోతున్నాడు. హార్దిక్‌, సాహా, మిల్లర్‌, విజయ్‌ శంకర్‌, సాయి సుదర్శన్‌.. ఇలా ఎవరో ఒకరు అతడికి సహకారం అందిస్తున్నారు. అలా గుజరాత్‌ భారీ స్కోర్లు సాధిస్తోంది. లక్ష్యాల్ని ఛేదిస్తోంది. ముంబయితో క్వాలిఫయర్‌-2లో ఉగ్రరూపం దాల్చి అద్భుత శతకం బాదిన గిల్‌.. మ్యాచ్‌ను ఏకపక్షం చేసేశాడు. నాలుగు మ్యాచ్‌ల్లో మూడు శతకాలతో 2016లో కోహ్లిని గుర్తుకు తెచ్చాడతను. ప్రస్తుత ఫామ్‌లో శుభ్‌మన్‌ను ఆపడం చెన్నై బౌలర్లకు సవాలే. మలింగను పోలిన బౌలింగ్‌ యాక్షన్‌తో బంతులేసే పతిరనపై సీఎస్‌కే ఆశలు పెట్టుకుని ఉండొచ్చు. అతడితో పాటు దీపక్‌ చాహర్‌, తుషార్‌ దేశ్‌పాండే, తీక్షణ, జడేజా.. శుభ్‌మన్‌ను ఎంతమేర పరీక్షించగలరో చూడాలి. కానీ తిరుగులేని టెక్నిక్‌, దానికి తోడు ఎంతో ఓపిక ఉన్న శుభ్‌మన్‌.. చెన్నై మీదా తన ఆధిపత్యాన్ని కొనసాగిస్తాడని గుజరాత్‌ ఆశిస్తోంది. అతణ్ని త్వరగా పెవిలియన్‌ చేరిస్తే.. చెన్నై పైచేయి సాధించినట్లే.

28/05/2023 16:08(IST)

అంతిమ పోరుకు అంతా సిద్ధం

ఐపీఎల్‌-16లో ఆసక్తికర అంతిమ పోరుకు అంతా సిద్ధం. గ్రూప్‌ దశలో ఉత్తమ ప్రదర్శనతో టాప్‌-2లో నిలిచిన రెండు జట్ల మధ్యనే ఆదివారం టైటిల్‌ పోరు జరగబోతోంది. నాలుగుసార్లు ఛాంపియన్‌ చెన్నై.. నిరుడు ఐపీఎల్‌లో అడుగు పెట్టగానే విజేతగా నిలిచిన గుజరాత్‌ అమీతుమీ తేల్చుకోబోతున్నాయి. సమష్టితత్వాన్ని నమ్ముకుని, నిలకడగా విజయాలు సాధిస్తూ ఫైనల్‌ వరకు వచ్చిన ఈ రెండు జట్లూ అదే ఒరవడితో కప్పు నెగ్గాలన్న పట్టుదలతో కనిపిస్తున్నాయి. చెన్నైకి ధోని, గుజరాత్‌కు హార్దిక్‌ రూపంలో ప్రశాంతంగా పని చేసుకుపోయే కెప్టెన్లున్నారు. మొత్తంగా చూస్తే బలాబలాల్లో రెండు జట్లూ సమవుజ్జీల్లా కనిపిస్తుండగా.. బౌలింగ్‌లో గుజరాత్‌, బ్యాటింగ్‌లో చెన్నై కొంచెం పైచేయిలో ఉన్నాయి. తమకు మంచి రికార్డున్న, చెన్నైకి చేదు జ్ఞాపకాలున్న అహ్మదాబాద్‌లో మ్యాచ్‌ జరుగతుండటం గుజరాత్‌కు కలిసొచ్చే అంశం. కానీ ధోని నాయకత్వం, సుడి కలిసొస్తే అయిదో కప్పు తమ సొంతం అవుతుందని చెన్నై భావిస్తోంది.

28/05/2023 16:06(IST)

పదహారు పట్టేదెవరో!

కొన్ని జట్లు పాత కథనే పునరావృతం చేస్తూ ముందే రేసు నుంచి తప్పుకొన్నాయి.. కొన్ని ఆశాజనకంగా సీజన్‌ను ఆరంభించి మధ్యలో గాడితప్పాయి.. కొన్ని జట్లు చివరి దశలో చేతులెత్తేశాయి. నిలకడ లేని.. కూర్పు కుదరని.. అదృష్టాన్ని నమ్ముకున్న జట్ల కథ కంచికి చేరింది. సీజన్లో అత్యంత నిలకడగా ఆడుతూ.. ఉత్తమంగా కనిపించిన రెండు జట్లే తుది పోరుకు అర్హత సాధించాయి. ఈసారి ఐపీఎల్‌ ట్రోఫీని అందుకోవడానికి గుజరాత్‌, చెన్నైల్లో ఓ జట్టే అర్హమైందని ఎవ్వరైనా అంగీకరించాల్సిందే! స్టార్‌ కళ కంటే.. సమష్టితత్వాన్ని నమ్ముకుని ముందుకు సాగిన ఈ రెండు జట్ల మధ్య ఆసక్తికర సమరానికి రంగం సిద్ధం. మరి అత్యధిక టైటిళ్ల ముంబయి రికార్డును చెన్నై సమం చేస్తుందా? వరుసగా రెండో సీజన్లోనూ విజేతగా నిలిచి గుజరాత్‌ తన ఆధిపత్యాన్ని చాటుతుందా?పూర్తి వార్త కోసం క్లిక్‌ చేయండి

App

IPL Final: చెన్నైదే టైటిల్.. ప్లేయర్‌ ఆఫ్‌ ది మ్యాచ్‌గా కాన్వే

తాజా వార్తలు (Latest News)

Game Changer: అందుకే షూటింగ్‌ వాయిదా.. రూమర్స్‌పై ‘గేమ్‌ ఛేంజర్‌’ టీమ్‌

TOEFL: విదేశాల్లో సెకండరీ ఎడ్యుకేషన్‌పై.. భారతీయుల మొగ్గు!

India vs Australia: ఆసీస్‌ బౌలర్లను ఆటాడుకున్నారు.. కంగారూల ఎదుట భారీ లక్ష్యం

Kangana Ranaut: మహేశ్‌ బాబు సినిమాలో నటించలేదన్న బాధ ఉంది: కంగనా రనౌత్‌

Chandrababu Arrest: అక్టోబరు 5వరకు చంద్రబాబు రిమాండ్‌ పొడిగించిన ఏసీబీ కోర్టు

Ukraine : యుద్ధం ముగిసిన వెంటనే అమెరికా నుంచి ఉక్రెయిన్‌కు పెట్టుబడులు : జెలెన్‌ స్కీ

సుఖీభవ

చదువు