Feedback | E-PAPER | Pratibha

IND vs NZ: భారత్‌ ఉత్కంఠ విజయం.. ఈ రోజు కొత్త ‘స్కై’ని చూశారు: సూర్యకుమార్‌

ఉత్కంఠభరితంగా సాగిన రెండో టీ20 మ్యాచ్‌లో కివీస్‌పై భారత్‌ 6 వికెట్ల తేడాతో విజయం సాధించింది. తొలుత బ్యాటింగ్‌ చేసిన కివీస్‌ 99/8 స్కోరు చేయగా.. అనంతరం టీమ్‌ఇండియా 19.5 ఓవర్లలో నాలుగు వికెట్లను కోల్పోయి 101 పరుగులు చేసి గెలిచింది. చివరల్లో సూర్యకుమార్ యాదవ్ (26*) కీలక ఇన్నింగ్స్‌తో భారత్‌ను విజయతీరాలకు చేర్చాడు. దీంతో మూడు టీ20ల సిరీస్‌లో భారత్‌ రేసులోకి వచ్చింది. కివీస్‌తో కలిసి 1-1తో సమంగా నిలిచింది.

Updated : 30 Jan 2023 00:07 IST

29/01/2023 23:58(IST)

ఈ రోజు కొత్త ‘స్కై’ని చూశారు: సూర్యకుమార్‌

ఈ రోజు కొత్త ‘స్కై’ని చూశారు. ఇలాంటి లక్ష్యాన్ని సాధించే క్రమంలో పరిస్థితులకు తగ్గట్టు ఆడటమే ముఖ్యం. వాషింగ్టన్‌ సుందర్‌ రనౌట్‌ కావడంలో నాదే తప్పు. ఈ పిచ్‌ సవాల్‌గా మారింది. రెండో ఇన్నింగ్స్‌లో బంతి బాగా టర్న్‌ అయింది. దీన్ని ఎవరూ ఊహించలేదు.

29/01/2023 23:26(IST)

పిచ్‌ షాక్‌కు గురిచేసింది: హార్దిక్‌ పాండ్య

ఎట్టి పరిస్థితుల్లోనూ మ్యాచ్‌ గెలుస్తామని నాకు నమ్మకం ఉంది. అయితే అది కాస్త ఆలస్యం అయింది. ఇలాంటి ముఖ్యమైన మ్యాచ్‌ల్లో భయపడాల్సిన అవసరం లేదు. ఒత్తిడిని తట్టుకునేందుకు స్ట్రైక్‌ రోటెట్‌ చేయడం ఉత్తమం. ఈ రోజు మ్యాచ్‌లో మీము అలాగే చేశాం. బేసిక్స్‌ను అనుసరించాం. నిజాయితీగా చెప్పాలంటే ఈ పిచ్‌ మమ్మల్ని షాక్‌కు గురిచేసింది. ఇది టీ20లకు సరిపోదు అని మ్యాచ్‌ అనంతరం హార్దిక్‌ పాండ్య అన్నాడు.

29/01/2023 23:09(IST)

ఫిబ్రవరి 1న విజేతను తేల్చే మ్యాచ్‌

రెండో మ్యాచ్‌లో భారత్‌ విజయం సాధించడంతో 1-1తో ఇరుజట్లు సమంగా నిలిచాయి. ఇక మూడో మ్యాచ్‌తో సిరీస్‌ ఫలితం తేలనుంది. ఫిబ్రవరి 1న చివరి మ్యాచ్‌ జరగనుంది. అహ్మదాబాద్‌లోని నరేంద్రమోదీ స్టేడియం ఇందుకు వేదిక కానుంది.

29/01/2023 22:33(IST)

భారత్‌ విజయం

స్వల్ప లక్ష్య ఛేదన కోసం చివరి ఓవర్‌ వరకూ సాగిన మ్యాచ్‌లో న్యూజిలాండ్‌పై భారత్‌ ఆరు వికెట్ల తేడాతో విజయం సాధించింది. చివరి ఓవర్‌లో 6 పరుగులు అవసరం కాగా.. టిక్నెర్‌ వేసిన ఇన్నింగ్స్‌ 20వ ఓవర్‌ మొదటి నాలుగు బంతులకు మూడు పరుగులే వచ్చాయి. దీంతో విజయ సమీకరణం 2 బంతుల్లో 3 పరుగులకు చేరిది. అభిమానుల్లో ఉత్కంఠ పెరిగిపోయింది. అయితే ఐదో బంతికి సూర్యకుమార్‌ యాదవ్ (26*) బౌండరీ బాదేసి టీమ్‌ఇండియాను విజయతీరాలకు చేర్చాడు. మరో వైపు కెప్టెన్‌ హార్దిక్‌ పాండ్య (15*) కీలక పరుగులు చేశాడు.

29/01/2023 22:23(IST)

6 బంతుల్లో 6

19 ఓవర్లు: ఫెర్గూసన్ వేసిన తొలి నాలుగు బంతులకు సింగిల్‌ మాత్రమే రావడంతో భారత అభిమానుల్లో కంగారు మొదలైంది. అయితే ఐదో బంతిని పాండ్య (13*) ఫోర్ కొట్టాడు. చివరి బంతికి మరో పరుగు వచ్చింది. దీంతో భారత్‌ స్కోరు 94/4కి చేరింది. చివరి ఓవర్‌లో భారత్‌ విజయానికి ఆరు పరుగులు కావాలి.

29/01/2023 22:03(IST)

సుందర్‌ రనౌట్‌

కీలక సమయంలో వాషింగ్టన్ సుందర్‌ (10) రనౌట్‌గా పెవిలియన్‌కు చేరాడు. గ్లెన్ ఫిలిప్స్‌ బౌలింగ్‌లో (14.3వ ఓవర్‌) సూర్యకుమార్‌ యాదవ్‌ (13*) పరుగు కోసం వచ్చేయడంతో సుందర్‌ క్రీజ్‌ను వదిలి రావాల్సి వచ్చింది. దీంతో 70 పరుగుల వద్ద భారత్‌ నాలుగో వికెట్‌ను నష్టపోయింది. ప్రస్తుతం టీమ్‌ఇండియా స్కోరు 73/4. క్రీజ్‌లో సూర్యతోపాటు హార్దిక్‌ పాండ్య (1*) ఉన్నాడు. చివరి ఐదు ఓవర్లలో భారత్‌ విజయానికి 27 పరుగులు కావాలి.

29/01/2023 21:55(IST)

స్కోరు బోర్డు వడివడిగా..

13 ఓవర్లు: భారత బ్యాటర్లు సూర్యకుమార్‌ (10*), వాషింగ్టన్ సుందర్ (6*) స్కోరు బోర్డును వడివడిగా నడిపిస్తున్నారు. సోధి వేసిన ఈ ఓవర్‌లో తొమ్మిది పరుగులు వచ్చాయి. దీంతో భారత్‌ స్కోరు 66/3కి చేరింది. చివరి 7 ఓవర్లలో 34 పరుగులు చేస్తే భారత్‌దే విజయం.

29/01/2023 21:45(IST)

రాహుల్‌ ఔట్

బ్యాటింగ్‌కు అగ్నిపరీక్షగా మారిన పిచ్‌పై కివీస్‌ బౌలర్లకు రాహుల్‌ త్రిపాఠి (13) దొరికిపోయాడు. దీంతో 50 పరుగుల వద్ద భారత్‌ మూడో వికెట్‌ను కోల్పోయింది. ప్రస్తుతం 11 ఓవర్లు ముగిసేసరికి టీమ్‌ఇండియా స్కోరు 51/3. క్రీజ్‌లో సూర్యకుమార్‌, వాషింగ్టన్ సుందర్ ఉన్నారు.

29/01/2023 21:40(IST)

భారత్ 10 ఓవర్లకు 49/2

బౌలింగ్‌కు అనుకూలంగా ఉన్న లఖ్‌నవూ మైదానంలో మ్యాచ్ రసవత్తరంగా సాగుతోంది. వంద పరుగుల లక్ష్యంతో బరిలోకి దిగిన టీమ్‌ఇండియా 10 ఓవర్లు ముగిసేసరికి రెండు వికెట్ల నష్టానికి 49 పరుగులు చేసింది. శాంట్నర్ వేసిన ఈ ఓవర్‌లో కేవలం మూడే పరుగులు వచ్చాయి. దీంతో ఆఖరి పది ఓవర్లలో 51 పరుగులు చేయాలి. క్రీజ్‌లో సూర్యకుమార్‌ (2*), రాహుల్ త్రిపాఠి (13*) ఉన్నారు.

29/01/2023 21:33(IST)

ఇషాన్‌ రనౌట్..

ఇషాన్‌ కిషన్‌ ఔటయ్యాడు. గ్లెన్ ఫిలిప్స్‌ బౌలింగ్‌లో (8.5వ ఓవర్‌) ఇషాన్‌ కిషన్‌ (19) రనౌట్‌ రూపంలో పెవిలియన్‌కు చేరాడు. దీంతో భారత్‌ 46 పరుగుల వద్ద రెండో వికెట్‌ నష్టపోయింది. ప్రస్తుతం 9 ఓవర్లు ముగిసేసరికి టీమ్‌ఇండియా స్కోరు 46/2. క్రీజ్‌లో రాహుల్ త్రిపాఠి, సూర్యకుమార్‌ ఉన్నారు. ఇంకా భారత్‌ 66 బంతుల్లో 54 పరుగులు చేయాలి.

29/01/2023 21:23(IST)

హమ్మయ్య.. చివరి బంతికి బౌండరీ

7 ఓవర్లు: గ్లెన్ ఫిలిప్స్‌ వేసిన ఈ ఓవర్‌ చివరి బంతికి ఇషాన్‌ కిషన్ (15*) బౌండరీ రాబట్టాడు. లెగ్‌సైడ్‌ వేసిన బాల్‌ను కీపర్ వెనుకగా ఫోర్‌గా మలిచాడు. ఈ ఓవర్‌లో ఐదు పరుగులు వచ్చాయి. దీంతో భారత్‌ స్కోరు 34/1కి చేరింది.

29/01/2023 21:21(IST)

ఫోర్ వచ్చినా..

6 ఓవర్లు: భారత ఇన్నింగ్స్‌లో పవర్‌ ప్లే ముగిసింది. కివీస్‌ బౌలర్లు కట్టుదిట్టంగా బంతులను సంధించడంతో కేవలం 29 పరుగులే వచ్చాయి. ఆరో ఓవర్‌ వేసిన బ్రాస్‌వెల్ 7 పరుగులు ఇచ్చాడు. ఇందులో ఇషాన్‌ కిషన్ (11*) కొట్టిన ఫోర్‌ ఉంది. మరోవైపు త్రిపాఠి (4*) ఉన్నాడు.

29/01/2023 21:17(IST)

నిదానంగా ఆడుతూ..

భారత బ్యాటింగ్‌ నిదానంగా సాగుతోంది. స్వల్ప లక్ష్యమే అయినా పిచ్‌ బౌలింగ్‌కు అనుకూలంగా ఉంది. దీంతో ఎలాంటి రిస్క్‌ తీసుకోకుండా బ్యాటర్లు ఆడుతున్నారు. ప్రస్తుతం 5 ఓవర్లు ముగిసేసరికి భారత్‌ వికెట్‌ నష్టానికి 22 పరుగులు చేసింది. క్రీజ్‌లో రాహుల్ త్రిపాఠి (3*), ఇషాన్‌ కిషన్ (7*) ఉన్నారు. ఈ ఓవర్‌లో శాంట్నర్ 5 పరుగులే ఇచ్చాడు.

29/01/2023 21:11(IST)

గిల్‌ ఔట్‌

స్వల్ప లక్ష్య ఛేదనలో భారత్‌ తొలి వికెట్‌ను కోల్పోయింది. బ్రాస్‌వెల్‌ బౌలింగ్‌లో శుభ్‌మన్‌ గిల్ (11) షాట్‌కు యత్నించి బౌండరీ లైన్‌ వద్ద ఫిన్‌ అలెన్ చేతికి చిక్కాడు. దీంతో 17 పరుగుల వద్ద మొదటి వికెట్‌ను నష్టపోయింది. ప్రస్తుతం 4 ఓవర్లు ముగిసేసిరికి భారత్‌ స్కోరు 17/1. క్రీజ్‌లోఇషాన్‌, రాహుల్‌ త్రిపాఠి ఉన్నారు.

29/01/2023 20:31(IST)

అర్ష్‌దీప్‌కు ఓవర్‌.. రెండు వికెట్లు

ఇన్నింగ్స్‌లోని 18వ ఓవర్‌ను వేయడానికి ఫాస్ట్‌ బౌలర్‌ అర్ష్‌దీప్‌ సింగ్‌ను హార్దిక్‌ తీసుకొచ్చాడు. అయితే అద్భుతమైన షార్ట్‌పిచ్‌ బంతికి సోధి (1) హార్దిక్‌ పాండ్య చేతికి దొరికిపోయాడు. ఫెర్గూసన్‌ (0) కూడా వాషింగ్టన్‌ సుందర్‌కు క్యాచ్‌ ఇచ్చి పెవిలియన్‌కు చేరాడు. దీంతో ఒకే ఓవర్‌లో కివీస్‌ రెండు వికెట్లను కోల్పోయింది. ప్రస్తుతం 18 ఓవర్లు ముగిసేసరికి కివీస్‌ స్కోరు 83/8. ఈ ఓవర్‌లో అర్ష్‌దీప్ మూడు పరుగులు ఇచ్చాడు. క్రీజ్‌లో మిచెల్ శాంట్నర్ (12*), డఫీ ఉన్నారు.

29/01/2023 20:26(IST)

హార్దిక్‌కు వికెట్‌

కెప్టెన్ హార్దిక్‌ పాండ్యకు వికెట్‌ దక్కింది. తన స్పెల్‌ చివరి ఓవర్‌ ఆఖరి బంతికి బ్రాస్‌వెల్‌ (14) వికెట్‌ తీశాడు. ప్రస్తుతం 17 ఓవర్లు ముగిసేసరికి కివీస్‌ స్కోరు 80/6. క్రీజ్‌లో శాంట్నర్ (10*), సోధి ఉన్నారు. ఈ ఓవర్‌లో హార్దిక్‌ వికెట్ తీసి నాలుగు పరుగులు మాత్రమే ఇచ్చాడు. దీంతో తన నాలుగు ఓవర్ల కోటాలో 25 పరుగులు ఇచ్చాడు.

29/01/2023 20:19(IST)

ఐదు సింగిల్స్‌

16 ఓవర్లు: కుల్‌దీప్‌యాదవ్‌ తన బౌలింగ్‌ స్పెల్‌ను పూర్తి చేశాడు. కేవలం 17 పరుగులను మాత్రమే ఇచ్చి ఒక వికెట్‌ తీశాడు. దీంతో 16 ఓవర్లు ముగిసేసరికి కివీస్‌ స్కోరు 76/5. క్రీజ్‌లో బ్రాస్‌వెల్ (12*), శాంట్నర్ (8*) ఉన్నారు. ఈ ఓవర్‌లో కుల్‌దీప్‌ ఐదు సింగిల్స్‌ను మాత్రమే ఇచ్చాడు.

29/01/2023 20:11(IST)

ఫోర్ కొట్టాడు..

14 ఓవర్లు: కెప్టెన్ మిచెల్ శాంట్నర్ (5*) బౌండరీ కొట్టాడు. వాషింగ్టన్ సుందర్ బౌలింగ్‌లో వచ్చిన ఫాస్ట్ డెలివరీని ఫోర్‌గా మలిచాడు. ఈ ఓవర్‌లో ఐదు పరుగులు ఇచ్చాడు. దీంతో కివీస్‌ స్కోరు 67/5. క్రీజ్‌లో శాంట్నర్‌తోపాటు బ్రాస్‌వెల్ (7*) ఉన్నాడు.

29/01/2023 20:04(IST)

ఐదో వికెట్‌

దీపక్ హుడా బౌలింగ్‌లో (12.4వ ఓవర్) మార్క్‌ చాప్‌మన్ (14) ఇచ్చిన క్యాచ్‌ను కుల్‌దీప్‌ అందుకోవడానికి ముందుకొస్తూ జారిపడ్డాడు. అయితే బంతిని వెంటనే అందుకొని కీపర్‌కు విసిరేయడంతో చాప్‌మన్ రనౌట్‌ రూపంలో పెవిలియన్‌కు చేరాడు. దీంతో 60 పరుగుల వద్ద కివీస్‌ ఐదో వికెట్‌ను కోల్పోయింది. ప్రస్తుతం 13 ఓవర్లు ముగిసేసరికి కివీస్‌ స్కోరు 62/5. క్రీజ్‌లో బ్రాస్‌వెల్ (6*), శాంట్నర్ (1*) ఉన్నారు.

29/01/2023 19:52(IST)

డారిల్ క్లీన్‌బౌల్డ్‌

కివీస్‌ నాలుగో వికెట్‌ను కోల్పోయింది. కుల్‌దీప్‌యాదవ్ వేసిన అద్భుతమైన బంతికి డారిల్ మిచెల్ (8) బౌల్డయ్యాడు. దీంతో 10 ఓవర్లు ముగిసేసరికి కివీస్‌ నాలుగు వికెట్ల నష్టానికి 48 పరుగులు చేసింది. ఈ ఓవర్‌లో కుల్‌దీప్‌ కేవలం మూడు పరుగులు మాత్రమే ఇచ్చాడు.

29/01/2023 19:41(IST)

నిదానంగా..

8 ఓవర్లు: భారత బౌలర్లు కట్టుదిట్టంగా బంతులను సంధించడంతో కివీస్‌ బ్యాటర్లు ఆచితూచి ఆడుతున్నారు. వరుసగా వికెట్లు కోల్పోవడంతో స్కోరు బోర్డు నెమ్మదించింది. ప్రస్తుతం 8 ఓవర్లు ముగిసేసరికి కివీస్‌ స్కోరు 40/3. ఈ ఓవర్‌లో కుల్‌దీప్‌ ఫోర్ సహా ఐదు పరుగులు ఇచ్చాడు. క్రీజ్‌లో డారిల్ (4*), చాప్‌మన్ (3*) ఉన్నారు.

29/01/2023 19:36(IST)

గ్లెన్ ఫిలిప్స్‌ క్లీన్‌బౌల్డ్

భారత బౌలర్‌ దీపక్ హుడా దెబ్బకు కివీస్‌ కీలక బ్యాటర్ గ్లెన్‌ ఫిలిప్స్‌ (5) క్లీన్‌బౌల్డ్‌గా పెవిలియన్‌కు చేరాడు. దీంతో 35 పరుగుల వద్ద కివీస్‌ మూడో వికెట్‌ను కోల్పోయింది. ప్రస్తుతం 7 ఓవర్లు ముగిసేసరికి న్యూజిలాండ్‌ స్కోరు 35/3. క్రీజ్‌లో చాప్‌మన్ (1*), డారిల్ మిచెల్ ఉన్నారు. ఈ ఓవర్‌లో దీపక్‌ కేవలం రెండు పరుగులను మాత్రమే ఇచ్చి వికెట్ తీశాడు.

29/01/2023 19:32(IST)

ముగిసిన ఆరు ఓవర్లు

న్యూజిలాండ్‌ ఇన్నింగ్స్‌లో పవర్‌ప్లే ముగిసింది. భారత బౌలర్లు కట్టుదిట్టంగా బౌలింగ్‌ చేయడంతో కివీస్‌ 6 ఓవర్లలో 33/2 స్కోరు సాధించింది. క్రీజ్‌లో చాప్‌మన్ (1*), ఫిలిప్స్ (4*) ఉన్నారు. ఆరో ఓవర్‌లో చాహల్‌ నాలుగు పరుగులను మాత్రమే ఇచ్చాడు.

29/01/2023 19:27(IST)

మరో ఓపెనర్ ఔట్

న్యూజిలాండ్‌ త్వరగానే ఓపెనర్ల వికెట్లను కోల్పోయింది. తొలుత చాహల్‌ బౌలింగ్‌లో ఫిన్ బౌల్డ్‌ కాగా.. ఇప్పుడు వాషింగ్టన్ సుందర్ (4.4వ ఓవర్) బంతిని ఆడే క్రమంలో కీపర్‌ ఇషాన్‌ చేతికి క్యాచ్‌ ఇచ్చి డేవన్ కాన్వే (11) పెవిలియన్‌కు చేరాడు. బంతి గ్లౌజ్ పై భాగంలో తగలకుండా వెళ్లిందనే అభిప్రాయంతో కాన్వే డీఆర్‌ఎస్‌కు వెళ్లాడు. అయితే సమీక్షలో ఔట్‌గా తేలడంతో పెవిలియన్‌ బాట పట్టాడు. ప్రస్తుతం 5 ఓవర్లు ముగిసేసరికి న్యూజిలాండ్‌ రెండు వికెట్ల నష్టానికి 29 పరుగులు చేసింది. క్రీజ్‌లో చాప్‌మన్ ( 1*), ఫిలిప్స్‌ (1*) ఉన్నారు. ఈ ఓవర్‌లో వాషింగ్టన్ 8 పరుగులు ఇచ్చాడు. అందులో ఐదు పరుగులు వైడ్ల రూపంలో (4+వైడ్) వచ్చాయి.

29/01/2023 19:18(IST)

ఫిన్‌.. భలే దొరికాడు..

యుజ్వేంద్ర చాహల్‌ తొలి బంతి నుంచే ఫిన్‌ అలెన్‌ (11)ను టార్గెట్‌ చేశాడు. ఈ క్రమంలో మూడో బంతికి షాట్‌కు (3.3వ ఓవర్) యత్నించి బౌల్డ్‌గా పెవిలియన్‌కు చేరాడు. మూడు బంతులను విభిన్నంగా సంధించి మరీ వికెట్‌ తీశాడు. దీంతో 21 పరుగుల వద్ద న్యూజిలాండ్‌ తొలి వికెట్‌ను కోల్పోయింది.

29/01/2023 19:15(IST)

రెండు బౌండరీలు

3 ఓవర్లు: హార్దిక్‌ పాండ్య వేసిన ఈ ఓవర్‌లో ఫిన్‌ అలెన్ (11*) వరుసగా రెండు బౌండరీలు బాదాడు. ఈ క్రమంలో క్లిష్టమైన క్యాచ్‌ కోసం ఇషాన్‌ కిషన్‌ ప్రయత్నించినా.. అందుకోలేకపోయాడు. ఈ ఓవర్‌లో మొత్తం 11 పరుగులు వచ్చాయి. దీంతో న్యూజిలాండ్‌ స్కోరు 21/0.

29/01/2023 19:09(IST)

సుందర్‌ వచ్చేశాడు

రెండో ఓవర్‌లోనే వాషంగ్టన్ సుందర్‌ చేతికి హార్దిక్‌ బంతినిచ్చాడు. కట్టుదిట్టంగా బంతులను సంధించిన సుందర్‌ కేవలం నాలుగు పరుగులే ఇచ్చాడు. దీంతో న్యూజిలాండ్‌ స్కోరు 10/0కి చేరింది. డేవన్ కాన్వే (9*), అలెన్ (1*) ఆచితూచి ఆడారు.

29/01/2023 18:38(IST)

న్యూజిలాండ్‌ జట్టులో మార్పుల్లేవ్

న్యూజిలాండ్‌ ఎలాంటి మార్పులు లేకుండా బరిలోకి దిగింది. ఫిన్‌ అలెన్, డేవన్ కాన్వే (వికెట్ కీపర్), మార్క్ చాప్‌మన్, గ్లెన్ ఫిలిప్స్‌, డారిల్‌ మిచెల్, మైకెల్ బ్రాస్‌వెల్, మిచెల్ శాంట్నర్ (కెప్టెన్), ఐష్ సోధి, జాకబ్ డఫీ, లాకీ ఫెర్గూసన్, బ్లెయిర్ టిక్నెర్

29/01/2023 18:36(IST)

ఉమ్రాన్‌ లేడు.. చాహల్ వచ్చాడు

భారత జట్టులో ఒక మార్పు జరిగింది. పేసర్ ఉమ్రాన్‌ మాలిక్‌ బదులు యుజ్వేంద్ర చాహల్‌ను హార్దిక్‌ తీసుకొన్నాడు. తుది జట్టులో శుభ్‌మన్‌ గిల్, ఇషాన్ కిషన్ (వికెట్ కీపర్), రాహుల్ త్రిపాఠి, సూర్యకుమార్‌ యాదవ్, హార్దిక్‌ పాండ్య (కెప్టెన్), దీపక్ హుడా, వాషింగ్టన్‌ సుందర్, శివమ్‌ మావి, కుల్‌దీప్‌ యాదవ్, యుజ్వేంద్ర చాహల్‌, అర్ష్‌దీప్‌ సింగ్ ఉన్నారు.

29/01/2023 18:32(IST)

టాస్‌ గెలిచిన కివీస్

రెండో టీ20 మ్యాచ్‌లో కివీస్‌ టాస్‌ నెగ్గింది. కెప్టెన్ మిచెల్ శాంట్నర్ బ్యాటింగ్‌ ఎంచుకొన్నాడు. లఖ్‌నవూ వేదిక ఛేజింగ్‌కు కష్టంగా ఉంటుందనే గణాంకాల నేపథ్యంలో తొలుత బ్యాటింగ్‌కు మొగ్గు చూపినట్లు శాంట్నర్ వెల్లడించాడు.

29/01/2023 18:29(IST)

అతడి వద్ద ఎలాంటి ప్రణాళికలు లేవు

న్యూజిలాండ్‌తో వన్డే సిరీస్‌(IND Vs NZ)లో టీమ్‌ఇండియా చూపించిన జోష్‌ను.. టీ20 సిరీస్‌ తొలి మ్యాచ్‌లో కొనసాగించలేకపోయింది. అన్ని రంగాల్లో విఫలమై ఓటమిని మూటగట్టుకుంది. ఈ నేపథ్యంలో తొలి టీ20లో కెప్టెన్‌ హార్దిక్‌(Hardik Pandya) వ్యూహాలను పాక్‌ మాజీ ఆటగాడు డానిష్‌ కనేరియా(Danish Kaneria) తప్పుబట్టాడు. బౌలర్లను మారుస్తూ వైవిధ్యం చూపించడంలో విఫలమయ్యాడని.. అతడి వద్ద ఎటువంటి ప్రణాళికలు లేనట్లు కనిపించాడని అన్నాడు. పూర్తి వార్త కోసం క్లిక్‌ చేయండి

29/01/2023 18:28(IST)

రెండో టీ20లో ఉమ్రాన్‌ స్థానంలో అతడిని తీసుకోవాలి

న్యూజిలాండ్‌తో వన్డే సిరీస్‌(IND Vs NZ)ను క్లీన్‌స్వీప్‌ చేసిన టీమ్‌ఇండియా(Team India).. తొలి టీ20లో చతికిలబడిన విషయం తెలిసిందే. ఇటు బౌలింగ్‌తోపాటు.. అటు బ్యాటింగ్‌లోనూ తేలిపోవడంతో టీ20 సిరీస్‌ను హార్దిక్‌ సేన ఓటమితో మొదలెట్టింది. ఈ నేపథ్యంలో తర్వాతి మ్యాచ్‌కు తుది జట్టులో మార్పులు చేయాలని మాజీ ఆటగాడు వసీం జాఫర్‌ సూచించాడు. పూర్తి వార్త కోసం క్లిక్‌ చేయండి

29/01/2023 18:28(IST)

IND Vs NZ: గెలవాల్సిందే..

మూడు మ్యాచ్‌ల సిరీస్‌ ఆరంభ పోరులో ఫేవరెట్‌గా బరిలోకి దిగిన భారత్‌కు రాంచిలో కివీస్‌ పెద్ద షాకే ఇచ్చింది. బౌలింగ్‌, బ్యాటింగ్‌ రెండింట్లోనూ హార్దిక్‌ సేన స్థాయికి తగ్గ ప్రదర్శన చేయలేకపోయింది. బౌలింగ్‌లో లభించిన మంచి ఆరంభాన్ని ఉపయోగించుకోలేక ప్రత్యర్థితో 170 పైచిలుకు స్కోరు చేయించిన టీమ్‌ఇండియా.. ఆ తర్వాత ఛేదనలో తేలిపోయింది. సూర్యకుమార్‌, వాషింగ్టన్‌ సుందర్‌ పోరాడకుంటే భారత్‌కు ఘోర పరాభవం ఎదురయ్యేదే. పూర్తి వార్త కోసం క్లిక్‌ చేయండి

App

IND vs NZ: భారత్‌ ఉత్కంఠ విజయం.. ఈ రోజు కొత్త ‘స్కై’ని చూశారు: సూర్యకుమార్‌

తాజా వార్తలు (Latest News)

Saudi Arabia: సౌదీలో ఘోర రోడ్డు ప్రమాదం.. 20 మంది హజ్‌ యాత్రికుల మృతి

Vangalapudi Anitha: 40 మంది ఎమ్మెల్యేలు టచ్‌లో ఉన్నారు: అనిత

వయసు 14.. బూట్ల సైజు 23!.. అసాధారణ రీతిలో పెరుగుతున్న పాదాలు

ఉనికికే ముప్పొస్తే ఎవరినైనా లేపేస్తాం: అమెరికాకు రష్యా తాజా హెచ్చరిక

సోదరి వివాహానికి రూ.8.1 కోట్ల కానుకలు

రాజకీయాల్లోకి సుష్మా స్వరాజ్‌ కుమార్తె

సుఖీభవ

చదువు