Breaking | Feedback | ePratibha | E-PAPER | Pratibha

Budget 2023: ఏపీకి కేటాయింపులు లేకపోవడం నిరాశ కలిగించింది

2023-24 సంవత్సరానికి గానూ కేంద్ర ఆర్థికమంత్రి నిర్మలా సీతారామన్‌ బడ్జెట్‌ను ప్రవేశపెట్టారు. 1గంటా 26నిమిషాల పాటు బడ్జెట్‌ ప్రసంగం సాగింది. వేతన జీవులకు ఊరటనిస్తూ బడ్జెట్‌లో ప్రకటన చేశారు. కొత్త పన్ను విధానం ఎంచుకున్న వారికి రూ.7లక్షల వరకూ ఆదాయపు పన్నులో మినహాయింపు ఇచ్చారు.

Updated : 08 Feb 2023 16:02 IST

01/02/2023 20:27(IST)

ఇది అదానీ.. అంబానీలను ఆదుకొనే బడ్జెట్‌: మంత్రి ప్రశాంత్‌రెడ్డి

కేంద్ర ప్రభుత్వం ప్రవేశపెట్టిన బడ్జెట్ రైతులను, పేదలను దగా చేసి అదానీ, అంబానీలను ఆదుకునే బడ్జెట్‌లా ఉందని మంత్రి వేముల ప్రశాంత్ రెడ్డి విమర్శించారు. ఇది రైతులను, పేదలను పూర్తిగా వంచించే బడ్జెట్ అని ఆగ్రహం వ్యక్తం చేశారు. ఉపాధిహామీ పథకానికి గత బడ్జెట్ కేటాయింపుల కంటే రూ.30వేల కోట్లు తగ్గించి పథకాన్ని నిర్వీర్యం చేయాలనుకోవడం సిగ్గుచేటన్నారు. కర్ణాటక అప్పర్ భద్రకు జాతీయ హోదా ఇచ్చి ప్రత్యేక నిధులు కేటాయించారు.. మరి కాళేశ్వరం, పాలమూరు-రంగారెడ్డి సాగునీటి ప్రాజెక్టులను ఎందుకు మర్చిపోయారని ప్రశ్నించారు.

01/02/2023 20:04(IST)

పార్లమెంటు సమావేశాల్లో నిలదీస్తాం: వైకాపా ఎంపీలు

ఏపీ విభజన హామీల పరంగా బడ్జెట్‌లో నిరాశే మిగిలిందని వైకాపా ఎంపీలు పేర్కొన్నారు. విభజన హామీలకు సంబంధించి నిధుల అంశంపై బడ్జెట్‌లో ప్రస్తావన లేదన్నారు. ‘‘అసెంబ్లీ ఎన్నికలు జరిగే రాష్ట్రాలపై కేంద్రం దృష్టి సారించినట్లు ఉంది. పోలవరం, రెవెన్యూ లోటు, రైల్వే కారిడార్‌, స్టీల్‌ ఫ్యాక్టరీకి సాయం వంటి ఏ అంశాన్నీ బడ్జెట్‌లో ప్రస్తావించలేదు. పార్లమెంటు సమావేశాల్లో వీటిపై కేంద్ర ప్రభుత్వాన్ని నిలదీస్తాం. ప్రత్యేక హోదా కోసం వైకాపా ప్రయత్నం కొనసాగుతూనే ఉంటుంది’’ అని వైకాపా ఎంపీలు పేర్కొన్నారు.

01/02/2023 19:25(IST)

ఏపీకి కేటాయింపులు లేకపోవడం నిరాశ కలిగించింది

వ్యవసాయ, మౌలిక రంగాలను నిలబెట్టేలా కేంద్ర బడ్జెట్ (Union Budget 2023) ప్రణాళికలున్నాయని తెదేపా అధినేత చంద్రబాబు అన్నారు. అయితే, పోలవరం సహా పలు ప్రాజెక్టులు, రాష్ట్రానికి కేటాయింపులు లేకపోవడం నిరాశ కలిగించిందన్నారు. ‘‘కేంద్రం ప్రవేశపెట్టిన 2023-24 బడ్జెట్ సమ్మిళిత అభివృద్ధి లక్ష్యం సాధించేలా ఉంది. 2014లో ప్రపంచంలో 10వ స్థానంలో ఉన్న భారత ఆర్థిక వ్యవస్థ.. ఇప్పుడు ఐదో స్థానంలోకి రావడం గొప్ప విషయం. 2047 లక్ష్యంగా పథకాలు, కార్యక్రమాల రూపకల్పన దిశగా ఆలోచనలు చేయడాన్ని స్వాగతిస్తున్నాం. ఆదాయపు పన్ను శ్లాబ్‌లలో మార్పులు తెచ్చి వేతన జీవులకు ఊరట కల్పించారు’’ అని చంద్రబాబు పేర్కొన్నారు.

01/02/2023 18:34(IST)

కేంద్ర బడ్జెట్‌లో తెలంగాణకు తీవ్ర నిరాశ

హైదరాబాద్‌: కేంద్ర బడ్జెట్‌లో తెలంగాణ రాష్ట్రానికి తీవ్ర నిరాశ కలిగిందని టీపీసీసీ అధ్యక్షుడు రేవంత్‌రెడ్డి ఆరోపించారు. రాష్ట్రం పట్ల కేంద్రం తీవ్ర వివక్ష చూపించిందని.. విభజన హామీల అమలుకు నిధులు కేటాయించలేదని అసహనం వ్యక్తం చేశారు. ‘‘బయ్యారం ఉక్కు పరిశ్రమ, రైల్వే కోచ్‌ ఫ్యాక్టరీ ఊసే లేదు. ఐటీఐఆర్ కారిడార్‌ ప్రస్తావనే లేదు. పాలమూరు-రంగారెడ్డి ప్రాజెక్టుకు జాతీయ హోదా ఇవ్వలేదు. తెలంగాణకు జరిగిన అన్యాయంలో భాజపా, భారాస ఇద్దరూ దోషులే. తెలంగాణకు రావాల్సిన వాటిని కేసీఆర్ సాధించలేదు’’ అని రేవంత్‌ రెడ్డి పేర్కొన్నారు.

01/02/2023 17:57(IST)

విఫలమైన బీమా పథకానికి రూ.1,249 కోట్లా..?

కేంద్రంలో ఉన్నది రైతు వ్యతిరేక ప్రభుత్వమని తెలంగాణ రాష్ట్ర వ్యవసాయ శాఖ మంత్రి సింగిరెడ్డి నిరంజన్‌రెడ్డి విమర్శించారు. వ్యవసాయ రంగానికి కేటాయింపులు 22 శాతం తగ్గించారన్నారు. ఎరువుల రాయితీకి కేంద్రం మెల్లగా మంగళం పాడుతోందన్నారు. ఇప్పటికే పెరిగిన ఎరువులు, డీజిల్‌ ధరలతో రైతులపై భారం పడుతోందని పేర్కొన్నారు. పీఎం కిసాన్ సమ్మాన్ నిధికి ఒక్క రూపాయి కూడా పెంచని కేంద్రం.. విఫలమైన.. ఏమాత్రం ప్రయోజనం లేని ఫసల్‌ బీమా పథకానికి అదనంగా రూ.1,249 కోట్లు కేటాయించిందని ఆక్షేపించారు. సీసీఐకి నిధుల తగ్గింపుతో పత్తి రైతులకు తీవ్ర అన్యాయం జరుగుతుందన్నారు.

01/02/2023 17:49(IST)

అందమైన మాటలు తప్ప కేటాయింపుల్లేని డొల్ల బడ్జెట్‌

కేంద్ర ప్రభుత్వం ప్రవేశపెట్టిన బడ్జెట్‌ (Budget 2023)లో డొల్లతనం కనిపిస్తోందని తెలంగాణ ఆర్థిక శాఖ మంత్రి హరీశ్‌రావు అన్నారు. అందమైన మాటలు తప్ప కేటాయింపులు లేని డొల్ల బడ్జెట్‌గా అభివర్ణించారు. బడ్జెట్‌లో ఏడు ప్రాధాన్యత రంగాలను కేంద్రం గాలికొదిలేసిందన్నారు. తెలంగాణకు మరోసారి తీవ్ర అన్యాయం చేశారని అసంతృప్తి వ్యక్తం చేశారు. విభజన హామీల అమలు ప్రస్తావనే లేదని.. 9 ఏళ్లుగా అడుగుతుంటే రైల్వే కోచ్‌ ఫ్యాక్టరీ ఊసేలేదని అసహనం వ్యక్తం చేశారు.

పూర్తి కథనం కోసం క్లిక్ చేయండి

01/02/2023 16:59(IST)

దేశ ప్రగతికి దోహదపడే బడ్జెట్‌ : డీకే అరుణ

హైదరాబాద్: కేంద్ర ప్రభుత్వం ప్రవేశపెట్టిన బడ్జెట్‌ 2023 (Budget 2023) బడుగు బలహీన వర్గాలకు ఊతమివ్వడంతోపాటు దేశ ప్రగతికి దోహదపడే విధంగా ఉందని భాజపా జాతీయ ఉపాధ్యక్షురాలు డీకే అరుణ హర్షం వ్యక్తం చేశారు. బడ్జెట్‌లో చేసిన కేటాయింపులపై ఆమె సంతృప్తి వ్యక్తం చేశారు. రైతులకు 20లక్షల కోట్ల రుణాలు ఇవ్వడంతోపాటు శ్రీ అన్న పథకం ద్వారా చిరు ధాన్యాలు పండించే రైతులకు ప్రోత్సాహం ఇస్తూ హరిత అభివృద్ది వైపు నడిపించే నిర్ణయం తీసుకున్న ప్రధాని మోదీకి ధన్యవాదాలు తెలిపారు.

01/02/2023 16:45(IST)

ఏకలవ్య ఆదర్శ పాఠశాలల్లో భారీ సంఖ్యలో నియామకాలు..

దేశవ్యాప్తంగా ఏకలవ్య ఆదర్శ పాఠశాలల్లో(Eklavya Model Residential Schools) భారీ సంఖ్యలో బోధన, బోధనేతర సిబ్బంది నియామకాలు చేపట్టనున్నట్టు కేంద్ర ప్రభుత్వం ప్రకటించింది. ఈ మేరకు కేంద్ర ఆర్థికమంత్రి నిర్మలాసీతారామన్‌ లోక్‌సభలో ప్రవేశపెట్టిన కేంద్ర బడ్జెట్‌ 2023-24(Union Budget 2023-24)లో ఈ విషయాన్ని వెల్లడించారు. ఏకలవ్య ఆదర్శ పాఠశాలల్లో 38,800 ఉపాధ్యాయ, సహాయక సిబ్బంది ఉద్యోగాలను భర్తీ చేస్తామని తెలిపారు. వచ్చే మూడేళ్లలో దేశంలోని 740 ఏకలవ్య మోడల్‌ రెసిడెన్సియల్‌ పాఠశాలల్లో 3.5లక్షల మంది ఆదివాసీ విద్యార్థులకు విద్యాబోధన అందించడమే లక్ష్యంగా ఈ భారీ రిక్రూట్‌మెంట్‌ చేపట్టనున్నట్టు వివరించారు.

01/02/2023 16:21(IST)

రైల్వేకు కేటాయింపులు ఇలా..

బడ్జెట్‌లో రైల్వేకు (Indian Railway) ఈ సారి కేంద్రం భారీగా కేటాయింపులు జరిపింది. గత బడ్జెట్‌లో రూ.1.4 లక్షల కోట్లు కేటాయించగా.. ఈసారి ఏకంగా రూ.2.40 లక్షలు కోట్లు (Budget 2023) కేటాయిస్తున్నట్లు కేంద్ర ఆర్థిక మంత్రి నిర్మలా సీతారామన్‌ ప్రకటించారు. 2013-14లో జరిపిన కేటాయింపులతో పోలిస్తే 9 రెట్లు అధికమని నిర్మలా సీతారామన్‌ చెప్పారు. ఈసారి బడ్జెట్‌లో కొత్త రైళ్ల ప్రస్తావన లేనప్పటికీ.. మౌలిక సదుపాయాలను మెరుగుపరిచేందుకు భారీగా నిధులు వెచ్చించనున్నారు.

పూర్తి కథనం కోసం క్లిక్‌ చేయండి..

01/02/2023 16:14(IST)

రైతులకు ₹20 లక్షల కోట్ల రుణాలు.. శ్రీఅన్న కేంద్రంగా భారత్‌

వచ్చే ఆర్థిక సంవత్సరంలో పంట రుణాల లక్ష్యాన్ని 11 శాతం పెంచి రూ.20 లక్షల కోట్లకు చేర్చుతున్నట్లు కేంద్ర ఆర్థిక మంత్రి నిర్మలా సీతారామన్‌ ప్రకటించారు. భారత్‌ను చిరుధాన్యాల (శ్రీఅన్న) కేంద్రంగా మారుస్తామని తెలిపారు. ప్రత్యామ్నాయ ఎరువుల వినియోగాన్ని పెంచడం కోసం పీఎం-ప్రణామ్‌ పేరిట ప్రత్యేక పథకాన్ని ప్రతిపాదించారు. వ్యవసాయ రంగంలోని అంకుర సంస్థల కోసం ప్రత్యేక నిధిని ప్రకటించారు. బడ్జెట్‌ 2023 (Budget 2023)ను పార్లమెంటులో ప్రవేశపెట్టిన మంత్రి.. వ్యవసాయం, అనుబంధ రంగాలు, రైతుల సంక్షేమం కోసం పలు కీలక ప్రకటనలు చేశారు.

పూర్తి కథనం కోసం క్లిక్‌ చేయండి..

01/02/2023 16:00(IST)

అఖర్లో అమ్మకాల ఒత్తిడి.. గరిష్ఠాల నుంచి సెన్సెక్స్‌ 1000 పాయింట్లు డౌన్‌

ముంబయి: దేశీయ స్టాక్‌ మార్కెట్‌ సూచీలు బుధవారం మిశ్రమంగా ముగిశాయి. బడ్జెట్‌పై ఆశలతో ఉదయం ఉత్సాహంగా ప్రారంభమైన మార్కెట్లు బడ్జెట్‌ ప్రసంగం ఆసాంతం ఆ జోరును కొనసాగించాయి. ఓ దశలో సెన్సెక్స్‌ 1,200 పాయింట్లకు పైగా లాభపడింది. ఆదాయ పన్ను విధానంలో మార్పులు, మూలధన పెట్టుబడులకు కేటాయింపులు పెంచడం మదుపర్లను ఉత్సాహరించింది. కానీ, ఆ జోరు చివరి వరకు నిలవలేదు. గరిష్ఠాల వద్ద మదుపర్లు లాభాల స్వీకరణకు దిగడంతో సూచీలు కిందకు దిగొచ్చాయి.

☛ ఉదయం సెన్సెక్స్‌ (Sensex) 60,001.17 వద్ద లాభాలతో ప్రారంభమైంది. ఇంట్రాడేలో 60,773.44- 58,816.84 మధ్య కదలాడింది. చివరకు 158.18 పాయింట్ల లాభంతో 59,708.08 దగ్గర స్థిరపడింది. నిఫ్టీ (Nifty) 17,811.60 వద్ద ట్రేడింగ్‌ ప్రారంభించి ఇంట్రాడేలో 17,972.20- 17,353.40 మధ్య ట్రేడయ్యింది. చివరకు 45.85 పాయింట్ల నష్టంతో 17,616.30 వద్ద ముగిసింది. మార్కెట్లు ముగిసే సమయానికి డాలర్‌తో పోలిస్తే రూపాయి మారకం విలువ 81.88 వద్ద నిలిచింది.

01/02/2023 15:33(IST)

ఏపీ సంస్థలకు కేటాయింపులు..

* ఏపీ సెంట్రల్‌ యూనివర్సిటీకి - రూ. 47 కోట్లు

* పెట్రోలియం యూనివర్సిటీకి - రూ. 168 కోట్లు

* విశాఖ స్టీల్‌ ప్లాంట్‌కు- రూ. 683 కోట్లు

తెలుగు రాష్ట్రాలకు ఉమ్మడి కేటాయింపులు..

* రెండు రాష్ట్రాల్లోని గిరిజన విశ్వవిద్యాలయాలకు - రూ. 37 కోట్లు

* మంగళగిరి, బిబినగర్‌ సహా దేశంలోని 22 ఎయిమ్స్‌ ఆసుపత్రులకు - రూ. 6,835 కోట్లు

* సాలార్జంగ్‌ సహా అన్ని మ్యూజియాలకు - రూ.357 కోట్లు

01/02/2023 15:11(IST)

బడ్జెట్‌.. దేశాభివృద్ధికి బలమైన పునాది: ప్రధాని మోదీ

రాబోయే 25 ఏళ్ల అమృత కాలానికి ప్రవేశపెట్టిన తొలి బడ్జెట్‌ దేశాభివృద్ధికి బలమైన పునాది అని ప్రధానమంత్రి నరేంద్రమోదీ అన్నారు. రైతులు సహా అన్ని వర్గాల కలలను ఈ బడ్జెట్‌ సాకారం చేస్తుందన్నారు. మహిళా సాధికారత మరింత పెరిగేలా దోహదం చేస్తుందన్నారు. ఇది చారిత్రక బడ్జెట్‌ అని కొనియాడిన ప్రధాని.. మధ్యతరగతి ప్రజల కోసం ప్రభుత్వం అనేక చర్యలు చేపడుతుందని తెలిపారు. పన్నుల ధరలు తగ్గించి ప్రజలకు ఉపశమనం కలిగించామన్నారు.

01/02/2023 15:08(IST)

ప్రజల్లోకి 'బడ్జెట్' తీసుకెళ్లేందుకు భాజపా ప్రత్యేక కార్యాచరణ

బడ్జెట్‌ అంశాలను ప్రజల్లోకి తీసుకెళ్లేందుకు తెలంగాణ భాజపా ప్రత్యేక కార్యాచరణ ప్రకటించింది. ఇందు కోసం ఈ నెల 3 నుంచి 10 వరకు స్పెషల్ డ్రైవ్ నినిర్వహించనుంది. రాష్ట్ర, జిల్లా స్థాయిలో కమిటీలు ఏర్పాటు చేయనున్నారు. ఈ సమావేశాలకు పలువురు జాతీయ నేతల రానున్నారు. ప్రతి జిల్లా కేంద్రంలో వివిధ వృత్తులవారితో సమావేశాల నిర్వహించనున్నారు.

01/02/2023 14:59(IST)

తెలంగాణలోని పలు సంస్థలకు కేటాయింపులు..

తెలంగాణలోని పలు సంస్థలకు కేంద్ర బడ్జెట్‌లో కేటాయింపులు చేశారు. సింగరేణికి రూ. 1,650 కోట్లు, ఐఐటీ హైదరాబాద్‌కు (ఈఏపీ కింద) రూ. 300 కోట్లు కేటాయించారు. తెలుగు రాష్ట్రాల్లోని గిరిజన వర్సిటీలకు రూ.37 కోట్లు కేటాయించారు.

01/02/2023 14:58(IST)

కేంద్ర బడ్జెట్‌ 2023: రూపాయి రాక.. పోక.. ఇలా!

2023-24 ఆర్థిక సంవత్సరానికి గానూ కేంద్ర ఆర్థిక మంత్రి నిర్మలా సీతారామన్‌ బడ్జెట్‌ను ప్రవేశ పెట్టారు. కేంద్ర ప్రభుత్వానికి సమకూరే ఆదాయం; పెట్టే వ్యయాలకు సంబంధించిన వివరాలను పరిశీలిస్తే..

రూపాయి రాక ఇలా..

రుణాలు 34శాతం; ఆదాయపు పన్ను 15శాతం; ఎక్సైజ్‌ సుంకాలు 7శాతం; కార్పొరేట్‌ పన్ను 15శాతం; జీఎస్టీ 17శాతం; కస్టమ్స్‌ 4శాతం; పన్నేతర ఆదాయం 6శాతం; రుణేతర మూలధన వసూళ్లు 2శాతం.

రూపాయి పోక ఇలా..

వడ్డీ చెల్లింపులు 20శాతం; కేంద్ర ప్రాయోజిత పథకాలు 9శాతం; సబ్సిడీలు 7శాతం; రక్షణ రంగం 8శాతం; కేంద్ర ప్రభుత్వ పథకాలు 17శాతం; ఆర్థిక సంఘం, ఇతర బదిలీలు 9శాతం; రాష్ట్ర పన్నుల వాటా 18శాతం; ఇతర ఖర్చులు 8శాతం, పింఛన్లు 4శాతం

01/02/2023 13:25(IST)

బడ్జెట్‌ ముఖ్యాంశాలు..

* ప్రైవేటు పెట్టుబడుల ఆకర్షణకు ప్రత్యేక విభాగం.
* డిజిటల్‌ ఇండియా అవసరాలకు నూతన కేవైసీ విధానం.
* వచ్చే మూడేళ్లలో కోటిమంది రైతులను సేంద్రియ సేద్యం వైపు మళ్లింపు.
* రైతుల కోసం 10వేల బయో ఇన్‌పుట్‌ రిసోర్స్‌ కేంద్రాలు ఏర్పాటు.
* ఎంఎస్‌ఎంఈలకు ముందస్తు పన్ను రూ..2కోట్ల నుంచి రూ.3కోట్లకు పెంపు .

01/02/2023 12:57(IST)

భారీ లాభాల్లో స్టాక్‌మార్కెట్లు

దేశీయ స్టాక్‌ మార్కెట్లు భారీ లాభాల్లో ట్రేడ్‌ అవుతున్నాయి. కేంద్ర ఆర్థిక మంత్రి నిర్మలా సీతారామన్‌ బడ్జెట్‌ ప్రసంగం ముగిసిన తర్వాత ఏకంగా 1000 పాయింట్లకు పైగా లాభంతో సెన్సెక్స్‌ దూసుకుపోయింది. అలాగే నిఫ్టీ కూడా 250 పాయింట్ల లాభంతో కదలాడుతోంది.

01/02/2023 12:46(IST)

బంగారం, వెండి ధరలపై కస్టమ్స్‌ డ్యూటీ పెంపు

బంగారం, వెండి ధరలపై కస్టమ్స్‌ డ్యూటీ పెంచుతున్నట్లు కేంద్ర ఆర్థిక మంత్రి నిర్మలా సీతారామన్‌ ప్రకటించారు. దీంతో ఆయా లోహల ధరలు పెరగనున్నాయి. అలాగే టైర్లు, సిగరెట్ల ధరలు పెరిగే అవకాశం ఉంది. మరోవైపు ఎలక్ట్రిక్‌ వాహన ధరలు భారీగా తగ్గనున్నాయి. వీటితో పాటు, టీవీలు, మొబైల్‌, కిచెన్‌ చిమ్నీ, కెమెరాలు, లెన్స్‌, దిగుమతి చేసుకునే బంగారం ధరలు తగ్గుతాయి.

01/02/2023 12:23(IST)

ఆదాయపన్ను పరిమితి రూ.7లక్షలకు పెంపు

ఉద్యోగులకు ఊరటనిస్తూ కేంద్ర ఆర్థిక మంత్రి నిర్మలా సీతారామన్‌ బడ్జెట్‌లో కీలక ప్రకటన చేశారు. ప్రస్తుతం ఉన్న రూ.5లక్షల ఆదాయపు పన్ను పరిమితిని రూ.7లక్షలకు పెంచుతున్నట్లు ప్రకటించారు. అయితే, ఇది కొత్త ఆదాయపు పన్ను విధానాన్ని ఎంచుకున్నవారికి మాత్రమే వర్తిస్తుంది.

* రూ.9లక్షల నుంచి రూ.12లక్షల వరకూ 15శాతం పన్ను
* రూ.12లక్షల నుంచి రూ.15లక్షల వరకూ 20శాతం పన్ను
* రూ.15. లక్షలకు పైబడిన వారికి 30శాతం పన్ను వర్తిస్తుంది.

01/02/2023 12:13(IST)

సీనియర్‌ సిటిజన్స్‌ పొదుపు పథకం పరిమితి పెంపు

సీనియర్‌ సిటిజన్స్‌లో పొదుపు పథకంలో భాగంగా డిపాజిట్‌ పరిమితి పెంచుతున్నట్లు బడ్జెట్‌ సందర్భంగా ఆర్థిక మంత్రి నిర్మలా సీతారామన్‌ ప్రకటించారు. ప్రస్తుతం రూ.15లక్షల వరకూ ఉన్న పరిమితిని డబుల్‌ చేసి, రూ.30లక్షలకు పెంచుతున్నట్లు తెలిపారు.

01/02/2023 12:10(IST)

మహిళల కోసం కొత్త స్కీమ్‌

ఆజాదీకా అమృత మహోత్సవ్‌లో భాగంగా మహిళల కోసం ప్రత్యేకంగా కేంద్రం కొత్త పథకం తీసుకొచ్చింది. మహిళా సమ్మాన్‌ సేవింగ్స్‌ సర్టిఫికెట్‌ను ప్రవేశపెట్టింది. రెండేళ్ల కాలానికి ఈ పథకం అందుబాటులో ఉంటుంది. ఈ ఫిక్స్‌డ్‌ డిపాజిట్‌ పథకంలో డిపాజిట్‌పై 7.5 శాతం స్థిర వడ్డీ ఉంటుంది. గరిష్ఠంగా రూ.2 లక్షల వరకు ఈ పథకంలో డిపాజిట్‌ చేయొచ్చు.

01/02/2023 12:05(IST)

ఎన్నికలు జరుగుతున్న కర్ణాటకకు ప్రత్యేక నిధులు కేటాయింపు

* కర్ణాటకలోని వెనుకబడ్డ ప్రాంతాలకు, అక్కడ సాగు రంగానికి రూ.5,300 కోట్లు
* దేశవ్యాప్తంగా కొత్తగా 50 ఎయిర్‌పోర్ట్‌లు, హెలిప్యాడ్‌ల నిర్మాణం
* 5జీ సేవల అభివృద్ధికి 100 ప్రత్యేక ల్యాబ్‌ల ఏర్పాటు
* పీఎం కౌశల్‌ పథకం కింద 4లక్షల మందికి శిక్షణ.
* దేశంలో 50 టూరిస్ట్‌ స్పాట్‌ల అభివృద్ధికి ప్రత్యేక నిధులు
* దేఖో ఆప్నా దేశ్‌ పథకం ప్రారంభం
* స్వదేశీ ఉత్పత్తుల అమ్మకానికి దేశవ్యాప్తంగా యూనిటీ మాల్స్‌

01/02/2023 12:00(IST)

లోక్‌సభలో నవ్వుల్‌ నవ్వుల్‌

పార్లమెంట్‌లో నిర్మలా సీతారామన్‌ బడ్జెట్‌ ప్రసంగంలో సరదా సన్నివేశం చోటుచేసుకుంది. తుక్కు విధానం గురించి ఆమె ప్రకటన చేస్తూ పొల్యూటెడ్‌ వెహికల్‌ అనబోయి.. పొలిటికల్‌ అని పలికారు. దీంతో అధికార సభ్యులతో పాటు, విపక్ష సభ్యులు ఒక్కసారిగా నవ్వారు. దీంతో ఒక్కసారిగా ఆహ్లాదకర వాతావరణం నెలకొంది. పొరపాటును గ్రహించిన నిర్మలా సీతారామన్‌ సైతం నవ్వుతూ తప్పును సవరించుకుని తన ప్రసంగాన్ని కొనసాగించారు.

01/02/2023 11:58(IST)

రాష్ట్రాలకు వడ్డీలేని రుణాల పథకం మరో ఏడాది పొడిగింపు

రాష్ట్రాలకు వడ్డీలేని రుణాల పథకం కోసం రూ.13.7లక్షల కోట్లు.
కీలకమైన వంద మౌలిక వసతుల ప్రాజెక్టులకు రూ.75వేల కోట్లు.
బడ్జెట్‌లో మూలధన వ్యయానికి రూ.13.5లక్షల కోట్ల కేటాయింపు.
కోస్టల్‌ షిప్పింగ్‌కు ప్రోత్సాహం.
కాలుష్య కారక వాహనాల తొలగింపులో భాగంగా వాహన తుక్కు విధానం.
పీఎం కౌశల్‌ యోజనలో భాగంగా యువతకు శిక్షణ.
ప్రకృతి వ్యవసాయం చేసేందుకు వీలుగా కోటిమంది రైతులకు సాయం.
36 అంతర్జాతీయ స్థాయి నైపుణ్య కేంద్రాల ఏర్పాటు.

01/02/2023 11:54(IST)

ఈ-కోర్టులకు రూ.7వేల కోట్లు

* బ్యాటరీల నిల్వ కేంద్రాల్లో 4వేల మెగావాట్లు.
* పట్టణ మౌలిక సౌకర్యాలకు రూ.10వేల కోట్ల నిధి.
* 2030 కల్లా 5 MMT హైడ్రోజన్‌ తయారీ. లద్ధాఖ్‌లో పునరుత్పాదక ఎనర్జీ కోసం రూ.20,700 కోట్లు. నేషనల్‌ హైడ్రోజన్‌ కార్యక్రమానికి రూ.19,700 కోట్లు.
* సముద్ర తీర ప్రాంతాల్లో మడ అడవుల పెంపకం.

01/02/2023 11:51(IST)

జాతీయ సహకార డేటా బేస్‌కు రూ.2516 కోట్లు

* ఫిన్‌టెక్‌ సర్వీసుల కోసం డిజిలాకర్‌ కేవైసీ మరింత సరళీకరణ.
* ప్రయోగశాలల్లో వజ్రాల తయారీకి ఐఐటీలకు ప్రత్యేక నిధులు
* 5జీ అప్లికేషన్ల తయారీకి 100 ప్రయోగశాలలు
* ఆర్టిఫిషియల్‌ ఇంటెలిజెన్స్‌ అభివృద్ధికి ప్రత్యేక నిధులు
* మేక్‌ ఇన్‌ ఇండియా, మేక్‌ ఎ వర్క్‌ మిషన్‌ ప్రారంభం
* స్టార్టప్‌లకు ప్రత్యేక ప్రోత్సాహం, రిస్క్‌ తగ్గించేందుకు కృతి
* ప్రభుత్వ పథకాల లబ్ధిదారులకు గుర్తింపుకార్డు పాన్‌ నెంబర్‌

01/02/2023 11:45(IST)

గృహ కొనుగోలుదారులకు గుడ్‌న్యూస్‌..

కొత్తగా ఇల్లు కొనుగోలు, కట్టుకోవాలనుకోవాలనుకునే వారికి మోదీ సర్కారు గుడ్‌న్యూస్‌ చెప్పింది. పీఎం ఆవాస్‌ యోజన పథకానికి ఈ సారి బడ్జెట్‌లో నిధులు పెంచింది. గత బడ్జెట్‌లో పీఎం ఆవాస్‌ యోజనకు 48 వేల కోట్ల రూపాయలు కేటాయించగా.. ఈ ఏడాది ఆ మొత్తాన్ని 66 శాతం పెంచి రూ.79వేల కోట్లు కేటాయించారు. వడ్డీ రేట్లు పెరిగిన వేళ గృహ కొనుగోలుదారులకు ఇది ఊరట కల్పించే అంశం.

01/02/2023 11:40(IST)

రైల్వేలకు రూ.2.40 లక్షల కోట్లు

తాజా బడ్జెట్‌లో రైల్వేలకు రికార్డు స్థాయిలో నిధులు కేటాయింపు చేస్తున్నాం. రైల్వేల అభివృద్ధికి ఈ బడ్జెట్‌లో రూ.2.40లక్షల కోట్లు కేటాయిస్తున్నాం. కొత్త రైల్వే లైన్ల నిర్మాణానికి పెద్ద పీట వేస్తాం. అలాగే మౌలిక వసతుల అభివృద్ధికి 33శాతం అధికంగా నిధులు కేటాయిస్తున్నాం. మూలధనం కింద రూ.10లక్షల కోట్లు కేటాయిస్తున్నాం.

01/02/2023 11:32(IST)

ప్రభుత్వ సర్వీసులను ప్రజలకు చేరువ చేసేందుకు చర్యలు

ఆదివాసీల అభివృద్ధి కోసం ప్రత్యేక కార్యక్రమం. ఆదివాసీ ప్రాంతాల్లో మౌలిక సౌకర్యాల కోసం రూ.15వేల కోట్లు. ఏకలవ్య పాఠశాలల్లో భారీ ఎత్తున ఉపాధ్యాయ నియామకాలు చేపడతాం. డిజిటల్‌ ఎపిగ్రఫీ మ్యూజియం ఏర్పాటు చేస్తాం. కారాగారాల్లో మగ్గిపోతున్న పేద ఖైదీలకు ఆర్థిక చేయూత అందిస్తాం.

01/02/2023 11:29(IST)

దేశవ్యాప్తంగా మరిన్ని నర్సింగ్‌ కళాశాలలు

దేశవ్యాప్తంగా మెడికల్‌ కళాశాలలతో పాటు, 157 నర్సింగ్‌ కాలేజ్‌లకు అనుమతి. త్వరలోనే ఐసీఎంఆర్‌ ప్రయోగశాలల విస్తృతిని మరింత పెంచుతాం. ఫార్మారంగంలో ఆవిష్కరణలకు ప్రోత్సాహం ఇస్తాం. వైద్య కళాశాలల్లో మరిన్ని ఆధునిక సౌకర్యాలు కల్పిస్తాం. అధ్యాపకుల శిక్షణకు డిజిటల్‌ విద్యావిధానం, జాతీయ డిజిటల్‌ లైబ్రరీ తీసుకొస్తాం.

01/02/2023 11:26(IST)

‘శ్రీఅన్న’ పథకం కోసం హైదరాబాద్‌ కేంద్రంగా పరిశోధనలు

* పీఎం మత్స్య సంపద యోజన కోసం అదనంగా రూ.6వేల కోట్లు. వ్యవసాయ రుణాలు రూ.20లక్షల కోట్ల వరకూ లక్ష్యం.
* రైతులు తమ ఉత్పత్తుల నిల్వ కోసం మరిన్ని గిడ్డంగులు. పంచాయతీ స్థాయిలో నిర్మాణానికి ఏర్పాట్లు.

01/02/2023 11:22(IST)

సప్త రుషుల రీతిలో ఏడు అంశాలకు బడ్జెట్‌ ప్రాధాన్యం

సప్త రుషుల రీతిలో ఏడు అంశాలకు బడ్జెట్‌లో ప్రాధాన్యం ఇస్తున్నాం.
* వ్యవసాయం కోసం డిజిటల్‌ ప్రభుత్వ మౌలిక సదుపాయాలు.
* వ్యవసాయ రంగానికి రుణ సదుపాయం, మార్కెటింగ్‌ సదుపాయం.
* వ్యవసాయ స్టార్టప్స్‌కు చేయూత, ప్రత్యేక నిధి ఏర్పాటు.
* రైతులు ఎదుర్కొంటున్న సమస్యల పరిష్కారానికి చర్యలు.
* పత్తిసాగు మెరుగుదల కోసం ప్రత్యేక చర్యలు. పత్తి కోసం ప్రత్యేకంగా మార్కెటింగ్‌ సదుపాయం.
* ఆత్మ నిర్భర్‌ భారత్‌ క్లీన్‌ పథకం ఉద్యానవన పంటకు చేయూత.
* చిరుధాన్యాల పంటలకు సహకారం. ఇందుకోసం ‘శ్రీఅన్న’ పథకం. రాగులు, జొన్నలు, సజ్జలు తదితర పంటలకు ప్రోత్సాహం

01/02/2023 11:15(IST)

అమృతకాలంలో ఇది తొలి బడ్జెట్‌

భారత దేశం తలెత్తుకుని నిలబడుతోంది. అమృత కాలంలో ఇది తొలి బడ్జెట్‌. డిజిటల్‌ చెల్లింపులు బాగా పెరిగాయి. సమష్టి ప్రగతి దిశగా భారత్‌ కదులుతోంది. స్వచ్ఛ భారత్‌లో భాగంగా 11.7కోట్లతో టాయ్‌లెట్స్‌ నిర్మాణం చేపట్టాం. 220 కోట్ల కొవిడ్‌ వ్యాక్సిన్‌లను అందించాం. 44కోట్ల మందికి పీఎం సురక్షా బీమా యోజన పథకం అందుతోంది. విశ్వకర్మ కౌశల్‌ పథకంలో భాగంగా చేనేత కార్మికులకు చేయూత అందిస్తున్నాం. ఉచిత ఆహార ధాన్యాల పథకానికి 2లక్షల కోట్లను కేంద్రం భరిస్తోంది.

01/02/2023 11:09(IST)

స్థిరీకరణతో కూడిన అభివృద్ధి దిశగా అడుగులు

‘కొవిడ్‌ సమయంలో పీఎం గరీబ్‌ కల్యాణ్‌ అన్నయోజన పథకం కింద 80 కోట్ల మందికి ఉచితంగా ఆహారధాన్యాలను సరఫరా చేశాం. ఈ ఏడాది కూడా ఇది కొనసాగుతుంది. స్థిరీకరణతో కూడిన అభివృద్ధి దిశగా భారత్‌ అడుగులు వేస్తోంది. దేశ తలసరి ఆదాయం రెట్టింపు అయింది. ఐదో అతిపెద్ద ఆర్థిక వ్యవస్థగా భారత్‌ నిలిచింది.

01/02/2023 11:07(IST)

ఆ బడ్జెట్‌ పునాదులపై తాజా బడ్జెట్‌ సమర్పిస్తున్నాం!

యువత, మహిళలు, ఎస్సీ, ఎస్టీ, బలహీన వర్గాలకు ఆశాదీపం ఈ బడ్జెట్‌. ఆర్థిక వృద్ధిరేటు 7శాతంగా ఉంటుందని అంచనా వేస్తున్నాం. ప్రపంచవ్యాప్తంగా కొవిడ్‌ కారణంగా ప్రగతి మందగిస్తే, భారత్‌ మాత్రం దూసుకుపోయింది. పూర్వ బడ్జెట్‌లు నిర్మించిన పునాదులపై ఈ బడ్జెట్‌ సమర్పిస్తున్నాం.

01/02/2023 11:04(IST)

ఎన్నికల కేంద్రంగానే బడ్జెట్‌.. కాంగ్రెస్‌ చీఫ్‌ విప్‌

‘‘2024 సాధారణ ఎన్నికలతో పాటు ఈ ఏడాది జరగనున్న రాష్ట్రాల అసెంబ్లీ ఎన్నికల కేంద్రంగానే బడ్జెట్‌ కేటాయింపులు ఉంటాయని భావిస్తున్నాం. గత మూడు బడ్జెట్‌లలో కేంద్రం మధ్యతరగతి, సామాన్య ప్రజలను విస్మరించింది. కేవలం కార్పొరేట్‌, ఉన్నత వర్గాలకే ప్రాధాన్యం ఇచ్చింది’’ - కె.సురేశ్‌, లోక్‌సభలో కాంగ్రెస్‌ చీఫ్‌విప్

01/02/2023 11:01(IST)

లోక్‌సభ ముందుకు కేంద్ర బడ్జెట్‌..

2023-24 ఆర్థిక సంవత్సరానికి గానూ కేంద్ర బడ్జెట్‌ను ఆర్థిక మంత్రి నిర్మలా సీతారామన్‌ బుధవారం ఉదయం 11 గంటలకు లోక్‌సభలో ప్రవేశపెట్టారు. అనంతరం బడ్జెట్‌పై ఆమె ప్రసంగిస్తున్నారు.

01/02/2023 10:53(IST)

బడ్జెట్‌ వేళ..ప్రత్యేక ఆకర్షణగా నిర్మలమ్మ చీరకట్టు..!

నేడు బడ్జెట్‌ పండగ. ఫిబ్రవరి ఒకటిన కేంద్రమంత్రి నిర్మలా సీతారామన్‌(Nirmala Sitharaman ) కురిపించే వరాల జల్లు కోసం దేశ ప్రజలంతా ఆసక్తిగా ఎదురుచూస్తున్నారు. అలాగే ప్రతి ఏడాది ఈ ప్రత్యేకమైన రోజున ఆమె ధరించే చీరలపైనా అందరి దృష్టి ఉంటుంది. ఈ రోజు బడ్జెట్ ట్యాబ్‌తో ఎరుపు రంగు చీరలో దర్శనమిచ్చారు. బ్రౌన్‌ రంగులో టెంపుల్‌ బోర్డర్‌లో ఉన్న ప్రకాశవంతమైన ఎరుపు చీరతో కనిపించారు.

పూర్తి కథనం కోసం క్లిక్‌ చేయండి..

01/02/2023 10:42(IST)

బడ్జెట్‌కు కేంద్ర కేబినెట్‌ ఆమోదం

ప్రధానమంత్రి నరేంద్రమోదీ అధ్యక్షతన కేంద్ర కేబినెట్‌ భేటీ జరిగింది. ఈ సమావేశంలో 2023-24 బడ్జెట్‌కు మంత్రిమండలి ఆమోదం తెలిపింది. మరికాసేపట్లో ఆర్థిక మంత్రి నిర్మలా సీతారామన్‌ బడ్జెట్‌ను లోక్‌సభలో ప్రవేశపెట్టనున్నారు.

01/02/2023 10:34(IST)

కేబినెట్‌ భేటీ ప్రారంభం

ప్రధాని నరేంద్రమోదీ అధ్యక్షతన కేంద్ర కేబినెట్‌ పార్లమెంట్‌లో భేటీ అయ్యింది. బడ్జెట్‌కు మంత్రి మండలి ఆమోదం తెలపనుంది. అనంతరం 11 గంటలకు కేంద్ర ఆర్థిక మంత్రి నిర్మలా సీతారామన్‌ లోక్‌సభలో బడ్జెట్‌ను ప్రవేశపెడతారు.

01/02/2023 10:18(IST)

నిర్మలమ్మకు.. ఐదో బడ్జెట్‌

ఆర్థిక మంత్రిగా నిర్మలా సీతారామన్‌ బడ్జెట్‌ను ప్రవేశపెట్టడం వరుసగా ఇది ఐదోసారి. ప్రస్తుత ప్రభుత్వానికి పూర్తిస్థాయి చివరి బడ్జెట్‌ ఇదే. వచ్చే ఏడాది సార్వత్రిక ఎన్నికలు జరగనున్న నేపథ్యంలో అప్పుడు ఓటాన్‌ అకౌంట్ బడ్జెట్‌ను ప్రవేశపెడుతారు.

01/02/2023 10:15(IST)

ఈసారీ.. కాగితరహిత బడ్జెట్టే..

కరోనా దృష్ట్యా గత రెండేళ్లుగా కాగిత రహిత బడ్జెట్‌నే ప్రవేశపెడుతున్నారు. అదే సంప్రదాయాన్ని ఈసారీ కొనసాగించారు. బడ్జెట్‌ ట్యాబ్‌ను ఎరుపు రంగు పౌచ్‌లో ఉంచి తీసుకొచ్చారు. ప్రజలు, ఎంపీలకు బడ్జెట్‌ వివరాలు అందుబాటులో ఉంచేందుకు యూనియన్‌ బడ్జెట్‌ మొబైల్‌ యాప్‌ను తీసుకొచ్చారు.

01/02/2023 10:00(IST)

పార్లమెంట్‌కు చేరుకున్న నిర్మలమ్మ బృందం

బడ్జెట్ ట్యాబ్‌తో కేంద్ర ఆర్థిక మంత్రి నిర్మలా సీతారామన్‌ బృందం పార్లమెంట్‌కు చేరుకుంది. ఉదయం 10 గంటలకు కేంద్ర కేబినెట్‌ సమావేశం కానుంది. ఈ భేటీలో కేంద్ర బడ్జె్ట్‌కు ఆమోదం తెలపనున్నారు. 11 గంటలకు లోక్‌సభలో బడ్జెట్‌ను ప్రవేశపెట్టనున్నారు.

01/02/2023 09:58(IST)

అందరి ఆకాంక్షలకు తగ్గట్లే బడ్జెట్‌..

దేశంలోని ప్రతి వర్గానికి చెందిన ప్రజల ఆకాంక్షలకు అనుగుణంగానే కేంద్ర బడ్జెట్ ఉంటుందని ఆర్థిక శాఖ సహాయ మంత్రి పంకజ్‌ చౌధరీ తెలిపారు. అందరి అంచనాలకు తగ్గట్లే పద్దును రూపొందించినట్లు చెప్పారు.

01/02/2023 09:57(IST)

ఆశల ఓరుగల్లు.. కురిసేనా వరాల జల్లు!

వచ్చే ఏడాది పార్లమెంట్‌ ఎన్నికలు జరగనున్న నేపథ్యంలో కేంద్ర ప్రభుత్వం బుధవారం చివరి పూర్తిస్థాయి బడ్జెట్‌ ప్రవేశపెట్టనుంది. ఈ తరుణంలో ఆర్థిక మంత్రి నిర్మలా సీతారామన్‌పై అన్ని వర్గాల ప్రజలు ఆశలు పెట్టుకున్నారు. పూర్తి కథనం కోసం క్లిక్‌ చేయండి..

01/02/2023 09:50(IST)

మార్కెట్లలో ‘బడ్జెట్‌’ జోష్‌..

మరికాసేపట్లో కేంద్ర ప్రభుత్వం పార్లమెంటులో బడ్జెట్‌ (Budget 2023)ను ప్రవేశపెట్టనున్న తరుణంలో దేశీయ స్టాక్‌ మార్కెట్‌ (Stock Market) సూచీలు ఈ రోజు లాభాలతో ప్రారంభమయ్యాయి. అంతర్జాతీయ మార్కెట్లలోని సానుకూల సంకేతాలు కూడా మార్కెట్లకు దన్నుగా నిలుస్తున్నాయి. అయితే, బడ్జెట్‌ (Budget 2023)లోని కేటాయింపులు, వివిధ రంగాలకు ప్రభుత్వ ప్రాధాన్యతలు నేడు మార్కెట్ల గమనాన్ని నిర్దేశిస్తాయని నిపుణులు విశ్లేషిస్తున్నారు. ఉదయం 9.50 గంటలకు సెన్సెక్స్‌ 360 పాయింట్ల లాభంతో 59,910 వద్ద, నిఫ్టీ 100 పాయింట్ల లాభంతో 17,761 వద్ద ట్రేడ్‌ అవుతున్నాయి.

01/02/2023 09:47(IST)

పన్నుల భారం తగ్గింపుపై మధ్యతరగతి ఆశలు

అటు ఉరుముతున్న ఆర్థికమాంద్యం.. ఇటు తరుముకొస్తున్న ఎన్నికలు.. ఆర్థిక క్రమశిక్షణకు పెద్దపీట వేయాలా? జనాకర్షణకు పట్టం కట్టాలా? కేంద్ర బడ్జెట్‌ వేళ మోదీ సర్కారు ముంగిట నిలిచిన అతిపెద్ద సవాళ్లు ఇవి. తరాజు ఎటువైపు ఎక్కువగా మొగ్గినా రెండో దానిపై తీవ్ర ప్రభావం తప్పదు. అత్యంత చాకచక్యంగా అడుగులేయాల్సిన తరుణమిది.

పూర్తి కథనం కోసం క్లిక్‌ చేయండి..

01/02/2023 09:36(IST)

బడ్జెట్‌ ట్యాబ్‌తో రాష్ట్రపతి భవన్‌కు నిర్మలమ్మ

2023-24 ఆర్థిక సంవత్సరానికి గానూ కేంద్ర పద్దును ఆర్థిక మంత్రి నిర్మలా సీతారామన్‌ మరికొద్దిసేపట్లో పార్లమెంట్‌లో ప్రవేశపెట్టనున్నారు. బడ్జెట్‌ ట్యాబ్‌తో నిర్మలమ్మ బృందం ఆర్థిక శాఖ కార్యాలయం నుంచి నేరుగా రాష్ట్రపతి భవన్‌కు చేరుకుంది. ప్రొటోకాల్‌ ప్రకారం దేశ ప్రథమ పౌరురాలు ద్రౌపదీ ముర్మును కలిసిన ఆర్థిక మంత్రి బృందం.. బడ్జెట్‌ గురించి రాష్ట్రపతికి వివరించారు. అక్కడి నుంచి పార్లమెంట్‌కు బయల్దేరనున్నారు. ఉదయం 11 గంటలకు లోక్‌సభలో బడ్జెట్‌ను ప్రవేశపెట్టనున్నారు.

31/01/2023 17:43(IST)

నవంబరు నాటికి 10.6 కోట్ల డీమ్యాట్‌ ఖాతాలు

వార్షిక ప్రాతిపదికన 2022 నవంబరు నెలలో డీమ్యాట్‌ ఖాతాల సంఖ్య 39 శాతం పెరిగి 10.6 కోట్లకు చేరినట్లు ఆర్థిక సర్వే పేర్కొంది. అయితే, 2021-22తో పోలిస్తే మాత్రం 2022-23లో కొత్త ఖాతాల సంఖ్య తగ్గినట్లు వెల్లడించింది. దేశీయ స్టాక్‌ మార్కెట్లలో ఒడుదొడుకులు, ఐపీఓల సంఖ్య తగ్గడం సహా భౌగోళిక రాజకీయ ఉద్రిక్తతలే అందుకు కారణమని వివరించింది. ఈ ఆర్థిక సంవత్సరంలో నవంబరు వరకు 1.71 కోట్ల ఖాతాలు జత కాగా.. క్రితం ఏడాది ఇదే కాలంలో 2.2 కోట్ల ఖాతాలను తెరవడం గమనార్హం.

31/01/2023 16:35(IST)

బ్యారెల్‌ 100 డాలర్లలోపు ఉంటే వృద్ధికి ఢోకా లేదు: సీఈఏ

దేశ ఆర్థిక వ్యవస్థ మెరుగ్గా రాణిస్తోందని, రాబోయే దశాబ్ద కాలంలో 6.5 -7 శాతం వృద్ధిని నమోదు చేసే అవకాశం ఉందని కేంద్ర ముఖ్య ఆర్థిక సలహాదారు (CEA) వి అనంత నాగేశ్వరన్‌ అన్నారు. కేంద్ర ఆర్థిక మంత్రి నిర్మలా సీతారామన్‌ ఆర్థిక సర్వేను పార్లమెంట్‌లో ప్రవేశపెట్టిన అనంతరం ఆయన విలేకరులతో మాట్లాడారు. 2023-24 ఆర్థిక సంవత్సరంలో ద్రవ్యోల్బణం అదుపులో ఉంటుందని చెప్పారు. ప్రస్తుత ఆర్థిక సంవత్సరంలో 6.5 శాతం వృద్ధికి అవకాశం ఉంటుందన్నారు. అయితే, అంతర్జాతీయ మార్కెట్‌లో చమురు ధర 100 డాలర్లు దాటకుంటే వృద్ధి అంచనాలకు ఏమాత్రం ఢోకా లేదని నాగేశ్వరన్‌ అన్నారు.

31/01/2023 15:52(IST)

ఏడాదికి కోటి వాహనాలు..

దేశంలో ఎలక్ట్రిక్‌ వాహన పరిశ్రమ భారీ వృద్ధి సాధించబోతోందని ఆర్థిక సర్వే తెలిపింది. 2030 నాటికి ఏడాదికి కోటి వాహన విక్రయాల మార్క్‌ను అందుకుంటుందని అంచనా వేసింది. ప్రత్యక్షంగా, పరోక్షంగా 5 కోట్ల ఉద్యోగాలను ఈ రంగం సృష్టిస్తుందని తెలిపింది. 2022లో ఈవీల అమ్మకాల సంఖ్య 10 లక్షలుగా ఉంది. వాహన విక్రయాల విషయంలో ఇప్పటికే భారత ఆటోమొబైల్‌ రంగం జపాన్‌, జర్మనీని దాటేసి మూడో స్థానానికి చేరిందని సర్వే తెలిపింది.

31/01/2023 15:40(IST)

9 ఏళ్లలో ₹4 లక్షల కోట్లు.. డిజిన్వెస్ట్‌మెంట్‌తో వచ్చిన మొత్తమిదీ..

గడిచిన 9 ఏళ్లలో ప్రభుత్వ రంగ సంస్థల్లో పెట్టుబడుల ఉపసంహరణ ద్వారా రూ.4.07 లక్షల కోట్లు సమకూరినట్లు కేంద్ర ఆర్థిక సర్వే తెలిపింది. ప్రస్తుత ఆర్థిక సంవత్సరంలో రూ.65 వేల కోట్లను లక్ష్యంగా నిర్దేశించుకోగా.. 48 శాతం లక్ష్యాన్ని ప్రభుత్వం చేరుకుందని వెల్లడించింది. తద్వారా రూ.31 వేల కోట్లు ఖజానాకు చేరినట్లు పేర్కొంది. 2014 తర్వాత వచ్చిన ప్రభుత్వం అభివృద్ధిలో ప్రైవేటు భాగస్వామ్యానికి పెద్ద పీట వేస్తోందని ఆర్థిక సర్వే తెలిపింది. ఐడీబీఐతో పాటు షిప్పింగ్‌ కార్పొరేషన్‌ ఆఫ్‌ ఇండియా, ఎన్‌ఎండీసీ స్టీల్‌ లిమిటెడ్‌, బీఈఎంఎల్‌, హెచ్‌ఎల్‌ఎల్‌ లైఫ్‌కేర్‌, కంటెయినర్‌ కార్పొరేసన్‌ ఆఫ్‌ ఇండియా, వైజాగ్‌ స్టీల్‌ ప్లాంట్‌ వంటి సంస్థలను విక్రయించే అంశంపై ప్రభుత్వం పనిచేస్తోంది. ప్రస్తుతం ఈ ప్రక్రియ వివిధ దశల్లో ఉంది.

31/01/2023 14:47(IST)

ఎఫ్‌డీఐలు పుంజుకుంటాయ్‌

రానున్న నెలల్లో దేశంలోకి విదేశీ ప్రత్యక్ష పెట్టుబడులు (FDI) మునుపటిలా రానున్నాయని ఆర్థిక సర్వే అంచనా వేసింది. దేశ వృద్ధి రేటు, వ్యాపార అనుకూల వాతావరణం ఇందుకు కారణమని తెలిపింది. రష్యా-ఉక్రెయిన్‌ యుద్ధం, ద్రవ్యోల్బణం కట్టడికి కేంద్ర బ్యాంకుల కఠిన ద్రవ్య పరపతి నిర్ణయాలు కారణంగా ఎఫ్‌ఐడీలు నెమ్మదించాయని తెలిపింది. అయితే, దేశం స్థిరమైన వృద్ధిని నమోదు చేస్తుండడంతో పెట్టుబడులు వెల్లువెత్తనున్నాయని ఆర్థిక సర్వే అభిప్రాయపడింది. ప్రస్తుత ఆర్థిక సంవత్సరం తొలి అర్ధ భాగంలో 30 బిలియన్‌ డాలర్లు విదేశీ పెట్టుబడులు రాగా.. 2021-22లో అత్యధికంగా 84. బిలియన్‌ డాలర్ల ఎఫ్‌డీఐలు వచ్చాయి.

31/01/2023 13:59(IST)

ఆర్థిక సర్వే అంటే ఏమిటీ..?

గత సంవత్సర కాలంలో దేశ ఆర్థిక పనితీరును.. రాబోయే సంవత్సరంలో ఆర్థికంగా ఎదురయ్యే సవాళ్లను ముందుగానే అంచనా వేసి చెప్పేదే ఈ ఎకనమిక్‌ సర్వే. దేశ ఆర్థిక వ్యవస్థకు దిశానిర్దేశం చేసేదిగా భావించే ఈ సర్వే ఆధారంగానే ఏటా బడ్జెట్‌ రూపకల్పన జరుగుతుంది. ఆర్థిక మంత్రిత్వశాఖ రూపొందించే ఈ సర్వే.. రానున్న రోజుల్లో దేశం ముందున్న సవాళ్లు, వాటిని ఎదుర్కోవడానికి తీసుకోవాల్సిన చర్యలను ముందుగానే అంచనా వేసి పలు సూచనలు చేస్తుంది. పూర్తి వివరాల కోసం క్లిక్‌ చేయండి..

31/01/2023 13:53(IST)

ఎంఎస్‌ఎంఈలను ఆదుకున్న అత్యవసర రుణ హామీ పథకం

కొవిడ్‌ కారణంగా బాగా దెబ్బతిన్న సూక్ష్మ చిన్న, మధ్య తరహా పరిశ్రమలను (MSME) కేంద్ర ప్రభుత్వం తీసుకొచ్చిన అత్యసవర రుణ హామీ పథకం (ELCGS) ఆదుకుందని ఆర్థిక సర్వే తెలిపింది. ప్రస్తుతం దేశంలో 6 కోట్లకు పైగా ఎంఎస్‌ఎంఈలు ఉన్నాయని, 12 కోట్ల మందికి ఉపాధి కల్పిస్తున్నాయని పేర్కొంది. జీడీపీలో ఈ రంగం వాటా 35 శాతం ఉందని తెలిపింది. అలాంటి ఎంఎస్‌ఎంఈలకు 2022 జనవరి-నవంబర్‌ మధ్య సగటున 30.6 శాతం అధికంగా రుణాలు మంజూరు చేసినట్లు ఆర్థిక సర్వే తెలిపింది.

31/01/2023 13:25(IST)

2023-24లో 6.5శాతం వృద్ధి: ఆర్థిక సర్వేలోని ముఖ్యాంశాలివే..

*వచ్చే ఆర్థిక సంవత్సరంలో దేశంలో 6.5శాతం వృద్ధి నమోదయ్యే అవకాశముందని ఆర్థిక సర్వే అంచనా వేసింది. ప్రస్తుత ఆర్థిక సంవత్సరంలో వృద్ధి 7శాతంగా ఉండనున్నట్లు తెలిపింది.

* అమెరికా ఫెడ్‌ వడ్డీరేట్లు మరింత పెరగొచ్చనే అంచనాలున్నాయి. దీంతో రూపాయి క్షీణత సవాళ్లు కొనసాగే అవకాశముంది.

* ప్రపంచవ్యాప్తంగా వినియోగ వస్తువుల ధరలు అధికంగానే ఉన్నాయి. దీంతో ద్రవ్యలోటు మరింత పెరగనుంది. రూపాయి ఒత్తిడికి గురవ్వొచ్చు.

* మహమ్మారి నుంచి భారత్‌ వేగంగా కోలుకుంటోంది. దేశీయ డిమాండ్‌, క్యాపిటల్‌ పెట్టుబడులు వృద్ధిని బలోపేతం చేస్తున్నాయి.

31/01/2023 13:00(IST)

లోక్‌సభ ముందుకు ఆర్థిక సర్వే..

బడ్జెట్‌ సమావేశాల్లో భాగంగా 2022-23 ఆర్థిక సర్వేను కేంద్ర ఆర్థిక శాఖ మంత్రి నిర్మలా సీతారామన్‌ మంగళవారం లోక్‌సభలో ప్రవేశపెట్టారు. పార్లమెంట్‌ ఉభయ సభలనుద్దేశించి రాష్ట్రపతి ద్రౌపదీ ముర్ము ప్రసంగం పూర్తయిన తర్వాత ఆమె ఆర్థిక సర్వేను సమర్పించారు. ఆర్థిక సర్వే సమర్పణ అనంతరం లోక్‌సభను రేపటికి (ఫిబ్రవరి 1వ తేదీ)కి వాయిదా వేశారు.

31/01/2023 12:19(IST)

డ్రాగన్‌ శక్తిని ఎదుర్కోవాలంటే..!

భారత్‌ ముంగిట చైనా ఆయుధాలను మోహరించి కూర్చొంది. ఈ పరిస్థితుల్లో మన దళాలను అత్యాధునిక ఆయుధాలతో బలోపేతం చేయకపోతే భవిష్యత్తులో సమస్యలు ఎదుర్కోవాల్సి వస్తుంది. ఈ నేపథ్యంలో రక్షణ రంగానికి నిధులు పెంచాల్సిన అవసరం ఉంది.

పూర్తి కథనం కోసం క్లిక్‌ చేయండి..

31/01/2023 11:53(IST)

ప్రపంచ వృద్ధిలో భారత్‌, చైనాదే సగం వాటా: ఐఎంఎఫ్‌

కేంద్ర ప్రభుత్వం బుధవారం బడ్జెట్‌ (Budget 2023) ప్రవేశపెట్టనున్న తరుణంలో ‘అంతర్జాతీయ ద్రవ్య నిధి (IMF)’ భారత వృద్ధిరేటుకు సంబంధించి కీలక గణాంకాలను వెల్లడించింది. ఈ ఏడాది దేశ జీడీపీ (GDP) వృద్ధిరేటు 6.1 శాతానికి పరిమితమవుతుందని తెలిపింది. వచ్చే ఆర్థిక సంవత్సరానికి అది 6.8 శాతానికి పుంజుకుంటుందని అంచనా వేసింది. ప్రపంచ ఆర్థిక ఔట్‌లుక్‌కు సంబంధించిన జనవరి అప్‌డేట్‌ను ఐఎంఎఫ్‌ మంగళవారం విడుదల చేసింది.

పూర్తి కథనం కోసం క్లిక్‌ చేయండి..

31/01/2023 11:47(IST)

రాష్ట్రపతి ప్రసంగంలోని ముఖ్యాంశాలు..

*పేదలు, గిరిజనులు, బలహీనవర్గాల కోసం ప్రభుత్వం పనిచేస్తోంది.
*మూడు కోట్ల మందికి సొంత ఇళ్లు నిర్మించాం.
*మహిళా సాధికారతను ప్రోత్సహిస్తున్నాం.
* చిన్న, సన్నకారు రైతులను ఆదుకుంటున్నాం. ఫసల్‌ బీమా యోజన, కిసాన్‌ కార్డు వంటి పథకాలు తీసుకొచ్చాం. పంట నష్టపోయిన రైతులను అన్ని విధాలా ఆదుకుంటాం. కనీస మద్దతు ధర పెంచి రైతులను బలోపేతం చేస్తున్నాం.
*ఆదివాసీ ప్రాంతాల్లో ఆదర్శ పాఠశాలలు ఏర్పాటు చేశాం.
* వెనుకబడిన జిల్లాల అభివృద్ధికి ప్రత్యేక చర్యలు తీసుకున్నాం.
*తీవ్రవాద ప్రభావిత జిల్లాల అభివృద్ధికి చర్యలు తీసుకున్నాం.

31/01/2023 11:42(IST)

మునుపెన్నడూ లేనంత ఆత్మవిశ్వాసంతో భారత్‌ పురోగమిస్తోంది..

రాష్ట్రపతి ప్రసంగంలోని ముఖ్యాంశాలు..
*అన్ని వర్గాల అభివృద్ధికి కృషి జరుగుతోంది.
*రికార్డు స్థాయిలో జీఎస్టీ వసూళ్లు నమోదవుతున్నాయి.
*భారత్‌ మునుపెన్నడూ లేనంత ఆత్మవిశ్వాసంతో పురోగమిస్తోంది. పేదరికం లేని భారత్‌ నిర్మాణం కోసం కృషి జరుగుతోంది.
* భారత డిజిటల్‌ నెట్‌వర్క్‌ వ్యవస్థ ప్రపంచానికే ఉదాహరంగా మారింది.

31/01/2023 11:32(IST)

డిజిటల్‌ ఇండియా దిశగా అడుగులు..

సాంకేతికతను అందిపుచ్చుకుని నూతన ఆవిష్కరణలు తీసుకొస్తున్నామని రాష్ట్రపతి తెలిపారు. ఆయుష్మాన్‌ భారత్‌ వంటి మెరుగైన పథకాలు తీసుకొచ్చామన్నారు. డిజిటల్‌ ఇండియా దిశగా భారత్‌ ముందుకెళ్తోందని తెలిపారు. అన్ని వర్గాల ప్రజల సంక్షేమం కోసం ప్రభుత్వం కృషి చేస్తోందన్నారు.

31/01/2023 11:25(IST)

పౌరులందరి అభివృద్ధే లక్ష్యంగా ప్రభుత్వం పనిచేస్తోంది..

పార్లమెంట్ బడ్జెట్‌ సమావేశాలు ప్రారంభమయ్యాయి. రాష్ట్రపతి ద్రౌపదీ ముర్ము ఉభయసభలనుద్దేశించి ప్రసంగిస్తున్నారు. దేశం ఆత్మనిర్భర్‌ భారత్‌గా అవిర్భవిస్తోందని, పౌరులందరి అభివృద్ధే లక్ష్యంగా ప్రభుత్వం పనిచేస్తోందని రాష్ట్రపతి తెలిపారు. తొమ్మిదేళ్ల ప్రభుత్వంలో పౌరుల ఆత్మవిశ్వాసం పెరిగిందన్నారు. ఇప్పుడు యావత్‌ ప్రపంచం ఆశావహ దృక్పథంతో చూస్తోందని, రాబోయే పాతికేళ్లలో వికసిత భారతం దిశగా అడుగులు పడాలన్నారు. ప్రపంచానికి పరిష్కారాలు చూపేలా భారత్‌ తయారైందని అన్నారు.

31/01/2023 11:09(IST)

మొదలైన రాష్ట్రపతి ప్రసంగం

భారత పార్లమెంటు బడ్జెట్‌ సమావేశాలు మంగళవారం ఉదయం 11 గంటలకు ప్రారంభమయ్యాయి. సెంట్రల్‌హాలులో ఉభయసభల సభ్యులను ఉద్దేశించి రాష్ట్రపతి ద్రౌపదీముర్ము ప్రసంగం ప్రారంభించారు.

31/01/2023 11:06(IST)

అందరి ఆకాంక్షలు నెరవేర్చేలా బడ్జెట్ : ప్రధాని మోదీ

దిల్లీ : 2023 బడ్జెట్ సమావేశాలు మరికాసేపట్లో ప్రారంభం కానున్నాయి. పార్లమెంట్‌లో రాష్ట్రపతి ఉభయసభలనుద్దేశించి ప్రసంగించనున్నారు. ఈ సందర్భంగా ప్రధాని నరేంద్ర మోదీ మాట్లాడుతూ..‘ఇది భారత రాజ్యాంగానికి ఇచ్చే గౌరవం. ఆదివాసీలకు, మహిళలకు ఇచ్చే గౌరవం. దేశ ఆర్థిక మంత్రి కూడా మహిళే. ప్రస్తుత పరిస్థితుల్లో.. యావత్ ప్రపంచం భారత్ వైపే చూస్తోంది. అందరి ఆకాంక్షలు నెరవేర్చేలా నిర్మలా సీతారామన్ బడ్జెట్ రూపొందించారని భావిస్తున్నా. ఇండియా ఫస్ట్.. సిటిజన్ ఫస్ట్‌ను ముందుకు తీసుకువెళతాం. అన్ని అంశాలపై సభలో చర్చ జరగాలని కోరుకుంటున్నాను’ అని ప్రధాని అన్నారు.

31/01/2023 10:53(IST)

బడ్జెట్ సమావేశాలు.. పార్లమెంట్‌కు చేరుకున్న రాష్ట్రపతి

పార్లమెంట్‌ బడ్జెట్‌ సమావేశాలు మంగళవారం ప్రారంభం కానున్నాయి. మరికాసేపట్లో రాష్ట్రపతి ద్రౌపదీ ముర్ము ఉభయ సభలనుద్దేశించి ప్రసంగించనున్నారు. రాష్ట్రపతి భవన్‌ నుంచి ఆమె పార్లమెంట్‌కు చేరుకున్నారు.

31/01/2023 10:33(IST)

‘తయారీ’కి ప్రోత్సాహం?

ఒకవైపు.. ఏప్రిల్‌కల్లా ప్రపంచంలో అత్యధిక జనాభా గల దేశ హోదా.. మరోవైపు.. 5 ట్రిలియన్ల ఆర్థిక వ్యవస్థగా ఎదగాలని లక్ష్యం.. ఇంకోవైపు.. వచ్చే ఎన్నికల ముందు ప్రవేశపెట్టే చివరి పూర్తిస్థాయి బడ్జెట్‌ (Budget 2023).. మధ్యతరగతి ప్రజలు, వేతన జీవులు ఆదాయపన్ను రాయితీలను కోరుకుంటున్నప్పటికీ ప్రస్తుత పరిస్థితుల్లో అందులో మార్పులు పెద్దగా సాధ్యంకాకపోవచ్చన్న భావన ఆర్థిక నిపుణుల్లో వ్యక్తమవుతోంది.

పూర్తి కథనం కోసం క్లిక్‌ చేయండి..

31/01/2023 10:30(IST)

ధరలు, ఉద్యోగ కోతలు.. ఇవే సగటు జీవి సమస్యలు!

ఓవైపు ప్రపంచవ్యాప్తంగా మాంద్యం (Recession) భయాలు బలపడుతున్నాయి. మరోవైపు అధిక ధరలతో సామాన్యులు అతలాకుతలమవుతున్నారు. పెరిగిన వడ్డీరేట్లు నెలవారీ వాయిదాల రూపంలో భారంగా పరిణమించాయి. సరిగ్గా ఈ తరుణంలో ఉద్యోగాల కోత గుబులు పుట్టిస్తోంది. ఈ పరిస్థితుల మధ్య కేంద్ర ప్రభుత్వం ఫిబ్రవరి 1న బడ్జెట్‌ (Budget 2023) ప్రవేశపెట్టబోతోంది.

పూర్తి కథనం కోసం క్లిక్‌ చేయండి..

31/01/2023 10:28(IST)

కొత్త బడ్జెట్‌... కోటి ఆశలు!

ఏటా కొత్త బడ్జెట్‌ (Budget 2023) రాబోతున్నదనగానే అన్ని వర్గాల్లో ఎన్నెన్నో ఆశలు! అందులో సాకారమయ్యే వాటికన్నా, నెరవేరనివే ఎక్కువ. ఈసారి కేంద్ర ఆర్థిక మంత్రి నిర్మలా సీతారామన్‌ సమర్పించే ఆర్థిక పద్దు- లోక్‌సభ ఎన్నికలకు ముందు వచ్చే చివరి పూర్తిస్థాయి బడ్జెట్‌ (Budget 2023). ఈ ఏడాది పలు రాష్ట్రాల్లో అసెంబ్లీ ఎన్నికలు జరగనున్నాయి. ద్రవ్యోల్బణమూ అదుపులోకి రాలేదు. ఇప్పటికే అధిక రుణభారం మోస్తున్న ప్రభుత్వం- పారిశ్రామిక, వ్యవసాయ రంగాల అవసరాలు తీర్చగలిగే స్థాయిలో కేటాయింపులు చేయగలుగుతుందా అన్నదే కీలక ప్రశ్న!

పూర్తి కథనం కోసం క్లిక్‌ చేయండి..

31/01/2023 10:24(IST)

ఉదయం 11 గంటలకు రాష్ట్రపతి ప్రసంగం.. ఆ వెంటనే ఆర్థిక సర్వే

దిల్లీ: అంతర్జాతీయంగా ఆర్థిక మాంద్యం ఉరుముతున్న వేళ భారత పార్లమెంటు బడ్జెట్‌ సమావేశాలు మంగళవారం ఉదయం 11 గంటలకు ప్రారంభంకానున్నాయి. సెంట్రల్‌హాలులో ఉభయసభల సభ్యులను ఉద్దేశించి ప్రసంగించడం ద్వారా రాష్ట్రపతి ద్రౌపదీముర్ము వీటికి శ్రీకారం చుడతారు. గత ఏడాది జులై 25న రాష్ట్రపతిగా బాధ్యతలు చేపట్టిన తర్వాత ఆమె లోక్‌సభ, రాజ్యసభల సంయుక్త సమావేశంలో ప్రసంగించడం ఇదే తొలిసారి. రాష్ట్రపతి ప్రసంగం అయిన వెంటనే కేంద్ర ఆర్థిక మంత్రి నిర్మలాసీతారామన్‌ ఆర్థిక సర్వేను సభ ముందుంచనున్నారు. బుధవారం ఉదయం 11 గంటలకు ఆమె దిగువ సభలో 2023-24 బడ్జెట్‌ను ప్రవేశపెడతారు. గురువారం నుంచి ఉభయ సభల్లో రాష్ట్రపతి ప్రసంగంపై ధన్యవాదాలు తెలిపే తీర్మానంపై చర్చ ప్రారంభమవుతుంది. ప్రధాని మోదీ జవాబు ఇవ్వనున్నారు. ఆ వెంటనే బడ్జెట్‌పై చర్చ మొదలవుతుంది.ఆర్థిక మంత్రి సమాధానమిస్తారు. వివిధ శాఖలకు కేటాయింపులపై స్థాయీ సంఘాలు అధ్యయనం జరిపి నివేదికలు సమర్పించడానికి పార్లమెంటుకు ఫిబ్రవరి 14 నుంచి మార్చి 12వ తేదీ వరకు విరామం ఇవ్వనున్నారు. రెండో దఫా సమావేశాల్లో.. శాఖల వారీ బడ్జెట్‌ కేటాయింపులు, ఆర్థిక బిల్లుపై చర్చిస్తారు.