Breaking | Feedback | ePratibha | E-PAPER | Pratibha

K.Viswanath: కె.విశ్వనాథ్‌ భౌతికకాయానికి అంత్యక్రియలు పూర్తి

ప్రముఖ దర్శకుడు కళాతపస్వి కె.విశ్వనాథ్‌ (K.Viswanath) భౌతికకాయానికి అంత్యక్రియలు పూర్తయ్యాయి. గత కొన్ని రోజులుగా అనారోగ్యంతో బాధపడుతున్న ఆయన గురువారం రాత్రి తుది శ్వాస (K Viswanath passed away) విడిచిన సంగతి తెలిసిందే. విశ్వనాథ్‌ మృతి పట్ల సినీ, రాజకీయ ప్రముఖులు సంతాపం తెలిపారు.

Updated : 03 Feb 2023 15:06 IST

03/02/2023 15:04(IST)

ముగిసిన కె.విశ్వనాథ్‌ అంత్యక్రియలు

లెజెండరీ దర్శకుడు కె.విశ్వనాథ్‌ అంత్యక్రియలు ముగిశాయి. ఫిలింనగర్‌లోని ఆయన నివాసం నుంచి పంజాగుట్ట శ్మశాన వాటిక వరకూ అంతిమయాత్ర సాగింది. కె.విశ్వనాథ్‌ని కడసారి చూసేందుకు అభిమానులు, ప్రజలు రహదారిపైకి చేరుకున్నారు. అనంతరం శ్మశానవాటికలో ఆయన పార్థివ దేహాన్ని ఖననం చేశారు.

03/02/2023 13:22(IST)

కృష్ణం రాజుకు కళాతపస్వి గురు సమానులు - కృష్ణం రాజు సతీమణి

కె. విశ్వనాథ్ దర్శకత్వం వహించిన ‘శివమెత్తిన సత్యం’, ‘కళ్యాణ చక్రవర్తి’, ‘అల్లుడు పట్టిన భారతం’ వంటి చిత్రాల్లో కృష్ణం రాజు నటించారు. హీరో కావాలని చెన్నైకి వెళ్లిన కృష్ణంరాజు ప్రముఖ దర్శకుడు ఆదూర్తి సుబ్బారావు వద్దకు వెళ్లారు. ఆ సమయంలో కృష్ణంరాజు నటనా ప్రావీణ్యాన్ని పరిశీలించాలని తన అసిస్టెంట్ అయిన కె.విశ్వనాథ్‌కు సుబ్బారావు చెప్పారట. కొన్ని భావోద్వేగభరిత సంభాషణలు ఇచ్చి వాటిని చెప్పాలని కృష్ణంరాజును అడగగా... ఆ డైలాగ్స్ చెబుతున్న క్రమంలో విశ్వనాథ్‌ కళ్లలో నీళ్లు తిరిగాయట. అది గమనించి కృష్ణం రాజును హీరోగా ఫైనల్ చేశారు. ఒక రకంగా విశ్వనాథ్‌ తన గురు సమానులు అని కృష్ణం రాజు అనేవారు

- కృష్ణం రాజు సతీమణి శ్యామలా దేవి

03/02/2023 12:20(IST)

ఆ సమయంలో ఎన్నో విషయాలు నేర్పారు: వెంకటేశ్‌

‘‘లెజెండరీ డైరెక్టర్‌ విశ్వనాథ్‌గారు లేరంటే నిజంగా షాకింగ్‌గా ఉంది. దేశంలో ఉన్న గొప్ప దర్శకుల్లో ఆయన కూడా ఒకరు. ‘స్వర్ణకమలం’ సినిమా సందర్భంగా ఎన్నో విషయాలు నేర్పారు. ఈ జనరేషన్‌ మాత్రమే కాదు, భవిష్యత్‌ తరాలు కూడా ఆయన సినిమాను గుర్తు పెట్టుకుంటాయి. ఆయన కుటుంబ సభ్యులకు నా ప్రగాఢ సానుభూతి తెలియజేస్తున్నా’’

03/02/2023 12:06(IST)

ఆయనకు వినోదం అందించేందుకు విశ్వనాథ్‌ వెళ్లారు: కోట శ్రీనివాసరావు

‘‘విశ్వనాథ్‌గారి గురించి నా మనసులో ఉన్నది చెప్పాలంటే ‘విశ్వ దర్శకుడికి వినోదమందించ, విశ్వనాథుడేగే విశ్వపురికి’. అనిపిస్తోంది. శంకరాభరణం విడుదలైన ఫిబ్రవరి 2నే ఆయన శివుడి దగ్గరకు వెళ్లారు’’

03/02/2023 11:35(IST)

దర్శకత్వం చేయకపోయినా మా కథలో నటించారు: పరుచూరి గోపాలకృష్ణ

‘‘ఒక తరం కదిలి వెళ్లిపోయినంత బాధగా ఉంది. ఫిబ్రవరి 2న ‘శంకరాభరణం’ విడుదలైన రోజునే ఆయన కన్నుమూయడం చూస్తే, ఒక గొప్ప సినిమాను మనకు అందించి సంతృప్తితో వెళ్లిపోయారనిపించింది. ఆయనతో సినిమా చేయాలని రెండు, మూడు సార్లు కథ వినిపించా. మా ఇద్దరి బాడీ లాంగ్వేజ్‌లు వేరు. మేము రాసిన కథలకు ఆయన దర్శకత్వం వహించకపోయినా, నటించారు. ‘నరసింహనాయుడు’లో ఆయన పాత్రను జీవితంలో మర్చిపోలేం. ఆ సినిమా స్క్రీన్‌ప్లే విషయంలోనూ పలు సలహాలు ఇచ్చారు. అలాంటి గొప్ప వ్యక్తి కన్నుమూడం నిజంగా బాధాకరం. ఆయన కుటుంబ సభ్యులకు ప్రగాఢ సానుభూతి తెలియజేస్తున్నా’’

03/02/2023 11:22(IST)

కె.విశ్వనాథ్‌ మృతి చెందారన్న వార్త నన్నెంతో బాధించింది: ఇళయరాజా

‘‘ఇండియన్‌ ఫిల్మ్‌ హిస్టరీలో గొప్ప దర్శకుడిగా కీర్తిని పొందిన కె.విశ్వనాథ్‌గారు కన్నుమూశారన్న వార్త నన్ను ఎంతో బాధించింది. ఆయన ఆత్మకు చేకూరాలని ప్రార్థిస్తున్నా’’

03/02/2023 11:14(IST)

కె.విశ్వనాథ్‌ గొప్ప విజనరీ డైరెక్టర్‌: గుణశేఖర్‌

‘‘మాటలు కనపడాలి’ అన్న దర్శకత్వ ప్రాథమిక సూత్రం ఆయన సినిమాల్లో ప్రస్పుటంగా కనిపిస్తుంది. మాలాంటి వాళ్ల మీద ఆయన ప్రభావం బాగా ఉంది. సినిమా ఒక గొప్ప కళ అని ఆయన నిరూపించారు. ఆయన ఎప్పుడూ మన మధ్య సజీవంగా ఉంటారు. ఆయన తీసిన ప్రతి సినిమా ఒక పుస్తకం. శంకరాభరణం గురించి ఎంత చెప్పినా తక్కువే. చూసిన ప్రతిసారి దాని దృక్కోణం మారిపోతుంది. ఎంతో లోతుగా మహాసముద్రంలా కనిపిస్తుంది. ప్రతి తరం దర్శకులకు అది స్ఫూర్తి. ఆయన గొప్ప విజనరీ డైరెక్టర్‌’’

03/02/2023 10:50(IST)

చిన్న వయసులోనే సినిమా చేసే భాగ్యం నాకు కలిగింది: అల్లు అరవింద్‌

‘‘చిన్న వయసులోనే ఆయనతో సినిమా చేసే భాగ్యం నాకు కలిగింది. షూటింగ్‌ సమయంలో నన్ను పిలిచి చాలా విషయాలు చర్చించేవారు. అంతకుముందెప్పుడూ అలా ఎవరితోనూ చర్చించలేదని జంథ్యాల ఆశ్చర్యపోతూ నాతో చెప్పారు. ఒక సీన్‌లో మా నాన్నగారు (అల్లు రామలింగయ్య) సరిగా చేయలేకపోతున్నారు. నలుగురు వ్యక్తులు కనపడే ఆ సన్నివేశాన్ని విశ్వనాథ్‌గారు అన్ని పాత్రల్లోనూ నటించి చూపించారు. చిరంజీవిగారితో ఆయనకు ఎంతో అవినాభావ సంబంధం ఉంది. ఆయన ఎక్కడున్నా చిత్ర పరిశ్రమను దీవించాలని కోరుకుంటున్నా’’

03/02/2023 10:42(IST)

ఆయన గొప్పతనం చెప్పడానికి నా స్థాయి సరిపోదు: చిరంజీవి

‘‘కళాతపస్వి ఇక లేరు అనే మాటను నన్ను దిగ్భ్రాంతికి గురి చేసింది.
ఇది ఎంత సహజం అనుకున్నా సరే, అత్యంత ఆప్తులు, గురుతుల్యులు, పితృ సమానులు విశ్వనాథ్‌గారు లేరనే మాట ఎంతో బాధించింది. ఆయన గొప్పతనం, దర్శక ప్రతిభ గురించి చెప్పడానికి నా స్థాయి కూడా సరిపోదు. పండిత, పామరులను సైతం అలరించేలా చిత్రాలు తీశారు. ఆర్ట్‌ ఫిల్మ్స్‌ను జనరంజకంగా తీర్చిదిద్దిన ఘనత ఆయనకే దక్కింది. తెలుగు సినీ ఖ్యాతిని ప్రపంచస్థాయికి తీసుకెళ్లారు. అలాంటి గొప్ప దర్శకుడి వద్ద పనిచేయడం నా అదృష్టం. మాలాంటి నటులకు ఆయన ఒక ఎన్‌సైక్లోపిడియా. నేటి యువ దర్శకులకు ఆయన సినిమాలు ఒక గ్రంథాలయం. షూటింగ్‌ సమయంలో ఆయన చేతితో స్వయంగా అన్నం కలిపి పెట్టిన సందర్భాలూ ఉన్నాయి. ‘ఇంద్ర’ షూటింగ్‌ జరుగుతున్నప్పుడు విశ్వనాథ్ దంపతులను వారణాసి తీసుకెళ్లాలని ఎందుకో అనిపించింది. ఫోన్‌ చేస్తే, ‘ఇది చిరంజీవి పిలుపులా లేదు. శివుడే శివ శంకర వరప్రసాద్‌ రూపంలో పిలిచాడనిపిస్తోంది’ అని బయలుదేరి వచ్చారు’ అని చిరంజీవి భావోద్వేగానికి గురయ్యారు.

03/02/2023 10:18(IST)

కె.విశ్వనాథ్‌ మృతి పట్ల ప్రధాని మోదీ సంతాపం

దిగ్గజ దర్శకుడు కె.విశ్వనాథ్ మృతి పట్ల ప్రధాని నరేంద్రమోదీ సంతాపం తెలిపారు. ఆయన మృతి చెందడం బాధాకరమని విచారం వ్యక్తం చేసిన మోదీ.. ఒక సృజనాత్మక బహుముఖ దర్శకుడిగా తనని తాను ప్రత్యేకం చేసుకున్న సినీ ప్రపంచంలోని ప్రముఖుడని కొనియాడారు. విశ్వనాథ్ సినిమాలు దశాబ్దాలుగా ప్రేక్షకులను ఆకర్షించాయన్నారు. ఆయన కుటుంబ సభ్యులకు, అభిమానులకు తన ప్రగాఢ సానుభూతిని తెలిపారు.

03/02/2023 09:57(IST)

అందుకు పునాదులు వేసిన దర్శకుడు విశ్వనాథ్‌: రాధిక

‘‘సినిమా విషయంలో ఆయన ఏం నమ్మారో చివరి వరకూ దానికే కట్టుబడి ఉన్నారు. ఆయనతో పనిచేసిన ఏ రోజునీ నేను మర్చిపోలేను. గత కొంతకాలంగా తెలుగు సినిమా ఖ్యాతి ప్రపంచవ్యాప్తమైంది. దానికి పునాదులు వేసిన దర్శకుడు విశ్వనాథ్‌గారు. ఆయన ఆత్మకు శాంతి చేకూరాలని ప్రార్థిస్తున్నా.’’

03/02/2023 09:51(IST)

భారత చలన చిత్ర పరిశ్రమలో విరబూసిన స్వర్ణకమలం ఆయన: బ్రహ్మానందం

‘‘పుట్టిన ప్రతి వాడూ చనిపోకతప్పదు. కానీ, అద్భుతమైన మరణాన్ని పొందిన కె.విశ్వనాథ్‌గారు కళ బతికున్నంత కాలం, కళాకారులు బతికున్నంతకాలం మనతోనే ఉంటారు. ఆయన దర్శకత్వంలో నేను రెండు సినిమాల్లో నటించా. నేనంటే ఆయనకు ఎంతో అభిమానం. నెలరోజుల కిందట కలిసినప్పుడు ‘బ్రహ్మం.. తరచూ కలుస్తూ ఉండు’ అన్నారు. అలాంటి మహనీయుడు మన మధ్య లేరంటే బాధగా ఉంది. భారత చలన చిత్ర చరిత్రలో విరబూసిన స్వర్ణకమలం ఆయన’’

03/02/2023 09:26(IST)

పంజాగుట్ట శ్మశానవాటిలో కె.విశ్వనాథ్‌ అంత్యక్రియలు

లెజెండరీ దర్శకుడు కె.విశ్వనాథ్‌ అంత్యక్రియలను పంజాగుట్ట శ్మశాన వాటికలో నిర్వహించనున్నట్లు నటుడు ఏడిద రాజా తెలిపారు. ఉదయం 11 గంటలకు విశ్వనాథ్‌ అంతిమయాత్ర ప్రారంభిస్తామన్నారు.

03/02/2023 09:11(IST)

కె.విశ్వనాథ్‌ భౌతికకాయానికి పవన్‌కల్యాణ్‌ నివాళి

లెజెండరీ దర్శకుడు కె.విశ్వనాథ్‌ భౌతికకాయానికి సినీ నటుడు, జనసేన అధినేత పవన్‌కల్యాణ్‌ నివాళులర్పించారు. త్రివిక్రమ్‌, సత్యానంద్‌లతో కలిసి విశ్వనాథ్ పార్థివదేహాన్ని ఆయన సందర్శించారు. అనంతరం పవన్‌ మాట్లాడుతూ.. ‘శంకరాభరణం’ సినిమా పాటల ద్వారా సంస్కృతి గొప్పదనం తెలిసిందన్నారు. ఆయన సినిమాలు అన్ని వర్గాలను ఆకట్టుకుంటాయన్నారు. కె.విశ్వనాథ్‌ ఆత్మకు శాంతి చేకూరాలని ప్రార్థించారు. ఆయన కుటుంబ సభ్యులకు ప్రగాఢ సానుభూతి తెలిపారు.

03/02/2023 08:41(IST)

ఆయన చిత్రాలు తెలుగు సినిమాకే గర్వకారణం: బాలకృష్ణ

‘‘కళాతపస్వి కె.విశ్వనాథ్ గారు క‌న్నుమూయ‌డం తెలుగు చ‌ల‌న‌చిత్ర పరిశ్రమకు తీర‌ని లోటు.. భారతీయ సంస్కృతీ సంప్రదాయలు మరీ ముఖ్యంగా మన తెలుగుదనాన్ని అణువణువున ప్రతిబింబించేలా ఆయన తీసిన అత్యద్భుత చిత్రాలు తెలుగు సినిమాకే గర్వ కారణం. తెలుగు సినిమా ఖ్యాతిని ఖండాంతరాలుగా వ్యాపింపజేసి తెలుగు చ‌ల‌న‌చిత్ర పరిశ్రమకే వ‌న్నెతెచ్చి ప్రతి తెలుగు వాడు గర్వించేలా చేసిన దిగ్గజ దర్శకుడి మరణం తీవ్రవిచారానికి గురిచేసింది. క‌ళా త‌ప‌స్వి ఆత్మకు శాంతి క‌ల‌గాల‌ని ఆ దేవుడిని ప్రార్థిస్తున్నాను. వారి కుటుంబ‌స‌భ్యుల‌కు నా ప్రగాఢ సంతాపం తెలియ‌జేస్తున్నాను’’ -నందమూరి బాలకృష్ణ

03/02/2023 08:33(IST)

ఆయన చేసిన కళాసేవ అజరామరం : కమల్‌హాసన్‌

‘‘కళ సజీవమైనది.. అజరామరమైనది అని పూర్తి అర్థం చేసుకున్న గొప్ప వ్యక్తి కళాతపస్వి కె.విశ్వనాథ్‌గారు. ఆయన చేసిన కళాసేవ ఎప్పటికీ నిలిచి ఉంటుంది. ఆయన తదనంతరం కూడా అది బతికే ఉంటుంది. నేను ఎప్పటికీ ఆయన అభిమానినే’’

03/02/2023 08:19(IST)

భారతీయ సినిమా జీనియస్‌ను కోల్పోయింది: గవర్నర్‌ తమిళిసై

కళాతపస్వి విశ్వనాథ్‌ మరణం తీవ్ర దిగ్భ్రాంతికి గురిచేసిందని తెలంగాణ గవర్నర్‌ తమిళిసై సౌందరరాజన్‌ అన్నారు. ఈ మేరకు ఆమె ట్వీట్‌ చేశారు. భారతీయ సినిమా జీనియస్‌ను కోల్పోయిందని తమిళిసై పేర్కొన్నారు. విశ్వనాథ్‌ దర్శకత్వంలో వచ్చిన శంకరాభరణం, స్వాతిముత్యం, సాగర సంగమం వంటి క్లాసిక్‌ చిత్రాలు రానున్న తరాలకు స్ఫూర్తిగా నిలుస్తాయన్నారు.

03/02/2023 08:03(IST)

మన ఖ్యాతిని విశ్వవ్యాప్తం చేశారు: మాజీ ఉపరాష్ట్రపతి ఎం.వెంకయ్యనాయుడు

‘‘సుప్రసిద్ధ దర్శకులు శ్రీ కాశీనాథుని విశ్వనాథ్ పరమపదించారని తెలిసి ఎంతో విచారించాను. కళాతపస్విగా పేరు గాంచిన ఆయన తెలుగు సినిమా స్థాయిని పెంచి, మన ఖ్యాతిని విశ్వవ్యాప్తం చేశారు. ఆయన ఆత్మకు శాంతి కలగాలని ప్రార్థిస్తూ వారి కుటుంబసభ్యులకు, అభిమానులకు సానుభూతి తెలియజేస్తున్నాను. సౌండ్ రికార్డిస్ట్ గా సినీ ప్రస్థానం ప్రారంభించిన శ్రీ విశ్వనాథ్ గారు, దర్శకుడిగా తొలి అడుగునే నంది అవార్డుతో ప్రారంభించారు. భాష, సంస్కృతి, కళలకు పెద్ద పీట వేస్తూ, అగ్రకథానాయకుల్ని సైతం ఆదర్శనీయ పాత్రల్లో చూపిన వారి చిత్రాలు ఆనందాన్ని, సందేశాన్ని అందించి ఆదర్శంగా నిలిచాయి.’’

03/02/2023 07:32(IST)

ఇది అత్యంత విషాదకరమైన రోజు: చిరంజీవి

‘‘పితృ సమానులు, కళాతపస్వి కె.విశ్వనాథ్‌గారు ఇక లేరు అనే వార్త దిగ్భ్రాంతికి గురి చేసింది. ఆయన గొప్పతనం గురించి మాటలు చాలవు. పండితులని పామరులనీ కూడా ఒకేలా మురిపించే ఆయన చిత్రాల శైలి విశిష్టమైంది. ఆయనలా సున్నితమైన ఆర్ట్‌ ఫిల్మ్స్‌ని కూడా బ్లాక్‌బస్టర్‌ హిట్స్‌గా మలిచిన దర్శకుడు బహుశా ఇంకొకరు లేరు. తెలుగు జాతి ఖ్యాతిని తన సినిమాల ద్వారా ప్రపంచస్థాయికి తీసుకెళ్లిన మహా దర్శకుడు. ఆయన దర్శకత్వంలో ‘శుభలేఖ’, ‘స్వయంకృషి’, ‘ఆపద్బాంధవుడు’ చిత్రాల్లో నటించే అవకాశం నాకు లభించింది. నాకు వ్యక్తిగతంగా ఆయనతో ఉన్నది గురు శిష్యుల సంబంధం. అంతకుమించి తండ్రీ కొడుకుల అనుబంధం. ఆయనతో గడిపిన సమయం నాకు అత్యంత విలువైంది. ప్రతి నటుడికీ ఆయనతో పని చేయటం ఒక ఎడ్యుకేషన్‌లాంటిది. ఆయన చిత్రాలు భావి దర్శకులకి ఒక గైడ్‌లాంటివి. 43 సంవత్సరాల క్రితం, ఆ మహనీయుడి ఐకానిక్‌ చిత్రం ‘శంకరాభరణం’ విడుదలైన రోజునే బహుశా ఆ శంకరుడికి ఆభరణంగా, ఆయన కైలాసానికి ఏతెంచారు. ఆయన చిత్రాలు, ఆయన చిత్రాల సంగీతం, ఆయన కీర్తి అజరామరమైనది. ఆయన లేని లోటు భారతీయ చిత్ర పరిశ్రమకు, తెలుగువారికి ఎప్పటికీ తీరనిది. ఆయన ఆత్మకు శాంతి చేకూరాలని ప్రార్థిస్తూ, ఆయన కుటుంబ సభ్యులకు ప్రగాఢ సానుభూతి తెలియజేస్తున్నా’’

03/02/2023 07:24(IST)

నాకు స్ఫూర్తినింపిన వాళ్లలో ఆయన ఒకరు: క్రిష్‌

‘‘లెజెండరీ దర్శకుడు కె.విశ్వనాథ్‌ మృతి నన్ను తీవ్రంగా కలిచి వేసింది. సినిమాపై ఆయనకున్న ప్యాషన్‌, కథను చెప్పే విధానం, పని పట్ల నిబద్ధత నాలాంటి ఎంతోమంది సినీ దర్శకులకు స్ఫూర్తి’’

03/02/2023 06:45(IST)

దర్శక రుషి..అసమాన యశస్వి

ఏ ఖజురహోలోనో, హళేబీడులోనో, అజంతా ఎల్లోరా గుహల్లోనో శ్రద్ధగా చెక్కిన శిల్పాల్లాగా ఆయన సినిమాలు సినీ ప్రేక్షకుల కళ్లముందు కొలువుదీరాయి. ఆయన దర్శకత్వం వహించిన ఏ సినిమా గురించైనా ఒక్కో ప్రత్యేకమైన వ్యాసం రాయవచ్చు. అన్నీ గుదిగుచ్చి చెప్పాలంటే విహంగవీక్షణమే శరణ్యం.

తొలి సినిమాతోనే నంది అవార్డు
కె.విశ్వనాథ్‌ తొలిసారి దర్శకుడిగా మారి 1963లో తీసిన ‘ఆత్మగౌరవం’ సినిమాలోనే ఆయన ప్రతిభ ఏంటో తెలుస్తుంది. తొలి ప్రయత్నంతోనే నంది అవార్డును అందుకున్న ఆ సినిమాను ఇప్పటి యువతరం చూసినా వారికి విసుగు కలిగించని రీతిలో కథనం ఉంటుంది. అక్కినేని, కాంచన, రాజశ్రీలతో రైతుకుటుంబం నేపథ్యంలో తీసిన ఆ సినిమాలో ‘అందెను నేడే అందని జాబిల్లి... నా అందాలన్నీ ఆతని వెన్నెలలే...’ అన్న పాటని, ‘రానని రాలేనని ఊరక అంటావు... రావాలని ఆశ లేనిదే ఎందుకు వస్తావు?’ పాటని ఓసారి చూడండి. శృంగారం అంటే ఏమిటో అర్థం అవుతుంది. ఆ పాటల చిత్రీకరణ తీరు ఈనాటి యువతరానికి కూడా గిలిగింతలు పెడుతుంది.

పూర్తి కథనం కోసం క్లిక్‌ చేయండి

03/02/2023 06:31(IST)

విశ్వనాథ్‌ మరణం తీవ్రంగా కలిచివేసింది: చంద్రబాబు

కళాతపస్వి విశ్వనాథ్‌ మరణం పట్ల తెదేపా అధినేత చంద్రబాబు దిగ్భ్రాంతి వ్యక్తం చేశారు. కళాఖండాల్లాంటి చిత్రాలను విశ్వనాథ్‌ అందించారన్నారు. ఆయన మరణం తీవ్రంగా కలిచివేసిందన్నారు. విశ్వనాథ్‌ మృతి సినీ ప్రపంచానికి తీరని లోటని చంద్రబాబు పేర్కొన్నారు.

03/02/2023 01:43(IST)

తెలంగాణ మంత్రుల సంతాపం

ప్రముఖ దర్శకుడు కె.విశ్వనాథ్ మరణం పట్ల తెలంగాణ మంత్రులు తలసాని శ్రీనివాస్‌ యాదవ్‌, సింగిరెడ్డి నిరంజన్‌రెడ్డి, పువ్వాడ అజయ్‌, సత్యవతి రాథోడ్ దిగ్భ్రాంతి వ్యక్తం చేశారు. విశ్వనాథ్‌ మరణం తెలుగు చిత్ర పరిశ్రమకు తీరనిలోటన్నారు. ఈ సమయంలో వారి కుటుంబ సభ్యులకు ధైర్యం ప్రసాదించాలని మంత్రులు ఆకాక్షించారు.

03/02/2023 01:41(IST)

సృజనాత్మక దృష్టితో తెలుగు సినిమాపై చెరగని ముద్ర: కిషన్‌రెడ్డి

దిగ్గజ దర్శకుడు కె.విశ్వనాథ్‌ మరణం పట్ల కేంద్ర మంత్రి కిషన్‌రెడ్డి సంతాపం వ్యక్తం చేశారు. ‘‘అద్భుత కథనం, సృజనాత్మక దృష్టితో లెజండరీ డైరెక్టర్‌ కె.విశ్వనాథ్‌ తెలుగు సినిమాపై చెరగని ముద్రవేశారు. భారత చిత్ర పరిశ్రమకు చేసిన ఆయన సేవలకు ఎన్నో అవార్డులు, ప్రశంసలు గెలుచుకున్నారు. ఈ సమయంలో నా ప్రార్థనలు, ఆలోచనలు ఆయన కుటుంబంపైనే ఉన్నాయి’’ అని కిషన్‌రెడ్డి పేర్కొన్నారు.

03/02/2023 01:26(IST)

తెలుగు సినిమా ఖ్యాతిని ఖండాంతరాలుగా వ్యాపింపజేశారు: జూనియర్‌ ఎన్టీఆర్‌

జూనియర్‌ ఎన్టీఆర్‌ ఆయనకు సంతాపం ప్రకటించారు. ‘‘తెలుగు సినిమా ఖ్యాతిని ఖండంతరాలుగా వ్యాపింపజేసిన వారిలో విశ్వనాథ్‌ది ఉన్నతస్థానం. శంకరాభరణం, సాగర సంగమం లాంటి ఎన్నో అపురూప చిత్రాలను అందించారు. ఆయన లేని లోటు ఎన్నటికీ తీరనిది. వారి కుటుంబానికి నా ప్రగాఢ సానుభూతి. ఆయన ఆత్మకు శాంతి చేకూరాలనుకుంటున్నాను’’ అని జూనియర్‌ ఎన్టీఆర్‌ అన్నారు.

03/02/2023 01:23(IST)

తెలుగు సినిమా ఉన్నన్ని రోజులు కె.విశ్వనాథ్ పేరు నిలిచి ఉంటుంది: కేసీఆర్‌

ప్రముఖ దర్శకుడు కళాతపస్వి, పద్మశ్రీ కె.విశ్వనాథ్ మరణం పట్ల తెలంగాణ ముఖ్యమంత్రి చంద్రశేఖర్‌ రావు సంతాపం తెలిపారు. అతి సామాన్యమైన కథను ఎంచుకొని తన అద్భుతమైన ప్రతిభతో.. వెండి తెర దృశ్య కావ్యంగా మలిచిన అరుదైన దర్శకుడు కె.విశ్వనాథ్ అని సీఎం కేసీఆర్‌ కొనియాడారు. గతంలో కె.విశ్వనాథ్ గారి ఆరోగ్యం బాగాలేనప్పుడు వారి ఇంటికి వెళ్లి పరామర్శించానని, ఆ సమయంలో సినిమాలు, సంగీతం, సాహిత్యంపై తమ మధ్య జరిగిన చర్చను సీఎం గుర్తు చేసుకున్నారు. భారతీయ సామాజిక సంస్కృతీ సంప్రదాయ విలువలకు తన సినిమాలో పెద్ద పీట వేశారని ఆయన కేసీఆర్‌ కొనియాడారు. సంగీత సాహిత్యాన్ని ప్రధాన ఇతివృత్తంగా, మానవ సంబంధాల నడుమ నిత్యం తలెత్తే వైరుధ్యాలను అత్యంత సృజనాత్మకంగా, సున్నితంగా దృశ్యమానం చేసిన గొప్ప భారతీయ దర్శకుడు కె. విశ్వనాథ్ అని కేసీఆర్‌ పేర్కొన్నారు. దాదా సాహెబ్ ఫాల్కే, రఘుపతి వెంకయ్య వంటి అనేక ప్రతిష్టాత్మక అవార్డులు ఆయన దర్శక ప్రతిభకు కలికితురాయిగా నిలిచాయన్నారు. తెలుగు సినిమా ఉన్నన్ని రోజులు కె.విశ్వనాథ్ పేరు నిలిచి ఉంటుందన్నారు. కవి పండితులకు జనన, మరణాల భయం ఉండదు, వారి కీర్తి అజరామరం అని సీఎం పేర్కొన్నారు. విశ్వనాథ్‌ కుటుంబ సభ్యులకు సీఎం కేసీఆర్ తన ప్రగాఢ సానుభూతిని తెలిపారు.

03/02/2023 01:19(IST)

తెలుగువారి గుండెల్లో శాశ్వతంగా నిలిచిపోతారు: జగన్‌

విశ్వనాథ్‌ మరణం తీవ్ర విచారానికి గురిచేసిందని ఏపీ సీఎం జగన్‌ అన్నారు. ఈ మేరకు ఆయన ట్వీట్‌ చేశారు. ‘తెలుగు సంస్కృతికి, భారతీయ కళలకు నిలువుటద్దం విశ్వనాథ్‌గారు. ఆయన దర్శకత్వంలో రూపుదిద్దుకున్న చిత్రాలు తెలుగు సినీరంగానికి అసమాన గౌరవాన్ని తెచ్చాయి. తెలుగువారి గుండెల్లో కళాతపస్విగా శాశ్వతంగా నిలిచిపోతారు’ అని సీఎం జగన్‌ సంతాపం వ్యక్తం చేశారు.

03/02/2023 01:14(IST)

శంకరాభరణం విడుదలైన రోజే..

కె.విశ్వనాథ్‌ అపురూప చిత్రాల్లో ‘శంకరాభరణం’కు ఎంతో ప్రత్యేక స్థానం ఉంది. 1980 ఫిబ్రవరి 2న విడుదలైన ఈ చిత్రం తెలుగు చిత్ర పరిశ్రమలో ఒక సంచలనం. సంగీత ప్రాధాన్యంగా వచ్చిన ఈ చిత్రం కమర్షియర్‌ హంగులు లేకున్నా అత్యంత ప్రజాదరణ పొందింది. ఈ చిత్రానంతరమే కె.విశ్వనాథ్‌ కళాతపస్విగా పేరుపొందారు. అయితే శంకరాభరణం విడుదలైన రోజే ఆయన శివైక్యం చేయడం బాధాకరం.

03/02/2023 01:05(IST)

విశ్వనాథ్‌తో చిరంజీవికి ఎంతో అనుబంధం..

లెజండరీ దర్శకుడు కె.విశ్వనాథ్‌తో చిరంజీవికి ప్రత్యేకమైన అనుబంధం ఉంది. ఆయన్ను సొంత కుటుంబ సభ్యుడిలా భావిస్తారు చిరు. ఎప్పటికప్పుడు కె.విశ్వనాథ్ దంపతులను కలుస్తూనే ఉంటారు. తన భార్య సురేఖతో కలిసి కె.విశ్వనాథ్ ఇంటికి వెళ్లి ఆయన ఆశ్వీర్వాదం తీసుకుంటూ ఉంటారు. నటనకు సంబంధించి చిరంజీవికి కళాతపస్వి ఎన్నో మెలుకువలు నేర్పించారు. తెలుగు సినిమా ఇండస్ట్రీలో చిరంజీవి, కె.విశ్వనాథ్‌లది సక్సెస్‌ఫుల్‌ కాంబినేషన్‌. వీరిద్దరూ కలిసి చేసిన ‘శుభలేఖ’, ‘స్వయంకృషి’, ‘ఆపద్బాంధవుడు’ వంటి సినిమాలు భారీ విజయాలను అందుకున్నాయి. ఈ సినిమాలన్నీ మ్యూజికల్‌గా కూడా సూపర్ హిట్స్. అద్భుతమైన సంగీతానికి, ప్రేమ, ఎమోషన్స్, ఫ్యామిలీ రిలేషన్స్‌ని కలగలిపి కె.విశ్వనాథ్‌ ఈ సినిమాలను రూపొందించారు. ఇవన్నీ కూడా బ్లాక్‌బస్టర్స్‌గా నిలిచాయి. ఎప్పటికీ ఎవర్‌ గ్రీన్‌ సినిమాలుగా నిలిచిపోయాయి.

03/02/2023 00:52(IST)

చిరంజీవి తీవ్ర దిగ్భ్రాంతి

కళాతపస్వి కె.విశ్వనాథ్‌ మరణం పట్ల ప్రముఖ నటుడు చిరంజీవి తీవ్ర దిగ్భ్రాంతి వ్యక్తం చేశారు. ‘‘నా తెలుగు చిత్రాల స్థాయిని అంతర్జాతీయ స్థాయికి తీసుకెళ్లిన గొప్ప దర్శకులు విశ్వనాథ్‌ గారు కాలం చేయడం నన్ను కలిచివేసింది. ఈ రోజు ఆయన కన్నుమూసిన వార్త విని నేను షాక్‌కు గురయ్యాను. ఆయనలాంటి డైరెక్టర్‌ కన్నుమూయడం నాకే కాదు తెలుగు సినీ పరిశ్రమకే తీరని లోటు. ఈ సమయంలో ఆయన కుటుంబ సభ్యులకు ఈ బాధను తట్టుకునే శక్తి ఇవ్వాలని కోరుకుంటున్నాను’’ అని చిరంజీవి పేర్కొన్నారు.

03/02/2023 00:40(IST)

పురస్కారాలు ఇలా...

సినిమా రంగంలో ఆయన చేసిన కృషికి 2016లో సినిరంగంలో ప్రతిష్టాత్మకంగా భావించే దాదాసాహెబ్‌ ఫాల్కే అవార్డు వచ్చింది. 1992లో రఘుపతి వెంకయ్య పురస్కారం, పద్మశ్రీ పురస్కారం అందుకున్నారు. దీంతోపాటు జాతీయ పురస్కారాలు, నంది అవార్డులు ఆయనకు దక్కాయి.

03/02/2023 00:39(IST)

సౌండ్‌ రికార్డిస్టుగా ప్రారంభించి...

చెన్నైలోని ఒక స్టూడియో సౌండ్‌ రికార్డిస్టుగా సినిమా జీవితాన్ని ఆరంభించిన కె.విశ్వనాథ్‌ (K.Viswanath) అంచెలంచెలుగా ఎదిగారు. ఆత్మగౌరవం సినిమాతో దర్శకుడిగా మారారు. ఎన్నో చిత్రాల్లో కీలక పాత్రలు పోషించారు.

03/02/2023 00:38(IST)

50కిపైగా చిత్రాలు...

కె.విశ్వనాథ్‌ స్వస్థలం గుంటూరు జిల్లా రేపల్లె మండంలోని పెద పులివర్రు గ్రామం. 1930 ఫిబ్రవరి 19న కాశీనాథుని సుబ్రహ్మణ్యం, సరస్వతమ్మ దంపతులకు విశ్వనాథ్‌ జన్మించారు. కె.విశ్వనాథ్‌కు ఇద్దరు కుమారులు, ఒక కూతురు ఉన్నారు. తెలుగు చిత్రపరిశ్రమకు ఒక గొప్ప గౌరవాన్ని తీసుకొచ్చిన ఆయన 50కి పైగా చిత్రాలకు దర్శకత్వం వహించారు.

03/02/2023 00:34(IST)

కళాతపస్వి కాశీనాధుని విశ్వనాథ్‌ కన్నుమూత

దిగ్గజ దర్శకుడు, కళాతపస్వి కాశీనాధుని విశ్వనాథ్‌ (K Viswanath) (92) కన్నుమూశారు. గత కొంతకాలంగా అనారోగ్యంతో బాధపడుతున్న ఆయన అపోలో ఆసుపత్రిలో చికిత్స పొందుతూ తుదిశ్వాస విడిచారు.