Feedback | E-PAPER | Pratibha

Elections result: ఒక ఎంపీ, ఆరు ఎమ్మెల్యే స్థానాలు.. ఉప ఎన్నికల ఫలితాలివే

గుజరాత్‌ (Gujarat), హిమాచల్‌ ప్రదేశ్‌ (Himachal Pradesh) అసెంబ్లీ ఎన్నికల ఓట్ల లెక్కింపు (Assembly Election Results) ముగిసింది. గుజరాత్‌లో భాజపా చరిత్రను తిరగరాస్తూ భారీ విజయాన్ని అందుకోగా, హిమాచల్‌లో కాంగ్రెస్‌ పార్టీ ఘన విజయం సాధించింది.

Updated : 08 Dec 2022 20:16 IST

08/12/2022 21:00(IST)

ఆప్‌కు నోటా కంటే తక్కువ ఓట్లు!

హిమాచల్‌ ప్రదేశ్‌ అసెంబ్లీ ఎన్నికల్లో తొలిసారి బరిలోకి దిగిన ఆమ్‌ ఆద్మీ పార్టీకి చుక్కెదురైంది. ఒక్కస్థానంలో కూడా విజయం సాధించని ఆ పార్టీ.. రాష్ట్ర వ్యాప్తంగా కేవలం 1.10 శాతం ఓట్లను మాత్రమే దక్కించుకుంది. కొన్ని స్థానాల్లో నోటా కంటే తక్కువ ఓట్లు సాధించడం గమనార్హం.

08/12/2022 20:36(IST)

భాజపా విజయానికి అవీ ఓ కారణం: ఉద్ధవ్‌ ఠాక్రే

గుజరాత్‌లో భాజపా విజయంపై శివసేన (యూబీటీ) అధ్యక్షుడు ఉద్ధవ్‌ ఠాక్రే.. ప్రధాని మోదీకి శుభాకాంక్షలు తెలిపారు. మహారాష్ట్ర నుంచి గుజరాత్‌కు తరలించిన భారీ ప్రాజెక్టులూ ఈ విజయానికి దోహదపడ్డాయని పేర్కొన్నారు.

08/12/2022 20:07(IST)

ఆయా స్థానాల్లో ఉప ఎన్నికల ఫలితాలు ఇవే..

దేశంలో ఒక ఎంపీ స్థానం, ఆరు ఎమ్మెల్యే స్థానాలకు డిసెంబరు 5న జరిగిన ఉప ఎన్నికల ఫలితాలూ నేడు వెలువడ్డాయి.

విజేతల వివరాలు..

మైన్‌పురీ (ఉత్తర్‌ప్రదేశ్‌) - డింపల్‌ యాదవ్ (ఎస్పీ) (ఎంపీ స్థానం)

సర్దార్‌శహర్‌(రాజస్థాన్‌) - అనిల్‌ కుమార్‌ శర్మ (కాంగ్రెస్‌)

భానుప్రతాప్‌పుర్‌(ఛత్తీస్‌గఢ్‌) - సావిత్రి మనోజ్‌ (కాంగ్రెస్‌)

పదంపుర్‌ (ఒడిశా) - బర్షాసింగ్‌ బారిహా (బీజేడీ)

కుర్హాణీ (బిహార్‌) - కేదార్‌ప్రసాద్‌ గుప్తా (భాజపా)

రాంపూర్ ‌(ఉత్తర్‌ప్రదేశ్‌) - ఆకాశ్‌ సక్సేనా (భాజపా)

ఖటౌలీ (ఉత్తర్‌ప్రదేశ్‌) - మదన్‌ భయ్యా(ఆర్‌ఎల్డీ)

08/12/2022 19:27(IST)

గుజరాత్‌లో కాంగ్రెస్‌ దుస్థితికి ఇవే కారణాలు.. జేపీ నడ్డా

దిల్లీలోని పార్టీ ప్రధాన కార్యాలయంలో భాజపా శ్రేణులనుద్దేశించి పార్టీ జాతీయ అధ్యక్షుడు జేపీ నడ్డా ప్రసంగించారు. ‘గుజరాత్‌లో భాజపా 52.5 శాతం ఓట్లు, 157 సీట్లు సాధించింది. అదే కాంగ్రెస్ 41.4 శాతం నుంచి 27.3 శాతానికి పడిపోయింది. వంశపారంపర్యం, కుటుంబ పాలన, పేలవ నాయకులు, బాధ్యతారాహిత్య విపక్ష వైఖరి కారణంగానే గుజరాత్‌లో కాంగ్రెస్‌ పరిస్థితి ఇలా తయారైంది’ అని విమర్శించారు.

08/12/2022 19:17(IST)

ప్రజల ఆశీర్వాదం ఉంటే అద్భుతాలు జరుగుతాయి.. ప్రధాని మోదీ

‘గుజరాత్‌ ప్రజలు భాజపావైపేనని మరోసారి నిరూపించారు. స్థానికుల ఆశీర్వాదం వల్లే మరోసారి గెలిచాం. పార్టీ కార్యకర్తల కష్టానికి ఫలితం కనిపిస్తోంది. ఉత్తర్‌ప్రదేశ్‌, బిహార్‌ ఉప ఎన్నికల్లోనూ గెలుపు.. భవిష్యత్తు విజయాలకు సంకేతం. ప్రజల ఆశీర్వాదం ఉంటే అద్భుతాలు జరుగుతాయి. ఒక్క పోలింగ్‌ కేంద్రంలోనూ రీపోలింగ్‌ జరపాల్సిన అవసరం రాలేదు. ఎన్నికల్లో పాలుపంచుకున్న ప్రతి ఒక్క కార్యకర్తకు అభినందనలు. హిమాచల్‌లో ఒక్క శాతం కంటే తక్కువ ఓట్లతో ఓడిపోయాం. ఇలా గతంలో ఎప్పుడూ జరగలేదు’ - విజయోత్సవ కార్యక్రమంలో ప్రధాని నరేంద్ర మోదీ

పూర్తి వార్త కోసం క్లిక్‌ చేయండి

08/12/2022 19:04(IST)

భాజపా ప్రధాన కార్యాలయానికి ప్రధాని మోదీ..

ప్రధాని నరేంద్ర మోదీ దిల్లీలోని భాజపా ప్రధాన కార్యాలయానికి చేరుకున్నారు. గుజరాత్‌ విజయం నేపథ్యంలో.. కొద్ది సేపట్లో ఆయన పార్టీ శ్రేణులను ఉద్దేశించి ప్రసంగించే అవకాశం ఉంది. ఈ క్రమంలోనే ప్రధాని మోదీతోసహా పార్టీ జాతీయ అధ్యక్షుడు జేపీ నడ్డా, కేంద్ర మంత్రులు రాజ్‌నాథ్‌సింగ్‌, అమిత్‌ షాలను భారీ పూలమాలతో సత్కరించారు.

08/12/2022 18:52(IST)

ఒక శాతం కంటే తక్కువ ఓట్లతో ఓడాం.. హిమాచల్‌ సీఎం జైరాం ఠాకూర్‌

హిమాచల్‌ ప్రదేశ్‌లో భాజపా పరాజయం పాలైన విషయం తెలిసిందే. దీనిపై సీఎం జైరాం ఠాకూర్ స్పందించారు. ‘హిమాచల్‌ ప్రదేశ్‌ ఎన్నికల్లో భాజపా కేవలం ఒక శాతం కంటే తక్కువ ఓట్లతో ఓడిపోయింది. రాష్ట్ర చరిత్రలోనే కాంగ్రెస్ అతి తక్కువ ఓట్లతో విజయం సాధించింది. ఏదేమైనా.. ఫలితాలను గౌరవిస్తా. కాంగ్రెస్ త్వరలో తమ ముఖ్యమంత్రిని ఎన్నుకుని రాష్ట్రాభివృద్ధికి పనిచేయడం ప్రారంభిస్తుందని ఆశిస్తున్నా’ అని పేర్కొన్నారు.

08/12/2022 18:44(IST)

గుజరాత్‌లో భాజపా విజయం కాంగ్రెస్‌ వైఫల్యమే.. మంత్రి జగదీశ్‌రెడ్డి

గుజరాత్‌ ఎన్నికల ఫలితాలపై తెలంగాణ మంత్రి జగదీశ్‌రెడ్డి స్పందించారు. ఆ రాష్ట్రంలో భాజపా గెలుపు.. కాంగ్రెస్‌ వైఫల్యమేనని వ్యాఖ్యానించారు. మోదీకి ప్రత్యామ్నాయ నాయకుడు అవసరమని పేర్కొన్నారు. మోదీ పాలనలో ఆకలితో బాధపడేవారి సంఖ్య పెరిగిందని ఆరోపించారు.

08/12/2022 18:33(IST)

గుజరాత్ ఫలితాలు.. ప్రముఖుల గెలుపోటములు ఇలా

గుజరాత్ అసెంబ్లీ ఎన్నికల్లో కాషాయ జెండా మళ్లీ రెపరెపలాడింది. గతంలో ఎన్నడూ లేనంతగా అఖండ మెజార్టీతో భాజపా ఘన విజయం సాధించింది. కాగా.. ఈ ఎన్నికల్లో పలువురు ప్రముఖులు పోటీ చేశారు. కొందరు అంచనాలకు తగ్గట్లుగానే జయకేతనం ఎగురవేయగా.. మరికొందరికి పరాభవం తప్పలేదు. ఈ ఎన్నికల్లో పోటీ చేసిన ప్రముఖుల ఫలితాలు ఇలా ఉన్నాయి..

పూర్తి కథనం కోసం క్లిక్‌ చేయండి

08/12/2022 18:25(IST)

ఇచ్చిన హామీలు నెరవేరుస్తాం: రాహుల్‌ గాంధీ

హిమాచల్‌ప్రదేశ్‌లో కాంగ్రెస్‌ గెలుపుపై పార్టీ సీనియర్‌ నేత రాహుల్‌ గాంధీ స్పందించారు. ‘ఈ నిర్ణయాత్మక విజయంపై హిమాచల్‌ వాసులకు హృదయపూర్వక ధన్యవాదాలు. శ్రమ, అంకితభావంతో కృషి చేసిన కాంగ్రెస్‌ శ్రేణులకు శుభాకాంక్షలు. ఎన్నికల్లో ఇచ్చిన హామీలను వీలైనంత త్వరలో పూర్తి చేస్తామని మరోసారి హామీ ఇస్తున్నా’ అని ట్వీట్‌ చేశారు.

అదే విధంగా.. గుజరాత్‌ ప్రజల తీర్పును వినమ్రంగా స్వీకరిస్తున్నట్లు తెలిపారు. ‘పార్టీలో పునర్వ్యవస్థీకరణ చేపడతాం. కష్టపడి పని చేస్తాం. దేశ ఆదర్శాలు, రాష్ట్ర ప్రజల హక్కుల కోసం పోరాడుతూనే ఉంటాం’ అని పేర్కొన్నారు.

08/12/2022 18:11(IST)

హిమాచల్‌ప్రదేశ్‌లో సంప్రదాయం కొనసాగింపు!

ప్రతి ఎన్నికల్లోనూ మార్పునకు ఓటేస్తున్న హిమాచల్‌ప్రదేశ్ ఓటర్లు మరోసారి అదే సంప్రదాయాన్ని కొనసాగించారు. అధికార భాజపాకు షాక్ ఇస్తూ ప్రతిపక్ష కాంగ్రెస్ పార్టీకి అధికార పగ్గాలు అప్పగించారు. హోరాహోరీగా జరిగిన పోరులో హస్తం పార్టీకే ఓటర్లు మద్దతుగా నిలిచారు.

08/12/2022 17:48(IST)

కార్యకర్తలదే ఈ విజయం.. ప్రధాని నరేంద్ర మోదీ

గుజరాత్‌లో భాజపా ఘన విజయంపై ప్రధాని నరేంద్ర మోదీ స్పందిస్తూ.. దీన్ని కార్యకర్తల గెలుపుగా అభివర్ణించారు. ‘మీలో ప్రతి ఒక్కరు ఛాంపియన్‌! మా పార్టీకి నిజమైన బలం కార్యకర్తలే. అసాధారణమైన వారి కృషి లేకుండా ఈ చారిత్రాత్మక విజయం ఎప్పటికీ సాధ్యం కాదు’ అని పేర్కొన్నారు.

హిమాచల్‌ప్రదేశ్ ఫలితాలపై స్పందిస్తూ.. పార్టీ పట్ల చూపిన అభిమానానికి, మద్దతుకు ధన్యవాదాలని తెలిపారు. రాష్ట్ర ఆకాంక్షలను నెరవేర్చేందుకు, రాబోయే కాలంలో ప్రజల సమస్యలను లేవనెత్తేందుకు కృషి చేస్తామన్నారు.

08/12/2022 17:14(IST)

ఆప్‌ జాతీయ పార్టీ అయినందుకు చాలా సంతోషంగా ఉంది: కేజ్రీవాల్‌

గుజరాత్‌ అసెంబ్లీ ఎన్నికల్లో ఆమ్‌ ఆద్మీ పార్టీ (ఆప్‌)పరాజయం పాలైనా జాతీయ పార్టీగా అవతరించింది. ఈ క్రమంలో ఆ పార్టీ అధ్యక్షుడు అరవింద్‌ కేజ్రీవాల్‌ ఆనందం వ్యక్తం చేశారు. ఆప్‌ జాతీయ పార్టీగా రూపాంతరం చెందడానికి సహకరించిన ప్రతి ఒక్కరికీ ధన్యవాదాలు తెలిపారు. గుజరాత్‌ ఎన్నికల్లో ఆప్‌ ఓటర్లను ఎలాంటి ప్రలోభాలకు గురిచేయలేదని, అక్రమాలకు పాల్పడలేదన్నారు. దిల్లీ, పంజాబ్‌లలో ఏమైతే చేశామో దాని గురించి మాట్లాడామన్నారు.

08/12/2022 16:46(IST)

కేవలం 483 ఓట్ల మెజార్టీతో గెలిచిన భాజపా అభ్యర్థి

ఎన్నికల్లో వేలు, లక్షల మెజార్టీతో విజయం సాధించిన అభ్యర్థులు చాలా మందే ఉంటారు. వెయ్యిలోపు ఓట్ల మెజార్టీతో ఒక అభ్యర్థి విజయం సాధించాడంటే, ఆ నియోజకవర్గంలో పార్టీల మధ్య పోటీ ఎలా ఉందనేది విషయాన్ని ఇట్టే అర్థం చేసుకోవచ్చు. గుజరాత్‌ అసెంబ్లీ ఎన్నికల్లో ఓ నియోజకవర్గంలో ఇలాంటి ఫలితమే వచ్చింది. కచ్‌ ప్రాంతంలోని రాపర్‌ నియోజకవర్గం నుంచి పోటీ చేసిన భాజపా అభ్యర్థి వీరేంద్రసిన్హా జడేజా తన సమీప ప్రత్యర్థి, కాంగ్రెస్‌ అభ్యర్థిపై 483 ఓట్ల మెజార్టీతో విజయం సాధించారు. దీంతో కాంగ్రెస్‌ పార్టీ మరోసారి ఓట్ల లెక్కింపు చేపట్టాలని కోరింది. రెండోసారీ ఓట్ల లెక్కింపులోనూ విజయం భాజపానే వరించింది.

08/12/2022 16:29(IST)

ఆప్‌ సీఎం అభ్యర్థి ఇసుదాన్‌ గఢ్వీ పరాజయం

గుజరాత్‌ అసెంబ్లీ ఎన్నికల్లో ఆమ్‌ ఆద్మీ పార్టీ సీఎం అభ్యర్థిగా బరిలోకి దిగిన ఇసుదాన్‌ గఢ్వీ ఓటమి పాలయ్యారు. కంభాలియా నియోజకవర్గం నుంచి ఇసుదాన్‌ పోటీ చేసిన సంగతి తెలిసిందే. తన సమీప ప్రత్యర్థి, భాజపా అభ్యర్థి ములుభాయ్‌ బెరా చేతిలో ఇసుదాన్‌ 18వేల ఓట్ల తేడాతో పరాజయం పాలయ్యారు. మొదటి నాలుగు రౌండ్‌లలో ఇసుదాన్‌ ఆధిక్యంలో దూసుకెళ్లారు. ఆ తర్వాత ఒక్కో రౌండ్‌లోనూ భాజపా అభ్యర్థి ములుభాయ్‌ బెరా ఆధిక్యం కనబరిచి చివరకు విజయం సాధించారు.

08/12/2022 16:19(IST)

గుజరాత్‌లో కమల వికాసం.. శ్రేణుల సంబరాలు

దాదాపు మూడు దశాబ్దాలుగా గుజరాత్‌లో ఏకఛత్రాధిపత్యం సాగిస్తున్న భారతీయ జనతా పార్టీ.. మరోసారి అధికార పీఠాన్ని కైవసం చేసుకుంది. దీంతో గాంధీనగర్‌లో ఆ రాష్ట్ర ముఖ్యమంత్రి భూపేంద్ర పటేల్, పార్టీ అధ్యక్షుడు సీఆర్‌ పాటిల్‌ శ్రేణులతో కలిసి సంబరాలు చేసుకున్నారు.

ఫొటోగ్యాలరీ కోసం క్లిక్‌ చేయండి

08/12/2022 16:07(IST)

గుజరాత్‌ కాంగ్రెస్‌ ఇన్‌ఛార్జ్‌ రాజీనామా

గుజరాత్‌ అసెంబ్లీ ఎన్నికల్లో కాంగ్రెస్‌ పార్టీ ఘోర పరాజయానికి బాధ్యత వహిస్తూ ఆ పార్టీ రాష్ట్ర ఇన్‌ఛార్జ్‌ రఘుశర్మ రాజీనామా చేశారు. తాజా ఎన్నికల ఫలితాల్లో ఇప్పటివరకూ కాంగ్రెస్‌ 14 స్థానాల్లో విజయం సాధించగా, మరో మూడు స్థానాల్లో ముందంజలో ఉంది.

08/12/2022 15:51(IST)

యువత ఓటు వేయడానికి ముందుకు రాలేదు: ఆప్‌

గుజరాత్‌ అసెంబ్లీ ఎన్నికల్లో అత్యధిక యువత ఓటు వేయడానికి ముందుకు రాలేదని, అదే పార్టీకి నష్టం చేకూర్చిందని, గుజరాత్‌ ఆమ్‌ ఆద్మీ పార్టీ ట్రేడింగ్‌ విభాగం ఉపాధ్యక్షుడు డీకే తివారి అన్నారు. గత 8 నెలలుగా రాష్ట్రంలో అవిశ్రాంతగా ప్రచారం చేశామని, 40-50సీట్లు వస్తాయని ఆశించామన్నారు. అయితే, 5-10 సీట్లు అస్సలు ఊహించలేదన్నారు. ఇందుకు కారణం 20-40ఏళ్ల వయసున్న వాళ్లలో అత్యధికులు ఓటు వేయడానికి ముందుకు రాలేదని అన్నారు. అదే సమయంలో ఆఖరి నిమిషంలో చాలా చోట్ల పరిస్థితులు మారిపోయాయని పేర్కొన్నారు.

08/12/2022 15:39(IST)

హిమాచల్‌ ప్రజలకు ధన్యవాదాలు: కాంగ్రెస్‌

హిమాచల్‌ప్రదేశ్‌ అసెంబ్లీ ఎన్నికల్లో కాంగ్రెస్‌ పార్టీ విజయం సాధించిన నేపథ్యంలో ఆ పార్టీ నేత ఎస్‌ఎస్‌ సుఖు ఆనందం వ్యక్తం చేశారు. కాంగ్రెస్‌ విజయం కోసం ప్రియాంక గాంధీ వాద్రా రాష్ట్ర వ్యాప్తంగా ఎన్నో ర్యాలీలు చేశారని అన్నారు. భాజపా విభజన రాజకీయాలను ప్రజలు తిప్పికొట్టి, కాంగ్రెస్‌ ఘన విజయం అందించారని అన్నారు.

08/12/2022 15:29(IST)

లక్ష ఓట్ల మెజార్టీతో గెలిచిన రాజ్‌కోట్‌ డిప్యూటీ మేయర్‌

రాజ్‌కోట్‌ డిప్యూటీ మేయర్‌ దర్శిత షా గుజరాత్‌ ఎన్నికల్లో బంపర్‌ మెజార్టీతో విజయం సాధించారు. రాజ్‌కోట్‌ పశ్చిమ నియోజకవర్గం నుంచి భాజపా అభ్యర్థిగా పోటీ చేసిన ఆమె తన సమీప ప్రత్యర్థిపై 1,05,975 ఓట్ల మెజార్టీతో గెలుపొందారు. 2017లో ఈ స్థానంలో మాజీ సీఎం విజయ్‌రూపానీ 53వేల ఓట్ల మెజార్టీతో గెలిచిన సంగతి తెలిసిందే.

08/12/2022 15:17(IST)

కాంగ్రెస్‌ ఓట్లను చీల్చడానికి భాజపా వాడిన అస్త్రం ఆప్‌

గుజరాత్‌లో కాంగ్రెస్‌ ఓటమిపై ఆ పార్టీ నేత, కర్ణాటక మాజీ సీఎం సిద్ధరామయ్య స్పందించారు. కాంగ్రెస్‌ ఓట్లను చీల్చడానికి గుజరాత్‌లో ఆప్‌ అస్త్రాన్ని భాజపా ప్రయోగించిందని ఆరోపించారు. ‘గుజరాత్‌లో గెలిచేందుకు ఆప్‌ భారీగా ఖర్చు చేసింది. నాకు తెలిసిన సమాచారం ప్రకారం, ఆ సొమ్ము భాజపానే సమకూర్చింది. ఆప్‌ వల్ల కాంగ్రెస్‌ 10శాతానికి పైగా ఓట్లను కోల్పోయింది’ అని విమర్శించారు.

08/12/2022 15:10(IST)

గుజరాత్‌ ఆప్‌ చీఫ్‌ గోపాల్‌ ఇటాలియా ఓటమి

గుజరాత్‌ అసెంబ్లీ ఎన్నికల్లో ప్రభావం చూపుతుందనుకున్న ఆప్‌ చతికలపడింది. ఈ క్రమంలో గుజరాత్‌ ఆప్‌ చీఫ్‌ గోపాల్‌ ఇటాలియా కూడా ఓటమి పాలయ్యారు. గోపాల్‌ సమీప ప్రత్యర్థి, భాజపా అభ్యర్థి వినోద్‌ మోరాదియా విజయం సాధించారు. తాజా ఎన్నికల్లో ఆప్‌ కనీసం రెండంకెల సీట్లను కూడా గెలుచుకోలేకపోయింది.

08/12/2022 14:47(IST)

హిమాచల్‌ప్రదేశ్‌లో కాంగ్రెస్‌ ఘన విజయం

హిమాచల్‌ప్రదేశ్‌ అసెంబ్లీ ఎన్నికల్లో కాంగ్రెస్‌ పార్టీ ఘన విజయం సాధించింది. మొత్తం 68 స్థానాలకు గానూ ప్రభుత్వ ఏర్పాటుకు అవసరమై మేజిక్‌ ఫిగర్‌(35)ను దాటేసింది. ఇప్పటికే 36 స్థానాల్లో విజయం సాధించగా, మరో 4 స్థానాల్లో ఆధిక్యంలో ఉంది. భాజపా 23 సీట్లు గెలిచి, 2 స్థానాల్లో ముందంజలో ఉంది. ఇతరులు మూడు సీట్లను గెలిచారు.

08/12/2022 14:42(IST)

ప్రధాని మోదీపై ప్రజలకున్న విశ్వాసమే ఈ గెలుపు:రాజ్‌నాథ్‌

భారత ప్రధాని నరేంద్రమోదీపై ప్రజలకు ఉన్న నమ్మకం, విశ్వాసం వల్లే గుజరాత్‌లో భారీ మెజార్టీతో భాజపా విజయం సాధించిందని కేంద్ర మంత్రి రాజ్‌నాథ్‌ సింగ్‌ అన్నారు. గత రికార్డులను బద్దలు కొడుతూ భాజపా వరుసగా ఏడోసారి ఆ రాష్ట్రంలో అధికారాన్ని చేజిక్కించుకుంది. దీన్నొక చారిత్రక విజయంగా రాజ్‌నాథ్ అభివర్ణించారు. ఎన్నికల్లో అఖండ విజయాన్ని అందించిన ప్రజలకు ధన్యవాదాలు తెలిపారు.

08/12/2022 14:29(IST)

గుజరాత్‌ ఎప్పుడూ చరిత్ర సృష్టించే పనులే చేసింది.. అమిత్‌ షా

గుజరాత్‌లో భాజపాను మరోసారి అధికారంలో తీసుకురావడంపై రాష్ట్ర ప్రజలకు కేంద్ర మంత్రి అమిత్‌ షా ధన్యవాదాలు తెలిపారు. ‘ప్రధాని మోదీ నేతృత్వంలో జేపీ నడ్డా అధ్యక్షతన సాధించిన ఈ విజయంపై సీఎం భూపేంద్ర పటేల్‌, పార్టీ రాష్ట్ర అధ్యక్షుడు సీఆర్‌ పాటిల్‌, కార్యకర్తలకు శుభాకాంక్షలు’ అని ఆయన ట్వీట్‌ చేశారు. ‘గుజరాత్.. ఎప్పుడూ చరిత్ర సృష్టించే పనులే చేసింది. గత రెండు దశాబ్దాల్లో మోదీ నాయకత్వంలో రాష్ట్రంలో భాజపా అభివృద్ధి సంబంధిత రికార్డులన్నింటినీ బద్దలుకొట్టింది. నేడు గుజరాత్ ప్రజలు భాజపాను మరోసారి ఆశీర్వదించి.. విజయాలకు సంబంధించిన రికార్డులన్నింటినీ బద్దలుకొట్టారు. మోదీ అభివృద్ధి నమూనాపై ప్రజలకున్న అచంచల విశ్వాసానికి ప్రతీక ఈ విజయం’ అని మరో ట్వీట్‌లో పేర్కొన్నారు.

08/12/2022 14:02(IST)

గుజరాత్‌ సీఎంగా డిసెంబరు 12న భూపేంద్ర ప్రమాణం

గుజరాత్‌ ఎన్నికల్లో భాజపా ఘన విజయాన్ని సాధించిన నేపథ్యంలో కొత్త ముఖ్యమంత్రిగా డిసెంబరు 12న భూపేంద్ర పటేల్‌ ప్రమాణ స్వీకారం చేస్తారని భాజపా గుజరాత్‌ చీఫ్‌ సీఆర్‌ పాటిల్‌ అన్నారు. గాంధీనగర్‌లో ప్రమాణ స్వీకార కార్యక్రమం నిర్వహించనున్నట్లు తెలిపారు.

08/12/2022 13:41(IST)

ప్రధాని మోదీ దార్శనికతతోనే ఈ విజయం: భాజపా గుజరాత్ చీఫ్‌

గుజరాత్‌లో భాజపా ఆధిక్యంపై ఆ పార్టీ రాష్ట్ర చీఫ్‌ సీఆర్‌ పాటిల్‌ హర్షం వ్యక్తం చేశారు. ఫలితాల సరళిపై ఆయన మీడియాతో మాట్లాడుతూ.. ‘ప్రధాని నరేంద్ర మోదీ దార్శనికతతో ఈ విజయం సాధ్యమైంది. రాష్ట్రాన్ని నడిపించే బాధ్యతను భాజపాకు అప్పగించినందుకు రాష్ట్ర ప్రజలకు ధన్యవాదాలు. తప్పుడు వాగ్దానాలు, ప్రకటనలు చేసిన ప్రతిపక్ష పార్టీలను వారు నమ్మలేదు. రాష్ట్రాన్ని అభివృద్ధి చేయాల‌న్న ప్రధానమంత్రి విజ‌న్‌ను సాధ్యం చేసేందుకు కృషి చేస్తాం’ అని వ్యాఖ్యానించారు.

08/12/2022 13:23(IST)

రివాబా జడేజా విజయం..

గుజరాత్‌ జామ్‌నగర్‌ నార్త్‌ నుంచి భాజపా తరఫున పోటీ చేసిన ప్రముఖ క్రికెటర్‌ రవీంద్ర జడేజా భార్య రివాబా విజయం సాధించారు. సమీప ప్రత్యర్థిపై 61 వేలకుపైగా భారీ మెజార్టీ సాధించినట్లు తెలుస్తోంది. ఈ క్రమంలోనే ఆమె ఓ వార్తాసంస్థతో మాట్లాడుతూ.. ఇది అందరి విజయంగా అభివర్ణించారు.

08/12/2022 13:09(IST)

గుజరాత్‌ ఫలితాల ప్రభావం తెలంగాణపై ఉంటుంది: డీకే అరుణ

గుజరాత్ రాష్ట్రంలో భాజపా ఘన విజయం సాధించడంపై భాజపా జాతీయ ఉపాధ్యక్షురాలు డీకే అరుణ హర్షం వ్యక్తం చేశారు. ఎవరు ఎన్ని కుట్రలు చేసినా, గుజరాత్ ప్రజలు భాజపా, ప్రధాన మంత్రి నాయకత్వంపై నమ్మకం ఉంచి ఇంతటి ఘన విజయాన్ని కట్టబెట్టారని అన్నారు. వరుసగా ఏడోసారి భాజపాకి పట్టం కల్పించిన గుజరాత్ ప్రజలకు ధన్యవాదాలు తెలిపారు. గుజరాత్ ఫలితాల ప్రభావం కచ్చితంగా తెలంగాణ ఉంటుందని అన్నారు.

08/12/2022 12:45(IST)

హిమాచల్‌లో ప్రభుత్వాన్ని ఏర్పాటు చేస్తాం: కాంగ్రెస్‌

హిమాచల్‌ప్రదేశ్‌లో తమ పార్టీ ప్రభుత్వాన్ని ఏర్పాటు చేస్తుందని, కాంగ్రెస్‌నేత విక్రమాదిత్య సింగ్‌ తెలిపారు. కాంగ్రెస్‌ ప్రభుత్వం పూర్తికాలం పాలిస్తుందని ధీమా వ్యక్తం చేశారు. ప్రజాస్వామ్యాన్ని, తమ ఎమ్మెల్యేలను కాపాడుకుంటామని అన్నారు. అధికారం కోసం భాజపా ఏమైనా చేయగలదని ఆరోపించారు.

08/12/2022 12:35(IST)

హిమాచల్‌లో ఉత్కంఠ రేపుతున్న ఫలితాలు

గుజరాత్‌ అసెంబ్లీ ఎన్నికల్లో భాజపా విజయం ఏకపక్షం కానుండగా, హిమాచల్‌ ప్రదేశ్‌లో మాత్రం భాజపా, కాంగ్రెస్‌ల మధ్య పోటీ నెలకొంది. మొత్తం 68 స్థానాలకు గానూ భాజపా 9 స్థానాల్లో విజయం సాధించి, మరో 20 స్థానాల్లో ఆధిక్యంలో కొనసాగుతోంది. అలాగే, కాంగ్రెస్‌9 స్థానాల్లో గెలుపొంది, మరో 27 స్థానాల్లో ముందంజలో ఉంది. ఇతరులు ఒక స్థానంలో గెలుపొందగా, మరో రెండు స్థానాల్లో ఆధిక్యంలో కొనసాగుతున్నారు.

08/12/2022 12:27(IST)

మోర్బీ వంతెన ఘటన.. ఆ నియోజకవర్గంలో ఆధిక్యంలో ఎవరంటే?

గుజరాత్‌లో అక్టోబరు 30న జరిగిన మోర్బీ తీగల వంతెన ఘటన యావత్‌ భారతదేశాన్ని కలిచి వేసింది. ఈ ప్రమాదంలో 135మంది ప్రాణాలు కోల్పోయారు. గుజరాత్‌ అసెంబ్లీ ఎన్నికల నేపథ్యంలో ఈ ఘటన ప్రభావం తక్కువేనని అర్థమవుతోంది. తాజా ఓట్ల లెక్కింపులో భాజపా అభ్యర్థి కాంతిలాల్‌ అమృతీయ, తన సమీప ప్రత్యర్థి, కాంగ్రెస్‌ అభ్యర్థి జయంతిలాల్‌పై 22వేల ఓట్ల ఆధిక్యంలో కొనసాగుతున్నారు. 11 రౌండ్లు ముగిసే సమయానికి అమృతీయకు 47వేల ఓట్లు రాగా, జయంతిలాల్‌కు 25వేల ఓట్లు వచ్చాయి.

08/12/2022 12:20(IST)

ఫలితాలు షాక్‌కు గురిచేశాయి: గుజరాత్‌ కాంగ్రెస్‌ చీఫ్‌

గుజరాత్‌లో అధికార భాజపా విజయంవైపు పరుగులు పెడుతున్న నేపథ్యంలో తాజా ఫలితాలపై ఆ రాష్ట్ర కాంగ్రెస్‌ చీఫ్‌ జగదీష్‌ ఠాకూర్‌ స్పందించారు. ఈ ఫలితాలు తనని షాక్‌కు గురిచేశాయని అన్నారు. మళ్లీ భాజపాకు అధికారం ఇవ్వాలన్న గుజరాత్‌ ప్రజల తీర్పు నిజంగా ఆశ్చర్యానికి గురి చేసిందన్నారు. కాంగ్రెస్‌ శక్తివంచన లేకుండా కష్టపడిందని, అయితే, ప్రభుత్వాన్ని ఏర్పాటు చేయడంలో విఫలమైనట్లు తెలిపారు. అదే సమయంలో భారీగా ఓటు షేరును కోల్పోవడంపైనా పార్టీలో అంతర్గతంగా చర్చించనున్నట్లు వివరించారు.

08/12/2022 12:05(IST)

ఆధిక్యంలోకి వచ్చిన జడేజా సతీమణి రివాబా

గుజరాత్‌ అసెంబ్లీ ఎన్నికల్లో జామ్‌నగర్‌ నియోజకవర్గం నుంచి పోటీ చేసిన క్రికెటర్‌ రవీంద్ర జడేజా భార్య రివాబా ఆధిక్యంలో కొనసాగుతున్నారు. మొదటి రౌండ్ల ఓట్ల లెక్కింపులో ఆమె వెనుకబడిన సంగతి తెలిసిందే. ప్రస్తుతం ఆమె తన సమీప ప్రత్యర్థి, ఆప్‌ అభ్యర్థిపై 18వేల ఓట్ల ఆధిక్యంలో కొనసాగుతున్నారు.

08/12/2022 11:49(IST)

పెరిగిన భాజపా ఓటు షేరు.. కాంగ్రెస్‌ పడిపోయింది

గుజరాత్‌ అసెంబ్లీ ఎన్నికల ఓట్ల లెక్కింపు ప్రక్రియ కొనసాగుతోంది. మొత్తం 182 అసెంబ్లీ స్థానాలకు జరిగిన ఎన్నికల్లో ఇప్పటికే భాజపా 15 స్థానాల్లో విజయం సాధించింది. మరో 138 స్థానాల్లో ఆధిక్యంలో కొనసాగుతోంది. ఈ ఎన్నికల్లో 53.6శాతం ఓట్‌ షేర్‌ను భాజపా దక్కించుకున్నట్లు ఎన్నికల విశ్లేషకులు చెబుతున్నారు. ఇక కాంగ్రెస్‌ 26.6శాతం, ఆప్‌ 12.8శాతం ఓట్లను షేర్‌ చేసుకుంది. సమాజ్‌వాదీ పార్టీ ఒకస్థానంలో ఆధిక్యంలో ఉండగా, స్వతంత్రులు నాలుగు స్థానాల్లో ఆధిక్యంలో కొనసాగుతున్నారు.

08/12/2022 11:38(IST)

13 స్థానాల్లో విజయం.. గుజరాత్‌లో భాజపా హవా

గుజరాత్‌ అసెంబ్లీ ఎన్నికల కౌంటింగ్‌లో అధికార భాజపా హవా కొనసాగుతోంది. మొత్తం 182 స్థానాలకు గానూ ఇప్పటివరకు భాజపా 13 స్థానాల్లో విజయం సాధించి, మరో 142 చోట్ల ఆధిక్యంలో కొనసాగుతోంది. కాంగ్రెస్‌ పార్టీ ఒక చోట విజయం సాధించి, 16 స్థానాల్లో ఆధిక్యంలో వెళ్తోంది. ఆప్‌ (8), ఇతరులు (3) స్థానాల్లో ఆధిక్యంలో ఉన్నారు. హిమాచల్‌ప్రదేశ్‌లో భాజపా 4 చోట్ల గెలుపొంది, 27 స్థానాల్లో ఆధిక్యంలో ఉంది. కాంగ్రెస్‌ 35 చోట్ల ఆధిక్యంలో కొనసాగుతోంది. హిమాచల్‌లో ప్రభుత్వ ఏర్పాటుకు 35 స్థానాల్లో గెలుపొందాల్సి ఉంటుంది.

08/12/2022 11:29(IST)

గుజరాత్‌ సీఎం భూపేంద్ర పటేల్‌ విజయం

గుజరాత్‌ అసెంబ్లీ ఎన్నికల్లో రాష్ట్ర ముఖ్యమంత్రి భూపేంద్ర పటేల్‌ విజయం సాధించారు. గట్లోదియా స్థానం నుంచి పోటీ చేసిన ఆయన భారీ మెజార్టీతో గెలుపొందారు. అలాగే ఎల్లిస్‌బ్రిడ్జ్‌ స్థానం నుంచి అమిత్‌భాయ్‌ షా(భాజపా), జలాల్‌పోర్‌ నుంచి రమేశ్‌బాయ్‌ పటేల్‌( భాజపా), రాజ్‌కోట్‌ పశ్చిమ స్థానం నుంచి దర్శిత షా(భాజపా), దహోద్‌ స్థానం నుంచి కన్నయ్యలాల్‌ కిశోరి (భాజపా), దరియాపూర్‌ నుంచి కౌశిక్‌భాయ్‌ జైన్‌ (భాజపా), జస్దాన్‌ నుంచి కున్వర్జీభాయ్‌ బవాలియా (భాజపా)లు విజయం సాధించగా, జమాల్‌పూర్‌ కదియా నుంచి ఇమ్రాన్‌ ఖేదావా (కాంగ్రెస్‌) గెలుపొందారు.

08/12/2022 11:16(IST)

హిమాచల్‌ సీఎం జైరాం ఠాకూర్‌ విజయం

హిమాచల్‌ప్రదేశ్‌ అసెంబ్లీ ఎన్నికల్లో ఓట్ల లెక్కింపు ప్రక్రియ కొనసాగుతోంది. మొదటగా భాజపా బోణి కొట్టింది. సెరాజ్‌ నియోజకవర్గం నుంచి పోటీ చేసిన ముఖ్యమంత్రి జైరాం ఠాకూర్‌, సుందేర్‌నగర్‌ స్థానం నుంచి పోటీ చేసిన భాజపా అభ్యర్థి రాకేశ్‌కుమార్‌ విజయం సాధించారు.

08/12/2022 10:51(IST)

వెనుకంజలో గుజరాత్‌ ఆప్‌ చీఫ్‌

గుజరాత్‌ అసెంబ్లీ ఓట్ల లెక్కింపు ప్రక్రియ కొనసాగుతోంది. సూరత్‌ కటర్‌గామ్‌ నియోజకవర్గంలో రాష్ట్ర ఆమ్‌ ఆద్మీ పార్టీ చీఫ్‌ గోపాల్‌ ఇటాలియా వెనుకంజలో ఉన్నారు. ఆయన సమీప ప్రత్యర్థి భాజపా అభ్యర్థి వినోద్‌ మోరాదియా ఆధిక్యంలో కొనసాగుతున్నారు.

08/12/2022 10:41(IST)

చరిత్ర సృష్టించబోతున్నాం: కేంద్రమంత్రి ప్రహ్లాద్‌ జోషి

గుజరాత్‌లో అధికార భాజపా చరిత్ర సృష్టించబోతోందని పార్లమెంటరీ వ్యవహారాలశాఖ మంత్రి ప్రహ్లాద్‌ జోషి అన్నారు. 2000-2001 నుంచి అమలు చేస్తున్న గుజరాత్‌ మోడల్‌ను ప్రజలు అంగీకరిస్తూ వచ్చారని, ఇప్పుడు అదే మోడల్‌ను కేంద్ర ప్రభుత్వం అమలు చేస్తుంటే, దేశ ప్రజలు ఆహ్వానిస్తున్నారని అన్నారు. గుజరాత్‌ ప్రజలు, భాజపా నాయకులకు ఆయన శుభాకాంక్షలు తెలిపారు.

08/12/2022 10:31(IST)

గుజరాత్‌లో భాజపా.. హిమాచల్‌లో హోరాహోరీ

గుజరాత్‌, హిమాచల్‌ ప్రదేశ్‌లో అసెంబ్లీ ఎన్నికల ఓట్ల లెక్కింపు కొనసాగుతోంది. గుజరాత్‌లో 182 స్థానాలకు గాను ఇప్పటివరకూ అధికార భాజపా 151 స్థానాల్లో, కాంగ్రెస్‌ (21), ఆప్ (6), ఇతరులు (5) స్థానాల్లో ఆధిక్యంలో కొనసాగుతున్నాయి. ఇక హిమాచల్‌ప్రదేశ్‌లో భాజపా, కాంగ్రెస్‌ మధ్య హోరాహోరీ పోటీ నెలకొంది. భాజపా 33 స్థానాల్లో, కాంగ్రెస్ 31, ఇతరులు 4 స్థానాల్లో ఆధిక్యంలో కొనసాగుతున్నాయి. ఆప్‌ ఇంకా ఖాతా తెరవలేదు.

08/12/2022 10:20(IST)

భాజపాకు స్పష్టమైన ఆధిక్యం.. సంబరాల్లో శ్రేణులు

గుజరాత్‌ అసెంబ్లీ ఎన్నికల్లో అధికార భాజపా అత్యధిక స్థానాల్లో ఆధిక్యంలో కొనసాగుతుంది. ఈ క్రమంలో రాష్ట్ర భాజపా శ్రేణులు ఆనందంలో మునిగి తేలుతున్నారు. పార్టీ కార్యాలయాల వద్ద సంబరాలు చేసుకుంటున్నారు. మొత్తం 182 స్థానాలకు గానూ 150 స్థానాల్లో భాజపా ఆధిక్యంలో కొనసాగుతోంది. కాంగ్రెస్‌ 23, ఆప్‌ 5, ఇతరులు 4 స్థానాల్లో ముందంజలో ఉన్నారు.

08/12/2022 10:12(IST)

సూరత్‌ ఈస్ట్‌లో కాంగ్రెస్‌ ఆధిక్యం

సూరత్‌ ఈస్ట్‌లో కాంగ్రెస్‌ అభ్యర్థి అస్లాం సైకిల్‌ వాలా ముందంజలో ఉన్నారు. భాజపా అభ్యర్థిపై దాదాపు 7వేల ఓట్ల ఆధిక్యంలో కొనసాగుతున్నారు. ఇక థారద్‌లో బనాస్‌ డైరీ ఛైర్మన్‌, భాజపా అభ్యర్థి శంకర్‌ ఛౌదరి, సిట్టింగ్‌ కాంగ్రెస్‌ ఎమ్మెల్యే గులాబ్‌సింగ్‌ రాజ్‌పుత్‌పై 5వేల ఓట్ల ఆధిక్యంలో ఉన్నారు.

08/12/2022 09:48(IST)

గుజరాత్‌ అసెంబ్లీ ఎన్నికలు.. ప్రముఖుల పరిస్థితి ఇదీ!

గుజరాత్‌ అసెంబ్లీ ఎన్నికల ఓట్ల లెక్కింపు ప్రక్రియ కొనసాగుతోంది. అత్యధిక స్థానాల్లో భాజపా ఆధిక్యంలో దూసుకుపోతోంది. ఈ క్రమంలో ప్రముఖుల అసెంబ్లీ నియోజకవర్గాల్లో పరిస్థితి ఏంటో ఓసారి చూద్దాం.. గట్లోదియా స్థానంలో సీఎం భూపేంద్ర పటేల్‌ ముందంజలో ఉన్నారు. విరంగాం స్థానంలో హార్థిక్‌ పటేల్‌(భాజపా), గాంధీనగర్‌ దక్షిణం స్థానంలో అల్పేశ్‌ ఠాకూర్‌(భాజపా)లు ముందంజలో ఉండగా, జామ్‌నగర్‌ ఉత్తరం స్థానంలో రవీంద్ర జడేజా భార్య రివాబా (భాజపా) వెనుకంజలో ఉన్నారు. ఖంభాలియా స్థానంలో ఆప్‌ సీఎం అభ్యర్థి ఇసుదాన్‌ గధ్వి ఆధిక్యంలో కొనసాగుతున్నారు.

08/12/2022 09:30(IST)

గుజరాత్‌లో దూసుకెళ్తున్న భాజపా, హిమాచల్‌లో పోటాపోటీ

గుజరాత్‌ అసెంబ్లీ ఎన్నికల్లో అధికార భాజపా దూసుకెళ్తోంది. మొత్తం 182 అసెంబ్లీ నియోజకవర్గాలకు జరిగిన ఎన్నికల్లో ఉదయం 9.30గంటలకు 136 స్థానాల్లో కమలదళం ఆధిక్యంలో ఉండగా, కాంగ్రెస్‌ 29, ఆప్‌ 12, ఇతరులు 5 స్థానాల్లో ఆధిక్యంలో కొనసాగుతున్నారు. అలాగే హిమాచల్‌లో మాత్రం భాజపా, కాంగ్రెస్‌ల మధ్య నువ్వానేనా అన్నట్లు పోటీ ఉంది. 68 స్థానాల్లో 32 భాజపా, 33 స్థానాల్లో కాంగ్రెస్‌ ఆధిక్యంలో ఉండగా, ఇతరులు మూడు స్థానాల్లో ఆధిక్యంలో కొనసాగుతున్నారు.

08/12/2022 09:23(IST)

భాజపా రికార్డులు బద్దలు కొడుతుంది

గుజరాత్‌లో ఎన్నికల ఫలితాల్లో భాజపా రికార్డులు బద్దలు కొడుతుందని గుజరాత్‌ మంత్రి, పశ్చిమ సూరత్‌ భాజపా అభ్యర్థి పూర్ణేష్‌ మోదీ ధీమా వ్యక్తం చేశారు. అత్యధిక స్థానాల్లో విజయం సాధించడమే కాదని, తమ పార్టీ అభ్యర్థలందరూ భారీ మెజార్టీతో విజయం సాధిస్తామని అన్నారు.

08/12/2022 08:54(IST)

హిమాచల్‌లో పోస్టల్‌ బ్యాలెట్‌ లెక్కింపు.. అధిక స్థానాల్లో కాంగ్రెస్‌ లీడ్‌

హిమాచల్‌ ప్రదేశ్‌లో పోస్టల్‌ బ్యాలెట్‌ ఓట్ల లెక్కింపు చివరిదశకు చేరుకుంది. ఇప్పటి వరకు వెల్లడైన ఫలితాల ప్రకారం కాంగ్రెస్‌ 34, భాజపా 27 చోట్ల ఆధిక్యంలో కొనసాగుతున్నాయి. ఇతరులు 5 చోట్ల లీడ్‌లో ఉన్నారు.

08/12/2022 08:50(IST)

గుజరాత్‌లో పోస్టల్‌ బ్యాలెట్‌ లెక్కింపు.. ఆధిక్యాలు ఇలా..

గుజరాత్, హిమాచల్‌ప్రదేశ్‌లో ఓట్ల లెక్కింపు కొనసాగుతోంది. పోస్టల్‌ బ్యాలెట్‌ ఓట్ల లెక్కింపు దాదాపు చివరి దశకు చేరుకుంది. గుజరాత్‌లో ఇప్పటి వరకు భాజపా 84, కాంగ్రెస్‌ 42, ఆప్‌ 6 స్థానాల్లో ఆధిక్యంలో కొనసాగుతున్నాయి.

08/12/2022 08:01(IST)

గుజరాత్‌, హిమాచల్‌లో ఓట్ల లెక్కింపు ప్రారంభం

దేశవ్యాప్తంగా ఆసక్తి రేకెత్తించిన గుజరాత్‌, హిమాచల్‌ అసెంబ్లీ ఎన్నికల ఓట్ల లెక్కింపు ప్రారంభమైంది. పటిష్ఠ భద్రత నడుమ ఉదయం 8 గంటలకు కౌంటింగ్‌ మొదలుపెట్టారు. తొలుత పోస్టల్‌ బ్యాలెట్‌ ఓట్లు, ఆ తర్వాత ఈవీఎంల ఓట్లు లెక్కించనున్నారు. గుజరాత్‌లో 182, హిమాచల్‌ ప్రదేశ్‌లో 68 అసెంబ్లీ స్థానాలకు ఇటీవల ఎన్నికలు జరిగాయి.

08/12/2022 07:32(IST)

కాంగ్రెస్‌కు ఆశాజనకమా..ఆశాభంగమా?

కొన్నేళ్లుగా ఓటర్ల మనసు గెలుచుకోలేక వరుస ఓటములను చవిచూస్తోన్న కాంగ్రెస్‌ గుజరాత్‌, హిమాచల్‌ రాష్ట్రాల్లో ఏ ఒక్క చోట అధికారంలోకి వచ్చినా...క్షీణిస్తున్న ప్రాభవానికి అడ్డుకట్టపడినట్లే. గుజరాత్‌లో ఆ పార్టీ విజయం సాధించే అవకాశాలు ఎటూ కనిపించడంలేదు. కనీసం గతంలో మాదిరిగా ప్రతిపక్ష స్థానాన్ని నిలబెట్టుకున్నా పరువు దక్కినట్లే. అలాకాకుండా ఆ స్థానాన్ని ఆమ్‌ ఆద్మీ పార్టీకి అప్పగించాల్సి వస్తే...అది కాంగ్రెస్‌కు శరాఘాతమే అవుతుందని రాజకీయ విశ్లేషకుల అభిప్రాయం. గత మూడు దశాబ్దాలుగా వరుసగా రెండోసారి ఒకే పార్టీకి అధికారం అప్పగించని హిమాచల్‌ప్రదేశ్‌లో భాజపాను ఓడించి గెలుపు సాధించడంపై కాంగ్రెస్‌ ఆశలుపెట్టుకుంది. ఎగ్జిట్‌ పోల్స్‌ కూడా కొంత ఆశాజనకంగానే కనిపిస్తున్నాయి. ఈ నేపథ్యంలో అక్కడ కూడా పార్టీకి ప్రతికూల ఫలితాలు వస్తే..సంస్థాగతంగా ఇప్పటికే ఎదుర్కొంటున్న సంక్షోభం మరింత తీవ్రమవుతుంది.

08/12/2022 07:15(IST)

హిమాచల్‌లో మారేది ప్రభుత్వమా? సంప్రదాయమా?

హిమాచల్‌లో 1985 తర్వాత ఇప్పటివరకు ఏ పార్టీ కూడా అధికారాన్ని నిలబెట్టుకోలేకపోయింది. ఈసారి ఆ సంప్రదాయానికి ముగింపు పలకాలని అధికార భాజపా గట్టి పట్టుదలను ప్రదర్శించింది. ‘ప్రభుత్వాన్ని కాదు.. సంప్రదాయాన్ని మారుద్దాం’ అనే నినాదంతో ప్రచారం నిర్వహించింది. యువత, మహిళల ఓట్లు తమకు కలిసొస్తాయని.. ప్రభుత్వ వ్యతిరేకతను అధిగమిస్తామని ఆ పార్టీ ఆశలు పెట్టుకుంది. ప్రధాని మోదీ పలుమార్లు రాష్ట్రంలో ప్రచారం నిర్వహించారు. మరోవైపు- హిమాచల్‌ ఫలితాలు కాంగ్రెస్‌కు చాలా ముఖ్యం. ప్రస్తుతం ఆ పార్టీ రాజస్థాన్‌, ఛత్తీస్‌గఢ్‌లలో మాత్రమే సొంతంగా అధికారంలో ఉంది. ఆ రెండు రాష్ట్రాలకూ వచ్చే ఏడాదే ఎన్నికలు జరగనున్నాయి. సార్వత్రిక సమరం కూడా సమీపిస్తోంది. ఈ పరిస్థితుల్లో హిమాచల్‌ ఎన్నికలతో విజయాల బాట పట్టాలని కాంగ్రెస్‌ కోరుకుంటోంది. అయితే రాష్ట్రంలో కమలదళానిదే ఈ దఫా కాస్త పైచేయి అవుతుందని మెజార్టీ ఎగ్జిట్‌ పోల్స్‌ అంచనా వేశాయి. ఆప్‌ ప్రభావం నామమాత్రమేనని విశ్లేషకులు అభిప్రాయపడుతున్నారు.

08/12/2022 07:12(IST)

గుజరాత్‌లో భాజపా హవా కొనసాగేనా!

గుజరాత్‌లో భాజపా, కాంగ్రెస్‌, ఆమ్‌ ఆద్మీ పార్టీ (ఆప్‌)ల మధ్య త్రిముఖ పోటీ నెలకొంది. ప్రధాని మోదీ స్వరాష్ట్రం కావడంతో ప్రస్తుతం అందరి దృష్టి ఇక్కడి ఫలితాలపైనే ఉంది. రాష్ట్రంలో ఆయన 30 ర్యాలీలు, రోడ్‌షోల్లో పాల్గొన్నారు. ఈ దఫా కూడా భాజపా ప్రభుత్వాన్ని ఏర్పాటుచేయగలిగితే.. మూడోసారి ప్రధానిగా ఆయన అభ్యర్థిత్వానికి మరింత బలం చేకూరినట్లవుతుందని విశ్లేషకులు చెబుతున్నారు. కేంద్ర హోంమంత్రి అమిత్‌ షా దాదాపుగా రెండు నెలలపాటు గుజరాత్‌లోనే ఉండి.. ప్రచార సరళిని పర్యవేక్షించారు. రాష్ట్రంలో కాంగ్రెస్‌ ఈసారి ‘నిశ్శబ్ద ప్రచారం’ నిర్వహించింది. జాతీయ స్థాయిలో భాజపాకు గట్టి పోటీదారుగా నిలవాలని భావిస్తున్న ఆప్‌.. గుజరాత్‌లో దూకుడు ప్రదర్శించింది. పార్టీ అధినేత కేజ్రీవాల్‌ సహా పలువురు నేతలు.. రాష్ట్రంలో తాము అధికారంలోకి వస్తే చేపట్టబోయే సంక్షేమ కార్యక్రమాల గురించి ప్రజలకు విస్తృత స్థాయిలో వివరించారు. గుజరాత్‌లో అధికారాన్ని నిలబెట్టుకుంటే.. మన దేశంలో సీపీఎం తర్వాత ఓ రాష్ట్ర అసెంబ్లీ ఎన్నికల్లో వరుసగా ఏడుసార్లు విజయం సాధించిన ఏకైక పార్టీగా భాజపా రికార్డు సృష్టిస్తుంది. సీపీఎం పశ్చిమ బెంగాల్‌ను వరుసగా 34 ఏళ్లపాటు (1977 నుంచి 2011 వరకు) పాలించింది.

08/12/2022 07:06(IST)

ఓట్ల లెక్కింపునకు ఏర్పాట్లు పూర్తి.. కాసేపట్లో కౌంటింగ్‌

దేశవ్యాప్తంగా ఉత్కంఠ రేకెత్తించిన గుజరాత్‌, హిమాచల్‌ ప్రదేశ్‌ అసెంబ్లీ ఎన్నికల ఫలితాలు గురువారం వెలువడనున్నాయి. ఈ రెండు రాష్ట్రాల్లో ఓట్ల లెక్కింపునకు ఎన్నికల సంఘం (ఈసీ) అన్ని ఏర్పాట్లు పూర్తిచేసింది. పటిష్ఠ భద్రత నడుమ ఉదయం 8 గంటలకు లెక్కింపు ప్రక్రియ ప్రారంభమవుతుంది. తొలుత పోస్టల్‌ బ్యాలెట్లను, తర్వాత ఈవీఎంల ఓట్లను లెక్కిస్తారు. గుజరాత్‌లో 27 ఏళ్లుగా అధికారంలో ఉన్న భాజపా.. మరోసారి ప్రభుత్వాన్ని ఏర్పాటుచేసేందుకు తహతహలాడుతోంది. అక్కడ కమలనాథుల ఘన విజయం లాంఛనమేనని ఎగ్జిట్‌ పోల్స్‌ అంచనా వేశాయి. కాంగ్రెస్‌ రెండో స్థానంలో, ఆప్‌ తృతీయ స్థానంలో నిలుస్తుందన్న అంచనాలున్నాయి. మరోవైపు- హిమాచల్‌ ప్రదేశ్‌లో భాజపా, కాంగ్రెస్‌ మధ్య పోరు నువ్వానేనా అన్నట్లు ఉంది.
* ఐదు రాష్ట్రాల్లో ఆరు అసెంబ్లీ స్థానాలతో పాటు ఉత్తర్‌ప్రదేశ్‌లోని ప్రతిష్ఠాత్మక మైన్‌పురి లోక్‌సభ సీటుకు జరిగిన ఉప ఎన్నికల ఫలితాలు కూడా గురువారం వెలువడనున్నాయి. ఉత్తర్‌ప్రదేశ్‌లోని రాంపుర్‌, ఖతౌలీ సహా పదమ్‌పుర్‌ (ఒడిశా), కుఢనీ (బిహార్‌), సర్దార్‌శహర్‌ (రాజస్థాన్‌), భానుప్రతాప్‌పుర్‌ (ఛత్తీస్‌గఢ్‌) అసెంబ్లీ స్థానాలకు తాజాగా ఉప ఎన్నికలు జరిగాయి.

06/12/2022 19:26(IST)

గుజరాత్‌, హిమాచల్‌ ప్రదేశ్‌లో కమల కాంతులే!

ప్రధానమంత్రి నరేంద్ర మోదీ స్వరాష్ట్రమైన గుజరాత్‌లో భారతీయ జనతా పార్టీ (భాజపా) మరోసారి ప్రభంజనం సృష్టించబోతోంది! రాష్ట్రంలో వరుసగా ఏడోసారి అధికార పగ్గాలు చేపట్టబోతోంది!! తాజాగా అక్కడ జరిగిన అసెంబ్లీ ఎన్నికల్లో కమలదళం ఘన విజయం సాధిస్తుందని సోమవారం ఎగ్జిట్‌ పోల్స్‌ ముక్తకంఠంతో పేర్కొన్నాయి. వాటి అంచనాల ప్రకారం- గుజరాత్‌లో భాజపాకు చాలా దూరంలో కాంగ్రెస్‌ రెండో స్థానానికి పరిమితం కానుంది. ఇక్కడ అధికారాన్ని దక్కించుకోవడమే లక్ష్యంగా సర్వశక్తులూ ఒడ్డి పోరాడిన ఆమ్‌ ఆద్మీ పార్టీ (ఆప్‌)కి తీవ్ర నిరాశ ఎదురుకానుంది. పూర్తి వార్త కోసం క్లిక్‌ చేయండి