close

మరో 2 కొత్త జిల్లాలు 

నారాయణపేట, ములుగు జిల్లాల ఆవిర్భావం 
నేటి నుంచే మనుగడలోకి 
ఉత్తర్వులు జారీచేసిన ప్రభుత్వం 
33 జిల్లాలకు విస్తరించిన రాష్ట్రం 
లోక్‌సభ ఎన్నికల అనంతరం 
12 కొత్త మండలాల ఏర్పాటు

ఈనాడు, హైదరాబాద్‌: రాష్ట్రంలో ములుగు, నారాయణపేట రెవెన్యూ డివిజన్లను కొత్త జిల్లాలుగా ఏర్పాటు చేస్తూ ప్రభుత్వం ఉత్తర్వులు జారీ చేసింది. గతేడాది డిసెంబర్‌ 31న ఈ రెండు జిల్లాల ఏర్పాటుకు ముసాయిదా ప్రకటనను జారీ చేసి ప్రజల నుంచి అభ్యంతరాలను కోరింది. అనంతరం జయశంకర్‌ భూపాలపల్లి జిల్లా నుంచి ములుగు, మహబూబ్‌నగర్‌ జిల్లా నుంచి నారాయణపేటలను వేరు చేస్తూ శనివారం తుది ప్రకటన విడుదల చేసింది. దీంతో రాష్ట్రంలో జిల్లాల సంఖ్య 33కు చేరుకుంది. పది జిల్లాలతో ఆవిర్భవించిన తెలంగాణలో 2016 అక్టోబర్‌ 11వ తేదీన కొత్తగా 21 జిల్లాలను ఏర్పాటు చేశారు. పరిపాలన సౌలభ్యం దృష్టా కొత్త జిల్లాలు, రెవెన్యూ డివిజన్లు, మండలాల పునర్విభజనను ప్రభుత్వం కొనసాగిస్తూ వస్తోంది. గత నెలలో కోరుట్ల, కొల్లాపూర్‌ రెవెన్యూ డివిజన్ల ఏర్పాటుకు ప్రాథమిక ప్రకటన జారీ అయింది.

నేటి నుంచే పరిపాలన ప్రారంభం 
ములుగు, నారాయణపేట జిల్లాల్లో ఆదివారం నుంచే పాలనాపరమైన సేవలు ప్రారంభం కానున్నాయి. కొత్త జిల్లాల ఆవిర్భావం, మనుగడ 17.02.2019 నుంచి అమల్లోకి వస్తుందని ఉత్తర్వుల్లో ప్రభుత్వ ప్రత్యేక ప్రధాన కార్యదర్శి రాజేశ్వర్‌ తివారీ పేర్కొన్నారు. ఈ మేరకు పాలనాపరమైన ఏర్పాట్లు చేస్తున్నారు. తొమ్మిది మండలాలతో ఏర్పడిన ములుగు జిల్లాలో ములుగు కేంద్రంగా పరిపాలన కొనసాగనుంది. 2.94 లక్షల జనాభా ఉన్న ఈ జిల్లాకు తొలి కలెక్టర్‌గా జయశంకర్‌ భూపాలపల్లి జిల్లా కలెక్టర్‌ వి.వెంకటేశ్వర్లకు అదనపు బాధ్యతలు అప్పగించారు. 11 మండలాలతో ఏర్పడిన నారాయణపేట జిల్లా జనాభా 5.04 లక్షలు. ఈ జిల్లాలో నారాయణపేట కేంద్రంగా పరిపాలన కొనసాగనుండగా తొలి కలెక్టర్‌గా మహబూబ్‌నగర్‌ జిల్లా కలెక్టర్‌ రొనాల్డ్‌రోస్‌కు అదనపు బాధ్యతలు అప్పగించారు.

కోయిలకొండ మహబూబ్‌నగర్‌లోనే 
మహబూబ్‌నగర్‌ జిల్లాలో ఉన్న కోయిలకొండ మండలాన్ని నారాయణపేట జిల్లాలో కలుపుతూ ప్రభుత్వం జారీ చేసిన ప్రాథమిక ప్రకటనపై స్థానికులు పెద్దఎత్తున అభ్యంతరాలు వ్యక్తం చేశారు. ఒక దశలో స్థానికుల ఆందోళన ఉద్రిక్తతలకు దారితీసి పోలీస్‌ పికెటింగ్‌ ఏర్పాటు చేయాల్సి వచ్చింది. ఈ నేపథ్యంలో ప్రభుత్వం ఆ మండలాన్ని వదిలేసి 11 మండలాలతోనే కొత్త జిల్లా ఏర్పాటు చేసింది. ములుగు జిల్లాలో తమ మండలాలను కలపాలంటూ మహబూబాబాద్‌ జిల్లాలో ఉన్న పాకాల కొత్తగూడెం, గంగారం మండలాలకు చెందిన కొందరు విజ్ఞప్తి చేశారు. అయినప్పటికీ తొమ్మిది మండలాలతోనే జిల్లాను ఏర్పాటు చేసింది.

12 కొత్త మండలాలకు అవకాశం 
రాష్ట్రంలో లోక్‌సభ ఎన్నికల అనంతరం మరో 12 కొత్త మండలాలను ఏర్పాటు చేసే అవకాశముంది. రెవెన్యూ డివిజన్లు, మండలాల పునర్విభజనకు ప్రభుత్వం శ్రీకారం చుట్టడంతో ఎన్నో ఏళ్లుగా కొత్త మండలాల ఏర్పాటుకు ప్రయత్నం చేస్తున్న ప్రజాప్రతినిధులు, సంఘాలు ప్రభుత్వానికి పెద్దఎత్తున అర్జీలు పంపుతున్నారు. ఎమ్మెల్యేలు, ఎంపీలు కూడా తమ నియోజకవర్గాల్లో జనాభా అధికంగా ఉన్న ప్రాంతాలను విభజించాలని ముఖ్యమంత్రి కేసీఆర్‌ను కోరుతూ వస్తున్నారు. ప్రస్తుతం కొత్తగా ఏర్పాటైన రెండు జిల్లాల్లోనూ ఒకటి రెండు మండలాలను కొత్తగా ఏర్పాటు చేయనున్నారు. ఆదిలాబాద్‌, జయశంకర్‌ భూపాలపల్లి జిల్లాలో రెండు, సిద్దిపేటలో ఒకటి, నిజామాబాద్‌, మేడ్చల్‌ మల్కాజిగిరి, మెదక్‌ జిల్లాల్లో మరికొన్ని మండలాలను ఏర్పాటు చేసేందుకు రెవెన్యూ యంత్రాంగం కసరత్తు చేస్తోంది.

జిల్లా: నారాయణపేట-11 మండలాలు 
సరిహద్దు జిల్లాలు: మహబూబ్‌నగర్‌, జోగులాంబ గద్వాల, వనపర్తి, వికారాబాద్‌, కర్ణాటక రాష్ట్రం 
మండలాలు: నారాయణపేట(26), దామరగిద్ద(27), ధన్వాడ(9), మరికల్‌(14), కోస్గి(26), మద్దూరు(30), ఊట్కూరు(27), నర్వ(20), మక్తల్‌(39), మాగనూరు(20), కృష్ణా(14).

జిల్లా: ములుగు- 9 మండలాలు 
సరిహద్దు జిల్లాలు: జయశంకర్‌ భూపాలపల్లి, మహబూబాబాద్‌, వరంగల్‌ గ్రామీణం, ఛత్తీస్‌గఢ్‌ రాష్ట్రం 
మండలాలు: ములుగు(19), వెంకటాపూర్‌(10), గోవిందరావుపేట(14), సమ్మక్క-సారక్క తాడ్వాయి(73), ఏటూరునాగారం(39), కన్నాయిగూడెం(25), మంగపేట(23), వెంకటాపురం(72), వాజేడు(61).

(బ్రాకెట్లలోనివి గ్రామాల సంఖ్య)

 

 

ముఖ్యాంశాలు

జిల్లా వార్తలు

దేవతార్చన

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.