నిందితుల వేరే గుర్తింపు కార్డుల గురించీ విచారణ

మహబూబ్‌నగర్‌, ఈనాడు డిజిటల్‌: దిశ హత్యాచార కేసులో నిందితుల వయసు నిర్ధరణ వివాదాస్పదం అవుతోంది. పాఠశాల బోనఫైడ్లలో ముగ్గురు మైనర్లుగా ఉండటంతో పోలీసు ఉన్నతాధికారులు ఆ ధ్రువపత్రాలపై ఆరా తీస్తున్నారు. వీరి వయసుకు సంబంధించిన వేరే గుర్తింపు కార్డులేమైనా ఉన్నాయా అనేదానిపై విచారణ జరుపుతున్నట్లు తెలిసింది. ప్రాథమిక పాఠశాలలో చేర్చే సమయంలో వయసుకు సంబంధించిన ఆధారాలు ఏమైనా సమర్పించారా అన్నది కూడా పోలీసులు ఆరా తీస్తున్నారు. ముగ్గురు నిందితులు బోనఫైడ్‌ సర్టిఫికెట్ల ఆధారంగా మైనర్లుగా ఉండటంతో వయసుకు సంబంధించిన వివరాలను పాఠశాల రికార్డుల్లో ఎప్పుడు నమోదు చేశారన్న దానిపై పోలీసులు దృష్టి సారించారు. ప్రస్తుతానికి నిందితుల ఆధార్‌కార్డులు, బోనఫైడ్లు ఉన్నాయి. ఓటరు గుర్తింపు కార్డులు లేవు.

ఎలాంటి ఆదేశాలూ రాలేదు
దీనిపై మక్తల్‌ మండల తహసీల్దారు నర్సింగరావు, పోలీసు ఇన్‌స్పెక్టరు శంకర్‌లను ‘ఈనాడు’ సంప్రదించగా వయసుకు సంబంధించిన ఆధారాలు సేకరించాలని ఇప్పటివరకు ఎలాంటి ఆదేశాలు రాలేదన్నారు. ‘ప్రసుత్తం పాఠశాలలో చేర్పించాలంటే ఆస్పత్రిలో పుట్టిన సమయంలో ఇచ్చిన ధ్రువపత్రాలు, పురపాలికలు ఇచ్చిన పత్రాలు, ఆధార్‌కార్డుల ఆధారంగా విద్యార్థికి వయసును నమోదు చేస్తున్నాం. పది.. పదిహేనేళ్ల కిందట ఆధార్‌ కార్డులు, ధ్రువపత్రాలు ఉండేవి కావు. తల్లిదండ్రులు దరఖాస్తు పత్రాల్లో ఏ వయసు వేస్తే దాన్నే కొనసాగించేవారు’ అని ఓ విద్యాశాఖాధికారి తెలిపారు.

ఎన్నికల్లో ఓటరు గుర్తింపు కార్డు ఇవ్వలేదు
‘మొన్న జరిగిన ఎన్నికల్లో నా కుమారుడు ఓటు వేయడానికి ఓటరు గుర్తింపు కార్డు ఇవ్వాలని అడిగా. మీవాడికి 18 ఏళ్లు నిండనందున.. ఇవ్వలేమని అధికారులు చెప్పారు’ అని ఓ నిందితుడి తండ్రి ‘ఈనాడు’కు తెలిపారు. ‘మా కుమారుడి వయసు నాకు నోటికి ఉంది, పుట్టిన సమయంలో రాసి పెట్టుకున్నాం’ అని మరో నిందితుడి తల్లి పేర్కొన్నారు. పాఠశాలలో తాను నమోదు చేయించిన వయసు వివరాలు వాస్తవమేనన్నారు. నిందితుల ఇళ్లలో ఓటర్లు గుర్తింపు కార్డులు లభ్యం కాలేదని స్థానిక రెవెన్యూ సిబ్బంది ఒకరు వెల్లడించారు.