దేశంలో ఒక్కరోజే 6 వేలకుపైగా కొత్త కేసులు
మరో 148 మంది మృతి

ఈనాడు, దిల్లీ: కరోనా వైరస్‌ భారతావనిపై తన ఉక్కు పిడికిలిని క్రమంగా బిగిస్తోంది. దేశంలో తాజాగా 24 గంటల్లో రికార్డు స్థాయిలో ఏకంగా 6,088 మంది వైరస్‌ పాజిటివ్‌గా నిర్ధారణ అయ్యారు. వైరస్‌ దెబ్బకు తాజాగా 148 మంది ప్రాణాలు కోల్పోయారు. దీంతో మొత్తం మరణాల సంఖ్య 3,583కు పెరిగింది. మహారాష్ట్రలో వైరస్‌ విలయ తాండవం కొనసాగుతోంది. కొత్తగా అక్కడ 2,345 కేసులు, 64 మరణాలు నమోదయ్యాయి. దేశవ్యాప్తంగా కొత్తగా 1,03,514 మందికి వైరస్‌ నిర్ధారణ పరీక్షలు నిర్వహించారు. వలస కూలీల రాక ప్రారంభమైన తర్వాత ఉత్తరాది రాష్ట్రాల్లో కేసుల సంఖ్య ఎక్కువైంది. బిహార్‌లో ఒకేరోజు 308 కొత్త కేసులొచ్చాయి. ఝార్ఖండ్‌, హిమాచల్‌ప్రదేశ్‌, ఉత్తరాఖండ్‌, అసోంలలోనూ పెరుగుదల అధికంగానే నమోదైంది. లద్దాఖ్‌, అండమాన్‌, మణిపుర్‌, మేఘాలయ, మిజోరం, దాద్రానగర్‌, త్రిపుర, నాగాలాండ్‌, అరుణాచల్‌ప్రదేశ్‌లలో 24 గంటల్లో కొత్త కేసులు ఒక్కటీ రాలేదు. తాజాగా గుజరాత్‌లో 24, దిల్లీలో 18, ఉత్తర్‌ ప్రదేశ్‌లో 11 మరణాలు నమోదయ్యాయి.
* గుజరాత్‌లోని వాద్‌నగర్‌ సివిల్‌ ఆస్పత్రిలో వారం క్రితం పుట్టిన కవలలకు వైరస్‌ సోకింది. కరోనా పాజిటివ్‌ మహిళ వీరికి జన్మనిచ్చింది.  ః  భారత్‌లో జూన్‌ 21 నుంచి 28 వరకు కరోనా కేసులు గరిష్ఠ స్థాయిలో నమోదయ్యే ముప్పు ఉందని, అక్టోబర్‌ చివరి నాటికి మొత్తం కేసుల సంఖ్య 5 లక్షలకు చేరుకుంటుందని జాదవ్‌పుర్‌ యూనివర్సిటీ ప్రొఫెసర్‌ నందదులాల్‌ బైరాగీ నేతృత్వాన చేపట్టిన అధ్యయనం పేర్కొంది.
మహారాష్ట్రలో చాలని పడకలు..
కరోనా ఉద్ధృతికి మహారాష్ట్ర విలవిల్లాడుతోంది. దేశంలో సంభవిస్తున్న మరణాల్లో 40 శాతానికిపైగా అక్కడే నమోదవుతున్నాయి. ప్రభుత్వ ఆస్పత్రుల్లో పడకలు చాలకపోవడంతో ప్రైవేటు, చారిటబుల్‌ ఆస్పత్రుల్లోని 80% పడకలను ఆగస్టు 31 వరకు ప్రభుత్వం తన అధీనంలోకి తీసుకొంది. అక్కడ బాధితుల చికిత్సకు సంబంధించిన రుసుమును 3 స్లాబులుగా (రూ.4 వేలు, రూ.7,500, రూ.9 వేలు) వర్గీకరించింది.
* లాక్‌డౌన్‌ కారణంగా విదేశాల్లో ఆగిపోయిన ఓసీఐ కార్డుదారులు దేశంలోకి వచ్చేందుకు కేంద్ర హోంశాఖ అనుమతిచ్చింది.

24 గంటల్లో..
సగటున గంటకు నమోదైన కేసులు 253
పరీక్షలు చేయించుకున్న ప్రతి 17 మందిలో ఒకరికి పాజిటివ్‌
ఒక్క మరణం కూడా నమోదు కాని రాష్ట్రాలు 19
ఇప్పటివరకు దేశంలో కోలుకున్నవారి శాతం 40.97
ఒక్కరోజులో ఇన్ని కేసులు నమోదవడం ఇదే తొలిసారి 6,000 +