పరమాన్నం పరమార్థం!

మతం-మంచి

పరమాన్నం పరమార్థం!

నేడు మకర సంక్రాంతి

పౌష్యమాసపు మంచుముత్యాలు..
చలిగాలుల చక్కిలిగింతలు..
అందంగా ముస్తాబైన ప్రకృతి...
ఒకటేమిటి సంక్రాంతికి అక్షరాలా ఆనందాల వెల్లువే ఇంటి ముంగిటకు వస్తుంది. అందుకే ఇది పెద్ద పండగ అయింది.
పండిన పంటలు...
నిండిన గాదెలు... నిండుగా మనసులు...
ఇలా ఈ పర్వదినం అనిర్వచనీయమైన అనుభూతిని మిగుల్చుతుంది.

మిగిలిన పండగలన్నీ తమను చల్లగా చూడమని భగవంతుణ్ణి ప్రార్థించే సందర్భాలైతే. సంక్రాంతి మాత్రం తమను చల్లగా చూసినందుకు, ఇంటిని ధనధాన్యాలతో నింపినందుకు ఆ పరమాత్ముడికి కృతజ్ఞతలు చెప్పే సందర్భం. ‘దేవాన్భావయ తానేన తే దేవాభావయన్తువః’... దేవతలను తృప్తిపరిస్తే వారు మనల్ని అనుగ్రహిస్తారు. కాబట్టి మనం తినే ఆహారాన్ని ముందుగా దేవతలకు నివేదించి తరువాత స్వీకరించాలని మహాభారతంలో గీతాచార్యుడు కూడా చెబుతాడు. సంక్రాంతి సమయానికి కొత్త పంట చేతికి వస్తుంది... తొలి ఫలితాన్ని భగవదర్పణం చేయాలని పెద్దలు అంటారు. అందుకే ఈ రోజు కొత్త బియ్యంతో పరమాన్నం చేసి భగవంతుడికి నివేదిస్తారు. వీటినే పొంగళ్లు అని కూడా అంటారు. అసలీ ఆచారం ఈనాటిది కాదు. వ్యవసాయానికి వెలుతురు ఇచ్చిన సూర్యుడికి, వర్షం కురిపించిన ఇంద్రుడికి, పంట రూపంలో ధాన్యాన్నిచ్చిన భూమాతకు, శారీరకంగా శ్రమించి సహకరించిన పశుగణానికి కృతజ్ఞతలు తెలపడం వేదకాలం నుంచి ఉంది. ఈ ప్రక్రియను ఉద్వృషభోత్సవం లేదా అనడుత్సవం పేరుతో సంక్రాంతి నాడు చేస్తారు. కొందరు కనుమ రోజున చేస్తారు. వేదాల్లో దీని ప్రస్తావన ప్రముఖంగా కనిపిస్తుంది.

పండిన ధ్యాన్యంలో నుంచి వచ్చిన బియ్యాన్ని, ఆవునేతితో కలిపి వండిన పదార్థాన్ని పురోడాశం అంటారు. దీన్ని విష్ణువుకు సమర్పించాలని కృష్ణ యజుర్వేదం చెబుతోంది. సూర్యుడు మకరరాశిలో ప్రవేశించినపుడు అప్పుడే పండిన పంటతో పొంగలిని వండి నివేదన చేయాలని అధర్వణ వేదం చెెప్పింది. దీన్నే ‘ఆగ్రయనేష్ఠి’ అని అన్నారు. ఇదంతా మార్గశిర, పుష్య మాసాల్లో చేయాలని రామాయణంలో చెప్పారు.

సంక్రాంతి నాడు మకరరాశిలో ప్రవేశించే సూర్యుడినే సంక్రాంతి పురుషుడు అని అంటారు. ఆ రోజు, తిథి, వారం, నక్షత్రాల బట్టి సంక్రాంతి పురుషుడి పేరు, రూపం ఆధారపడి ఉంటాయని... ఆ రూపం ఆధారంగానే ఆ ఏడాది ప్రజల వర్తన, ప్రభువుల పరిపాలన, దేశకాల పరిస్థితులు, వాతావరణం ఉంటాయని శాస్త్రాలు చెబుతున్నాయి.

-రమా శ్రీనివాస్‌

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి రుచులు దేవతార్చన

మతం-మంచి

మరిన్ని

రుచులు

App