ఆసక్తి రేకెత్తిస్తున్న తాజా పరిణామం

ముంబయి: మహారాష్ట్ర రాజకీయాలు పొలిటికల్‌ థ్రిల్లర్‌ సినిమాను తలపిస్తున్నాయి. అక్కడ పరిస్థితుల్లో రోజుకో ట్విస్ట్ కనిపిస్తోంది. ప్రభుత్వ ఏర్పాటుకై కాంగ్రెస్‌-ఎన్సీపీ నేడు సమావేశం కానున్న తరుణంలో మరో ఆసక్తికర పరిణామం చోటు చేసుకుంది. నేషనలిస్ట్‌ కాంగ్రెస్ అధినేత శరద్‌ పవార్‌.. ప్రధాన మంత్రి నరేంద్ర మోదీతో నేడు భేటీ కానున్నారు. మధ్యాహ్నం 12:30గంటలకు వీరిద్దరి భేటీ జరగనుంది. ప్రస్తుతం మహారాష్ట్రలో నెలకొన్న పరిణామాల నేపథ్యంలో ఈ భేటీకి ప్రాధాన్యం లభిస్తోంది.
మహారాష్ట్రలోని రైతుల సమస్యలపై ప్రధాని మోదీతో పవార్‌ చర్చించనున్నట్లు సంబంధిత వర్గాలు వెల్లడించాయి. పార్లమెంటు ఆవరణలోనే వీరి భేటీ జరగనుంది. శివసేనతో పొత్తు విషయంలో ముందుకు వెళ్లడంపై ఈరోజు సాయంత్రం కాంగ్రెస్‌-ఎన్సీపీలు మరోకీలక భేటీ నిర్వహించనున్నాయి. ఈ నేపథ్యంలో రైతుల సమస్యలంటూ మోదీతో పవార్‌ భేటీ కానున్నారు. వీరిద్దరి మధ్య మహారాష్ట్ర రాజకీయ పరిస్థితి కూడా చర్చకు వచ్చే అవకాశం కనిపిస్తోంది.