భారత్‌-బంగ్లాదేశ్‌ టీ20లు అయిపోయాయ్‌.. ఇక మిగిలింది టెస్టు సమరం! చిట్టి ఫార్మాట్‌లో టీమ్‌ఇండియాకు గట్టిపోటీనే ఇచ్చిన బంగ్లాకు టెస్టుల్లో నెగ్గుకు రావడం అంత సులభం కాబోదు. చరిత్ర చూసుకున్నా.. రికార్డుల లెక్కలు తీసినా భారత్‌ చేతిలో బంగ్లాకు ప్రతిసారి చేదు అనుభవమే ఎదురైంది. చివరగా ఈ రెండు జట్లు 2017లో ఆడితే అందులో భారతే నెగ్గింది. టీమ్‌ఇండియా పేస్‌ దళం మునుపెప్పుడూ లేనంత పదునుగా ఉంది. ఈ స్థితిలో బంగ్లా.. భారత్‌లో   భారత్‌ను ఎదుర్కొని నిలవగలదా! ఎంత మేరకు పోటీ ఇవ్వగలదు? రేపటి నుంచే టెస్టు సిరీస్‌..!

ఇండోర్‌

బంగ్లాదేశ్‌తో భారత్‌ టెస్టు సమరానికి సమయం ఆసన్నమైంది.. టీ20లో ఊహించిన దానికంటే గట్టిగానే పోరాడిన బంగ్లా పులులకు గురువారం ప్రారంభం కానున్న రెండు టెస్టుల సిరీస్‌ పెద్ద పరీక్ష పెట్టనుంది. ముఖ్యంగా భారత బౌలింగ్‌ను ఎదుర్కోవడం బంగ్లాకు సవాలే. బుమ్రా లేకపోయినా మహ్మద్‌ షమి, ఇషాంత్‌శర్మ, ఉమేశ్‌ యాదవ్‌లతో భారత పేస్‌ విభాగం బలంగా ఉంది. ఇటీవల దక్షిణాఫ్రికాతో సిరీస్‌లో అద్భుత బౌలింగ్‌తో టీమ్‌ఇండియా విజయంతో కీలకపాత్ర పోషించిన పేసర్లు.. మరోసారి పంజా విసిరేందుకు సిద్ధం అవుతున్నారు. షకిబ్‌ అల్‌ హసన్‌, తమీమ్‌ ఇక్బాల్‌ లాంటి స్టార్లు లేకపోయినా టీ20ల్లో ఎలాగోలా లాక్కొచ్చిన బంగ్లాదేశ్‌కు టెస్టుల్లో కొన్ని సెషన్ల పాటు భారత బౌలర్లను ఎదుర్కొని నిలవడం అంత సులభం కాదు. ముఖ్యంగా గత దక్షిణాఫ్రికా సిరీస్‌లో 26 వికెట్లు పడగొట్టిన భారత పేసర్లు జట్టు విజయంలో కీలకమయ్యారు. జీవం లేని పిచ్‌లపై సైతం రివర్స్‌ స్వింగ్‌తో వికెట్లు పడగొడుతున్న పేసర్లు (17.5) దక్షిణాఫ్రికా సిరీస్‌లో స్పిన్నర్ల (27.18) కంటే మెరుగైన సగటుతో బంతులేయడం విశేషం. సఫారీతో సిరీస్‌లో షమి 13, ఉమేశ్‌ 11 వికెట్లు తీశారంటేనే వారి జోరును అర్ధం చేసుకోవచ్చు.

ఆరుసార్లూ ఓడింది
భారత్‌తో ఇప్పటిదాకా ఆరు టెస్టు సిరీస్‌లలో తలపడ్డ బంగ్లాదేశ్‌ ఒక్కసారి కూడా గెలవలేకపోయింది. సిరీస్‌ సంగతి పక్కనపెడితే ఒక్క మ్యాచ్‌లోనూ బంగ్లా నెగ్గలేకపోయింది. 2000లో తొలిసారి ఈ రెండు జట్లు సిరీస్‌ ఆడగా భారత్‌ 1-0తో గెలిచింది. 2015లో ఏకైక టెస్టు సిరీస్‌ను  0-0తో డ్రా చేసుకోవడం ఒక్కటే ఇప్పటిదాకా ఆ జట్టు ఉత్తమ ప్రదర్శన. చివరిగా 2017లో హైదరాబాద్‌ వేదికగా జరిగిన ఏకైక టెస్టులో భారత్‌ నెగ్గింది. ఈ నేపథ్యంలో తాజాగా రెండు మ్యాచ్‌ల పోరుకు సిద్ధమైన బంగ్లా.. సిరీస్‌ను డ్రా చేసుకున్నా గొప్ప విషయమే. కానీ ఇటీవల టెస్టుల్లో భారత జోరు చూస్తుంటే బంగ్లా ఎదురు నిలవడం కష్టంగానే కనిపిస్తోంది.

ఈ పిచ్‌ అందరిది..
భారత్‌లో టెస్టు మ్యాచ్‌ అనగానే స్పిన్‌ పిచ్‌ మాట వినిపిస్తోంది. కానీ భారత్‌-బంగ్లా తొలి టెస్టు కోసం సిద్ధం చేసిన పిచ్‌ అందరికీ సహకరిస్తుందని అంటున్నాడు ఇండోర్‌ స్టేడియంలో పిచ్‌ క్యురేటర్‌ సమందర్‌ సింగ్‌ చౌహాన్‌. ఈ పిచ్‌ ఐదు రోజులూ అటు బ్యాట్స్‌మెన్‌కు, ఇటు బౌలర్లకు సమానంగా సహకరించేలా ఉంటుందని అతను చెబుతున్నాడు.  ‘‘పిచ్‌ బాగుంది. బౌలింగ్‌, బ్యాటింగ్‌కు సమానంగా అనుకూలిస్తుంది. మ్యాచ్‌ జరిగినన్ని రోజులూ జీవం ఉంటుంది. కొన్ని రోజులు వాతావరణం ఇబ్బందిపెట్టింది. కానీ ఇప్పుడా పరిస్థితి లేదు. పిచ్‌ గురించి బీసీసీఐ నుంచి ఎలాంటి మార్గదర్శకాలు రాలేదు’’ అని చౌహాన్‌ చెప్పాడు.

డే/నైట్‌ టెస్టుపై..