తొలి డే/నైట్‌ టెస్టులో భారత్‌ జోరు
ఫాస్ట్‌బౌలర్ల జాతర.. పదికి పది వికెట్లు
30.3 ఓవర్లలో 106 పరుగులకే బంగ్లా ఆలౌట్‌
తొలి ఇన్నింగ్స్‌లో టీమ్‌ఇండియా 174/3

నిండుగా స్టేడియం.. ఒకటే కేరింతలు.. అక్కడ ఐపీఎల్‌ మ్యాచ్‌ ఏమైనా జరుగుతోందా అనిపించే సందడి!
ఆరంభోత్సవంలో ఒక దేశ ప్రధాని.. ఒక రాష్ట్ర సీఎం.. విరామ సమయాల్లో దిగ్గజ ఆటగాళ్ల ఊరేగింపులు, సాంస్కృతిక ప్రదర్శనలు.. ప్రపంచకప్‌ ఏమైనా మొదలైందా అనిపించే హంగామా!
పదికి పది వికెట్లు పేసర్లకే.. ఇషాంత్‌ శర్మ ఖాతాలో అయిదు వికెట్లు.. మ్యాచ్‌కు ఏ డర్బనో, గబ్బానో ఆతిథ్యమిస్తోందా అనిపించే ఫాస్ట్‌బౌలింగ్‌ జోరు!
ఇదంతా ‘గులాబి’ మాయాజాలమే!
మన క్రికెట్‌ అభిమానులకు సరికొత్త అనుభూతి పంచుతూ.. అరుదైన దృశ్యాలకు వేదికగా నిలుస్తూ.. గులాబి బంతి భారత గడ్డపై ఘనంగా అరంగేట్రం చేసింది. తన తొలి డేనైట్‌ టెస్టులో కోహ్లీసేనకు శుభారంభాన్నందించింది.
ఆట వేళలు మారినా.. పరిస్థితులు మారినా.. బంతి కూడా మారినా.. భారత్‌ జోరుకు మాత్రం అడ్డే లేదు. ప్రత్యర్థిని 106కే కుప్పకూల్చి.. తొలి రోజే 68 పరుగుల ఆధిక్యం సాధించి.. మరో ‘మూడ్రోజుల విందు’కు రంగం సిద్ధం చేసుకున్న కోహ్లీసేన.. క్లీన్‌స్వీప్‌ సంకేతాలూ ఇచ్చేసింది.

కోల్‌కతా

చారిత్రక మ్యాచ్‌ను టీమ్‌ఇండియా అద్భుత రీతిలో ఆరంభించింది. తొలిసారిగా గులాబి బంతితో డే/నైట్‌ టెస్టు ఆడిన కోహ్లీసేన.. తొలి రోజే మ్యాచ్‌పై పట్టు సాధించింది. శుక్రవారం ఆరంభమైన సిరీస్‌ రెండో టెస్టులో గులాబి బంతుల్ని బుల్లెట్లలా ప్రయోగించిన పేసర్లు ఇషాంత్‌ శర్మ (5/22), ఉమేశ్‌ యాదవ్‌ (3/29), మహ్మద్‌ షమి (2/36).. బంగ్లాను 106 పరుగులకే కుప్పకూల్చారు. బంగ్లా ఇన్నింగ్స్‌లో పదికి పది వికెట్లూ ఈ ముగ్గురు పేసర్లే పడగొట్టారు. 29 పరుగులు చేసిన ఓపెనర్‌ షాద్మన్‌ ఇస్లామే టాప్‌స్కోరర్‌. అనంతరం తొలి ఇన్నింగ్స్‌ ఆరంభించిన భారత్‌.. ప్రత్యర్థి స్కోరును సునాయాసంగా అధిగమించింది. 3 వికెట్లకు 176 పరుగులతో తొలి రోజు ఆటను ముగించింది. గులాబి బంతితో భారత్‌కూ కొంత ఇబ్బందులు ఎదురైనప్పటికీ.. కెప్టెన్‌ విరాట్‌ కోహ్లి (59 బ్యాటింగ్‌; 93 బంతుల్లో 8×4), చెతేశ్వర్‌ పుజారా (55; 105 బంతుల్లో 8×4) ప్రమాదం లేకుండా చూశారు. కోహ్లికి తోడుగా రహానె (23 బ్యాటింగ్‌) క్రీజులో ఉన్నాడు. ఇప్పటికే 68 పరుగుల ఆధిక్యంలో ఉన్న టీమ్‌ఇండియా.. మిగిలిన 7 వికెట్లతో ఇన్నింగ్స్‌ను ఎక్కడిదాకా తీసుకెళ్తుందో చూడాలి.

4 ఓవర్లు మామూలే..: టాస్‌ గెలిచిన బంగ్లా కెప్టెన్‌ సాహసోపేత రీతిలో బ్యాటింగ్‌ ఎంచుకోగా.. తొలి నాలుగు ఓవర్లు గులాబి బంతి సాధారణంగానే స్పందించడంతో అతడి నిర్ణయం సరైందే అనిపించింది. కానీ తర్వాతి ఓవర్‌ నుంచి మొదలైంది మాయ. బంతి వేగం పెరిగింది. స్వింగ్‌ కూడా అయింది. దీంతో బంగ్లా ఓపెనర్లకు కష్టాలు తప్పలేదు. ఇన్నింగ్స్‌ ఏడో ఓవర్లో కయెస్‌ను వికెట్ల ముందు దొరకబుచ్చుకుని భారత్‌కు శుభారంభాన్నందించాడు ఇషాంత్‌. బంగ్లా ఓపెనర్‌ సమీక్ష కోరినా ఫలితం లేకపోయింది. తొలి వికెట్‌ పడిందో లేదో.. బంగ్లా పతనానికి గేట్లు ఎత్తేసినట్లయింది. వరుసగా ముగ్గురు బ్యాట్స్‌మెన్‌ డకౌటైపోయారు. మొమినుల్‌, మిథున్‌లను ఉమేశ్‌ ఒకే ఓవర్లో ఔట్‌ చేయగా.. తొలి టెస్టులో భారత బౌలింగ్‌ను బాగానే ప్రతిఘటించిన ముష్ఫికర్‌ను బౌల్డ్‌ చేసిన షమి బంగ్లా కష్టాల్ని మరింత పెంచాడు. 15/0 నుంచి ఆ జట్టు 26/4కు చేరుకుంది. ఓ ఎండ్‌లో నిలకడగా ఆడుతున్న షాద్మన్‌ను ఉమేశ్‌ బోల్తా కొట్టించగా.. ఇషాంత్‌ తెలివిగా విసిరిన బంతికి మహ్మదుల్లా (6) వెనుదిరిగాడు. లంచ్‌ సమయానికి బంగ్లా స్కోరు 73/6. ఆత్మవిశ్వాసంతో ఆడుతున్న లిటన్‌ దాస్‌ (24) అప్పుడే తలకు బంతి తగిలి రిటైర్డ్‌ ఔట్‌గా వెనుదిరిగాడు. రెండో సెషన్లో బంగ్లా ఇంకో పది ఓవర్లయినా నిలవలేదు. విరామం తర్వాత ఇషాంత్‌ విజృంభించాడు. ఆఫ్‌, లెగ్‌ కట్టర్లతో బ్యాట్స్‌మెన్‌ను బెంబేలెత్తించడంతో స్కోరు వంద దాటగానే బంగ్లా ఆలౌటైంది.

కాస్త కష్టపడ్డా..: గులాబి బంతి, పరిస్థితుల ప్రభావాన్ని చూసుకుని భారత ఓపెనర్లు ఆచితూచి ఆడే ప్రయత్నం చేశారు. కానీ వాళ్లిద్దరూ ఎక్కువసేపు నిలవలేకపోయారు. మయాంక్‌ (14) ఇన్నింగ్స్‌ ఐదో ఓవర్లోనే ఔటైపోయాడు. ఒక జీవనదానం అందుకున్న రోహిత్‌ (21).. ఇబాదత్‌ బౌలింగ్‌లో వికెట్ల ముందు దొరికిపోయాడు. ఔట్‌ అని అర్థమవుతున్నప్పటికీ అతను సమీక్షకు వెళ్లి విఫలమయ్యాడు. 43/2తో భారత్‌ కాస్త ఇబ్బందికర స్థితిలోనే నిలిచింది. అయితే ఫ్లడ్‌లైట్ల వెలుతురులో గులాబి బంతి ప్రభావం తగ్గే వరకు ఎదురు చూసిన పుజారా, కోహ్లిలకు మంచి ఫలితమే దక్కింది. ఆట సాగే కొద్దీ బ్యాటింగ్‌ తేలికైపోయింది. మ్యాచ్‌ గులాబి బంతితో సాగుతోందన్న భావనే రానివ్వకుండా వీళ్లిద్దరూ అలవోకగా బ్యాటింగ్‌ చేశారు. చూడముచ్చటైన షాట్లతో అలరించారు. పుజారా అర్ధసెంచరీ దాటి.. వీరి భాగస్వామ్యం శతకం దిశగా వెళ్తుండగా.. ఇబాదత్‌ బంగ్లాకు కాస్త ఊరటనిచ్చాడు. పుజారాను ఔట్‌ చేశాడు. ఆ తర్వాత రహానెతో కలిసి కోహ్లి మరో వికెట్‌ పడకుండా జాగ్రత్త పడ్డాడు.

బంగ్లాదేశ్‌ తొలి ఇన్నింగ్స్‌: షాద్మన్‌ ఇస్లామ్‌ (సి) సాహా (బి) ఉమేశ్‌ 29; ఇమ్రుల్‌ కయెస్‌ ఎల్బీ (బి) ఇషాంత్‌ 4; మొమినుల్‌ హక్‌ (సి) రోహిత్‌ (బి) ఉమేశ్‌ 0; మహ్మద్‌ మిథున్‌ (బి) ఉమేశ్‌ 0; ముష్ఫికర్‌ రహీమ్‌ (సి) షమి 0; మహ్మదుల్లా (సి) సాహా (బి) ఇషాంత్‌ 6; లిటన్‌ దాస్‌ రిటైర్డ్‌ హర్ట్‌ 24; నయీమ్‌ హసన్‌ (బి) ఇషాంత్‌ 19; ఇబాదత్‌ హుస్సేన్‌ (బి) ఇషాంత్‌ 1; మెహిదీ హసన్‌ (సి) పుజారా (బి) ఇషాంత్‌ 8; అల్‌ అమిన్‌ నాటౌట్‌ 1; అబు జాయెద్‌ (సి) పుజారా (బి) షమి 0; ఎక్స్‌ట్రాలు 14 మొత్తం: (30.3 ఓవర్లలో ఆలౌట్‌) 106.
వికెట్ల పతనం: 1-15, 2-17, 3-17, 4-26, 5-38, 6-60, 7-82, 8-98, 9-105;
బౌలింగ్‌: ఇషాంత్‌ 12-4-22-5, ఉమేశ్‌ 7-2-29-3; మహ్మద్‌ షమి 10.3-2-36-2; జడేజా 1-0-5-0.
భారత్‌ తొలి ఇన్నింగ్స్‌: మయాంక్‌ (సి) మెహిదీ హసన్‌ (బి) అల్‌అమిన్‌ 14; రోహిత్‌ ఎల్బీ (బి) ఇబాదత్‌ 21; పుజారా (సి) షాద్మన్‌ (బి) ఇబాదత్‌ 55; కోహ్లి బ్యాటింగ్‌ 59; రహానె బ్యాటింగ్‌ 23; ఎక్స్‌ట్రాలు 2 మొత్తం: (46 ఓవర్లలో 3 వికెట్లకు) 174
వికెట్ల పతనం: 1-26, 2-43, 3-137
బౌలింగ్‌: అల్‌అమిన్‌ 14-3-49-1; అబు జాయెద్‌ 12-3-40-0; ఇబాదత్‌ హుస్సేన్‌ 12-1-61-2.