close

ప్రధానాంశాలు

Facebook Share Twitter Share WhatsApp Share Telegram Share
జులై 27 కల్లా భారత్‌ చేతికి రఫేల్‌

సరిహద్దు ఉద్రిక్తతల నేపథ్యంలో వేగంగా ఆయుధ సమీకరణ
ఇజ్రాయెల్‌ నుంచి రానున్న గగనతల రక్షణ వ్యవస్థ
మందుగుండు సామగ్రి, క్షిపణులను సరఫరా చేయనున్న రష్యా
దిల్లీ

భారత దీర్ఘకాల నిరీక్షణ కొద్దిరోజుల్లో ఫలించనుంది. అత్యంత అధునాతన రఫేల్‌ యుద్ధవిమానాలు జులై 27 కల్లా మన అమ్ములపొదిలో చేరనున్నాయి. ఇవి భారత వైమానిక దళ పోరాట సామర్థ్యాన్ని మరింత పెంచనున్నాయి. చైనా వెంబడి ఉన్న సరిహద్దుల్లో ఉద్రిక్తతలు నెలకొనడంతో రెండు వారాలుగా భారత వాయుసేన అప్రమత్తంగా ఉంది. ఈ నేపథ్యంలో రఫేల్‌ యుద్ధవిమానాలు మన బలగాలకు కొత్త ఉత్సాహాన్ని అందించనున్నాయి. సరిహద్దుల్లో పరిస్థితుల దృష్ట్యా అమెరికా, రష్యా, ఇజ్రాయెల్‌ నుంచి వేగంగా మరిన్ని ఆయుధాలు, మందు గుండు సామగ్రిని భారత్‌ సమకూర్చుకోనుంది.
రక్షణ మంత్రి రాజ్‌నాథ్‌ సింగ్‌.. ఫ్రాన్స్‌ రక్షణ మంత్రి ఫ్లారెన్స్‌ పార్లీతో ఈ నెల 2న ఫోన్‌లో మాట్లాడారు. కరోనా మహమ్మారి ఉన్నప్పటికీ షెడ్యూల్‌ ప్రకారమే రఫేల్‌ యుద్ధవిమానాలను భారత్‌కు అందిస్తామని ఫ్లారెన్స్‌ హామీ ఇచ్చారు. ఈ లోహ విహంగాలు భారత శత్రువులకు విస్పష్ట సందేశాన్ని పంపుతాయని సైనికాధికారులు తెలిపారు.  
రూ.58వేల కోట్లతో 36 రఫేల్‌ యుద్ధవిమానాల కొనుగోలు కోసం భారత్‌, ఫ్రాన్స్‌ల మధ్య 2016 సెప్టెంబర్‌లో ఒక ఒప్పందం కుదిరింది. ఈ లోహవిహంగాల్లో అత్యంత అధునాతన మీటియోర్‌, స్కాల్ప్‌ క్షిపణులు ఉంటాయి. వీటితోపాటు రఫేల్‌లో భారత్‌ ప్రత్యేకంగా కొన్ని మార్పులు చేయించుకుంది. తొలివిడత కింద ఆరు రఫేల్‌ విమానాలు అందే వీలుంది.

మరిన్ని ఆయుధాలు..
చైనా దూకుడు నేపథ్యంలో వివిధ దేశాల నుంచి మరిన్ని ఆయుధాలను భారత్‌ అత్యవసరంగా సమకూర్చుకుంటోంది. మన దేశ విజ్ఞప్తికి ఆయా దేశాలు సానుకూలంగా స్పందించాయి.
ఇజ్రాయెల్‌
భారత్‌కు అత్యంత విశ్వసనీయ రక్షణ సరఫరాదారుగా ఇజ్రాయెల్‌ గుర్తింపు పొందింది. కార్గిల్‌ యుద్ధ సమయంలోనూ మనకు లేజర్‌ గైడెడ్‌ బాంబులు, క్షిపణులు, నిఘా డ్రోన్లను సరఫరా చేసింది. ఈసారి కీలక గగనతల రక్షణ వ్యవస్థను అందించనుంది.
రష్యా
భారత్‌కు అతిపెద్ద ఆయుధ సరఫరాదారుగా రష్యా ఉంది. ఇటీవల మాస్కో వెళ్లిన రక్షణ మంత్రి రాజ్‌నాథ్‌ సింగ్‌.. అనేక ఆయుధాలు, మందుగుండు సామగ్రి, క్షిపణులను వేగంగా అందించాలని కోరారు. దీనికి రష్యా సమ్మతించింది. 100 కోట్ల డాలర్ల విలువైన ఈ సామగ్రి కొద్దివారాల్లోనే మన దేశానికి రానున్నాయి. విమానాల నుంచి జారవిడిచే బాంబులు, క్షిపణులు తక్షణం అవసరమని భారత వాయుసేన కోరుతోంది. ట్యాంకు విధ్వంసక క్షిపణులు, భుజంపై నుంచి ప్రయోగించే విమాన విధ్వంసక క్షిపణి వ్యవస్థలను సైన్యం అడుగుతోంది.
అమెరికా
కీలక నిఘా సమాచారాన్ని, ఉపగ్రహ చిత్రాలను అమెరికా ఎప్పటికప్పుడు భారత్‌కు అందిస్తోంది. తద్వారా సరిహద్దు పరిస్థితులపై మన వ్యూహకర్తలకు స్పష్టత ఏర్పడుతోంది. అవసరమైన ఆయుధాలు, మందుగుండు సామగ్రి జాబితాను ఇవ్వాలని, వాటిని తక్షణం సరఫరా చేస్తామని హామీ ఇచ్చింది. అధునాతనమైన ఎక్స్‌క్యాలిబర్‌ శతఘ్ని గుళ్లను భారత్‌ ఆర్డరిచ్చింది. ఇవి 40 కిలోమీటర్ల దూరంలోని లక్ష్యాలను అత్యంత కచ్చితత్వంతో ఛేదించగలవు. పర్వత ప్రాంత యుద్ధాల కోసం సిద్ధం చేసిన ఎం777 శతఘ్నులకు ఇవి సరిపోతాయి.

ముఖ్యాంశాలు

జిల్లా వార్తలు

దేవతార్చన


మరిన్ని
రుచులు
+

© 1999- 2020 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.