భయమా? అభయమా?

ప్రధానాంశాలు

భయమా? అభయమా?

మమత స్థానచలనం వెనక మతలబేంటి?

న సిట్టింగ్‌ సీటును మమతా బెనర్జీ ఎందుకు వదులుకున్నారు. నందిగ్రామ్‌ నుంచి పోటీ చేయాలని ఎందుకు నిర్ణయించుకున్నారు? భాజపాకు భయపడా? లేక తన కేడర్‌కు భరోసా ఇవ్వటానికా?
నానాటికీ వేడెక్కుతున్న బెంగాల్‌ ఎన్నికల సమరాంగణంలో ముఖ్యమంత్రి మమతా బెనర్జీ పోటీ చేసే సీటు తాజాగా చర్చనీయాంశమైంది. తానెప్పుడూ పోటీ చేస్తూ వస్తున్న భవానీపూర్‌ను కాదని, బెంగాల్‌ చరిత్రను మార్చిన నందిగ్రామ్‌ స్థానం నుంచి దీదీ ఈ దఫా బరిలో దిగనున్నారు. ఆసక్తికరమైన ఈ నిర్ణయంపై భిన్నమైన వాదనలు వినిపిస్తున్నాయి. తన ప్రత్యర్థులకు సవాల్‌ విసిరి, సొంత పార్టీ కార్యకర్తలకు కూడా తానున్నాననే బలమైన అభయం ఇవ్వటానికే మమత ఈ నిర్ణయం తీసుకున్నారనేది ఒక విశ్లేషణ! లేదు లేదు... భవానీపూర్‌లో ఓడిపోతాననే భయంతో సీటు మారారని అనుమానించే వారూ లేకపోలేదు.

ఆయనే కీలకం
బెంగాల్‌లో ఈ దఫా తృణమూల్‌కు భారతీయ జనతా పార్టీ నుంచి తీవ్రమైన ప్రతిఘటన, పోటీ ఎదురవుతున్న సంగతి తెలిసిందే! భాజపా అగ్ర నేతలంతా బెంగాల్‌పై సర్వశక్తులనూ కేంద్రీకరిస్తున్నారు. ప్రధాని నరేంద్ర మోదీ, అమిత్‌ షాలతో పాటు ముఖ్య నేతలంతా రాష్ట్రంలో మొహరిస్తున్నారు. దీనికి తోడు... తృణమూల్‌ నుంచే అనేక మంది కీలక నేతలు, స్థానిక కేడర్‌లు భాజపాలో చేరుతుండటంతో అధికార పార్టీ యంత్రాంగంలో ఒకింత గందరగోళం ఏర్పడటం సహజం! అలా తృణమూల్‌కు రాజీనామా చేసి... భాజపాతో కలసిన నేతల్లో సువేందు అధికారి కీలకం! ఆయన ప్రాతినిధ్యం వహిస్తున్న ప్రాంతమే నందిగ్రామ్‌.
ప్రభావాన్ని పరిమితం చేయాలని...
బెంగాల్‌లో 34 ఏళ్ల కమ్యూనిస్టు పాలనకు చరమగీతం పాడటానికి బీజం వేసింది నందిగ్రామ్‌! ఇక్కడ జరిగిన భూసేకరణ వ్యతిరేక ఉద్యమం చివరకు కామ్రేడ్లను గద్దె దించింది. ఆ ఉద్యమంలో కీలకంగా వ్యవహరించిన నేత సువేందు అధికారి! వీరి కుటుంబానికి ఈ ప్రాంతంలో మంచి పట్టుంది. 2016లో సువేందు తృణమూల్‌ తరఫున నందిగ్రామ్‌ నుంచి ఎమ్మెల్యేగా ఎన్నికయ్యారు. సువేందు తండ్రి, అన్నయ్య కూడా ఎంపీలుగా ఉన్నారు. ఈ ప్రాంతంలోని దాదాపు 40 అసెంబ్లీ సీట్లను అధికారి కుటుంబం ప్రభావితం చేస్తుందంటారు. అలాంటి సువేందు తృణమూల్‌కు గుడ్‌బై చెప్పి భాజపాలో చేరారు. ఈ నేపథ్యంలో- కొడితే కుంభస్థలాన్నే కొట్టాలన్నట్లుగా మమత ఏకంగా సువేందు ఇలాఖా నుంచే సమరానికి సిద్ధమయ్యారు. తద్వారా తమ పార్టీ కేడర్‌కు బలమైన సందేశం ఇచ్చే ప్రయత్నం చేస్తున్నారు. మమత ప్రత్యర్థిగా ఉండటంతో సువేందు, ఆయన కుటుంబం తన నియోజకవర్గంలోనే తమ శక్తియుక్తులను కేంద్రీకరించాల్సి ఉంటుంది. బయటి వాటిపై ప్రభావం తగ్గే అవకాశం ఉంటుందనేది తృణమూల్‌ వర్గాల అంచనా!
భవానీపూర్‌లో ఓట్లు నానాటికీ తగ్గుతున్నా... ఓడేంత పరిస్థితి మమతకు ఉండకపోవచ్చు! నిజంగా ఒకవేళ గెలుపుపై అనుమానంతో సీటు మార్చుకోవాలనుకుంటే నందిగ్రామ్‌లాంటి బలమైన స్థానం కంటే మరేదైనా సులభంగా నెగ్గే సీటును మమత చూసుకునేవారనేది కూడా హేతుబద్ధమే!
కారణం ఏదైనా, మొత్తానికి మమత సీటు మార్పిడి- బెంగాల్‌ ఎన్నికలకు కొత్త ఊపు తెచ్చింది! మరి బెంగాల్‌ చరిత్రను మార్చిన నందిగ్రామ్‌ మరోమారు ఆ పని చేస్తుందా అనేది ఆసక్తికరం!

తగ్గుతున్న ఓట్లు...

భవానీపూర్‌ నుంచి మమత రెండుసార్లు అసెంబ్లీకి ఎన్నికయ్యారు. తొలిసారి లక్ష ఓట్లకుపైగా మెజార్టీతో అక్కడి ప్రజలు ఘన విజయం కట్టబెట్టారు. 2016లో మాత్రం ఆ మెజార్టీ 25 వేలకు పడిపోయింది. 2019 లోక్‌సభ ఎన్నికల్లోనూ ఈ ప్రాంతంలో భాజపా ఓట్లు మెరుగుపడ్డాయి. దీంతో ఈసారి ఎన్నికల్లో ఏమౌతుందోననే భయంతో, ఎందుకైనా మంచిదనే ఉద్దేశంతో మమత సీటు మార్చుకున్నారనేది ప్రత్యర్థుల విశ్లేషణ!

- ఈనాడు ప్రత్యేక విభాగం


Tags :

ప్రధానాంశాలు

జిల్లా వార్తలు

దేవతార్చన


మరిన్ని