వివేకా హత్యలో ఆ నలుగురు

ప్రధానాంశాలు

వివేకా హత్యలో ఆ నలుగురు

ఎర్ర గంగిరెడ్డి, ఉమాశంకర్‌రెడ్డి, సునీల్‌యాదవ్‌, దస్తగిరి ప్రమేయం

వారిపై పలు అభియోగాలు మోపిన సీబీఐ

ఈనాడు, అమరావతి: ఏపీ ముఖ్యమంత్రి వై.ఎస్‌.జగన్‌మోహన్‌రెడ్డి బాబాయ్‌, మాజీ మంత్రి వై.ఎస్‌.వివేకానందరెడ్డి హత్యలో ఎర్ర గంగిరెడ్డి, యాదటి సునీల్‌ యాదవ్‌, గజ్జల ఉమాశంకర్‌రెడ్డి, షేక్‌ దస్తగిరి పాత్ర ఉందని సీబీఐ తేల్చింది. ఆ నలుగురి ప్రమేయంపై మంగళవారం పులివెందుల న్యాయస్థానంలో అభియోగపత్రం దాఖలు చేసింది. వీరిలో ఉమాశంకర్‌రెడ్డి, సునీల్‌యాదవ్‌ ప్రస్తుతం జైలులో, ఎర్ర గంగిరెడ్డి, దస్తగిరి బెయిల్‌పై ఉన్నారు. నిందితుల నేపథ్యం, ఈ హత్య కేసులో వారి ప్రమేయానికి సంబంధించి సీబీఐ దర్యాప్తులో గుర్తించిన అంశాలు ఇలా ఉన్నాయి...


అంతమొందించేందుకు ప్రణాళిక

గజ్జల ఉమాశంకర్‌రెడ్డి: వివేకా వద్ద పీఏగా పనిచేసిన జగదీశ్వరరెడ్డి సోదరుడు ఉమాశంకర్‌రెడ్డి. ఈయనది కడప జిల్లా సుంకేశుల. పాల డెయిరీ నిర్వహిస్తుంటారు. ఈ కేసులో నిందితుడిగా ఉన్న యాదటి సునీల్‌ యాదవ్‌ను వివేకాకు పరిచయం చేసింది ఈయనే.

సీబీఐ దర్యాప్తు ఏం తేల్చిందంటే: వివేకాను అంతమొందించేందుకు సునీల్‌ యాదవ్‌తో కలిసి ప్రణాళిక రూపొందించారు. దాని అమలుకు ఆటంకం కలిగిస్తుందనే ఆయన ఇంటి వద్ద ఉండే కుక్కను ఉమాశంకర్‌రెడ్డి కారుతో గుద్దించి చంపేశారు. సేకరించిన శాస్త్రీయ ఆధారాలను గుజరాత్‌లోని ఫోరెన్సిక్‌ సైన్స్‌ డైరెక్టరేట్‌తోపాటు మరికొన్ని ఫోరెన్సిక్‌ సైన్స్‌ ప్రయోగశాలల్లో విశ్లేషించగా... ఈ హత్యలో ఉమాశంకర్‌రెడ్డి పాత్ర తేటతెల్లమైంది. వివేకా హత్యలో ఉమా శంకర్‌రెడ్డి ప్రమేయం ఉందంటూ సునీల్‌ యాదవ్‌, షేక్‌ దస్తగిరి ఇద్దరూ వేర్వేరుగా వాంగ్మూలం ఇచ్చారు.


  గొడ్డలిని బైక్‌ సైడ్‌ బ్యాగ్‌లో దాచిపెట్టి

యాదటి సునీల్‌ యాదవ్‌: ఈయనది పులివెందుల మండలం మోట్నూంతలపల్లె. వివేకా హత్యకు కొన్ని రోజుల ముందే ఆయనకు పరిచయమయ్యారు.

సీబీఐ దర్యాప్తు ఏం తేల్చిందంటే: వివేకాను అంతమొందించేందుకు ఉమాశంకర్‌రెడ్డితో కలిసి ప్రణాళిక రూపొందించారు. వివేకాను హత్య చేసిన రోజు రాత్రి ఆయన ఇంటికి చేరుకునేందుకు ఉమాశంకర్‌రెడ్డికి చెందిన పల్సర్‌ బైక్‌నే సునీల్‌ యాదవ్‌ వినియోగించారు. ఆయన్ని హతమార్చేందుకు వినియోగించిన గొడ్డలిని బైక్‌ సైడ్‌ బ్యాగ్‌లో దాచిపెట్టి, దానిపైనే అక్కడి నుంచి తప్పించుకున్నారు. వివేకా ఇంటివద్ద వాచ్‌మన్‌గా పనిచేసిన రంగన్న న్యాయమూర్తి ఎదుట ఇచ్చిన వాంగ్మూలంలోనూ ఈ హత్యలో సునీల్‌ ప్రమేయం గురించి వెల్లడించారు. హత్యకు వినియోగించిన ఆయుధాలు, ఇతర నిందితుల ప్రమేయం గురించి సునీల్‌కు తెలుసు.


ఆధారాలను తుడిచేశారని...

తూమలపల్లి గంగిరెడ్డి అలియాస్‌ ఎర్ర గంగిరెడ్డి: 40 ఏళ్లుగా వివేకాకు సన్నిహితుడిగా కొనసాగారు. సీబీఐ విచారణ కోరుతూ వివేకా కుమార్తె సునీత హైకోర్టులో గతంలో వేసిన పిటిషన్‌లో పేర్కొన్న అనుమానితుల జాబితాలో ఈయన పేరు రెండోది.

ఆరోపణలు, అభియోగాలు: ‘‘వివేకా హత్య కేసు విషయంలో ఎవరికైనా నా పేరు చెబితే నిన్ను నరికేస్తా’’ అంటూ ఎర్ర గంగిరెడ్డి తనను బెదిరించారంటూ వివేకా వద్ద వాచ్‌మన్‌గా పనిచేసిన రంగన్న ఈ ఏడాది జులైలో ఆరోపించారు. ‘‘వివేకా హత్య తర్వాత ఘటనా స్థలంలోని రక్తపు మరకలు, ఇతర ఆధారాలన్నింటినీ తుడిచేశారు. మనోహర్‌రెడ్డి చెబితేనే ఆధారాల్ని తుడిచేశానని ఆయన గతంలో పోలీసు కస్టడీలో ఉన్నప్పుడు చెప్పారు. గంగిరెడ్డికి మేమంతా పరిచయమైనప్పటికీ వివేకా మరణించారనే విషయం మా తల్లికి కానీ, నాకు కానీ ఫోన్‌ చేసి చెప్పలేదు. మేము లేకుండానే హడావుడిగా మృతదేహానికి అంత్యక్రియలు జరిపించేందుకు ప్రయత్నించారు. మృతదేహం రక్తపు మడుగులో ఉండటంతోపాటు గాయాల ఆనవాళ్లు కనిపించినప్పటికీ గుండెపోటుతో మరణించారంటూ చిత్రీకరించి అందర్నీ నమ్మించేందుకు యత్నించారు.’’ అంటూ వివేకా కుమార్తె సునీత కూడా ఈయనపై అనుమానాలు వ్యక్తంచేశారు.


  దిల్లీలో రెండు నెలలపాటు విచారణ

షేక్‌ దస్తగిరి: వివేకా వద్ద 2017, 2018ల్లో డ్రైవర్‌గా పనిచేశారు. హత్య జరగటానికి ఆరు నెలల ముందు ఉద్యోగం మానేసి ఐస్‌ పరిశ్రమ నిర్వహిస్తున్నారు. హత్య కేసులో ఇతని ప్రమేయానికి సంబంధించి వాచ్‌మన్‌ రంగన్న వాంగ్మూలం ఇవ్వగా... ఉమాశంకర్‌రెడ్డి ప్రమేయంపై ఈయన సీబీఐకు వాంగ్మూలం ఇచ్చారు. రెండు నెలలపాటు ఆయన్ను సీబీఐ అధికారులు దిల్లీలో ఉంచి విచారించారు.

Advertisement


Tags :

ప్రధానాంశాలు

జిల్లా వార్తలు

దేవతార్చన


మరిన్ని