సముద్రంలో కూలిన మిగ్‌ శిక్షణ విమానం 

(ప్రతీకాత్మక చిత్రం)

దిల్లీ: భారత నౌకాదళానికి చెందిన మిగ్‌-29కే శిక్షణ విమానం సముద్రంలో కుప్పకూలింది. గురువారం సాయంత్రం ఈ ఘటన చోటుచేసుకున్నట్లు నేవీ అధికారులు నేడు వెల్లడించారు. శిక్షణలో భాగంగా అరేబియా సముద్రంపై ప్రయాణిస్తుండగా ప్రమాదవశాత్తు ఎయిర్‌క్రాఫ్ట్‌ కూలిపోయింది. ఘటన సమయంలో విమానంలో ఇద్దరు పైలట్లు ఉండగా.. ఒక పైలట్‌ను కాపాడినట్లు అధికారులు తెలిపారు. మరో పైలట్‌ గల్లంతయ్యారు. దీంతో అధికారులు గాలింపు చేపట్టారు. ప్రమాదంపై ఉన్నతస్థాయి దర్యాప్తునకు ఆదేశించినట్లు నేవీ వెల్లడించింది. 

కాగా.. గత ఏడాది కాలంలో మిగ్‌-29కే విమానం ప్రమాదానికి గురవడం ఇది మూడోసారి. ఈ ఏడాది ఫిబ్రవరిలో గోవాలో పక్షులు ఢీకొట్టడంతో మిగ్‌-29కే విమానం కూలిపోయింది. ఆ ఘటనలో పైలట్‌లు ఇద్దరు సురక్షితంగా బయటపడ్డారు. గతేడాది నవంబరులో సాంకేతికలోపం కారణంగా మిగ్‌ కూలిపోయింది. భారత నౌకదళానికి 40కి పైగా మిగ్‌-29కే యుద్ధ విమానాలున్నాయి. గోవా నేవీ బేస్‌, ఐఎన్ఎస్‌ విక్రమాదిత్య నుంచి వీటిని నిర్వహిస్తుంటారు.