close

తాజా వార్తలు

Published : 12/04/2021 01:30 IST
Facebook Share Twitter Share WhatsApp Share Telegram Share

కరోనా కట్టడి: ఆ మూడు రాష్ట్రాల్లో లోపాలివే..!

గుర్తించిన కేంద్ర నిపుణుల బృందాలు

దిల్లీ: కరోనా వైరస్‌ రెండో ఉద్ధృతితో పలు రాష్ట్రాలు వణికిపోతున్నాయి. ముఖ్యంగా మహారాష్ట్ర, ఛత్తీస్‌గఢ్‌, పంజాబ్‌ రాష్ట్రాల్లో వైరస్‌ విస్తృతి అనూహ్యంగా పెరిగింది. దీంతో అక్కడి పరిస్థితులను సమీక్షించేందుకు కేంద్ర ఆరోగ్యశాఖ ప్రత్యేక బృందాలను మూడు రాష్ట్రాలకు పంపించింది. గత కొన్నిరోజులుగా మూడు రాష్ట్రాల్లో పర్యటించిన కేంద్ర బృందాలు.. ఆయా రాష్ట్రాల్లో వైరస్‌ కట్టడి కాకపోవడంలో వైఫల్యాలను గుర్తించాయి.

దేశంలో కరోనా వైరస్‌ మరోసారి విజృంభిస్తోన్న నేపథ్యంలో వాటి తీవ్రతను అంచనా వేసేందుకు కేంద్ర ఆరోగ్యశాఖ 50జిల్లాలకు ప్రత్యేక బృందాలను పంపించింది. క్షేత్రస్థాయిలో పర్యటించిన కేంద్ర బృందాలు.. కొన్ని జిల్లాల్లో ఆర్టీపీసీఆర్‌ నిర్ధారణ కేంద్రాలు లేకపోవడం, కొవిడ్‌ కంటెయిన్‌మెంట్‌ చర్యలు తీసుకోకపోవడం, ఆరోగ్యసంరక్షణ సిబ్బంది కొరత వంటి కీలక సమస్యలను గుర్తించాయి.

నిబంధనలకు దూరం..

వైరస్‌ తీవ్రత అధికంగా ఉన్న మహారాష్ట్రలో దాదాపు 30జిల్లాల్లో కేంద్ర బృందాలు పర్యటించాయి. పలు జిల్లాల్లో కొవిడ్‌ శాంపిళ్లు భారీ స్థాయిలో పరీక్షించాల్సి రావడంతో ఫలితాలు ఆలస్యమవుతున్నట్లు కేంద్ర బృందాలు గుర్తించాయి. వీటికి తోడు స్థానిక ప్రజలు కొవిడ్‌ నిబంధనలను పాటించకపోవడం కూడా వైరస్‌ వ్యాప్తికి మరో కారణంగా అంచనా వేసింది. ఇక మరికొన్ని జిల్లాల్లో క్రియాశీల కేసులపై పర్యవేక్షణ లేకపోవడం స్పష్టంగా కనిపించినట్లు కేంద్ర బృందాలు నివేదించాయి. ముఖ్యంగా ఈ కారణాల వల్ల వైరస్‌ ఉద్ధృతిని కట్టడి చేయలేకపోతున్నట్లు నివేదించింది.

నిర్ధారణ పరీక్షలు తక్కువే..

మహారాష్ట్ర అనంతరం వైరస్‌ తీవ్రత అధికంగా ఉన్న రాష్ట్రాల్లో పంజాబ్‌ రెండో వరుసలో ఉంది. ఇక్కడ నమోదవుతున్న కేసుల్లో 80శాతానికి పైగా బ్రిటన్‌ రకానివే ఉన్నట్లు పంజాబ్‌ ముఖ్యమంత్రి ఇదివరకే ప్రకటించారు. అయినప్పటికీ ఇక్కడ కొవిడ్‌ నిర్ధారణ పరీక్షలు ఆశించిన స్థాయిలో జరగకపోవడంతో పాటు, కొవిడ్‌ ఆసుపత్రులు కూడా లేవని కేంద్ర బృందాలు గుర్తించాయి. వీటికి తోడు అవసరమైన సంఖ్యలో ఆరోగ్య సంరక్షణ కార్యకర్తలు లేరని పేర్కొన్నాయి. ఇక వ్యాక్సినేషన్‌ ప్రక్రియ కూడా పంజాబ్‌లో మందకొడిగా సాగుతున్నట్లు కేంద్ర బృందం గుర్తించింది. అయితే, పంజాబ్‌లో టీకాల కొరత ఉందని ముఖ్యమంత్రి అమరీందర్‌ సింగ్‌ ఇప్పటికే కేంద్రానికి విజ్ఞప్తి చేశారు.

కంటెయిన్‌మెంట్‌ జోన్ల ఏర్పాటులో నిర్లక్ష్యం..

కరోనా వైరస్‌ వ్యాప్తిని కట్టడి చేయడంలో భాగంగా కంటెయిన్‌మెంట్‌ జోన్లను ఏర్పాటు చేసుకోవడంలో ఛత్తీస్‌గఢ్‌ వెనుకబడిందని కేంద్ర నిపుణుల బృందం గుర్తించింది. అంతేకాకుండా అక్కడక్కడ ఆరోగ్యసంరక్షణ కార్యకర్తలపై దాడులు జరుగుతున్నట్లు తెలిపింది. దీంతో అక్కడ కంటెయిన్‌మెంట్‌ చర్యలు తీసుకునేందుకు ఆటంకం ఏర్పడుతున్నట్లు పేర్కొంది.

ఇదిలాఉంటే, దేశంలో రోజువారీ కరోనా కేసుల సంఖ్య పెరుగుతోంది. నిన్న ఒక్కరోజే లక్షా 52వేల పాజిటివ్‌ కేసులు నమోదయ్యాయి. ముఖ్యంగా ఐదు, ఆరు రాష్ట్రాల్లోనే కొవిడ్‌ తీవ్రత అత్యధికంగా ఉన్నట్లు కేంద్ర ఆరోగ్యశాఖ వెల్లడించింది. మహారాష్ట్ర, ఛత్తీస్‌గఢ్, ఉత్తర్‌ప్రదేశ్‌, పంజాబ్‌, కర్ణాటక, కేరళ రాష్ట్రాల్లో కేసుల సంఖ్య అనూహ్యంగా పెరుగుతున్నట్లు గుర్తించింది. ఈ నేపథ్యంలో మూడు రాష్ట్రాల్లో పర్యటించిన కేంద్ర బృందాలు ఇచ్చిన నివేదిక ప్రకారం, కొవిడ్‌ కట్టడికి తీసుకోవాల్సిన చర్యలను ఆయా రాష్ట్రాలకు కేంద్ర ఆరోగ్యశాఖ వివరించినట్లు తెలుస్తోంది.


ఇవీ చదవండి


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని