కరోనా పరీక్షలకు ఇక సులువైన విధానం!

తాజా వార్తలు

Published : 29/05/2021 09:52 IST

కరోనా పరీక్షలకు ఇక సులువైన విధానం!

భారత శాస్త్రవేత్తల ఘనత 


దిల్లీ: కొవిడ్‌ అనుమానితుల నుంచి నమూనాల (శ్వాబ్‌)ను సేకరించి, ఆర్‌టీ-పీసీఆర్‌ పరీక్ష కోసం సిద్ధం చేయడానికి భారత శాస్త్రవేత్తలు ఒక సులువైన, వేగవంతమైన విధానాన్ని కనుగొన్నారు. మౌలిక వసతులు పెద్దగా లేని గ్రామాలు, గిరిజన ప్రాంతాల్లో కరోనా నిర్ధారణ పరీక్షలను నిర్వహించడానికి దీనివల్ల వీలవుతుంది. కేంద్ర ప్రభుత్వానికి చెందిన శాస్త్ర, పారిశ్రామిక పరిశోధన మండలి (సీఎస్‌ఐఆర్‌) ఆధ్వర్యంలోని ‘నేషనల్‌ ఎన్విరానిమెంటల్‌ ఇంజినీరింగ్‌ రీసెర్చ్‌ ఇన్‌స్టిట్యూట్‌’ (నీరి) శాస్త్రవేత్తలు దీన్ని అభివృద్ధి చేశారు.  సాధారణంగా నమూనాల సేకరణకు చాలా సమయం పడుతుందని పరిశోధనలో పాలుపంచుకున్న కృష్ణ ఖైర్నార్‌ తెలిపారు. పైగా దీనికోసం రోగి ముక్కు లేదా గొంతులోకి సాధనాలను చొప్పించాల్సి ఉంటుందని, దీనివల్ల వారికి అసౌకర్యం ఉంటుందని చెప్పారు. వీటిని సేకరించడానికి నైపుణ్యం కూడా అవసరమన్నారు. ఈ నమూనాలను కలెక్షన్‌ సెంటర్‌కు రవాణా చేయడానికి కొంత సమయం పడుతుందని తెలిపారు. 

ఈ ఇబ్బందులను అధిగమించడానికి సెలైన్‌ గార్గల్‌ ఆర్‌టీ-పీసీఆర్‌ విధానాన్ని శాస్త్రవేత్తలు తెరపైకి తెచ్చారు. ఈ ప్రక్రియలో నమూనాల సేకరణకు రోగి శరీరంలోకి ఎలాంటి సాధనాలనూ ప్రవేశపెట్టాల్సిన అవసరం ఉండదు. ఇందులో సెలైన్‌ ద్రావకంతో కూడిన ఒక కలెక్షన్‌ గొట్టం ఉంటుంది. ఈ ద్రావకంతో పుక్కిలించి, తిరిగి గొట్టంలోకి దాన్ని ఊయాల్సి ఉంటుంది. అనంతరం దీన్ని ల్యాబ్‌కు పంపి, అక్కడ గది ఉష్ణోగ్రత వద్ద ప్రత్యేక పదార్థంలో ఉంచుతారు. ఈ నమూనాను వేడి చేసినప్పుడు ‘ఆర్‌ఎన్‌ఏ టెంప్లేట్‌’ ఒకటి వెలువడుతుంది. దాన్ని ఆర్‌టీ-పీసీఆర్‌ పరీక్ష కోసం పంపొచ్చు. నమూనాల సేకరణ, ప్రాసెసింగ్‌ కోసం ఈ విధానాన్ని ఉపయోగించడం వల్ల ఖరీదైన మౌలిక వసతుల అవసరం తప్పుతుంది. ఈ పద్ధతిలో వ్యర్థాలు కూడా తక్కువగా వెలువడతాయని, అందువల్ల ఇది పర్యావరణ అనుకూలమైందని ఖైర్నార్‌ తెలిపారు. ఈ విధానానికి నాగ్‌పుర్‌ నగరపాలక సంస్థ అనుమతి ఇచ్చింది.  

 


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని