poonawalla: పూనావాలా కోరితే భద్రత కల్పిస్తాం

తాజా వార్తలు

Updated : 12/06/2021 14:55 IST

poonawalla: పూనావాలా కోరితే భద్రత కల్పిస్తాం

బాంబే హైకోర్టుకు తెలిపిన మహారాష్ట్ర సర్కార్‌

ముంబయి: కొవిడ్‌-19 మహమ్మారి నివారణకు కొవిషీల్డ్‌ వ్యాక్సిన్‌ రూపొందించిన సీరం ఇన్‌స్టిట్యూట్‌ ఆఫ్‌ ఇండియా(ఎస్‌ఐఐ) సీఈవో అదార్‌ పూనావాలా కోరితే తగిన భద్రత కల్పిస్తామని బాంబే హైకోర్టుకు మహారాష్ట్ర సర్కారు శుక్రవారం తెలిపింది. ప్రభుత్వ స్పందన విన్నాక.. పుణెకు చెందిన ఈ పారిశ్రామికవేత్తకు మరింత భద్రత కల్పించాలన్న ప్రజాప్రయోజన వ్యాజ్యాన్ని కోర్టు మూసివేసింది. పూనావాలాకు ఇప్పటికే కేంద్ర ప్రభుత్వం ‘వై’ కేటగిరీ సీఆర్‌పీఎఫ్‌ భద్రత కల్పిస్తోంది. వ్యాక్సిన్‌ సరఫరాకు సంబంధించి బెదిరింపులు ఎదుర్కొంటున్న పూనావాలాకు ఈ భద్రత చాలదని, ‘జడ్‌ ప్లస్‌’ భద్రత కల్పించేలా కేంద్ర, రాష్ట్ర ప్రభుత్వాలను ఆదేశించాలని కోరుతూ న్యాయవాది దత్తా మానె ఈ పిల్‌ దాఖలు చేశారు. జస్టిస్‌ ఎస్‌.ఎస్‌.షిండే, జస్టిస్‌ ఎన్‌.జె.జమాదార్‌లతో కూడిన డివిజన్‌ బెంచ్‌కు రాష్ట్ర ప్రభుత్వం తరఫున పబ్లిక్‌ ప్రాసిక్యూటర్‌ దీపక్‌ ఠాక్రే సమాధానం ఇచ్చారు. ‘ఇవి వ్యక్తిగత వ్యవహారాలు. మీరు ఎవరి కోసం ఈ పిటిషన్‌ వేశారో ఆ పారిశ్రామికవేత్తకు అసలు పిటిషన్‌ విషయమే  తెలియకపోవచ్చు. ఒకవేళ రేపు అతను నాకు ఎలాంటి భయం లేదు, ఏ భద్రతా అక్కరలేదంటే ఎలా? కోర్టు వ్యక్తుల వెనుక పరుగులు తీసి, ఉత్తర్వులు జారీ చేయదు’ అని ధర్మాసనం ఈ సందర్భంగా వ్యాఖ్యానించింది.  


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని