WHO: మళ్లీ కొవిడ్‌ విజృంభణ..

తాజా వార్తలు

Published : 16/07/2021 13:44 IST

WHO: మళ్లీ కొవిడ్‌ విజృంభణ..

ప్రపంచవ్యాప్తంగా కేసులు, మరణాల పెంపు
111 దేశాల్లో ‘డెల్టా’ : డబ్ల్యూహెచ్‌వో

వాషింగ్టన్‌: ప్రపంచవ్యాప్తంగా కొవిడ్‌ కేసులు, మరణాలు మరోసారి పెరుగుతుండటం ఆందోళన కలిగిస్తోంది. దీంతో పలుచోట్ల మళ్లీ నిబంధనలు అమలు చేయాల్సిన పరిస్థితులు తలెత్తుతున్నాయి. 9 వారాలుగా తగ్గుతూ వస్తున్న మరణాల సంఖ్య ఇప్పుడు మళ్లీ పెరుగుతున్నటు ప్రపంచ ఆరోగ్య సంస్థ (డబ్ల్యూహెచ్‌ఓ) పేర్కొంది. క్రితం వారంతో పోలిస్తే 3 శాతం మరణాలు, 10 శాతం కేసులు పెరిగినట్లు బుధవారం వెల్లడించింది. ఈ వారంలో 55 వేల మంది మృతి చెందగా, 30 లక్షల కేసులు నమోదైనట్లు తెలిపింది. బ్రెజిల్, భారత్, ఇండొనేసియా, బ్రిటన్‌లలో అత్యధిక కేసులు బయటపడినట్లు పేర్కొంది. వ్యాక్సినేషన్‌ నెమ్మదిగా సాగడం.. మాస్కులు, ఇతర నిబంధనలను సడలించడంతో పాటు కరోనా వైరస్‌ డెల్టా రకం వ్యాప్తి ఎక్కువగా ఉండటంతో కేసులు పెరిగినట్లు తెలిపింది. ఈ రకాన్ని 111 దేశాల్లో గుర్తించామని, రానున్న నెలల్లో ఇది మరింత విజృంభించే అవకాశం ఉందని పేర్కొంది. 

- అర్జెంటినాలో కొవిడ్‌ మరణాల సంఖ్య లక్ష దాటింది. రష్యాలో ఈ వారంలో అత్యధిక రోజువారీ కేసులు నమోదయ్యాయి.

- బెల్జియంలో యువత ఎక్కువగా డెల్టా రకం బారిన పడుతోంది. ఇక్కడ గత వారం కంటే కేసుల సంఖ్య రెట్టింపు అయింది. బ్రిటన్‌లో గత 6 నెలల్లో ఎన్నడూ లేనంతగా ఒక రోజులో 40 వేలకు పైగా కొత్త కేసులు బయటపడ్డాయి. 

- ఇండొనేసియాలో బుధవారం దాదాపు వెయ్యి మంది చనిపోయారు. 54 వేలకు పైగా కేసులు నమోదయ్యాయి. మృతదేహాల ఖననం కూడా జకార్తాలో కష్టమైపోతోంది. అంత్యక్రియలు జరిపేందుకు ఎక్కువ సమయం నిరీక్షించాల్సి వస్తోందని స్థానికులు చెబుతున్నారు. మయన్మార్‌లోని పలు ప్రాంతాల్లో ఉదయం నుంచి రాత్రి వరకూ కొవిడ్‌ మృతులకు అంత్యక్రియలు నిర్వహిస్తూనే ఉన్నారు.

- అమెరికాలో కొద్ది నెలలుగా తగ్గుముఖం పట్టిన కేసులు మళ్లీ పెరుగుతున్నాయి. గత మూడు వారాలతో పోలిస్తే రోజువారీ కేసులు రెట్టింపు అయ్యాయి. లాస్‌ ఏంజెలిస్‌లో వరుసగా ఐదో రోజు వెయ్యికి పైగా కొత్త కేసులు బయటపడ్డాయి. 


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని