ఐఎంఏ వైద్యుల రిలే నిరాహార దీక్షలు

తాజా వార్తలు

Published : 01/02/2021 22:14 IST

ఐఎంఏ వైద్యుల రిలే నిరాహార దీక్షలు

దిల్లీ: శస్త్రచికిత్సలు చేసేందుకు ఆయుర్వేద వైద్యులకు కేంద్రం అనుమతించడాన్ని నిరసిస్తూ ఇండియన్‌ మెడికల్‌ అసోసియేషన్ (ఐఎంఏ)‌కు చెందిన వైద్యులు సోమవారం నుంచి రిలే నిరాహార దీక్షలు ప్రారంభించారు. దేశవ్యాప్తంగా ఫిబ్రవరి 1 నుంచి 14 వరకు ఈ దీక్షలు కొనసాగుతాయని ఐఎంఏ ఓ ప్రకటనలో తెలిపింది. ఫిబ్రవరి 7న దేశవ్యాప్తంగా మహిళా వైద్యులు ఈ దీక్షను నడిపిస్తారని వెల్లడించింది.

పోస్టు గ్రాడ్యుయేషన్‌ చేసిన ఆయుర్వేద వైద్యులు శస్త్రచికిత్సలు చేసేందుకు అనుమతినిస్తూ సెంట్రల్‌ కౌన్సిల్‌ ఆఫ్‌ ఇండియన్‌ మెడిసిన్‌ గతంలో ఉత్తర్వులు ఇచ్చిన విషయం తెలిసిందే. దీనిని ఐఎంఏ తీవ్రంగా వ్యతిరేకించింది. ఈ ఉత్తర్వులను వెనక్కి తీసుకోవాలని ఐఎంఏ వైద్యులు డిమాండ్‌ చేస్తున్నారు. దేశవ్యాప్తంగా ఉన్న అన్ని వైద్య సంఘాలు ఈ రిలే దీక్షల్లో పాలుపంచుకోనున్నట్లు వారు తెలిపారు. ఇటువంటి విధానాలతో ప్రజల ఆరోగ్యానికి ముప్పు వాటిల్లుతుందన్నారు. ప్రజారోగ్యంపై దేశవ్యాప్తంగా పెద్దఎత్తున అవగాహన కార్యక్రమాలు నిర్వహిస్తామని వారు తెలిపారు. ప్రజా ప్రతినిధులకు ఈ విధానంలో ఉన్న లోపాలను అర్ధమయ్యేలా వివరిస్తామన్నారు. అంతర్జాతీయ వైద్య సంఘాల సహకారం కూడా తీసుకుంటామని వారు వెల్లడించారు.

ఇవీ చదవండి..

బడ్జెట్‌లో ఎన్నికల వరాలు

పీఎఫ్‌ మొత్తాలపై పన్ను


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని