పార్లమెంటులో రెండో రోజూ వాయిదాల పర్వం.. 
close

తాజా వార్తలు

Published : 09/03/2021 22:45 IST

పార్లమెంటులో రెండో రోజూ వాయిదాల పర్వం.. 

దిల్లీ: చమురు ధరల పెరుగుదల అంశం పార్లమెంట్‌ ఉభయ సభలను రెండో రోజూ కుదిపేసింది. దీంతో లోక్‌సభ, రాజ్యసభల్లో ఎలాంటి కార్యకలాపాలు సాగకుండానే రేపటికి వాయిదా పడ్డాయి. ఉదయం 11 గంటలకు లోక్‌సభ ప్రారంభం కాగానే.. ప్రతిపక్ష సభ్యులు తమ సీట్లలోంచి లేచి పెరిగిన ఇంధన ధరలపై చర్చకు పట్టుబట్టారు. విపక్ష సభ్యుల విజ్ఞప్తిని స్పీకర్‌ ఓంబిర్లా తిరస్కరించి ప్రశ్నోత్తరాలు కొనసాగించేందుకు ప్రయత్నించారు. దీంతో విపక్ష సభ్యులు సభా కార్యకలాపాలకు అడుగడుగునా అడ్డు తగిలారు. కేంద్ర ప్రభుత్వానికి వ్యతిరేకంగా పలువురు సభ్యులు సభలోనే నినాదాలు చేశారు. సభ్యుల ఆందోళనతో సభా కార్యకలాపాలు నిలిచిపోయాయి. దీంతో మధ్యాహ్నం 12 గంటలకు ఒకసారి.. ఆ తర్వాత మధ్యాహ్నం 2గంటల వరకు మరోసారి సభ వాయిదా పడింది. మళ్లీ తిరిగి సభ ప్రారంభమైనప్పటికీ పరిస్థితిలో ఎలాంటి మార్పు రాకపోవడంతో సభాపతి ఓం బిర్లా లోక్‌సభను బుధవారానికి వాయిదా వేశారు.

రాజ్యసభలోనూ వాయిదాల పర్వం

మరోవైపు, రాజ్యసభలోనూ వాయిదాల పర్వం కొనసాగింది. ఉదయం 11గంటలకు ప్రారంభమైన రాజ్యసభలో విపక్ష సభ్యులు ఆందోళనకు దిగారు.  దీంతో సభ తొలుత 11.20 నిమిషాల వరకు వాయిదా పడింది. ఆ తర్వాత మళ్లీ సమావేశమైన సభలో సభ్యులు నినాదాలు చేశారు. దీంతో మధ్యాహ్నం 2గంటల వరకు మరోసారి వాయిదా పడింది. ఆ తర్వాత తిరిగి ప్రారంభమైనప్పటికీ పరిస్థితిలో ఎలాంటి మార్పూ లేకపోవడంతో డిప్యూటీ ఛైర్మన్‌ రేపటికి వాయిదా వేశారు.


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని