G-20 Summit: ఈ నెల 29నుంచి ప్రధాని మోదీ విదేశీ పర్యటన!

తాజా వార్తలు

Updated : 24/10/2021 19:11 IST

G-20 Summit: ఈ నెల 29నుంచి ప్రధాని మోదీ విదేశీ పర్యటన!

జీ-20 సదస్సులో పాల్గొననున్న నరేంద్ర మోదీ

దిల్లీ: రోమ్‌లో జరుగనున్న 16వ జీ-20 సదస్సులో పాల్గొనేందుకు భారత ప్రధాని నరేంద్ర మోదీ ఈ నెల 29న ఇటలీ బయలుదేరనున్నారు. ఐదురోజుల విదేశీ పర్యటనలో భాగంగా తొలుత రోమ్‌కు అక్కడ నుంచి యూకే, స్కాట్‌లాండ్‌లోనూ ప్రధాని మోదీ పర్యటించనున్నారు. పర్యటనలో భాగంగా కాప్‌-26 సదస్సులోనూ ప్రధాని మోదీ నేరుగా పాల్గొంటారు.

రోమ్‌లో ఈ నెల 30-31 తేదీల్లో జరుగనున్న జీ-20 సదస్సులో ప్రధాని మోదీ తొలుత పాల్గొంటారు. ఇటలీ ప్రధాని అధ్యక్షతన జరుగుతోన్న ఈ సదస్సులో మహమ్మారి విలయం నుంచి కోలుకోవడం, ఆరోగ్యం విషయంలో అంతర్జాతీయ సహకారం, ఆర్థిక వ్యవస్థ పునరుద్ధరణ, వాతావరణ మార్పు, ఆహార భద్రత, సుస్థిరాభివృద్ధి వంటి అంశాలే ప్రధాన ఎజెండాగా నిలువనున్నాయి. సభ్యదేశాల అధ్యక్షులు, ప్రభుత్వాధినేతలు పాల్గొనే ఈ సదస్సులో ప్రధాని మోదీ పాల్గొనడం ఎనిమిదవసారి కావడం విశేషం. ఇక 2023లో తొలిసారిగా భారత్‌ ఈ సదస్సుకు వేదిక కానుంది.

జీ-20 సదస్సు అనంతరం స్కాట్లాండ్‌లోని గ్లాస్గోకు బయలుదేరుతారు.  అక్టోబర్‌ 31 నుంచి నవంబర్‌ 12వరకు జరుగనున్న కాప్‌-26 సదస్సులో ప్రధాని మోదీ పాల్గొంటారు. వరల్డ్‌ లీడర్స్‌ సమ్మిట్‌ (WLS) పేరుతో నవంబర్‌ 1-2వ తేదీల్లో జరిగే ప్రధాన సమావేశానికి హాజరవుతారు. బ్రిటన్‌ ప్రధానమంత్రి బోరిస్‌ జాన్సన్‌ అధ్యక్షతన జరగనున్న ఈ సదస్సుకు ప్రపంచ వ్యాప్తంగా దాదాపు 120 దేశాధినేతలు హాజరుకానున్నారు. వాస్తవానికి కాప్‌-26 గతేడాదే జరగాల్సి ఉన్నప్పటికీ కొవిడ్‌ కారణంగా వాయిదా పడింది. ఇక విదేశీ పర్యటనలో భాగంగా బ్రిటన్‌, ఇటలీతో పాటు ఇతర దేశాల అధినేతలతో ప్రధాని మోదీ భేటీ అయ్యే అవకాశాలు ఉన్నాయి.



Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని