Tunnel: దిల్లీ అసెంబ్లీ నుంచి ఎర్రకోటకు సొరంగం..!

తాజా వార్తలు

Updated : 03/09/2021 14:17 IST

Tunnel: దిల్లీ అసెంబ్లీ నుంచి ఎర్రకోటకు సొరంగం..!

 

దిల్లీ: దేశ రాజధాని దిల్లీ శాసనసభలో ఏళ్ల క్రితం నాటి సొరంగం ఒకటి తాజాగా బయటపడింది. ఈ సొరంగ మార్గం అసెంబ్లీ నుంచి ఎర్ర కోట వరకు ఉందట. అయితే దీన్ని బ్రిటిష్‌ హయాంలో ఉపయోగించేవారని శాసనసభ స్పీకర్‌ రామ్ నివాస్‌ గోయల్‌ తెలిపారు.

‘‘1993లో నేను ఎమ్మెల్యే అయినప్పుడు ఈ టన్నెల్‌ గురించి విన్నాను. ఇది ఎర్రకోట వరకు ఉంటుందని చెప్పేవారు. బ్రిటిష్‌ వారు స్వాతంత్ర్య సమరయోధుల తరలింపు కోసం ఈ రహస్య మార్గాన్ని ఉపయోగించేవారని చెప్పుకునేవారు. 1912లో అప్పటి బ్రిటిష్‌ ప్రభుత్వం తమ రాజధానిని కోల్‌కతా నుంచి దిల్లీకి మార్చిన తర్వాత ఈ భవనాన్ని సెంట్రల్‌ లెజిస్లేటివ్‌ అసెంబ్లీగా ఉపయోగించేది. ఆ తర్వాత 1926లో దీన్ని కోర్టుకు మార్చారు. అప్పుడు స్వాతంత్ర్య సమరయోధులను కోర్టుకు తీసుకొచ్చేందుకు ఈ మార్గాన్ని ఉపయోగించేవారు. దీని చరిత్రను తెలుసుకునేందుకు ప్రయత్నించినప్పటికీ కచ్చితమైన సమాచారం లభించలేదు’’ అని స్పీకర్ గోయల్ వెల్లడించారు.

ఈ సొరంగం ప్రవేశమార్గం గురువారం బయటపడిందని ఆయన తెలిపారు. ప్రస్తుతానికి తాము ఈ సొరంగ మార్గాన్ని తవ్వాలనుకోవడం లేదన్నారు. మెట్రో ప్రాజెక్టులు, డ్రైనేజీ వ్యవస్థలతో ఈ సొరంగంలో చాలా భాగం ఇప్పటికే ధ్వంసమై ఉంటుందని అభిప్రాయపడ్డారు. అయితే స్వాతంత్ర్య పోరాటంలో గొప్ప చరిత్ర కలిగిన ఈ టన్నెల్‌ను పర్యాటక ప్రాంతంగా మారుస్తామని అన్నారు.


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని