Corona: కరోనా అంతం అప్పుడే.. డబ్ల్యూహెచ్‌వో ఏం చెబుతోందంటే..

తాజా వార్తలు

Published : 25/10/2021 12:16 IST

Corona: కరోనా అంతం అప్పుడే.. డబ్ల్యూహెచ్‌వో ఏం చెబుతోందంటే..

బెర్లిన్‌: కరోనా మహమ్మారి ఎప్పటికి అంతమయ్యేను..? యావత్‌ ప్రపంచాన్ని వేధిస్తున్న ప్రశ్న ఇది. మరి దీనికి జవాబు దొరికేనా అంటే.. అది పూర్తిగా మన చేతుల్లోనే ఉందని అంటోంది ప్రపంచ ఆరోగ్య సంస్థ(డబ్ల్యూహెచ్‌వో). మన వైద్యారోగ్య సాధనాలను సమర్థంగా ఉపయోగించుకున్నప్పుడే మహమ్మారిని అంతం చేయొచ్చని డబ్ల్యూహెచ్‌వో డైరెక్టర్‌ జనరల్‌ టెడ్రోస్‌ అధానమ్‌ తెలిపారు. 

జర్మనీ రాజధాని బెర్లిన్‌లో జరిగిన ప్రపంచ ఆరోగ్య సదస్సులో టెడ్రోస్‌ పాల్గొని ప్రసంగించారు. ‘‘గత ఏడాదిన్నర కాలంగా చాలా మంది నన్ను అడుగుతున్న ప్రశ్న: కరోనా మహమ్మారి అంతం ఎప్పుడు? దీనికి నా సమాధానం ఒకటే.. ప్రపంచం దాన్ని అంతం చేయాలనుకున్నప్పుడు. మహమ్మారి ముగింపు మన చేతుల్లోనే ఉంది. వైరస్‌ను అంతం చేయడానికి అవసరమైన సాధనాలన్నీ మన దగ్గర ఉన్నాయి. సమర్థమైన ప్రజారోగ్య సాధనాలు, ఔషధాలు ఉన్నాయి. కానీ, ప్రపంచం వాటిని సరిగా వినియోగించుకోవట్లేదు. ప్రపంచవ్యాప్తంగా వారానికి దాదాపు 50వేల మంది కరోనాకు బలవుతున్నారు. మహమ్మారి అంతానికి మనం చాలా దూరంలో ఉన్నాం’’ అని టెడ్రోస్‌ చెప్పుకొచ్చారు. 

‘‘ఆరోగ్యమనేది సంపన్నులకు లగ్జరీ కాదని మహమ్మారి నిరూపించింది. ఇది మనిషి ప్రాథమిక హక్కు. ఏ దేశం కూడా ప్రపంచం నుంచి వేరుపడి మహమ్మారిని అంతం చేయలేదు. అంతేకాదు, ఇతర దేశాల ప్రజల ఆరోగ్యాన్ని కాపాడేందుకు కృషి చేయకుండా.. తమ పౌరులను కాపాడుకోలేవు’’ అని టెడ్రోస్‌ వెల్లడించారు. 

ఇటీవల ప్రపంచవ్యాప్తంగా కరోనా మహమ్మారి తగ్గుముఖం పట్టినట్లే కన్పించినా.. తాజాగా కొన్ని దేశాల్లో మళ్లీ పంజా విసురుతోంది. ముఖ్యంగా వైరస్‌ పుట్టినిల్లు చైనాలో మళ్లీ కేసులు పెరుగుతుండగా.. బ్రిటన్‌, రష్యాల్లోనూ వ్యాప్తి ఉద్ధృతంగానే ఉంది. దీంతో ఆయా దేశాలు మళ్లీ ఆంక్షల బాటపడుతున్నాయి. అయితే, భారత్‌లో మాత్రం వైరస్‌ వ్యాప్తి అదుపులోనే ఉన్నట్లు కన్పిస్తోంది. గత కొన్ని రోజులుగా కొత్త కేసులు 20వేల మార్క్‌ దిగువనే కొనసాగుతున్నాయి. క్రియాశీల రేటు కూడా 0.5శాతం కిందకు పడిపోయింది. 


Advertisement

Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని