close

తాజా వార్తలు

Updated : 28/11/2020 11:52 IST
Facebook Share Twitter Share WhatsApp Share Telegram Share

చట్టాల్ని వెనక్కితీసుకునే వరకు ఆందోళనే: రైతులు

దిల్లీ సరిహద్దుల్లో కొనసాగుతున్న అన్నదాతల నిరసన

దిల్లీ: నూతన వ్యవసాయ చట్టాలకు వ్యతిరేకంగా రైతులు చేపట్టిన ‘చలో దిల్లీ’ ఆందోళన శనివారమూ కొనసాగుతోంది. చట్టాలకు వెనక్కి తీసుకునే వరకు రాజధానిలోనే బైఠాయిస్తామని రైతులు తేల్చి చెబుతున్నారు. బురారీలోని నిరంకారీ మైదానంలో శాంతియుతంగా నిరసన తెలిపేందుకు పోలీసులు అనుమతించినా.. పంజాబ్‌-హరియాణాకు చెందిన రైతులు సింఘులో ఇంకా తమ నిరసనను విరమించలేదు. అక్కడే బైఠాయించి తమ ఆందోళన కొనసాగిస్తామని తేల్చి చెప్పారు. పంజాబ్‌ నుంచి దిల్లీలోకి ప్రవేశించేందుకు ఇదే ప్రధాన రహదారి కావడంతో వాహన రాకపోకలు పూర్తిగా స్తంభించిపోయాయి. ఈ నేపథ్యంలో వారితో పోలీసులు చర్చలు కొనసాగిస్తున్నారు. రాత్రంతా రహదారులపైనే వంటావార్పు కార్యక్రమాన్ని నిర్వహించి రైతులు తమ నిరసనని కొనసాగించారు. 

మరోవైపు దిల్లీ సరిహద్దు ప్రాంతమైన టిక్రీలో శనివారమూ భారీ స్థాయిలో భద్రతా బలగాల్ని మోహరించారు. ఇప్పటి వరకు ఉత్తర్‌ప్రదేశ్‌కు చెందిన 30 మంది రైతులు నిరంకారీ మైదానానికి చేరుకున్నారు. మధ్యాహ్నానికి మరికొంత మంది వచ్చే అవకాశం ఉన్నట్లు తెలుస్తోంది. పోలీసులు మాత్రం చాలా మంది రైతు సంఘాల నాయకులు మైదానానికి రావడానికి సుముఖత వ్యక్తం చేస్తున్నామని చెబుతున్నప్పటికీ. చాలా మంది రైతులు మాత్రం ఇంకా సరిహద్దుల్లోనే ఆందోళన సాగిస్తున్నారు.

నేడు మరికొన్ని రాష్ట్రాల రైతులు కూడా ఆందోళనలో పాల్గొనే అవకాశం ఉందని సమాచారం. ఈ మేరకు ఇప్పటికే ఆయా రాష్ట్రాల నుంచి రైతులు బృందాలుగా బయలుదేరారని తెలుస్తోంది. పంజాబ్‌లోని ఫతేగఢ్‌ నుంచి మరికొంత మంది రైతులు ట్రాక్టర్లలో బయలుదేరారు. మరోవైపు డిసెంబరు 3న చర్చలు చేపట్టేందుకు కేంద్రం సుముఖత వ్యక్తం చేసింది. అప్పటి వరకు రైతులు ఆందోళనను విరమించాలని కేంద్ర వ్యవసాయ శాఖ మంత్రి నరేంద్ర సింగ్‌ తోమర్‌ కోరారు.



Tags :

జాతీయ-అంతర్జాతీయ

జిల్లా వార్తలు
బిజినెస్‌
మరిన్ని
జాతీయ- అంతర్జాతీయ
మరిన్ని
పాలిటిక్స్
మరిన్ని
సినిమా
మరిన్ని
క్రీడలు
మరిన్ని
క్రైమ్
మరిన్ని