బ్రిటిష్‌ ఇండియన్‌ రచయిత్రికి హెజెల్‌ టిల్ట్‌మన్‌ బహుమతి

 జలియన్‌వాలా బాగ్‌ చారిత్రక ఘటనపై పుస్తకాన్ని రచించిన అనితా ఆనంద్‌

లండన్‌: బ్రిటిష్‌ ఇండియన్‌ రచయిత్రి అనితా అనంద్‌ను ప్రతిష్ఠాత్మక ‘హెజెల్‌ టిల్ట్‌మన్‌ బహుమతి’ వరించింది. భారత్‌లో జరిగిన జలియన్‌వాలా బాగ్‌ ఘటనపై రచించిన పుస్తకం గొప్ప చారిత్రక రచనగా ఎంపికవడంతో ఆమెకు ఈ గౌరవం దక్కింది. ఆమె రచించిన ‘ది పేషెంట్‌ అసాసిన్‌: ఎ ట్రూ టేల్‌ ఆఫ్‌ మాసకర్‌’ను వాస్తవిక చారిత్రక నేపథ్యం ఉన్న పుస్తకంగా ఆవార్డు కమిటీ న్యాయనిర్ణేతలు అభివర్ణించారు. ఈ బహుమతి దక్కడంపై ఆమె సంతోషం వ్యక్తం చేశారు. ఈ సందర్భంగా బహుమతి రూపంలో ఆమెకు 2 వేల పౌండ్లు(సుమారు రూ.2 లక్షలు) దక్కనున్నాయి. ‘‘ఈ పుస్తకం.. అమృత్‌సర్‌లో 1919లో  జలియన్‌వాలా బాగ్‌లో జరిగిన దారుణ మారణహోమానికి సంబంధించి.. ఓ హంతకుడికి, ఓ బాధితుడికి మధ్య జరిగిన కథ. దానికి బాధ్యుడైన ఓ బ్రిటిష్‌ అధికారిపై.. ఆ ఘటన జరిగిన రెండు దశాబ్దాల తర్వాత ఆ బాధితుడు పగ తీర్చుకున్న కథ. అంతకు మించి ఇద్దరు వ్యక్తుల కథ’’ అని న్యాయనిర్ణేతల్లో ఒకరైన రాణా మిట్టర్‌ తెలిపారు.