మళ్లీ పెరిగిన పెట్రో ధరలు

దిల్లీ: పెట్రో ధరలు ఆకాశాన్నంటాయి. ఐదు రోజుల విరామం తర్వాత బుధవారం చమురు సంస్థలు మళ్లీ ధరలను పెంచడంతో కొత్త రికార్డులు నమోదయ్యాయి. పెట్రోలు, డీజిల్‌ ధరలు లీటరుకు 25 పైసల చొప్పున పెరిగాయి. దీంతో దిల్లీలో పెట్రోల్‌ లీటరు రూ.84.45, డీజిల్‌ లీటరు రూ.74.63కు చేరాయి. దేశ రాజధానిలో పెట్రోల్‌కు సంబంధించి ఇప్పటివరకూ ఇదే గరిష్ఠ ధర కావడం గమనార్హం. ముంబయిలో పెట్రోల్‌ లీటరు రూ.91.07, డీజిల్‌ లీటరు రూ.81.34కు పెరిగాయి. ముంబయిలో డీజిల్‌కు సంబంధించి ఇదే అత్యధిక ధర. ఆయా రాష్ట్రాల్లో స్థానిక పన్నులు కలిపితే కొత్త ధరల్లో ఆమేరకు వ్యత్యాసం కనిపించనుంది. హైదరాబాద్‌లో పెట్రోల్‌ ధర 26 పైసలు, డీజిల్‌ ధర 28 పైసలు పెరిగింది. దీంతో అక్కడ పెట్రోల్‌ లీటరు రూ.87.85, డీజిల్‌ లీటరు రూ81.45కు చేరింది.