China: దలైలామా వారసునిపై చైనాకు అధికారం లేదు

ప్రధానాంశాలు

Updated : 25/10/2021 09:32 IST

China: దలైలామా వారసునిపై చైనాకు అధికారం లేదు

తవాంగ్‌ బౌద్ధ ఆరామం స్పష్టీకరణ

తవాంగ్‌: టిబెటన్‌ బౌద్ధుల ఆధ్యాత్మిక గురువు దలైలామా వారసుని ఎంపికలో చైనా ప్రభుత్వానికి ఎలాంటి అధికారం లేదని అరుణాచల్‌ ప్రదేశ్‌లోని తవాంగ్‌ బౌద్ధ ఆరామం ప్రకటించింది. మతాలపై నమ్మకం లేని ప్రభుత్వానికి ఈ విషయంలో ఏమి ప్రమేయం ఉంటుందని ప్రశ్నించింది. వారసుని ఎంపిక పూర్తిగా ఆధ్యాత్మికపరమైనదని, ఇది రాజకీయ సమస్య కాదని స్పష్టం చేసింది. చైనా సరిహద్దుల విస్తరణ విధానాన్ని అవలంబిస్తోందని, దీనిపై అప్రమత్తంగా ఉండాలని ఆ ఆరామం మఠాధిపతి గ్యాంగ్‌బంగ్‌ రింపోచే కేంద్ర ప్రభుత్వానికి సూచించారు. 350 ఏళ్ల చరిత్ర కలిగిన ఈ ఆరామం చైనా సరిహద్దుల్లో ఉండడం గమనార్హం. ఇది ప్రపంచంలోనే రెండో అతిపెద్ద ఆరామం కావడం విశేషం. ఈ ప్రాంతం తమదేనని చైనా చెబుతూ వస్తోంది. ప్రస్తుత దలైలామాతో పాటు, ఆయన అనుచరులే వారసునిని ఎంపిక చేస్తారని రింపోచే చెప్పారు. ఇందులో జోక్యం చేసుకునే అధికారం కూడా చైనాకు లేదని తెలిపారు. ఈ విషయంలో చైనా తీసుకునే నిర్ణయాన్ని టిబెటన్లు ఆమోదించబోరని స్పష్టం చేశారు. ప్రస్తుతం ధర్మశాలలో ప్రవాస జీవితం గడుపుతున్న దలైలామాకు 86 ఏళ్లు నిండడంతో వారసునిపై చర్చలు మొదలయ్యాయి. దలైలామాను సాక్షాత్తూ బుద్ధుని అవతారంగా టిబెటన్లు భావిస్తుంటారు.



Advertisement

Tags :

మరిన్ని

జిల్లా వార్తలు
మరిన్ని

దేవతార్చన