ఒక్క రోజే రూ.600 పెరిగిన వెండి ధర

దిల్లీ: అంతర్జాతీయ మార్కెట్ల సానుకూల ప్రభావం, దేశీయంగా కొనుగోళ్ల మద్దతుతో బంగారం, వెండి ధరలకు రెక్కలొచ్చాయి. బులియన్‌ మార్కెట్‌లో పసిడి ధర రూ.32,500 మార్క్‌ దాటగా.. వెండి ధర శుక్రవారం ఒక్క రోజే రూ.600 పెరిగింది.

అంతర్జాతీయంగా పసిడి పెట్టుబడులు పెరగడంతో పాటు దేశీయంగా నగల వ్యాపారుల నుంచి బంగారానికి గిరాకీ పెరిగింది. దీంతో శుక్రవారం బులియన్‌ మార్కెట్లో 10 గ్రాముల పుత్తడి ధర రూ.170 పెరిగి రూ. 32,620 చేరింది. అటు వెండి కూడా బంగారం దారిలోనే పయనిస్తోంది. పారిశ్రామిక వర్గాలు, నాణేల తయారీదారుల నుంచి కొనుగోళ్లు ఊపందుకోవడంతో కిలో వెండి ధర రూ. 600 పెరిగి రూ. 39,250కు చేరింది.

అంతర్జాతీయంగానూ ఈ లోహల ధరలు స్వల్పంగా పెరిగాయి. న్యూయార్క్‌ మార్కెట్లో ఔన్సు బంగారం ధర 1,278.10 డాలర్లు, ఔన్సు వెండి ధర 15.26డాలర్లు పలికింది.