close

తాజా వార్తలు

కిమ్‌ బెంజికారు కథ ఇదీ..!

ఖండాలను దాటి.. కళ్లుగప్పి..

కిమ్‌ బెంజికారు కథ వింటే పెద్దపెద్ద స్మగ్లర్లు కూడా మూర్ఛపోవాల్సిందే. ఉపగ్రహాల నిఘా కళ్లుగప్పి మరీ ఉత్తరకొరియాలో కిమ్‌కు కార్లను అందించారు. ఈ క్రమంలో ఐరాస వాణిజ్య ఆంక్షలు ఉత్తర కొరియాను ఏమాత్రం అడ్డుకోలేకపోతున్నాయన్న విషయం ప్రపంచానికి తేటతెల్లం అయింది.  

ఉ.కొరియా అధినేత కిమ్‌జోంగ్‌ ఉన్‌ రాజధాని ప్యాంగ్‌యాంగ్‌లో ఎప్పుడు చూసినా బెంజ్‌ లిమోసిన్‌, రోల్స్‌రాయిస్‌లో దర్శనమిస్తుంటారు. ఈ ఫోటోలను చూసి పాశ్చాత్య నిఘా సంస్థలకు పిచ్చెక్కిపోయేది. ఉ.కొరియాపై ఐరాస ఆంక్షల నేపథ్యంలో దేశాధినేతల స్థాయి వ్యక్తులు వాడే ఆ విలాసవంతమైన కార్లు ఎలా వచ్చాయని జుట్టుపీక్కునేవి. దీంతో అమెరికాకు చెందిన ది సెంటర్‌ ఫర్‌ అడ్వాన్స్‌డ్‌ డిఫెన్స్‌ స్టడీస్‌ అనే ఒక సంస్థ పరిశోధన చేపట్టింది. కిమ్‌ కార్ల వెనుక ప్రపంచ స్థాయిలో పెద్ద నెట్‌వర్క్‌ ఉందని గుర్తించింది. ఐదు దేశాలను ఉపయోగించుకొని ఈ కార్లను తరలించినట్లు తేల్చింది. 

ఖండాలను దాటి..

కిమ్‌కు చేరాల్సిన రెండు మెర్సిడెస్‌ కార్లను 2018 జూన్‌ 14వ తేదీన రెండు కంటైనర్లలో లోడ్‌చేసి వాటికి సీల్‌ వేసి  ట్రక్కుల్లో నెదర్లాండ్స్‌లోని రోటర్‌డామ్‌ ఓడరేవుకు చేర్చారు. వీటి విలువ 5లక్షల డాలర్లు ఉంటుంది. ఈ కార్లు చైనాకు చెందిన ఓ షిప్పింగ్‌ కార్పొరేషన్‌ కస్టడీలో ఉన్నాయి. తొలుత ఈ కార్లను ఎవరి పేరుతో కొన్నారో తెలియలేదు. రోటర్‌డామ్‌ నుంచి బయల్దేరిన ఆ కార్గో షిప్‌ 41రోజుల తర్వాత జులై 31న చైనాలోని దలియన్‌ ఓడరేవుకు చేరింది. అక్కడ ఆ కంటైనర్లను దించేశారు. అవి ఆగస్టు 26వరకు ఆ పోర్టులోనే ఉండిపోయాయి. జపాన్‌లోని ఒసాక వెళ్లే ఒక షిప్‌లో వాటిని లోడ్‌ చేశారు. సెప్టెంబర్‌ 18 నాటికి ఒసాక చేరిన ఈ కంటైనర్లను బుసాన్‌ వెళ్లే మరో ఓడలో ఎక్కించారు. సెప్టెంబర్‌ 30న ఇవి దక్షిణకొరియాలోని బుసాన్‌ ఓడరేవును చేరాయి.  

అసలు దొంగ ఓడ ఇదే..

ఉత్తర ఆఫ్రికా దేశమైన టోగో పతాకంతో ఉన్న డీఎన్‌5505 ఓడ బుసాన్‌లో ఈ కంటైనర్లను ఎక్కించుకొని రష్యాలోని వ్లాదివాస్తోక్‌ వద్ద నఖోద్క ఓడరేవు దిశగా బయల్దేరింది. ఉత్తరకొరియాకు వెళ్లే స్మగ్లింగ్‌ వస్తువులకు ఈ ప్రాంతం గడప వంటింది. అక్టోబర్‌ 1వ తేదీన ఈ షిప్‌ ఆటోమేటిక్‌ ఐడెంటిఫికేషన్‌ వ్యవస్థను నిలిపివేశారు. ఆంక్షలను ఉల్లంఘించడానికి నౌకలు సాధారణంగా ఇదే పనిచేస్తాయి. 18 రోజుల తర్వాత దక్షిణ కొరియా సముద్ర జల్లాల్లో ఈ ఓడ సిగ్నల్స్‌ మళ్లీ అందుబాటులోకి వచ్చాయి.  ఆ సమయంలో దానిలో 2,588 మెట్రిక్‌ టన్నుల బొగ్గు ఉంది. దీనిని దక్షిణ కొరియాలోని ఫాంగ్‌ నౌకాశ్రయంలో అన్‌లోడ్‌ చేసింది. రష్యా నుంచి ఈ బొగ్గును తెచ్చినట్లు చూపించారు. 

ఉ.కొరియా నుంచి మూడు విమానాలు..

అక్టోబర్‌ 7వ తేదీన ఉత్తరకొరియాకు చెందిన మూడు కార్గో విమానాలు  రష్యాలోని వ్లాదివాస్తోక్‌కు చేరుకొన్నాయి. ఇది చాలా అరుదైన ఘటన. ఇవే విమానాలు కిమ్‌ విదేశీ పర్యటనలకు కార్లను తరలిస్తాయి. 
అదే రోజున అమెరికా విదేశాంగశాఖ కార్యదర్శి మైక్‌ పాంపియోతో భేటీ అయ్యేందుకు కిమ్‌ ఒక రోల్స్‌రాయిస్‌ను బయటకు తీయడం విశేషం. వ్లాదివాస్తోక్‌ చేరుకొన్న ఉత్తరకొరియా విమానాలు బెంజ్‌ లిమోసిన్‌లను లోడ్‌ చేసుకొని ప్యాంగ్‌యాంగ్‌ దిశగా రివ్వున ఎగిరిపోయాయి.  జనవరి 31న ఆ బెంజి కార్లలో కిమ్‌ ఠీవీగా ప్యాంగ్‌యాంగ్‌ వీధుల మీదుగా తన ప్రధాన కార్యాలయానికి వెళ్లారు.  

అనుమానాస్పద ఓడ..

ఈ ఓడ మార్షల్‌ ఐలాండ్‌కు చెందిన డూ యంగ్‌ షిప్పింగ్‌ కంపెనీ పేరుతో రిజిస్టరై ఉంది. రష్యాకు చెందిన డేనియల్‌ కజచుక్‌  ఈ కంపెనీ యజమానిగా భావిస్తున్నారు. ఇదే కంపెనీకి కత్రిన్‌ అనే ఓ ట్యాంకర్‌ నౌక కూడా ఉంది. కిమ్‌ కార్లను రవాణ చేసిన ఓడను గతంలో హంగ్‌కాంగ్‌లోని ఒక కంపెనీ వాడింది. అప్పట్లో దానిపేరు జింగ్‌ జిన్‌.. తర్వాత డీఎన్‌5505గా మార్చారు. కార్లు చైనాలోని ఓడరేవుకు చేరడానికి కొన్ని రోజుల ముందే పేరు మార్చారు. దీనిపై ఆ షిప్పింగ్‌ సంస్థ యజమాని కజచుక్‌ మాట్లాడుతూ ‘‘ ఇది మా కంపెనీ వ్యాపార రహస్యం. ఈ కార్లను ఎక్కడ కొన్నాను.. ఎవరికి అమ్మానో చెప్పాల్సిన అవసరం ఏముంది..?’ అని ప్రశ్నించారు. ఆ తర్వాత డూయంగ్‌కు చెందిన నౌకలను దక్షిణ కొరియా అదుపులోకి తీసుకొంది. 

అమెరికా మిత్ర దేశాల నుంచి కూడా..

ఉత్తరకొరియాకు కార్లను రవాణ చేయడంలో జపాన్‌, దక్షిణ కొరియా, నెదర్లాండ్స్‌ వంటి అమెరికా మిత్రదేశాల భూభాగాన్ని కూడా వాడుకోవడం విశేషం. 2015-17 మధ్యలో కిమ్‌ బృందం 90 దేశాల నుంచి విలాసవంతమైన వస్తువులను దిగుమతి చేసుకొన్నట్లు అంచనా. ఇలాంటి మార్గాల్లోనే ఉ.కొరియా అణు టెక్నాలజీ, ఇంధనాలను తెప్పిస్తున్నట్లు అమెరికా విశ్వసిస్తోంది. ఉ.కొరియా పర్యటనకు వచ్చిన చైనా అధ్యక్షుడు షీ జిన్‌పింగ్‌, దక్షిణ కొరియా అధినేత మూన్‌జే ఇన్‌ కూడా ఈ అక్రమ కార్లలోనే కిక్కురుమనకుండా విహరించారు..!

-ఇంటర్నెట్‌ డెస్క్‌


Tags :

బిజినెస్‌

రాజకీయం

జనరల్‌

సినిమా

క్రైమ్

స్పోర్ట్స్

జాతీయ-అంతర్జాతీయ

జిల్లా వార్తలు

దేవతార్చన

+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.