తల్లి మృతి.. నలుగురు చిన్నారుల పరిస్థితి విషమం

డోన్: కుటుంబకలహాల కారణంగా ఓ తల్లి తన నలుగురు పిల్లలకు విషమిచ్చి తానూ తాగి ఆత్మహత్యాయత్నానికి పాల్పడిన ఘటన కర్నూలు పట్టణంలోని తారకరామ నగర్‌లో సోమవారం చోటు చేసుకుంది. స్థానికులు, పోలీసులు తెలిపిన వివరాల ప్రకారం..గ్రామానికి చెందిన వడ్డె వరలక్ష్మి(36) అనే మహిళ సోమవారం ఉదయం భర్తతో గొడవపడింది. క్షణికావేశంలో నలుగురు చిన్నారులైన ఇందు(12), ఉమాదేవి(9), ఉదయ్‌కుమార్‌(5), ఐశ్వర్య(1)చేత విషం తాగించింది. అనంతరం తానూ తాగి ఆపస్మారక స్థితికి వెళ్లిపోయింది. గమనించిన స్థానికులు హుటాహుటిన డోన్‌ ప్రభుత్వాసుపత్రికి తరలించారు. అక్కడినుంచి మెరుగైన చికిత్స కోసం కర్నూలు ప్రభుత్వాసుపత్రికి తరలించారు. అక్కడ చికిత్స పొందుతూ తల్లి మృతిచెందింది. నలుగురు చిన్నారుల పరిస్థితి విషమంగా ఉన్నట్లు వైద్యులు తెలిపారు. జరిగిన ఘటనపై కేసు నమోదు చేసి దర్యాప్తు చేస్తున్నట్లు పట్టణ సీఐ కంబగిరి రాముడు తెలిపారు.