ప్రస్తుతం అంకుర సంస్థల హవా నడుస్తోంది. వీటిని మొదలుపెడుతున్నవారిలో అమ్మాయిలూ తక్కువేం కాదు. వాటిల్లో నిలదొక్కుకుని లాభాల బాట పట్టాలంటే కొన్ని జాగ్రత్తలు తీసుకోవాలి.

* వ్యాపారం ప్రారంభిస్తున్నప్పుడు సవాళ్లే ఎక్కువగా ఉంటాయి వాటిని వీలైనంతవరకూ సానుకూలంగా తీసుకుని, పరిష్కరించుకునేలా చూసుకోవాలి. అప్పుడే అనుకున్న లక్ష్యాన్ని చేరుకోగలుగుతారు.
* ఉద్యోగం చేయడంతో పోలిస్తే... సొంతంగా వ్యాపారం చేస్తున్నప్పుడు ఒత్తిడి సహజంగానే ఎదురవుతుంది. దాన్నుంచి బయటపడాలంటే... ఎంత సమయం లేకపోయినా మీకంటూ ఓ అరగంట పెట్టుకోండి. ఆ సమయంలో నడక, ధ్యానం వంటివి ఎంచుకోండి.
* ఒకేసారి చాలా పనులు చేయాలని అసలు అనుకోకూడదు. ఒకపని తరువాతే మరొకటి అనే నియమం పెట్టుకోవాలి. ప్రతిదానికి ఓ ప్రణాళిక రూపొందించుకోవాలి. అన్ని పనులు మీరే చేయాలని చూడకుండా మీ ప్రమేయం లేనివాటిని ఇతరులకు అప్పగించండి. పనిభారం తగ్గుతుంది.
* మీరెంచుకున్న రంగంలో రాణించాలంటే కుటుంబసభ్యుల సహకారం చాలా అవసరం. వాళ్లతో మీ ఆలోచనల్ని వివరించి, సాయం అడగండి. తప్పకుండా అర్థంచేసుకుంటారు.
* మీకంటూ ఓ మెంటార్‌ని పెట్టుకోండి. ఆ సలహాలు, అనుభవాలు మీకెంతో ఉపయోగపడతాయి. మీ నెట్‌వర్క్‌ పరిధినీ విస్తరించుకుంటే.. మీ రంగంలో వస్తోన్న మార్పులు, కొత్త విషయాలు తెలుసుకోగలుగుతారు.
* చదువు పూర్తయినా నిత్య విద్యార్థిలా  ఉండాలి. తెలియని విషయాలు నేర్చుకోవడం, అవసరమైన మెలకువలు, నైపుణ్యాలు పెంచుకోవడం చాలా అవసరం. అది మీకు ఎంతో ఉపయోగపడుతుంది.
* వ్యాపారం చేస్తున్నప్పుడు కేవలం పర్యవేక్షణ మాత్రమే కాకుండా... అన్ని పనులు తెలిసుండాలి. ఇది మీకు ఎప్పుడో ఒకప్పుడు ఉపయోగపడుతుంది.