దిల్లీ: పండగలు, పెళ్లిళ్ల సీజన్‌తో ఇటీవల దూసుకెళ్లిన పసిడి ధర మంగళవారం కాస్త దిగొచ్చింది. ఇవాళ ఒక్కరోజే రూ. 548 తగ్గడంతో 10 గ్రాముల బంగారం ధర రూ. 38,857కు పడిపోయింది. గతవారం బులియన్‌ మార్కెట్లో పుత్తడి రూ. 39వేల పైనే పలికిన విషయం తెలిసింది. అటు వెండి ధర కూడా నేడు భారీగా పడిపోయింది. రూ. 1,190 తగ్గడంతో దేశ రాజధానిలో కేజీ వెండి ధర రూ. 47,090గా ఉంది. 

పండగ సీజన్‌ పూర్తవడంతో కొనుగోళ్లు తగ్గాయి. దీనికి తోడు అమెరికా-చైనా మధ్య త్వరలో వాణిజ్య చర్చలు జరగనున్నట్లు వస్తున్న వార్తలతో అంతర్జాతీయంగా బంగారం ధరలు ఒత్తిడికి గురయ్యాయి. ఫలితంగా దేశీయ మార్కెట్లో ఈ లోహాల ధరలు తగ్గినట్లు బులియన్‌ వర్గాలు చెబుతున్నాయి.